1 Ma sa oo ina faapea ona mavae atu foi o le tausaga e ivasefulu ma le lima, ma sa amata ona galo i tagata ia faailoga ma mea ofoofogia ia sa latou faalogo i ai, ma amata ona faaitiitia ifo lava lo latou ofo i se faailoga po o se mea ofoofogia mai le lagi, sa oo ai ina amata ona latou maaa i o latou loto, ma tauaso i o latou mafaufau, ma amata ona le talitonu i mea uma sa latou faalogo ma vaai i ai—

2 Ua mafaufau ae ni mea lē aoga i o latou loto, e faapea o se mea na faia e tagata ma le mana o le tiapolo, e taitai ese ma faasese ai loto o tagata; ma sa faapea ona toe maua ai e Satani loto o tagata, sa oo ina ia faatauasoina o latou mata ma taitai ese i latou ia talitonu o le mataupu faavae a Keriso o se mea valea ma se mea ua lē aoga.

3 Ma sa oo ina amata ona faasolo malolosi tagata i le amioleaga ma mea inosia; ma sa latou le talitonu o le a i ai ni isi faailoga po o mea ofoofogia e tuuina mai; ma sa fealua’i solo Satani e taitai ese loto o tagata, ma faaosooso i latou ma uunai i latou ia latou faia le amioleaga tele i le laueleele.

4 Ma sa faapea ona mavae atu o le tausaga e ivasefulu ma le ono; ma le tausaga foi e ivasefulu ma le fitu; ma le tausaga foi e ivasefulu ma le valu; ma le tausaga foi e ivasefulu ma le iva;

5 Ma ua mavae atu foi le selau o tausaga talu aso o Mosaea, o le sa avea ma tupu i le nuu o sa Nifaē.

6 Ma ua mavae atu le ono selau ma le iva o tausaga talu ona tuua e Liae Ierusalema.

7 Ma ua mavae atu tausaga e iva o tausaga mai le taimi na tuuina mai ai le faailoga, lea sa fetalai i ai perofeta, o le a afio mai ai Keriso i le lalolagi.

8 O lenei sa amata e sa Nifaē ona faitau la latou taimi mai le taimi lea na tuu mai ai le faailoga, pe mai i le afio mai o Keriso; o lea, ua iva tausaga ua mavae atu.

9 Ma o Nifae, o le o le tamā o Nifae, o le sa i ai le matafaioi mo talafaamaumau, sa le toe foi mai i le laueleele o Sara’emila, ma sa leai se mea sa mafai ona maua i ai o ia i le laueleele atoa.

10 Ma sa oo ina sa tumau pea tagata i le amioleaga, e ui i le tele o talaiga ma valoaga ia sa auina atu i totonu ia te i latou; ma sa faapea ona mavae atu foi o le tausaga e sefulu; ma sa mavae atu foi le tausaga e sefulutasi i le amioletonu.

11 Ma sa oo i le tausaga e sefulu ma le tolu, sa amata ona i ai o taua ma finauga i le laueleele atoa; ona sa matuā faatoateleina lava faomea a Katianetona, ma sa latou fasiotia tagata e toatele, ma faatautala le tele o aai, ma latou faasalalau le oti ma le faamasaatoto tele i le laueleele atoa, sa tatau ai i tagata uma, o sa Nifaē ma sa Lamanā, ona latou ave a’e a latou auupega e tetee atu ia te i latou.

12 O lea, o sa Lamanā uma o e sa faaliliuina i le Alii, sa latou aufaatasi atu ma o latou uso, o sa Nifaē, ma sa faamalosia i latou, mo le saogalemu o o latou ola ma o latou fafine ma a latou fanau, e ave a’e auupega o taua, e tetee atu i faomea a Katianetona, ioe, ma ia tumau ai pea foi a latou aia, ma avanoa o la latou ekalesia ma la latou tapuaiga, ma lo latou saolotoga ma la latou tuufaitalia.

13 Ma sa oo ina ae lei mavae atu le tausaga lenei e sefulu ma le tolu, sa faamata’uina sa Nifaē i le faaumatiaina atoa ona o lenei taua, lea sa avea ma faanoanoaga sili.

14 Ma sa oo ina sa faitauina sa Lamanā o e na aufaatasi ma sa Nifaē i totonu o sa Nifaē;

15 Ma sa aveesea lo latou fetuu mai ia te i latou, ma sa liu papa’e o latou pa’u e pei o sa Nifaē;

16 Ma sa oo ina matuā pa’emā o latou tama talavou ma o latou afafine, ma sa faitauina i latou i totonu o sa Nifaē, ma sa ta’ua o sa Nifaē. Ma sa faapea ona iu o le tausaga e sefulu ma le tolu.

17 Ma sa oo i le amataga o le tausaga e sefulu ma le fa, sa faaauau pea le taua i le va o au faomea ma le nuu o Nifae ma sa oo ina avea ma faanoanoaga sili; ae ui i lea, sa maua e le nuu o Nifae ni aafiaga sili atu i le au faomea, sa oo ina latou tutuli ese i latou i tua mai o latou laueleele, e agai atu i mauga ma o latou nofoaga lilo.

18 Ma sa faapea ona iu o le tausaga e sefulu ma le fa. Ma i le tausaga e sefulu ma le lima, sa latou o mai e faasaga i le nuu o Nifae; ma ona o le amioleaga o tagata o Nifae, ma a latou finauga ma fouvalega e tele, o lea na maua ai e faomea a Katianetona le tele o avanoa i luga o i latou.

19 Ma sa faapea ona iu o le tausaga e sefulu ma le lima, ma sa faapea ona i ai o tagata i se tulaga o puapuaga e tele; ma sa tautau ifo le pelu o le faafanoga i luga o i latou, sa oo ina tauau ina faaumatia ai i latou, ma o le pogai ona o lo latou amioletonu.