1 ’E i teienei, i muri a’era, mai te au i tā mātou pāpa’a parau, ’ua ’ite mātou ē, e parau mau tā mātou pāpa’a parau, inaha ho’i, nā te hō’ē ta’ata parauti’a i pāpa’i i te reira pāpa’a parau—’ua rave ho’i ’oia i te mau semeio e rave rahi nā roto i te i’oa o Iesu ; ’e ’aita roa atu ho’i e ta’ata ’o tē ti’a ’ia rave i te semeio nā roto i te i’oa o Iesu, maori rā ’ua tāmā-roa-hia ’oia i tāna ra mau ’ohipa ’ī’ino—

2 ’E i teienei, i muri a’era, mai te mea ē ’aita e hape i ravehia e teie nei ta’ata nō te tai’ora’a i tō mātou nei taime, ’ua hope ïa te toru ’ahuru ’e ma toru o te matahiti.

3 ’E ’ua ha’amata te mau ta’ata i te hi’o māite atu ma te ’ana’anatae rahi i te tāpa’o i hōro’ahia mai e te peropheta ra ’o Samuela, te ’āti Lamana, ’oia ïa, i te taime e tupu ai te pōiri nō te ārea e toru mahana te maoro i ni’a i te fenua tā’āto’a nei.

4 ’E ’ua tupu te fē’a’a rahi ’e te mau mārōra’a rahi i rotopū i te mau ta’ata, noa atu ā te mau tāpa’o e rave rahi i hōro’ahia mai na.

5 ’E i muri a’era, i te toru ’ahuru ’e ma maha o te matahiti, i te ’āva’e mātāmua, nō te maha o te mahana o te ’āva’e, ’ua tupu te hō’ē vero rahi roa, mai tei ’ore i ’itea i ni’a i te fenua mai te mātāmua mai ā.

6 ’E ’ua tupu ato’a te hō’ē vero rahi ’e te ri’ari’a ; ’e ’ua tupu te hō’ē pātiri ri’ari’a, ’e nō reira ho’i ’ua fa’a’āueue te reira i te fenua tā’āto’a, mai te mea ra ē, ’ua fātata te reira i te ’āfāfā.

7 ’E ’ua ’anapa mai te mau uira ’ana’ana, ’o tei ’ore ā i ’itea na i ni’a i te fenua tā’āto’a.

8 ’E ’ua pa’apa’a ihora te ’oire ra nō Zarahemela i te auahi.

9 ’E ’ua tomo roa ihora te ’oire ra nō Moroni i raro roa i te miti, ’e ’ua paremo ihora te mau ta’ata nō taua ’oire ra.

10 ’E ’ua tāpo’ihia ihora te ’oire ra nō Moroniha i te repo fenua, ’e ’ua riro ihora te vāhi nō te ’oire ’ei mou’a rahi roa.

11 ’E ’ua tupu te pau rahi ’e te ri’ari’a i ni’a i te fenua i te pae apato’a.

12 Inaha rā, ’ua rahi roa atu te pau ’e te ri’ari’a i ni’a i te fenua i te pae apato’erau, inaha ho’i, ’ua fa’ahuru-’ē-roa-hia te fenua tā’āto’a nō te vero ’e te mau pūāhiohio, ’e te mau pātiri ’e te mau uira, ’e te ’āueuera’a rahi o te fenua tā’āto’a.

13 ’E ’ua pararī haere te mau purūmu rahi, ’e ’ua ’ino te mau purūmu pāpū, ’e ’ua pu’upu’u haere te mau vāhi pāpū.

14 ’E ’ua tomo roa ihora te mau ’oire rahi ’e te tu’iro’o e rave rahi, ’e ’ua pa’apa’a te tahi pae i te auahi, ’e e rave rahi tei fa’a’āueuehia ē tae roa atu ’ua ma’iri te mau fare i raro i te repo, ’e ’ua taparahihia te mau ta’ata, ’e ’ua vaiiho-ano-noa-hia te mau vāhi i ti’ahia e rātou ra.

15 ’E tē vai ra te tahi mau ’oire i toe noa mai ; ’āre’a rā ’ua rahi roa te mau vāhi ’ino nō te reira, ’e tē vai ra ho’i e rave rahi ta’ata tei pohe i roto.

16 ’E tē vai ra te tahi pae ’o tei ’āfa’i-’ē-hia atu nā roto i te pūāhiohio ; ’e te vāhi i ’āfa’ihia atu rātou ra, ’aita roa te hō’ē ta’ata i ’ite i te reira, maori rā ’ua ’ite rātou ’e ’ua ’āfa’i-’ē-hia atu rātou.

17 ’E ’ua nā reira te fenua tā’āto’a i te fa’ahuru-’ē-hia nā roto i te mau vero, ’e te mau pātiri, ’e te mau uira, ’e te ’āueuera’a fenua.

18 ’E inaha, ’ua pararī te mau mato nā te ’āfara’a ; ’e ’ua pararī te reira i ni’a i te fenua tā’āto’a, ’e nō reira ho’i ’ua ’itehia te reira i roto i te mau hu’ahu’a i pararī, i roto i te mau vāhi ’afā ’e i roto i te mau ārea, i ni’a i te fenua tā’āto’a.

19 ’E i muri a’era, ’ia fa’aea te mau pātiri, ’e te mau uira, ’e te vero, ’e te mata’i rahi, ’e te mau ’āueuera’a fenua—inaha ho’i, ’ua tupu te reira e toru hora i te maoro ; ’e ’ua parau ho’i te tahi pae ē, ’ua roa atu ā te taime i te reira ; ’āre’a rā ’ua hope teie mau mea rahi ’e te ri’ari’a i te tupu i roto paha i te ārea e toru hora—’e inaha, ’ua vai mai te pōiri i ni’a i te fenua tā’āto’a.

20 ’E i muri a’era, ’ua tae mai te pōiri ta’ota’o rahi roa i ni’a i te fenua tā’āto’a, ’e nō reira ho’i ’ua ’ite te mau ta’ata ’o tei ’ore i pohe i te māhu pōiri.

21 ’E nō te pōiri, ’aita atu ra e ti’a ’ia tūtu’i i te hō’ē auahi, ’e ’aita ato’a te mōrī hinu, ’e ’aita ato’a te rama ; ’e ’aita ato’a e ti’a ’ia tahu i te auahi i te vahie maita’i ’e te marō, ’e nō reira ’aita roa atu ra e ti’a ’ia vai te hō’ē noa atu huru māramarama.

22 ’E ’aita roa te hō’ē māramarama i ’itehia, ’aita te auahi, ’aita te hō’ē ’ana’ana, ’aita te mahana, ’aita te marama, ’aita te mau feti’a, ’e ’ua rahi roa te māhu pōiri i ni’a i te fenua tā’āto’a.

23 ’E i muri a’era, ’ua vai noa te reira nō te ārea e toru mahana te maoro ’e ’aita e māramarama i ’itehia ; ’e tē vai noa ra te ’oto rahi, ’e te ’auē, ’e te ta’i i rotopū i te mau ta’ata ’aore e fa’aea ; ’oia ïa, ’ua rahi roa te autā o te mau ta’ata nō te pōiri ’e te pau rahi i tae mai i ni’a ia rātou.

24 ’E i te hō’ē vāhi ’ua fa’aro’ohia tō rātou ’otora’a, i te nā-’ō-ra’a ē : ’Āhiri tātou i tātarahapa hou teie mahana ’ino ’e te ri’ari’a rahi i tae mai ai, i reira ’ua fa’ahereherehia ïa tō tātou mau taea’e, ’e ’aita ïa rātou e pa’apa’a i roto i te ’oire rahi o Zarahemela.

25 ’E i te tahi atu vāhi, ’ua fa’aro’ohia rātou i te ta’ira’a ’e te ’otora’a, i te nā-’ō-ra’a ē : ’Āhiri tātou i tātarahapa hou teie mahana ’ino ’e te ri’ari’a i tae mai ai, ’e ’āhiri ’aita tātou i taparahi ’e i pēhi i te mau peropheta i te ’ōfa’i, ’e i tīahi atu ia rātou i rāpae ; i reira ’ua fa’ahereherehia ïa tō tātou mau metua vahine, ’e tā tātou mau tamāhine nehenehe, ’e tā tātou mau tamari’i, ’e ’aita ïa rātou i tāpo’ihia i roto i taua ’oire rahi ra o Moroniha. ’E ’ua nā reira te mau ta’ata i te autā rahi ma te ri’ari’a.