1 Iwe iei non ewe fansoun pwe anongonong won am we uruo, me am mi sinei pwe am we uruo mi ennet, pun nengeni, emon mwan mi pung ewe a sopweno ne makkei ewe uruo—pun a ennetin fori chommong manaman non iten Jises; iwe ese wor emon a tongeni fori ew manaman non iten Jises tiwenon chok ika i mi unusen nimenimoch seni an angangangaw—

2 Iwe iei non ewe fansoun, ika pwe ese wor mettoch mi muan a fis me ren ei mwan non kaukun ar fansoun, ewe inik me unungat ier a wesino;

3 Iwe ekkewe aramas ra poputa ne ewitiwit fiti ennetin netip ren ewe esisin minne a fen kawor me ren ewe soufos Samuel, ewe chon Leiman, ewer, ren ewe fansoun ita epwe wor rochopwak ren ukukun unungat ran won unungen ewe fonu.

4 Iwe a poputa ne wor ennetin tipemwaramwar me anini fengen me nein ekkewe aramas, ina mwo ekkewe fokkun chommong esisin a fen kawor.

5 Iwe non ewe fansoun non ewe inik me ruanu ier, non ewe ewin maram, won ewe eruanun ranin ewe maram, a poputa ew anuokusun monumon, sokkun ew ese mwo fen pin fis akkom me non unusen ewe fonu.

6 Me a pwan fis ew watten me anuokusun monumon; me mi wor anuokusun chopunap, ina popun pwe a achechechi unusen fonufan usun ita epwene keimufesen non ruepek.

7 Me a fis fokkun fatafatochun inefi, sokkun ese mwo fen pin fis akkom me non unusen ewe fonu.

8 Iwe ewe teninimwen Saraemla a poputa ne kareno.

9 Iwe ewe teninimwen Moronai a kokotiw non anonnonun ewe sat, me aramasan non ra monum.

10 Iwe ewe puun a sikkita won ewe teninimwen Moronaia, ina minne non nenien ewe teninimw we a winiti ew watten chuk.

11 Iwe a fis ew ennetin me anoninenin kiteter me non ewe fonu eor.

12 Nge nengeni, a wor ew unusen watten me anoninenin kiteter me non ewe fonu ennefen; pun nengeni, unusen unungen ewe fonu a siwin, pokiten ewe monumon me ekkewe ewuniar, me ekkewe chopunap me ekkewe inefi, me ewe fokkun pochokunen chechechin unusen kinikinin ewe puun;

13 Iwe ekkewe aanenap ra tatakis, me ekkewe aan mi sonoch ra ngaweno, me chommong neni mi sosonoch ra sonongaw.

14 Iwe chommong teninimw mi napanap me auchea ra kokotiw, me chommong ra kareno, me chommong ra chunguchung tori imwer kewe ra turutiw ngeni ewe puun, iwe ekkewe aramas non ra ninnino, iwe ekkewe neni ra ponnuno.

15 Iwe mi wor ekkoch teninimw minne ra nomwetiw; nge tatakisir kewe ra fokkun watte, iwe mi wor chommong non ir ra ninnino.

16 Iwe mi wor ekkoch ekkewe ra assuno me non ekkewe ewuniar; iwe ian ra no ia ese wor emon a sinei, tiwenon chok ra sinei pwe ra assuno.

17 Iwe iei unungen unusen kinikinin ewe puun a siwin, pokiten ekkewe monumon, me ekkewe chopunap, me ekkewe inefi, me chechechin ewe puun.

18 Iwe nengeni, ekkewe fau ra mokfesen non ru; ra tatakisitiw me won unungen unusen kinikinin ewe puun, ina popun pwe ra pwá non tatakisin kinikin, me non mokufesen me nangefesen, won unusen unungen ewe fonu.

19 Iwe non ewe fansoun pwe nupwen ekkewe chopunap, me ekkewe inefi, me ewe asepwan, me ewe monumon, me ewe chechechin ewe puun a kouno—pun nengeni, a soposopono ren ukukun unungat awa; iwe ekkoch ra fen apasa pwe ewe fansoun a nangatam seni ena; nge inamo, ekkei auchean me anoninenin mettoch meinisin ra fis non ukukun unungat awa—iwe ina nengeni, a wor rochopwak won unungen ewe fonu.

20 Iwe non ewe fansoun pwe a fis chouchoun rochopwak won unusen unungen ewe fonu, ina popun pwe aramasan kewe rese mano ra tongeni mefi ewe otuotun rochopwak;

21 Iwe ese tongeni wor saram, pokiten ewe rochopwak, ese pwan tongeni wor kanten, are pwan tön; ese pwan tongeni wor ekkei epwe kek ren ar kewe ira mi echipwer me fokkun pwas, iwe pwe ese tongeni wor och saram;

22 Iwe ese wor och saram a pwá, are pwan ekkei, are kukkunun saram, are ewe akkar, are ewe maram, are ekkewe fu, pun a fokkun chouchou ekkewe toputopun rochopwak minne ra nom won unungen ewe fonu.

23 Iwe non ewe fansoun pwe a soposopono ren ukukun unungat ran ina popun ese wor saram a pwá; iwe a wor ennetin soposoponon netipeta me ngungures me kechiw me nein ekkewe aramas meinisin; ewer, a ennet ewe kechiwen noninen an ekkewe aramas, pokiten ewe rochopwak me ewe weiresin kiteter minne a fen fis wor.

24 Iwe non ew neni ra rong pwe ra pupuchor, ra apasa: O amwo kich mi fen aier me mwen ei auchean me anoninenin ran, iwe ika epwe ina pwich kewe repwe fen manau, iwe ita resap fen kareno me non ewe teninimwen Saraemla mi napanap.

25 Iwe non pwan ew neni ra rong pwe ra pupuchor me netipeta, ra apasa: O amwo kich mi fen aier me mwen ei auchean me anoninenin ran, me ika sise nieno me monei ngeni fau ekkewe soufos, me aturareu; iwe inach kewe me nouch kewe fopun mi nioch, me nouch kewe semirit repwe fen manau, me resap fen ireno non ewe auchean teninimwen Moronaia. Iwe iei ekkewe ngungures an ekkewe aramas ra amwarar me anoninen.