1 Áádóó tádiin dóó baʼaan dį́į́ʼ éí ałtso nááhai; dóó tádiin dóó baʼaan ashdlaʼ ałdóʼ ałtso nááhai; jó áádóó tʼáá ałtso kéyahgóó éí naakitsʼáadahii Jesus yikééʼ naazínígíí, Christ bisodizin bá hooghan bee dah daʼíldéehgo ádayiilaa. Dóó diné éí tʼááałtso yaa yíkaigo, dóó beʼiinaʼ łahgo áńdayiidlaa éí, Jesus bízhiʼ binahjįʼ tó bee dabiʼdoolzį́į́ʼ; dóó éí éiyá ałdóʼ Iiʼsizį́ Diyinii baa dahaasyá.

2 Áádóó tádiin dóó baʼaan hastą́ą́ góneʼ yihahgo, kéyah bikááʼgóó tʼáá ałtso Nephi bidineʼé dóó Laman bidineʼé, Bóhólníihii deiyoosdląąd; dóó doo éí tsʼídá haitʼáo ałchʼįʼ bá dahachįʼ da dóó doo ałkʼijįʼ danilį́į da, áko tʼáá ałtsogo ahaa dajoobaʼgo hahoolzhiizh.

3 Dóó tʼáá ałtsoní éí yee ahaa dajoobaʼ ńtʼę́ę́ʼ; éí bąą doo éí łaʼ diné baa hojoobáʼí da, dóó doo éí łaʼ ayóó atʼį́į da ńtʼę́ę́ʼ, índa naałteʼé dóó tʼáadoo naʼniłtłʼahgóó naʼadáhígíí ałdóʼ ádin, ndi tʼáá ájíłtso tʼáadoo nahodiniłtłʼahgóó, dóó yáʼąąshdę́ę́ʼ bikʼidahojídlíigo ályaa.

4 Áádóó tádiin dóó baʼaan tsostsʼid éí ałdóʼ ałtso nááhai; dóó tʼahdii kéyah bikááʼgóó kʼé náás hoolzhish ńtʼę́ę́ʼ.

5 Dóó naakitsʼáadah Jesus yikééʼ naazínígíí éí ląʼída naanish ayóó átʼéii ádayiilaa; áko índa bitah dahoneezgaiígíí bitah yáʼádahootʼéehgo áńdayiidlaa dóó daneeznánę́ędóʼ dahináago áńdayiidlaa, dóó doo ndaakai yę́ę éí ndaakaigo áńdayiidlaa índa doo daʼooʼínę́ę, daʼooʼį́įgo áńdayiidlaa, dóó bijééhdaakałę́ę éí daʼdiitsʼaʼgo áńdayiidlaa; dóó álílee tsʼídá tʼáá ałtso ałʼąą ádaatʼéego éí bílaʼashdlaʼii baʼáłchíní bitahgóó yee ndaalnish ńtʼę́ę́ʼ; dóó Jesus bízhiʼ binahjįʼ tʼéiyá díí álílee yee ndaalnish ńtʼę́ę́ʼ.

6 Dóó kótʼáo tádiin dóó baʼaan tseebíí ałtso nááhai, dóó tádiin dóó baʼaan náhástʼéí ałdóʼ ałtso nááhai; dóó dízdiin dóó baʼaan tʼááłáʼí, dóó dízdiin dóó baʼaan naaki ałtso nááhai; aooʼ, ńléí dízdiin dóó baʼaan náhástʼéijįʼ ałtso nááhai ndi, dóó ałdóʼ ashdladiin dóó baʼaan tʼááłáʼí éí ałtso nááhai, dóó ashdladiin dóó baʼaan naaki ałtso nááhai; aooʼ, ńléí ashdladiin dóó baʼaan náhástʼéijįʼ ałtso nááhai ndi.

7 Dóó Diyin God éí kéyah bikááʼgóó diné tsʼídá tʼáá íiyisíí yikʼihojídlíigo ałʼąą náádíneestʼą́; áko índa kintah adahideezkʼą́ʼą́ągóó, ląʼída kin hadaasʼá ánáádayiidlaa.

8 Aooʼ, Zarahemla tsʼídá nitsaago kin haalʼáhą́ą ndi áńdayiidlaa.

9 Ndi ląʼída éí kin hadaasʼáhą́ą adah haazdááz, dóó tó bił deiyeʼ; áko díí áńdadoolnííł, éí doo bihónéedzą́ą da.

10 Jó, dóó kʼad, áádóó Nephi bidineʼé tsʼídá tʼáadoo hodíinaʼí ałʼąą daneestʼą́; dóó diné tsʼídá yáʼátʼéehii danilį́įgo dah yikah silį́į́ʼ.

11 Dóó daʼahisgeh, dóó baʼáłchíní ahaa dayiznil, dóó Bóhólníihii ląʼígo yee yił ałhadaʼdeestʼánígíí bikʼehgo bikʼidahojídlíí ńtʼę́ę́ʼ.

12 Dóó Moses bibeehazʼáanii bikʼehgo oʼoolʼįįłę́ę éí doo bikʼehgo ooldah da silį́į́ʼ, ndi biBóhólníihii dóó biDiyin God beehazʼáanii baa yiizláhą́ą éí yikʼehgo deíkááh ńtʼę́ę́ʼ; dóó tʼáá áłahjįʼ diyinkʼehgo chʼiyáán ádąąh deitʼį́įgo sodadilzin, dóó tʼáá áłahjįʼ éí ahéédiikahgo sodadilzin dóó Bóhólníihii bizaad deididootsʼį́į́ł biniiyé.

13 Áádóó tʼáá ałtso kéyah bikááʼgóó, diné bitahgóó, doo saad ahídeetʼáah da; ndi ląʼída éí naakitsʼáadahí Jesus yikééʼ naazínígíí álílee diyin binaanish ádeiłʼį́į́ ńtʼę́ę́ʼ.

14 Áádóó tsostsʼidiin dóó baʼaan tʼááłáʼí éí ałtso nááhai, dóó tsostsʼidiin dóó baʼaan naaki ałdóʼ ałtso nááhai; aooʼ, dóó índa, ńléí tsostsʼidiin dóó baʼaan náhástʼéijįʼ ałtso nááhai; aooʼ, neeznádiin ałtso nááhai ndi, dóó Jesus naakitsʼáadahii náyiizláʼą́ą, éí ałtso Diyin God bił hazʼą́ą́góó ahaaskai, tʼáá hazhóʼó táltʼéego nahasdzáán tʼáá yikááʼ naakai dooleeł hodooʼniidę́ę tʼéiyá; dóó akééʼ naazíinii łaʼ nínááhaasdlááʼ dóó bitsáskʼehgi náádabiʼdiilzį́į́ʼ; dóó ląʼí diné yił ahąąh ndaakai yę́ę ałdóʼ náádabiʼdiilyá.

15 Áádóó kéyah bikááʼgóó doo saad ahídeetʼáah da, háálá Diyin God beʼayóó óʼóʼníinii diné bijéí biiʼ dahólǫ́ǫgo biniinaa.

16 Dóó doo éí oolchʼį́įd da, doodago doo ahiłkʼijįʼ ntsídaakees da, doodago doo saad ahídeetʼáah da, doodago ałjiłí, doodago yoochííd, doodago ndaʼałtseedii, doodago atseezį́ dóó naʼadloʼ diné dóó asdzání bee tsiʼnaʼadáh ádaatʼéii éí bitahgóó ádin ńtʼę́ę́ʼ; dóó tʼáá aaníí éí Diyin God tʼáá ałtso nihookááʼ dineʼé bílaʼ yee áyiilaaígíí éí tʼah doo kótʼáo bił dahózhǫ́ǫ da ńtʼę́ę́ʼ díí dineʼé íiyisíí bił dahózhónígi átʼáo.

17 Daʼniʼįįhii doodago ndaʼałtseedii doo Laman bidineʼé ndi, doodago ałʼąą átʼéego bee dahoʼdójíhígíí éí tsʼídá ádin ńtʼę́ę́ʼ; ndi tʼáá ałtso éí tʼááłáʼí, Christ baʼáłchíní danilį́į́ ńtʼę́ę́ʼ, dóó Diyin God bił hazʼánígíí dayoosbą́.

18 Dóó dooládóʼ éí diné bikʼidahojisdliʼ da! Háálá éí tʼáá ałtsoní ádeiléhígíí Bóhólníihii yee yikʼidahojídlíí ńtʼę́ę́ʼ; aooʼ, bikʼidahojídlíigo ndi dóó náásnootʼį́įłgo éí neeznádiin dóó baʼaan neeznáá nááhai; dóó Christ níyáhą́ądą́ą́ʼ ndahoʼdizhchínę́ę kojįʼ ałtso ájísdįįd, dóó tʼáá ałtso kéyah bikááʼgóó doo diné saad ahídeetʼáah da.

19 Áádóó Nephi, akéeʼdi béésh bikááʼ haneʼ áyiilaahą́ą, (díí haneʼ éí béésh tʼą́hí Nephi wolyéhę́ę bikáaʼgi haneʼ áyiilaa) éí náádiilyá; dóó éí biyeʼ, Amos éí haneʼ yikááʼ ánáánéíłʼį́; dóó éí éiyá ałdóʼ Nephi wolyéhę́ę béésh tʼą́hí bikáaʼgi haneʼ náyoodlííł ńtʼę́ę́ʼ.

20 Dóó éí éiyá tʼáá yikááʼ náʼiidzohgo tseebídiin dóó baʼaan dį́į́ʼ nááhai; áko tʼahdi éí kéyah bikááʼgóó kʼé hólǫ́ǫgo hoolzhish, tʼáá hazhóʼó áłchʼį́į́dígo, łaʼ diné sodizin bá hooghan yitsʼáhaaskaiígíí tʼéiyá dóó Laman bidineʼé yee ádaʼdééjiʼ; éí bąą kéyah bikááʼgóó éí Laman bidineʼé náhásdlį́į́ʼ.

21 Áádóó Amos éí ałdóʼ náádiilyá, (dóó neeznádiin dóó baʼaan náhástʼédiin dóó baʼaan dį́į́ʼ nááhai Christ níyáhą́ądą́ą́ʼ dóó wóshdę́ę́ʼ) dóó biyeʼ Amos bitsáskʼeh góneʼ béésh bikááʼ haneʼ yikááʼ nináʼádzoh ńtʼę́ę́ʼ; áádóó éí éiyá ałdóʼ, Nephi wolyéhę́ę béésh tʼą́hí bikáaʼgi haneʼ ííłʼį́į́ ńtʼę́ę́ʼ; dóó éí díidí naaltsoos, Nephi baa haneʼ wolyéego, Nephi béésh tʼą́hí bikááʼ nááháasdzo ałdóʼ.

22 Áádóó naakidi neeznádiin nááhai; dóó naakidi są́ náʼooghą́ą́ʼ tʼáá hazhóʼó áłchʼį́į́dígo tʼéiyá jidziih.

23 Dóó kʼad shí, Mormon, díí nihił béédahodoozįįł nisin diné éí ałʼąą dínéestʼą́, áko índa tʼáá ałtsogóó nihookááʼgóó daazlį́į́ʼ, dóó Christ bikʼihojídlíigo biniinaa, diné ayóó átʼéego daʼatʼį́ silį́į́ʼ.

24 Dóó kʼad, éí díí naakidi neeznádiin dóó baʼaan tʼááłáʼí yihahgo bitah hahoolzhiizh, ééʼ daʼílíinii dah yiih ńdaakááh, dóó yooʼ danizhónígíí, dóó tʼáadoo leʼé daʼílíinii nahasdzáán bikáaʼgi ádaalyaaígíí, éí yee ádaa dahaʼniihgo yaa ńdiikai.

25 Dóó kodóó tʼáadoo leʼé yáʼádaatʼéehii dóó bee daʼiináanii yę́ę doo yee ahaa dajoobaʼ da daazlį́į́ʼ.

26 Dóó dah daʼíldéhígíí bikʼehgo atsʼádaʼiisdeeʼ; dóó tʼáá bí bisodizin bá dahooghan ádayiilaa áko bee ńdiʼdoodlééł, dóó tʼáá aaníí Christ bisodizin bá hooghanę́ę éí doo deiniidlą́ą da daaní silį́į́ʼ.

27 Áádóó naakidi neeznádiin dóó baʼaan neeznáá ałtso nááhaigo kéyah bikááʼgóó tʼóó ahayóí ałʼąą átʼéego sodizin bá hooghan bee dah daʼíldééh silį́į́ʼ; aooʼ, ląʼída éí sodizin bá hooghan Christ beedahoniilzin daaní, dóó ákondi ląʼída binaʼnitin doo dayoodlą́ą da, áko índa bąąhági átʼéii bił yah anááʼookai silį́į́ʼ, dóó éí biniinaa éí tsʼídá íiyisíí diyingo baa ntshákeesgo bąąhági átʼéii bee dahólǫ́ǫgo tʼáadoo bidaʼołʼíní dabiʼdooʼniidę́ę, éí ákótʼéego yaa ńdiikai.

28 Dóó dineʼé bąąhági átʼéii yaa naakaiígíí dóó Satan beʼiiníziinii bijéí deíyiiłtsoodígíí biniinaa éí díí sodizin bá hooghan bąąhági átʼéii tsxį́įłgo bee náás dínéesą́.

29 Dóó nááná, náánáłaʼ sodizin bá hooghan léiʼ Christ doo deiniidlą́ą da daaní; áádóó tʼáá aaníí Christ bisodizin bá hooghanę́ę dayoołchʼį́į́d, háálá éí diné hojoobaʼ ádeinízingo dóó Christ dayoodlą́ągo biniinaa; dóó deijoosłááʼ háálá ląʼída éí bitahgóó álílee diyinkʼehgo naʼanish ádaalyaahą́ą biniinaa.

30 Éí bąą Jesus hastóí náyiizláʼą́ą naakitsʼáadah danilínę́ę hootaakaiyę́ę éí adziil dóó óhólníihii yee yikʼehdadidlį́įʼgo awáalyaa, dóó góneʼ yah adayiiznil; ndi Diyin God bizaad bibee adziilii, éí éí biiʼ dahólónígíí biniinaa, awáalyaahą́ą éí ałtso ahiih ndahaasdááz, dóó naanish diyinii ayóó ádaatʼéhígíí éí binaanish ádayósingo diné yitah daakai ńtʼę́ę́ʼ.

31 Ákótʼée ndi, azhą́ ákótʼéego díí naanish diyinii bitah hólǫ́ǫ ndi, diné bijéí deistłʼis yaa naakai, dóó ndootsił danízingo hadeinitáá ńtʼę́ę́ʼ, Jew dineʼé Jerusalemdi Jesus bizaad biniinaa, hadeinitáhą́ągi átʼáo.

32 Dóó kǫʼ biyiʼ góneʼ adayiistłʼííd, dóó tʼáadoo ádaatʼéhígóó áádę́ę́ʼ chʼíheeskai ńtʼę́ę́ʼ.

33 Dóó naaldlooshii daʼałchinii bighan góneʼ adayiistłʼííd ndi, tʼóó yił ndaanéé ńtʼę́ę́ʼ, awééʼ dibé yázhí yił naanéhégi átʼáo; dóó doo ádaatʼéhígóó éí yighandóó chʼíheeskai.

34 Ákótʼée ndi, diné bijéí deistłʼis, háálá doo tʼáá aaníí sodizin bąąh naazláhígíí dóó dahalneʼígíí ląʼída sodizin bá hooghan ałʼąą ádaatʼéego hadayistʼiʼ, dóó bikʼehgo tʼáá ałtsoní bąąhági átʼéii yaa naakaigo. Áádóó Jesus bidineʼé ałdóʼ atídeiłʼį́; ndi Jesus bidineʼé éí doo nátʼą́ą́ʼ atíńdaʼałʼį́į da ńtʼę́ę́ʼ. Dóó ákótʼáo tʼáá nináháhááh bikʼehgo, tʼóó hózhǫ́ doo daʼoodlą́ą́góó dóó bąąhági átʼéii yaa ńdiikai, wónáásdóó naakidi neeznádiin dóó baʼaan tádiin ałtso nááhai ndi.

35 Áádóó kʼad tʼáá díí yíhaiígíí biyiʼ, aooʼ, naakidi neeznádiin dóó baʼaan tádiin dóó baʼaan tʼááłáʼí góneʼ yihahgo, diné tʼóó ahayóígo ałtsʼáhaazná.

36 Áádóó díí kóneʼ yihahgo diné łaʼ Nephi bidineʼé daolyéego hazlį́į́ʼ, dóó éí éiyá Christ tʼáá aaníí dayoodlą́ą́ ńtʼę́ę́ʼ; dóó díí kótʼéego daʼíldéhígíí éí łaʼ diné Laman bidineʼé—Jacob bidineʼé, Joseph bidineʼé, dóó Zoram bidineʼé deiłníí ńtʼę́ę́ʼ;

37 Éí bąą Christ tʼáá aaníí dayoodlánígíí, dóó tʼáá aaníí Christ yichʼįʼ sońdadílzįįhígíí, (éí éí łaʼ táltʼéego Jesus náyiizláʼą́ą ákǫ́ǫ́ hólǫ́ǫ doo hodooʼniidę́ę éí daʼatah ńtʼę́ę́ʼ) éí Nephi bidineʼé, dóó Jacob bidineʼé, dóó Joseph bidineʼé, dóó Zoram bidineʼé daolyéé ńtʼę́ę́ʼ.

38 Áádóó, Christ binaʼnitin doo deiniizį́ʼę́ę éí Laman bidineʼé, dóó Lemuel bidineʼé, dóó Ishmael bidineʼé daolyéé ńtʼę́ę́ʼ; dóó Christ binaʼnitin tʼáá aaníí átʼéhígíí ałdóʼ bił béédahózin, ndi doo deiniizį́į́ʼgóó yikʼijįʼ daazlį́į́ʼ; dóó ałkʼidą́ą́ʼ, bizhéʼé, doo daʼoodlánę́ęgi átʼáo, baʼáłchíní tʼáadoo daʼiinohdlání deiłníigo éí ndeinitin ńtʼę́ę́ʼ.

39 Dóó hodeeyáádą́ą́ʼ átʼéhę́ęgi átʼáo, bizhéʼé éí doo yáʼátʼéehii dóó bąąhági átʼéii éí yaa naakaigo biniinaa. Áko Diyin God baʼáłchíní dajiinohłá dabiʼdiʼníigo éí ndabiʼdinitin ńtʼę́ę́ʼ, éí Laman bidineʼé hahoolzhiizh yę́ędą́ą́ʼ ndi Nephi baʼáłchíní dajiinohłá, dabiʼdiʼníigo ndabidiʼnitinę́ęgi átʼéego.

40 Áádóó naakidi neeznádiin dóó baʼaan dízdiin dóó baʼaan dį́į́ʼ éí ałtso nááhai; dóó ákótʼéego éí diné kéédahatʼį́į́ ńtʼę́ę́ʼ. Dóó diné doo yáʼátʼéehii dóó bąąhági átʼéii yaa naakai yę́ę dabidziil dahazlį́į́ʼ dóó éí Diyin God bidineʼé yilááhgóó dínéestʼą́.

41 Dóó éí diné sodizin bá hooghan tʼáá bí ádeinízinígi átʼáo ádayoolííł dóó ndeinil ńtʼę́ę́ʼ, dóó tʼáadoo leʼé daʼílíinii yee hadeidileʼgo. Dóó ákótʼáo naakidi neeznádiin dóó baʼaan ashdladiin ałtso nááhai, dóó naakidi neeznádiin dóó baʼaan hastą́diin ałdóʼ ałtso nááhai.

42 Áádóó diné bąąhági átʼéii yaa naakai yę́ę éí Gadianton nahonitʼingo beʼałghaʼditʼáahii yę́ę ląʼí nááhodleeł silį́į́ʼ.

43 Dóó Nephi bidineʼé dabiʼdiʼnínę́ę éí ałdóʼ bijéí biyiʼdi ádaa dahaʼniihgo yaa ńdiikai, háálá tʼáadoo leʼé daʼílíinii tʼáá íiyisíí bee dahazlį́įʼgo biniinaa, dóó bikʼisóó Laman bidineʼé dah yikahígi átʼáo nikiʼdiildeeʼ.

44 Dóó kodóó naakitsʼáadahí éí diné nahasdzáán yikááʼ naaldeehii bibąąhági átʼéii yaa yínííł daniizį́į́ʼ.

45 Áádóó táadi neeznádiin ałtso nááhaigo, tʼáá áła Nephi bidineʼé dóó Laman bidineʼé éí aheełtʼéego bąąhági átʼéii yaa ńdiikai.

46 Áádóó Gadianton daʼniʼįįhii éí tʼáá ałtso kéyah bikááʼgóó hazlį́į́ʼ; dóó tʼáadoo yáʼátʼééh hinání da tʼáá hazhóʼó Jesus yikééʼ naazíinii tʼéiyá. Dóó diné bąąhági átʼéii yaa naakaiígíí éí béésh óola dóó béésh łigai tʼóó ahayóí hashtʼendayiinííł ńtʼę́ę́ʼ, dóó tʼáadoo leʼé ałchʼįʼ ndayiiłniih ńtʼę́ę́ʼ.

47 Áádóó táadi neeznádiin dóó baʼaan ashdlaʼ ałtso nááhaigo, (dóó tʼahdii diné bąąhági átʼéii yaa naakai) Amos éí náádiilyá; dóó bikʼis, Ammaron, Amos bitsáskʼeh góneʼ béésh bikááʼ haneʼ ánáánéíłʼį́į́ ńtʼę́ę́ʼ.

48 Áádóó táadi neeznádiin dóó baʼaan naadiin ałtso nááhaigo, Ammaron, Iiʼsizį́ Diyinii bił halneʼgo, béésh bikááʼ haneʼę́ę éí diyinę́ę néideesʼį́į́ʼ—aooʼ, tsʼídá tʼáá ałtso béésh bikááʼ haneʼ diyingo hadadiilyaahą́ą ndi dóó daʼoochííł bikʼehdę́ę́ʼ yítʼánę́ę—Christ níyáhą́ądą́ą́ʼ ndi dóó ńléí neeznádiin dóó baʼaan naadiin yinahjįʼ éí haneʼ bikááʼ ádaalyaahą́ą éí tʼáá ałtso néideesʼį́į́ʼ.

49 Dóó Bóhólníihii éí yichʼįʼ néideesʼį́į́ʼ, áko náás hodeeshzhiizhgo Jacob bighandóó bidineʼé, Bóhólníihii bił ahaʼdeestʼánę́ę éí binahjįʼ náásgóó yaa halneʼę́ę yichʼįʼ hanéídooʼnił. Dóó ákótʼáo éí Ammaron yaa hoolneʼ.