1 Kʼad éí Mosiah bibeehazʼáanii biyiʼ yisdzoh diné tʼáá ałtso beehazʼáanii bee ánihwiiʼaah danilínígíí, éí doodago ándahwiiʼaahgo bikʼidahodiiniiʼígíí, baa dahwiinítʼínígíí haa nízahjįʼ baa dahwiinístʼįįdígíí bikʼehgo bichʼįʼ ndaʼiilyé.

2 Áko índa diné nááná łaʼ yąąh haʼííłʼáago, dóó doo naʼílééhgóó, ánihwiiʼaahii bee bił hóóneʼ; dóó ánihwiiʼaahii bibee óhólníihii choyoosʼįįdgo, dóó siláo yichʼįʼ ayíłʼaad bidááhdóó niidlóozgo; dóó bikʼijįʼ yisdzohígíí dóó beehazʼáanii bikʼehgo yá nináháʼááh, áko diné bąąh hááʼáhígíí yikʼé náʼálééh, éí doodago éí tʼáá ałtso bee hólóonii bighaʼnił, éí doodago éí aniʼįįhii dóó diné tʼáadoo leʼé yighayiníiłii nilį́įgo diné bitahdóó yíwohdi naniná biʼdiʼniih.

3 Dóó ánihwiiʼaahii ndaalnishígíí bíighahgo bichʼįʼ naʼalyééh—łaʼajį́ naashnishgo béésh óola senine wolyéhígíí bíighahgo bichʼįʼ niilyééh, éí doodago béésh łigai senum wolyéhígíí bíighahgo, éí béésh óola senine bił aheełtʼé; dóó díí éí beehazʼáanii bikʼehgo ályaa.

4 Kʼad díí éí bibéésh óola, dóó bibéésh łigai ałʼąą ádaatʼéhígíí, dóó bą́ą́h daʼílínígíí bikʼehgo dabízhiʼ. Dóó Nephi bidineʼé éí bízhiʼ ádayiilaa, háálá doo éí Jew dineʼé Jerusalemdi kééhatʼínígíí bikʼehgo béeso dayółtaʼ da; dóó ałdóʼ doo éí Jew dineʼé bikʼehgo ídaʼneełʼąąh da; ndi bibéeso wóltaʼ dóó beʼídaʼneelʼąąh éí łahgo ádayiilaa, diné bintsékees dóó bił ádahootʼéhígíí bikʼehgo, tʼáá ałtso daʼíchíídę́ę́ʼ, ándahwiiʼaahii á naazį́ silį́įʼjįʼ, éí aláahdi naatʼáanii Mosiah á sizį́įgo ádayiilaa.

5 Kʼad ákótʼáo bibéeso ałʼąą bą́ą́h daʼílínígíí—béésh óola senine, béésh óola seon, béésh óolaa shum, dóó béésh óola limnah daolyé.

6 Béésh łigai senum, béésh łigai amnor, béésh łigai ezrom, dóó béésh łigai onti.

7 Béésh łigai senum éí béésh óola senine yił aheełtʼéego bą́ą́h ílį́, dóó tʼáá ałchʼishjí éí tłʼoh naadą́ą́ʼ adeeʼé bee bíʼneelʼąądgo bą́ą́h ílį́, dóó tʼáá ałtso tłʼoh naadą́ą́ʼ átʼéii ałʼąą bíʼneelʼąądgo.

8 Áko béésh óola seon éí senine ałhą́ą́h nániilyáago bą́ą́h ílį́.

9 Dóó béésh óola shum éí seon ałhą́ą́h nániilyáago bą́ą́h ílį́.

10 Dóó béésh óola limnah éí tʼáá ałtso ahidiiʼnilgo bą́ą́h ílį́.

11 Dóó béésh łigai amnor éí senum naakigo bą́ą́h ílį́.

12 Dóó béésh łigai ezrom éí senum dį́įʼgo bą́ą́h ílį́.

13 Dóó béeso onti éí tʼáá ałtso biláahgo bą́ą́h ílį́—

14 Kʼad díí éí hóyahgo bibéeso ndaachʼidígíí átʼé—

15 Shiblon éí senum ałnííʼdóó átʼé; éí bąą, shiblon éí tłʼoh naadą́ą́ʼ adeeʼé ałníʼnéélʼąądgo bą́ą́h ílį́.

16 Dóó shiblum éí shiblon ałnííʼdóó átʼé.

17 Dóó leah éí shiblum ałnííʼdóó átʼé.

18 Kʼad díí éí kótʼáo, bibéeso tʼáá ałtso dayółtaʼ ńtʼę́ę́ʼ.

19 Áko béésh óola antion éí shiblon táaʼgo bił aheenéeltʼeʼ.

20 Kʼad, yee daʼatʼį́į dooleeł biniiyé lá, háálá ndaalnishígíí bikʼehgo bichʼįʼ ndaʼiilyé, éí bąą, dahojíłchįʼ dóó ląʼída ałʼąą átʼéego aa náhátʼį́, dóó bąąhági ádaatʼéii hazlį́į́ʼ, áko hózhǫ́ binaanish dahólǫ́ǫ dooleeł biniiyé, áko aa dahwiinítʼį́ bidááhdóó nahatʼéhígíí binahjįʼ béeso ádeidoolííł; éí bąą kótʼáo diné Alma dóó Amulek yikʼijįʼ dahóółchįįd.

21 Dóó díí Zeezrom Amulek neídíłkid, kóníigo: Díí áłtsʼíísígo nanídíshkid nátʼą́ą́ʼ shił náhólneʼgóósh tʼáá áko? Kʼad Zeezrom éí diné chʼį́įdii beʼiiníziinii bikʼehgo saad náhooʼniłígíí tʼáá íiyisíí bił bééhózin, áko yáʼátʼéehii yidoołchxǫǫłígíí éí yíighah, éí bąą, Amulek kóyidííniid: Nanídíshkidígíísh nátʼą́ą́ʼ shił náhodíílnih?

22 Dóó Amulek áhodííniid: Aooʼ, Bóhólníihii biiʼSizíinii áshiłníigo, éí shiiʼ hólǫ́; háálá Bóhólníihii biiʼSizíinii tsʼídá doo bitsʼą́ą́jí hadeesdzih da. Dóó Zeezrom áhodííniid: Jó, kǫ́ǫ́ béésh łigai onti hastą́ą́, dóó díí tʼáá átʼé naa deeshnił Diyin God doo hólǫ́ǫ da dííníniidgo.

23 Kʼad Amulek ání: O chʼį́įdiitah beʼawééʼ, haʼátʼíísh biniiyé shííníʼááh? Doo hanii nił bééhózin da diné diyin yikééʼ yigáałii éí díí doo yinízin da?

24 Diyin God doo hólǫ́ǫ́góósh yínídlą́? Ándishníigo, Ndagaʼ, Diyin God hólǫ́ǫgo nił bééhózin, ndi naadeełii Diyin God biláahgo ayóí ííníʼní.

25 Dóó kʼad Diyin God bidááhdóó shichʼįʼ niyoochʼííd. Áshidíní—díí onties hastą́ągo níníłʼį́, tʼáá íiyisíí daʼílį́, naadeeshnił—ákondi nijéí biyiʼdóó tʼáá ní náníjááh dóó doo shaa dííniłgo íʼdiinilyaa; dóó Diyin God hináanii dóó tʼáá aaníinii doo hólǫ́ǫ da dideeshniiłgo shá nínízin ńtʼę́ę́ʼ, áko biniiyé shidiyííłhééł ninízį́į́ʼ. Jó dóó kʼad, díí doo yáʼáshóonii biniinaa bikʼehgo naʼdoolyééł.

26 Dóó Zeezrom ábiłní: Daʼ Diyin God tʼáá aaníí hólǫ́ dóó hiná diní?

27 Dóó Amulek ání: Aooʼ, Diyin God tʼáá aaníí hólǫ́ dóó hiná.

28 Kʼad Zeezrom ání: Daʼ Diyin Godísh tʼóó ahayóí dahólǫ́?

29 Dóó ání, Ndagaʼ.

30 Kʼad Zeezrom ánáábiłní: Haash yitʼáo díí nił bééhózin?

31 Dóó ání: Diyin yá naalʼaʼii shił ííshją́ą́ áyiilaa.

32 Dóó Zeezrom ánáádíʼní: Háísh éí doogááł? Daʼ Diyin God biYeʼésh?

33 Dóó iiłní, Aooʼ.

34 Dóó Zeezrom ánáádíʼní: Daʼ bidineʼésh doo beʼiinaʼ łahgo áńdeidlééhgóó yisdéidoonił? Dóó Amulek yił chʼiiníʼą́ dóó iiłní: Bee nił hashneʼ doo ádooníił da, háálá bizaad yikʼijįʼ dooleełgo doo bá bíighah da.

35 Índa Zeezrom diné iiłní: Díí tʼáadoo leʼé béédaohłniih; háálá Diyin God éí tʼááłáʼí ní; ákondi Diyin God biYeʼ éí doogááł ní, ndi bidineʼé éí doo yisdáyidoonił da—Diyin God neiłʼaʼ bee bíhólnííh nahalingo.

36 Kʼad Amulek ánáánéíłʼní: Jó niyoochʼííd, áko Diyin God naashʼaʼgo bee shíhólnííh shidííníniidígíí háálá bidineʼé doo beʼiinaʼ łahgo áńdeidlééhgóó éí doo yisdáyidoonił da.

37 Dóó ánáándishní beʼiinaʼ doo łahgo áńdeidlééhgóó éí doo yisdáyidoonił da; háálá bizaad łahgo ádeeshłíiłgo doo bííníshghah da, dóó tʼáá bí ání yáʼąąsh bił hazʼą́ądi doo łaʼ chin bąąhgo bá hwiidooʼáał da; éí bąą, haash yitʼáo éí yisdádíínááł, tʼáá hazhóʼó yáʼąąsh bił hazʼą́ądi náhooʼaʼgo tʼéiyá? Éí bąą, doo neʼiinaʼ łahgo ánánídlééhgóó éí doo yisdádíínáał da.

38 Índa Zeezrom ánáábiłní: Daʼ Diyin God biYeʼésh éí tʼáá aaníí Hoolʼáágóó Ataaʼ nilíinii átʼį́?

39 Dóó Amulek ábiłní: Aooʼ, tsʼídá nahasdzáán dóó yáʼąąsh, dóó tʼáá ałtso biiʼ hólóonii Hoolʼáágóó biTaaʼ nilíinii átʼį́; éí éí bee hahóóyá dóó bee nahoníyá, tsʼídá áłtséii dóó tsʼídá akéeʼdii átʼį́;

40 Dóó nihookááʼ doogááł bidineʼé yá nináʼdoodlééł biniiyé; bízhiʼ dayoodláanii beehazʼáanii kʼídayiiztiʼígíí ákʼiididootʼááł; dóó díí éí hoolʼáágóó Diyin God bił iiná bee dahólǫ́ǫ dooleeł, dóó doo éí nááná łaʼ díí yisdáʼiildééh baa doolyéeł da.

41 Éí bąą diné doo yáʼádaatʼéehii éí doo naʼílyá hólǫ́ bił hazʼą́ nahalin da dooleeł, tʼáá hazhóʼó ánoonééł ádingo tʼéiyá; jó áko, tʼáá ałtso daneeznánę́ę náádidoojahjįʼ yoołkááł dóó Diyin God yidááhdóó deidoozįįł, dóó yindaashnish yę́ę bee bá ndahodootʼááł.

42 Kʼad, łaʼ anoonééł atsʼíískʼeh anoonééł wolyé; dóó Christ náádiilyáhígíí atsʼíískʼeh anoonééł doo átʼéhégo áyiilaa, tʼáá ałtso díí atsʼíískʼeh anoonééł yitsʼą́ą́dóó náádidoojah.

43 Atsʼíís dóó iiʼsizíinii tsʼídá hadaałtʼéego tʼááłáʼí ńdoodleeł; atsʼádaazʼáí dóó dah daditʼaanii ahidadiiʼáhę́ęgi átʼáo ádadoolnííł, tsʼídá kʼad ániitʼéhígi átʼáo; dóó Diyin God bidááhdóó nanihidiʼdoodlóós, kʼad tʼáá ałtso nihił bééhózinígíí baa ákoniidzin, dóó daʼsiilzihę́ę tʼáá ałtso doo nanitłʼahgóó bénéilniih dooleeł.

44 Kʼad, díí nááʼdiijeeh tʼáá ałtso yaa hidookah, ániid ndaakai dóó hadaastihii tʼáá áła, akąʼii dóó aʼáadii tʼáá áła, doo yáʼádaatʼéehii dóó tʼáá ákogogi deíkáahii tʼáá áła; dóó tsʼídá bitsiiʼ tʼááłáʼí ndi doo łaʼ yóó adoodił da; ndi tʼáá ałtso hadaałtʼéego hadidoonííł, kʼad átʼéhígi átʼáo, éí doodago atsʼíís biyiʼgo, Christ aYeʼ nilíinii, dóó Diyin God aTaaʼ nilíinii, dóó Iiʼsizį́ Diyinii éí Hoolʼáágóó tʼááłáʼí Diyin God danilį́, dah naháaztą́ą́dóó tʼáá ałtso diné ndahidoodlóós dóó ádá hadahidoodzih, yindaashnish yę́ę bikʼehgo bá ndahwidootʼááł, yáʼádaatʼéehgo éí doodago doo yáʼádaatʼééhgóó.

45 Jó, kʼad, atsʼíís náádiilyé bee nichʼįʼ haasdzííʼ, dóó atsʼíís náádiidáhígíí ałdóʼ. Ánidishní díí atsʼíís anoonééł bidééłníinii doo anoonééł bidééłníiniigóó náádidoodááł, anoonééł yitsʼą́ą́dóó náádidoodááł, tsʼídá áłtsé anoonééł bitsʼą́ą́dóó dóó iináajįʼ, áko tsʼídá doo náádadootsaał da; biiʼnaazíinii bitsʼíís yił tʼááłáʼí ńdadoodleeł, tsʼídá doo ałtsʼánahidookah da; ákótʼáo atsʼíís iiʼsizíinii diyin dóó anoonééł doo bidééłníinii nilį́į dooleeł; áko bąąhági ádaatʼéii tsʼídá doo yiiʼ nínáádookah da.

46 Áko, Amulek ałtso haadzíiʼgo diné bił dahóóyééʼ, dóó Zeezrom ałdóʼ bitah ahodiʼniitłid. Dóó kótʼáo Amulek saad yee haadzííʼ, éí doodago tʼáá kóníłtsoígo niʼsézo.