1 Iei Alma, nupwen a kuna pwe ekkewe kapas an Amulek a aueno Siesrom ne kapas, pun a kuna pwe Amulek a sinei usun an chofona me nikatuputup an epwe nieno i, iwe nupwen a kuna pwe a poputa ne chechech ren ar uren sinei usun an kewe tipis, a suki awan me poputa ne kapas ngeni i, me an epwe apungano ekkewe kapas an Amulek, me an epwe awewei ekkewe mettoch a ekieki, are an epwe pwarano ekkewe pukefel nap seni met minne Amulek a fen fori.

2 Iei ekkewe kapas minne Alma a apasa ngeni Siesrom ekkewe aramas unukur ra rongorong; pun ewe mwicheich a fokkun watte, iwe a kapas non ei napanap:

3 Iei Siesrom, ka kuna pwe ka fen ono non om chofona me tipachem sona, pun kose chofona ngeni aramas chok nge ka chofona ngeni Kot; pun nengeni, i a sinei usun om ekiek meinisin, iwe ka kuna pwe om ekiek a pwano ngenikem me ren noun we Ngun;

4 Iwe ka kuna pwe am mi sinei pwe om kokkot a ew kokkot mi fokkun nikatuputup, usun nikatuputupen ewe tefin, pun om kopwe chofona me otupu ekkei aramas pwe kopwe tongeni fori ir ar repwe ungenikem, pwe repwe kapas mi ngaw ngenikem me aturakemiu—

5 Iei ei a ew kokkotun noum we chon koum, iwe a fen aea an pochokun non en. Iei ua mochen pwe kopwe chechemeni pwe met ua apasa ngonuk ua apasa ngeni meinisin.

6 Iwe nengeni ua apasa ngenikemi meinisin pwe ei a ew saren ewe chon koum, minne i a forata pwe epwe niapeni ekkei aramas, pwe i epwe tongeni uweikemi ngeni fan an nemenem, pwe i epwe tongeni rokopwanikemino ren an kewe senimecha, pwe i epwe tongeni fotikemitiw ngeni kiteter esemuch, anongonong won pochokunen an fotek.

7 Iwe nupwen Alma a apasa ekkei kapas, Siesrom a poputa ne fokkun chechech napanap, pun a napeno me napeno an pesepes usun ewe manamanen Kot; iwe a pwan pesepes pwe a wor an Alma me Amulek mirit usun i, pun a pesepes pwe ra sinei usun ekiekin me popun netipan; pun manaman a kawor ngeni ir pwe repwe tongeni sinei usun ekkei mettoch anongonong won ewe ngunun osini.

8 Iwe Siesrom a poputa achocho ne eis senir, pwe i epwe tongeni sinei chommong usun ewe muun Kot. Iwe a apasa ngeni Alma: Met wewen ei minne Amulek a fen kapas usun ewe manausefanin ekkewe mi mano, pwe meinisin repwe manausefan seni mano, ekkewe mi pung me pwan ekkewe rese pung, me repwe emmwenito ar repwe uta me mwen Kot pwe repwe kapung anongonong won ar kewe angang?

9 Iwe iei Alma a poputa ne awewei ekkei mettoch ngeni i, a apasa: A kawor ngeni chommong ar repwe sinei usun monomonen Kot; nge inamo ra fen nom fan ew annuk mi tichik pwe resap pwarano tiwenon chok ika epwe anongonong won ekis kinikinin an kapas minne i a fen fang ngeni ekkewe noun aramas, anongonong won ewe aneasochis me achocho minne ra ngeni i.

10 Iwe iei minne, i ewe epwe apochokunano netipan, i ewe epwe pwan angei kukkunun kinikinin an kapas; iwe i ewe esap apochokunano netipan, epwe kawor ngeni ewe watten kinikinin ewe kapas, tori an a kawor ngeni i an epwe sinei usun monomonen Kot tori an sinei unusochur.

11 Iwe ir ekkewe repwe apochokunano netiper, epwe kawor ngeni ir ewe kukkunun kinikinin ewe kapas tori ar resap sinei och mettoch usun an kewe monomon; iwe repwe ono non fotek me ren ewe tefin, iwe repwe emmwen me ren an mochen feitiw ngeni kiteter. Iei met wewen me ekkewe senimechan hell.

12 Iwe Amulek a fen kapas fatafatoch usun mano, me manausefan seni manauach iei ngeni ew nikinikin inis ese tongeni mano, me emmwen ngeni me mwen ewe kapung an Kot, pwe sipwe kapung anongonong won ach kewe angang.

13 Iwe ika netipach a fen pochokununo, ewer, ika sia fen apochokunano netipach seni ewe kapas, ina minne ese chiwen pwá rech, iwe nonnomuch epwene anoninen, pun ina sipwene tipis.

14 Pun ach kewe kapas repwene apungu kich, ewer, ach kewe angang meinisin repwe apungu kich; iwe sisap nom non kinikinin nimenimoch; iwe ach ekiek repwe pwan apungu kich, iwe non ei anoninenin nikinik sisap pwaracho ne neta ngeni ach Kot; iwe sipwe fen pwapwa ne anean ach tongeni annuku ekkewe foun fau me ekkewe chuk pwe repwe turutiw woch pwe repwe ponnukicheno seni me mwan.

15 Nge ei ese tongeni fis; mi auchea sipwe feito me uta me mwen i non an ning, me non an manaman, me non an pochokun mi napanap, sufon, me pochokun, me pwarata usun ach saw esemuch pwe an kewe kapung meinisin mi ennet; pwe i mi ennet non an angang meinisin, me pwe i mi umoumoch ngeni ekkewe noun aramas, me pwe mi wor an unusochun manaman ne angasa aramas meinisin ekkewe ir mi nuku won itan we me uwani angang mi fich ngeni aier.

16 Iwe iei nengeni, ua apasa ngenikemi non na fansoun epwe tapweto ew mano, pwan mwo ew aruwen mano, minne a ew manon ngun; iwe a ew fansoun pwe ion a mano non an tipis, usun ew manon inis, epwe pwan mano non ew manon ngun; ewer, i epwe mano ren pekin mettoch mi wenechar.

17 Iwe ewe fansoun nupwen ar riaffou epwe usun ew noomun ekkei me brimstone, ngetengetin a feita feinfeino me esemuch; iwe mwirin ewe fansoun pwe repwene fofotiw ngeni ew kiteter esemuch, anongonong won ewe manaman me fotek an Setan, pokiten a wor an nemenem wor anongonong won an mochen.

18 Iwe, ua apasa ngenikemi, epwe usun ita ese wor ngaseno a fen kawor; pun rese tongeni ngaseno anongonong won an Kot pungoch; iwe rese tongeni mano, pokiten ese chiwen wor kiteter.

19 Iwe non ewe fansoun nupwen Alma a osopwano an apasa ekkei kapas, ekkewe aramas ra poputa ne mairu;

20 Nge mi wor emon Antiona, i emon chon nemenem mi nap me neir, a feito me apasa ngeni i: Met ei ka fen apasa, pwe aramas repwe manau seni mano me repwe siwin seni ei manauen fonufan ngeni ew nikinik esap chiwen tongeni mano, pwe ewe ngun esap chiwen tongeni mano?

21 Met wewen ewe pukefel, ewe a apasa pwe Kot a annomu ekkewe cherubim me efoch ketinas mi ngetenget won otiwen ewe ataken Eden, pwe aewin semach me inach kewe resap tonong me ochoch seni ewe foun iran ewe iran manau, me manau feinfeino chok? Iwe iei sia kuna pwe ese wor tufich epwe tawe pwe repwe manau feinfeino chok?

22 Iei Alma a apasa ngeni i: Iei ewe mettoch ita upwe keran awewei. Iei sia kuna pwe Adam a turutiw ren an ochoch seni ewe foun ira mi annuk, anongonong won ewe kapasen Kot; iwe iei sia kuna, pwe ren an we turutiw, aramas meinisin ra winiti ew monuchenon me turutiwen aramas.

23 Iwe iei nengeni, ua apasa ngenikemi pwe ika a fen tufich an Adam epwe ochoch seni ewe foun iran ewe iran manau atun ewe fansoun, iwe esap wor mano, iwe ewe kapas epwe fen namotmwan, minne epwe fori Kot pwe emon mi chofona, pun a apasa: Ika kopwe ochoch kopwe ennetin mano.

24 Iwe sia kuna pwe mano a feito won aramas, ewer, ewe mano minne Amulek a fen kapas usun, ina ewe manon inis; nge inamo mi wor ew fansoun a kawor ngeni aramas non minne repwe tongeni aier; iei minne ei manau a winiti ew nonnomun fansoun sossot; ew fansoun ach sipwe monneta ne churi Kot; ew fansoun ach sipwe monneta ngeni ewe nikinik esemuch minne am aua fen apasa, minne mwirin ewe manausefanin ekkewe mi mano.

25 Iei, ika esap popun ewe kokkotun ngaseno, minne a foruta seni nepoputan ewe fonufan, esap tongeni wor manausefanin ekkewe mi mano; nge mi wor ew kokkotun ngaseno a foruta, minne epwe esenipato ewe manausefanin ekkewe mi mano, usun minne am aua fen kapas usun.

26 Iwe iei nengeni, ika epwe tufich pwe aewin semach me inach kewe repwe tongeni feino me ochoch seni ewe iran manau repwe fen riaffou feinfeino chok, esap wor nonnomun fansoun sossot; iwe iei ita ewe kokkotun ngaseno esap fen pwonueta, iwe ewe kapasen Kot epwe fen namotmwan, esap wor fetanochun.

27 Nge nengeni, ese ina usun; nge a fen kefinita ngeni aramas pwe repwe fokkun mano; iwe mwirin mano, repwe fokkun feito ngeni kapung, pwan mwo ewe chok kapung usun minne am aua fen kapas usun, ina ewe nesoponon.

28 Iwe mwirin an Kot a fen finata pwe ekkei mettoch repwe fis ngeni aramas, nengeni, mwirin i epwe kuna pwe epwe auchea pwe aramas repwe sinei usun ekkewe mettoch usun minne i a fen finata ngeni ir;

29 Iei minne a tinato chon nang pwe repwe kapas ngeni ir, ekkewe ra fori aramas pwe repwe kuna usun an ning.

30 Iwe ra poputa seni ena fansoun feino ne kokkori itan we; iei minne Kot a kapas ngeni aramas, me pwarano ngeni ir usun ewe kokkotun ngaseno, minne a fen monneta seni nepoputan ewe fonufan; iwe ei a pwarano ngeni ir anongonong won ar nuku me aier me ar angang mi fel.

31 Iei minne, a awora annuk ngeni aramas, pwe ra fen akkom atai ewe aewin annuk usun mettochun fonufan, me ra winiti usun ekkewe kot, ra sinei usun öch seni ngaw, ra annomur pwisin non ew nikinik ar repwe angang, are fen katonong non ew nikinik ar repwe angang anongonong won ar mochen me met epwe fich ngeni netiper, ika repwe fori mi ngaw are repwe fori mi och—

32 Iei minne Kot a ngeni ir annuk, mwirin an a pwarano ngeni ir ewe kokkotun ngaseno, pwe resap fori mi ngaw, ewe niwinin mi ngaw pwe ew aruwen mano, minne ew mano esemuch ren pekin mettoch mi wenechar; pun won ekkewe sokkun ewe kokkotun ngaseno esap tongeni wor manaman wor, pun ekkewe angangen pungoch esap tongeni tano, anongonong won ewe kirekiroch mi napanap an Kot.

33 Nge Kot a kokkori aramas, non iten Noun we, (ei ewe kokkotun ngaseno minne a foruta) a apasa: Ika oupwe aier, me ousap apochokunano netipemi, iwe epwe wor ai umoumoch womi, me non Nei we Anamon;

34 Iei minne, ion epwe aier, me esap apochokunano netipan, i epwe wor an pung won umoumoch me non Nei we Anamon, ngeni ew omusomusen an kewe tipis; iwe ekkei repwe tonong non ai nenien asoso.

35 Iwe ion epwe apochokunano netipan me epwe fori angangangaw, nengeni, ua akkapon non ai song pwe i esap tonong non ai nenien asoso.

36 Iwe iei, ami pwi, nengeni ua apasa ngenikemi, pwe ika oupwe apochokunano netipemi ousap tonong non ewe nenien asoso an ewe Samon; iei minne ami angangangaw epwe asonga i iwe i epwe tinatiw an song womi usun chok ewe aewin asong, ewer, anongonong won an kapas non ewe amuchunon anini usun pwan ewe aewin, ngeni kiteterinon ngunumi esemuch; iei minne, anongonong won an kapas, ngeni ewe amuchunon mano, usun chok ewe aewin.

37 Iwe iei, ami pwi, oua kuna pwe am mi sinei usun ekkei mettoch, iwe ir mi ennet, sipwene aier, me sisap apochokunano netipach, pwe sisap asonga ewe Samon ach Kot ne watiw an song woch non ekkei an aruwen annuk minne a fen ngenikich; nge sipwe tonong non ewe nenien asoso an Kot, minne a monneta anongonong won an kapas.