1 Ut kik’ulman naq chirix naq kixk’e xraqik raatinankileb’ li tenamit, naab’al reheb’ ke’xpaab’ li raatin, ut ke’ok chixjalb’aleb’ xk’a’uxl, ut chixtz’ilb’aleb’ rix li loq’laj hu.

2 A’b’an lix k’ihaleb’ ke’raj sa’ xch’ool xsachb’al laj Alma ut laj Amulek; xb’aan naq yookeb’ xjosq’il rik’in laj Alma, sa’ xk’ab’a’ xsaqenkil ru li raatin re laj Tzeesrom; ut ke’xye ajwi’ naq laj Amulek kixtik’ti’iheb’ chaq, ut kixhob’ chaq lix chaq’rab’eb’ ut jo’kan ajwi’ eb’ lix ch’olob’anel chaq’rab’ ut eb’ lix raqonel aatin.

3 Ut eb’ a’an ke’chal ajwi’ xjosq’il rik’in laj Alma ut laj Amulek; ut rik’in naq ke’xch’olob’ chaq chi saqen ru xyaalal lix maa’usilaleb’, ke’xsik’ xsachb’aleb’ sa’ muqmu.

4 A’b’an kik’ulman naq moko ke’xb’aanu ta; ke’xchapeb’ b’an ut ke’xb’ak’eb’ rik’in kawil k’aam, ut ke’xk’ameb’ chiru li xb’eenil aj raqol aatin re li ch’och’.

5 Ut eb’ li tenamit xkoheb’ ut ke’ch’olob’an aatin re xjitb’aleb’—ke’xye naq ke’xhob’ chaq li chaq’rab’, ut eb’ lix ch’olob’anel chaq’rab’ ut eb’ laj raqol aatin re li ch’och’, ut re ajwi’ chixjunileb’ li ani wankeb’ sa’ li ch’och’; ut naq ke’xch’olob’ naq jun ajwi’ li Dios wan, ut naq a’an tixtaqla li Ralal sa’ xyanqeb’ li tenamit, a’b’anan moko tixkoleb’ ta; ut naab’al chik xkomon li k’a’aq re ru a’in ke’xch’olob’ li tenamit re xjitb’al laj Alma ut laj Amulek. Anajwan kib’aanuman a’in chiru li xb’eenil aj raqol aatin re li ch’och’.

6 Ut kik’ulman naq laj Tzeesrom kikana chi sachso xch’ool chirix li aatin yeeb’il; ut a’an kixnaw ajwi’ chirix xmutz’ulaleb’ lix k’a’uxleb’, li kixtikib’ chaq a’an sa’ xyanqeb’ li tenamit rik’in xtik’ti’ aj aatin; ut ki’ok chi tawasiik li raam rik’in xnawb’al naq wan li maak sa’ xb’een; relik chi yaal, ki’ok chi sutiik xb’aan xrahil li xb’alb’a.

7 Ut kik’ulman naq ki’ok chixjapb’al re chiruheb’ li tenamit, ut kixye: K’ehomaq reetal, laa’in wan inmaak, ut eb’ li winq a’in maak’a’eb’ xtz’ajnil chiru li Dios. Ut chirix chik a’ hoonal a’an ki’ok chi aatinak re xkolb’aleb’; a’b’an ke’xhob’, ut ke’xye: Ma laa’at ajwi’ chapb’ilat xb’aan laj tza? Ut ke’xchuub’a, ut ke’risi chaq sa’ xyanqeb’, ut jo’kan ajwi’ chixjunileb’ li ke’paab’ank re li aatin li yeeb’il xb’aan laj Alma ut laj Amulek; ut ke’risiheb’ chaq ut ke’xtaqlahatq li winq re xkutb’aleb’ chi pek.

8 Ut ke’xch’utub’eb’ li rixaqileb’ ut lix kok’aleb’, ut chixjunil ani li ke’paab’ank re malaj ut li ke’tzole’ chixpaab’ankil li raatin li Dios ke’xtaqla xkutb’aleb’ sa’ li xam; ut ke’xk’am ajwi’ chaq eb’ li tz’iib’anb’il esil reheb’ wan wi’ eb’ li loq’laj hu, ut ke’xkut ajwi’ a’an sa’ li xam, re naq te’k’atq ut te’oso’q xb’aan li xam.

9 Ut kik’ulman naq ke’xchap laj Alma ut laj Amulek, ut ke’xk’ameb’ sa’ li na’ajej re li kamsink, re te’ril xsachlijikeb’ li ani ke’k’ate’ xb’aan li xam.

10 Ut naq kiril laj Amulek lix rahileb’ li ixq ut li kok’al li yookeb’ chi k’atmank sa’ li xam, kiraho’ ajwi’ a’an; ut kixye re laj Alma: Chan put ru naru naqil li xuwajelil na’leb’ a’in? Chiqaye’ ut li quq’, ut chiqak’anjela lix wankil li Dios li wan qik’in, ut chiqakoleb’ chiru li raq’ xam.

11 A’b’an laj Alma kixye re: Li Musiq’ej narelaji we naq ink’a’ tinye’ li wuq’; xb’aan naq k’e reetal naq li Qaawa’ naxk’uleb’ rik’in a’an, sa’ li loq’alil; ut a’an naxkanab’ naq neke’xb’aanu li na’leb’ a’in, malaj naq eb’ li tenamit neke’xb’aanu li na’leb’ a’in reheb’, jo’ chanru xkawileb’ li raam, re naq tiikaq ru li raqb’a-aatin tixk’anjela sa’ xb’eeneb’ sa’ xjosq’il; ut lix kik’eleb’ li ani maak’a’eb’ xmaak taaxaqliiq re xk’utb’al xyaalal lix maakeb’, relik chi yaal, ut kaw naq tixjap re chirixeb’ sa’ roso’jik li kutan.

12 Anajwan laj Amulek kixye re laj Alma: K’e reetal, maare toohe’xk’at ajwi’ laa’o.

13 Ut laj Alma kixye: Chiwanq jo’ chanru li naraj li Qaawa’. A’b’an k’e reetal, maji’ naraqe’ li qak’anjel; jo’kan naq ink’a’ toohe’xk’at.

14 Anajwan kik’ulman naq chirix naq oso’jenaq xtib’eleb’ li ke’kute’ sa’ li xam, ut jo’kan ajwi’ li tz’iib’anb’il hu li kikute’ rochb’eeneb’, li xb’eenil aj raqol aatin kichal ut kixaqli chiru laj Alma ut laj Amulek, naq b’ak’b’ileb’; ut kixsak’eb’ chixk’atqeb’ li re rik’in ruq’, ut kixye reheb’: Chirix li k’a’ru xeril, ma teejultika wi’chik re li tenamit a’in, naq te’kute’q sa’ jun li palaw re xam ut chuhil pek?

15 K’ehomaq reetal, nekeril naq moko kiwan ta eewankil chixkolb’aleb’ li ke’kute’ sa’ li xam; chi moko li Dios kixkoleb’ xb’aan naq wankeb’ sa’ laa paab’aal. Ut laj raqol aatin kixsak’eb’ wi’chik chixk’atqeb’ li re, ut kixpatz’: K’a’ pe’ ru nekeye laa’ex?

16 Anajwan laj raqol aatin a’in natz’aqon sa’ xk’anjelil ut xpaab’aal laj Nehor, li kikamsink re laj Gideon.

17 Ut kik’ulman naq laj Alma ut laj Amulek maak’a’ ke’xchaq’b’e wi’; ut a’an kixsak’eb’ wi’chik, ut kixq’axtesiheb’ reheb’ laj taql re te’tz’ape’q sa’ tz’alam.

18 Ut chirix naq tz’apb’ileb’ sa’ tz’alam chiru oxib’ kutan, ke’chal k’iila aj ch’olob’anel chaq’rab’, ut aj raqol aatin, ut aj tij, ut aj tzolonel, li neke’k’amok re lix na’leb’ laj Nehor, ut ke’ok sa’ li tz’alam chirilb’aleb’, ut ke’patz’ink reheb’ chirix k’iila aatin; a’ut maak’a’ ke’xchaq’b’eheb’ wi’.

19 Ut kik’ulman naq kixaqli laj raqol aatin chiruheb’, ut kixye: K’a’ut naq ink’a’ nekechaq’b’e li raatineb’ li tenamit a’in? Ma ink’a’ nekenaw naq wan inwankil cheq’axtesinkil sa’ li raq’ xam? Ut kixtaqlaheb’ chi aatinak; a’b’an maak’a’ ke’chaq’ok wi’.

20 Ut kik’ulman naq xkoheb’ ut ke’xk’amatq lix b’e, a’b’anan wulajaq chik ke’chal wi’chik, ut laj raqol aatin kixsak’eb’ ajwi’ wi’chik chixk’atqeb’ re. Ut ke’chal ajwi’ naab’al, ut ke’xsak’eb’ ut ke’xye: Ma texxaqliiq wi’chik ut teeraq aatin chirix li tenamit a’in, ut teejit li qachaq’rab’? Wi wan xnimal eewankil k’a’ut naq ink’a’ nekekol eerib’?

21 Ut k’iila aatin ke’xye chi jo’kan reheb’, ut ke’xk’uxuxi li ruch re chiruheb’, ut ke’xchuub’aheb’, ut ke’xye: Chan ru too’iloq naq k’eeb’ilo sa’ tojb’a-maak?

22 Ut k’iila k’a’aq re ru xkomon a’in, relik chi yaal, k’iila paay xkomon li k’a’aq re ru a’in ke’xye reheb’; ut chi jo’kan ke’reetz’uheb’ chiru k’iila kutan. Ut ke’risi li tzakemq chiruheb’ re te’tz’okaaq, ut li ha’ re te’chaqiq re; ut ke’xmaq’ chiruheb’ li raq’eb’ re naq t’ust’uuqeb; ut chi jo’kan ke’b’ak’e’ rik’in kawil k’aam, ut ke’tz’ape’ sa’ tz’alam.

23 Ut kik’ulman naq chirix naq ke’xk’ul rahilal chi jo’kan chiru k’iila kutan (ut kiwan sa’ lix kab’laju kutan, sa’ lix laje po, sa’ xlaje chihab’ rawa’b’ejileb’ laj raqol aatin sa’ xb’een lix tenamit laj Nefi) naq li xb’eenil aj raqol aatin sa’ xb’een li ch’och’ Ammonihah ut naab’al reheb’ lix tzolonel ut lix ch’olob’anel chaq’rab’ ke’ok sa’ li tz’alam li b’ak’b’ookeb’ wi’ laj Alma ut laj Amulek rik’in k’aam.

24 Ut li xb’eenil aj raqol aatin kixaqli chiruheb’, ut kixsak’eb’ wi’chik, ut kixye reheb’: Wi wan eerik’in lix wankil li Dios, kolomaq eerib’ chiru li b’ak’leb’ a’in, toja’ ut naq laa’o taqapaab’ naq li Qaawa’ tixsach li tenamit a’in jo’ chanru lee raatin.

25 Ut kik’ulman naq chixjunileb’ xkoheb’ ut ke’xsak’eb’, ut ke’xye ajwi’ li aatin a’an, toj reetal kiwulak laj ch’otonel; ut chirix naq kiraatinaheb’ laj ch’otonel kiwan lix wankil li Dios sa’ xb’een laj Alma ut laj Amulek, ut eb’ a’an ke’wakli ut ke’xaqli chiroq.

26 Ut laj Alma kixjap re chixyeeb’al: Toj jo’q’e taqanumsi li ninqi ch’a’ajkilal a’in, at Qaawa’? At Qaawa’, k’e chaq qametz’ew jo’ chanru li qapaab’aal li wan rik’in li Kristo, toj reetal tookole’q. Ut ke’xt’up li k’aam li b’ak’b’ookeb’ wi’; ut naq ke’ril a’in li tenamit, ke’ok chi eelelik, xb’aan naq chalenaq sa’ xb’eeneb’ xxiweb’ naq te’sache’q.

27 Ut kik’ulman naq q’axal nim xxiweb’ jo’kan naq ke’t’ane’ chi ch’och’, ut ink’a’ ke’xtaw li okeb’aal li na’el chirix li tz’alam; ut li ch’och’ kichiq’ok chi kaw, ut eb’ lix tz’akil li tz’alam ke’jache’ sa’ xyi, jo’kan naq ke’rume’ chi ch’och’; ut li xb’eenil aj raqol aatin, ut eb’ laj ch’olob’anel chaq’rab’, ut laj tij, ut laj tzolonel, li ke’sak’ok chaq re laj Alma ut laj Amulek, ke’kamsiik sa’ lix t’anik.

28 Ut laj Alma ut laj Amulek ke’el chaq sa’ li tz’alam, ut maajun ra ke’xk’ul chaq; xb’aan naq li Qaawa’ kixk’e chaq wankilal reheb’, jo’ chanru lix paab’aaleb’ li kiwan rik’in li Kristo. Ut tikto ke’el chaq sa’ li tz’alam, ut ke’hite’ chirixeb’ lix b’ak’leb’eb’; ut rumb’il chi ch’och’ lix tz’akil li tz’alam, ut ke’kamsiik li junjunq chi aamej li wankeb’ sa’ xyanq xtz’akil, ka’ajwi’ laj Alma ut laj Amulek ink’a’; ut eb’ a’an tikto koxe’okaq sa’ li tenamit.

29 Anajwan eb’ li tenamit chirix rab’inkil jun nimla choqink koxe’xmololi rib’ sa’ aanil re xnawb’al k’a’ut naq kiwan; ut naq ke’ril laj Alma ut laj Amulek chi elk chaq sa’ li tz’alam, ut lix xaqxookil tz’akil rumb’il chi ch’och’, ke’chal xnimaleb’ xxiw, ut ke’eelelik chiru laj Alma ut laj Amulek jo’ chanru junaq chib’aat na’eelelik rochb’eeneb’ li ral chiru wiib’ li kaqkojl; ut chi jo’kan ke’eelelik chiru laj Alma ut laj Amulek.