1 Iwe non ewe fansoun pwe king Leimonai a annuku pwe noun kewe chon angang repwe uta me pwarata usun ekkewe mettoch meinisin minne ra fen kuna usun ewe mettoch.

2 Iwe nupwen ir meinisin ra pwarata usun ekkewe mettoch minne ra fen kuna, iwe i a sinei usun nukucharen Ammon ne tumunu noun kewe penen man, me pwan usun an we pochokun mi napanap ne fiu ngeni ekkewe ir ra kutta ar repwe nieno i, a fokkun ingeno, me apasa: Ennetin, ei a nap seni emon mwan. Nengeni, esap iei i ewe Ngun mi Nap ewe a tinato niwinin tipis mi aweires won ekkei aramas, pokiten ar nii manau?

3 Iwe ra ponueni ewe king, me apasa: Ika pwe i ewe Ngun mi Nap are emon mwan, am ause sinei; nge iei ukukun am mi sinei, pwe i ese tongeni ninnino me ren ekkewe chon koum ngeni ewe king; rese pwan tongeni atoropasa noun ewe king kewe penen man nupwen i mi nom rem, pokiten an angangoch me pochokun mi napanap; iei minne, am aua sinei pwe i emon mi chiechioch ngeni ewe king. Iwe iei, O king, am ause nuku pwe emon mwan a wor an sokkun pochokun mi napanap, pun am aua sinei pwe i ese tongeni ninnino.

4 Iwe iei, nupwen ewe king a rongorong ekkei kapas, a apasa ngeni ir: Iei ua sinei pwe i ewe Ngun mi Nap; me i a feitiw atun ei fansoun pwe epwe tumunu manauemi, pwe usap tongeni nikemino usun ua fen fori ngeni pwiumi kewe. Iei i ewe Ngun mi Nap usun semach kewe ra fen kapas usun.

5 Iei ewe eerenien Leimonai, minne a angei seni seman we, pwe mi wor emon Ngun mi Nap. Inamo ra nuku non emon Ngun mi Nap, ra ekieki pwe met chok ra fori mi pung; nge inamo, Leimonai a poputa ne fokkun nuokus, ren nuokus pwe a fen fori mi muan ne nieno noun kewe chon angang;

6 Pun i a fen nieno chommong me neir pokiten pwir kewe ra fen atoropasa nour kewe penen man me ren ewe nenien konik; iwe iei, pokiten nour kewe penen man ra toropas fetan ra ninnino.

7 Iei ewe eereni an ekkei chon Leiman pwe repwe uta ren ekkewe konikin Sipus pwe repwe atoropasa ekkewe penen man noun ekkewe aramas, pwe ren ewe popun repwe tongeni asueno chommong ekkewe ra toropas fetan ngeni pwisin fonuer we, pun a ew eerenien angemwan me neir.

8 Iwe non ewe fansoun pwe king Leimonai a eisini noun kewe chon angang, a apasa: Ifa i ei mwan ewe a wor an manaman mi napanap?

9 Iwe ra apasa ngeni i: Nengeni, a amwongoni noum kewe oris. Iei ewe king a fen annuku ngeni noun kewe chon angang, me mwen ewe fansoun repwe aunnu konik ngeni ekkewe penen man, pwe repwe amonnata noun kewe oris me chariot, me emmweni i ngeni ewe fonuen Nifai; pun a fen wor ew auchean kametip a fen foruta me non ewe fonuen Nifai, seni semen Leimonai we, ewe kingen unusen ewe fonu.

10 Iei nupwen king Leimonai a rong pwe Ammon a amonnata noun kewe oris me chariot a napeno an ingeno, pokiten nukucharen Ammon, a apasa: Ennetin ese mwo wor emon chon angang me nein nei kewe chon angang meinisin a kon nukuchar usun ei mwan; pun mwo a chechemeni ai kewe annuk meinisin an epwe awesireno.

11 Iei ua ennetin sinei pwe iei i ewe Ngun mi Nap, iwe ua mochen i pwe epwe feito ngeniei, nge use pwaracho ngeni.

12 Iwe non ewe fansoun pwe nupwen Ammon a amonnata ekkewe oris me ekkewe chariot fan iten ewe king me noun kewe chon angang, a feino ngeni ewe king, iwe a kuna pwe nikinikin mesen ewe king a siwin; iei minne ita epwene niwin sefanneuu seni me mwen mesan.

13 Iwe emon me nein noun ewe king kewe chon angang a apasa ngeni i, Rabbanah, minne, a wewe ngeni, fokkun pochokun are king mi napanap, pokiten ra ekieki nour kewe king pwe ir mi fokkun pochokun; iwe iei a apasa ngeni i: Rabbanah, ewe king a mochen pwe en kopwe nometiw.

14 Iei minne Ammon a akunnu inisin ngeni ewe king, me apasa ngeni i: Met ka mochen pwe upwe fori fan itom, O king? Iwe ewe king ese ponueni i ren ukukun ew awa, non napanapen ar fansoun, pun ese sinei met epwe apasa ngeni i.

15 Iwe non ewe fansoun pwe Ammon a apasa ngeni i sefan: Met ka mochen seniei? Nge ewe king ese ponueni i.

16 Iwe non ewe fansoun pwe Ammon, pokiten a ureno ren ewe Ngunun Kot, iei minne a weweiti ekiekin ewe king. Iwe a apasa ngeni i: Met pokiten ka rongorong pwe ua tumunu noum kewe chon angang me noum kewe penen man, me nieno fumon me nein pwir kewe ren ewe aunun me ren ewe ketinas, me pokueno poun ekkoch, ren ai upwe tumunu noum kewe penen man me noum kewe chon angang; nengeni, iei met a esenipato om mairu?

17 Ua apasa ngonuk, met ewe popun, pwe om mairu a fokkun watte? Nengeni, ngang emon mwan, me ngang emon noum chon angang; iei minne, met chok ka mochen minne mi pung, ena ngang upwe fori.

18 Iei nupwen ewe king a rongorong ekkei kapas, a mairu sefan, pun a kuna pwe Ammon a tongeni sinei an ekiek; nge inamo ei, king Leimonai a suki awan, me apasa ngeni i: En ion? En ewe Ngun mi Nap, ewe mi sinei mettoch meinisin?

19 Ammon a ponueni me apasa ngeni i: Esap ngang.

20 Iwe ewe king a apasa: Ifa usun ka sinei ekiekin netipei? Ka tongeni kapas pwaracho, me ureniei usun ekkei mettoch; me pwan ureniei seni minne manaman ka nieno me pokueno poun pwi kewe ekkewe ra atoropasa nei kewe penen man—

21 Iwe iei, ika kopwe ureniei usun ekkei mettoch, met chok ka mochen upwe ngonuk; me ika pwe mi auchea, upwe masok ren nei kewe sounfiu; nge ngang mi sinei pwe ka kon fokkun pochokun nap seni ir meinisin; nge inamo, met chok ka mochen seniei upwe mut ngonuk.

22 Iei Ammon a mirit, nge ese efeiengaw, a apasa ngeni Leimonai: Kopwe ausening ngeni ai kapas, ika upwe urenuk seni minne manaman ua fori ekkei mettoch? Iwe iei ewe mettoch ua mochen senuk.

23 Iwe ewe king a ponueni i, me apasa: Ewer, upwe nuku om kewe kapas meinisin. Iwe iei a tup ren otuputup.

24 Iwe Ammon a poputa ne kapas ngeni i fiti pwaracho, me apasa ngeni i: Ka nuku pwe mi wor emon Kot?

25 Iwe a ponueni, me apasa ngeni i: Ngang use sinei met wewen ena.

26 Iwe mwirin Ammon a apasa: Ka nuku pwe mi wor emon Ngun mi Nap?

27 Iwe a apasa, Ewer.

28 Iwe Ammon a apasa: Iei i Kot. Iwe Ammon a apasa ngeni i sefan: Ka nuku pwe ei Ngun mi Nap, i ewe Kot, a forata mettoch meinisin minne ra nom won nang me won ewe fonufan?

29 Iwe a apasa: Ewer, ua nuku pwe a forata mettoch meinisin minne ra nom non ewe fonufan; nge ngang use sinei ekkewe nang.

30 Iwe Ammon a apasa ngeni i: Ekkewe nang ina ew neni ikewe Kot a nonnom ie me noun kewe chon nang mi fel meinisin.

31 Iwe king Leimonai a apasa: Ei a nom asan ewe fonufan?

32 Iwe Ammon a apasa: Ewer, iwe a nenetiw won ekkewe noun aramas meinisin; me a sinei ekkewe ekiekin me popun netip; pun me ren poun ir meinisin ra foruta seni nepoputan.

33 Iwe king Leimonai a apasa: Ua nuku ekkei mettoch meinisin minne ka apasa. En ka ekkuneto me ren Kot?

34 Ammon a apasa ngeni i: Ngang emon mwan; me aramas me nepoputan a foruta seni napanapen Kot, iwe ua kokko me ren noun we Ngun mi Fel pwe upwe afanafana ekkei mettoch ngeni ekkei aramas, pwe repwe tongeni emmwen ngeni ew mirit usun met minne mi pung me ennet;

35 Iwe och kinikinin ena Ngun a nom rei, minne a ngeniei mirit, me pwan manaman anongonong won ai nuku me mochen minne ra nom non Kot.

36 Iei nupwen Ammon a apasa ekkei kapas, a poputa atun ewe forutan ewe fonufan, me pwan forutan Adam, me a ureni i ekkewe mettoch meinisin usun ewe turutiwen aramas, me apasa sefani me watiw me mwen i ekkewe uruo me ekkewe pukefel mi pin noun ekkewe aramas, minne ekkewe soufos ra fen kapas usun, pwan mwo feitiw ngeni ewe fansoun semer we, Liai, a su seni Jerusalem.

37 Iwe a pwan apasa sefani ngeni ir (pun a apasa ngeni ewe king me ngeni noun kewe chon angang) ekkewe sai meinisin an semer kewe me non ewe fonu pon, me ar kewe riaffou ren echik me kaka, me ar kewe weires, me soposopono.

38 Iwe a pwan apasa sefani ngeni ir usun ekkewe ungeni an Leiman me Lemuel, me ekkewe anuon noun Ishmael, ewer, ar kewe ungeni meinisin a ureni ir; iwe a awewei ngeni ir ekkewe uruo meinisin me ekkewe pukefel seni ewe fansoun Liai a su seni Jerusalem feitiw ngeni ewe fansoun iei.

39 Nge esap ikkei meinisin; pun a awewe ngeni ir ewe kokkotun ngaseno, minne a monneta seni nepoputan ewe fonufan; iwe a pwan pwarano ngeni ir usun ewe wareton Kraist, me ekkewe angang meinisin an ewe Samon a pwarano ngeni ir.

40 Iwe non ewe fansoun pwe mwirin a fen apasa ekkei mettoch meinisin, me awewer ngeni ewe king, pwe ewe king a nuku an kewe kapas meinisin.

41 Iwe a poputa ne sio ngeni ewe Samon, a apasa: O Samon, kopwe umoumoch; anongonong won om umoumoch mi watte minne ka fen aea won ekkewe aramasen Nifai, kopwe aea woi, me nei kewe aramas.

42 Iwe iei, nupwen a apasa ei, a turuno ngeni ewe puun, usun ita a mano.

43 Iwe non ewe fansoun pwe noun kewe chon angang ra angei i me ekieno i ren punuwan we, me okkonatiw won ew pet; iwe a kokkon usun ita a mano ren ukukun ru ran me ru pwin; iwe punuwan we, me noun kewe anuon, me noun kewe fopun ra netipeta won, anongonong won napanapen ekkewe chon Leiman, ra fokkun nonineniti an we mano.