1 Im ālikin men kein kiin̄ Lamonai eaar kōm̧m̧an bwe rijerbal ro an ren jutak im kam̧ool kōn aolep men ko raar loi kōn menin.

2 Im ke eaar m̧ōj aer aolep kam̧ool kōn men ko raar loi, im eaar jeļā kōn tiljek an Ammōn ilo oņaake bwijin in kidu ko an, im barāinwōt kajoor eo an eļap ilo pata ņae ro raar kappukot n̄an m̧an e, eaar bwilōn̄ otem bwilōn̄, im ba: Em̧ool in e ļapļo̧k jān juon em̧m̧an. Lo, ej jab Jetōb Eļap eo in ej jilkintok kaje ko reļļap ioon armej rein, kōnke uror ko aer ke?

3 Im raar uwaak e kiin̄ eo, im ba: Eļan̄n̄e e ej Jetōb Eļap ak juon em̧m̧an, kōmij jab jeļā; ak jon̄an in kōm jeļā, bwe e ej jab maron̄ mej jān rikōjdat ro an kiin̄ eo; rebarāinwōt jab maron̄ kajjeplōklōk bwijin in kidu ko an kiin̄ eo n̄e ej pād ippām; kōn menin, kōm jeļā bwe e ej jeran kiin̄ eo. Im kiiō, O kiin̄, kōmij jab tōmak bwe juon armej ewōr an kajoor eļap āinwōt in, bwe kōm jeļā bwe rej jamin m̧an e.

4 Im kiiō, ke kiin̄ eo eaar ron̄ naan kein, eaar ba n̄an er: Kiiō ijeļā bwe e ej Jetōb Eļap; im eaar wanlaļtak ilo iien in n̄an oņaake mour ko ami, bwe in emaron̄ jab m̧an kom̧ āinwōt iaar ro jeiūm̧i im jātimi. Kiiō en̄in ej Jetōb Eļap eo im ro jemād raar kōnono kake.

5 Kiiō en̄in eaar imminene eo an Lamonai, eo eaar bōk jān jemān, bwe eaar wōr juon Jetōb Eļap. Mekarta n̄e raar tōmak ilo Jetōb Eļap in, raar ļōmņak bwe jabdewōt raar kōm̧m̧ane eaar jim̧we; kōn menin, Lamonai eaar jino n̄an mijak otem mijak, kōn mijak n̄e ab kar kōm̧m̧an bōd ilo m̧an rijerbal ro an.

6 Bwe eaar m̧an elōn̄ iaer kōnke ro jeir im jatier raar kajjeplōklōk bwijin in kidu ko ilo jikin dān eo; im āindein, kōnke rekar kajjeplōklōk bwijin in kidu ko aer kar m̧an er.

7 Kiiō eaar imminene eo an riLeman rein n̄an jutak iturin dān ko in Sebus n̄an kajjeplōklōk bwijin in kidu ko an armej ro, bwe ilo wāween in raar maron̄ lukwarkwareļo̧k elōn̄ bwe ren ejjeplōklōk n̄an āneo āneer make, in ej imminene in rakimi ilubwiljier.

8 Im ālikin men kein kiin̄ Lamonai eaar kajjitōk ippān rijerbal ro an, im ba: Ewi ļein ewōr kajoor rot in eļap ippān?

9 Im raar ba n̄an e: Lo, e ej naajdik o̧o̧j ko am̧. Kiiō kiin̄ eo eaar jiron̄ rijerbal ro an, m̧okta jān iien in kaidaak bwijin in kidu ko aer, bwe rej aikuj kōpooji o̧o̧j ko im jariot ko an, im bōkļo̧k e n̄an āneen Nipai; bwe eaar wōr juon kwōjkwōj eļap kōm̧m̧ane ilo āneen Nipai, jān jemān Lamonai, eo eaar kiin̄ ioon aolepān āneo.

10 Kiiō ke kiin̄ Lamonai eaar ron̄ bwe Ammōn eaar kōpooji o̧o̧j ko an im jariot ko an eaar ļapļo̧k an bwilōn̄, kōnke niknik eo an Ammōn, im ba: Em̧ool eaar jan̄in wōr rijerbal ilubwiljin aolep rijerbal ro aō eaar niknik āinwōt ļein; bwe em̧ool ej keememej aolep kien ko aō n̄an kōm̧m̧ani.

11 Kiiō i kanooj jeļā bwe in ej Jetōb Eļap, im ikōņaan bwe en itok n̄an ippa, ak i jeperan.

12 Im ālikin men kein ke eaar dedeļo̧k an Ammōn kōpooj o̧o̧j ko im jariot ko n̄an kiin̄ eo im rijerbal ro an, eaar deļo̧n̄ļo̧k n̄an kiin̄ eo, im eaar lo bwe paotok eo an kiin̄ eo eaar oktak; kōn menin e nan̄in ro̧o̧l nabōjļo̧k jān im̧aan mejān.

13 Im juon iaan rijerbal ro an kiin̄ eo ej ba n̄an e, Rabbanah, eo, oktan ej, kanooj kajoor ak kiin̄ eļap, kōnke raar watōke kiin̄ ro aer bwe rekanooj kajoor; im āindein eaar ba n̄an e: Rabbanah, kiin̄ eo ekōņaan bwe kwōn pād.

14 Kōn menin Ammōn eaar oktakļo̧k n̄an kiin̄ eo, im eaar ba n̄an e: Ta kwōj kōņaan bwe in kōm̧m̧ane n̄an kwe, O kiin̄? Im kiin̄ eo eaar uwaak e jaab jon̄an iien eo juon awa, ekkar n̄an iien ko aer, bwe eaar jeļā jaab ta en ba n̄an e.

15 Im ālikin men kein Ammōn eaar ba n̄an bar juon alen: Ta kwōj kōņaan jān eō? A kiin̄ eo ej jab uwaak e.

16 Im ālikin men kein Ammōn, kōnke eaar obrak kōn Jetōb an Anij, kōn menin eaar jeļā ļōmņak ko an kiin̄ eo. Im eaar ba n̄an e: Ej ke kōn am̧ kar ron̄ bwe iaar ebbaar n̄an rijerbal ro am̧ im bwijin in kidu ko am̧, im kar m̧an jiljilimjuon iaan ro jeir im jatier kōn buwat eo im kōn jāje eo, im m̧wijitļo̧k pein ro jet, n̄an maron̄ ebbaar n̄an bwijin in kidu ro im rijerbal ro am̧; lo, ej men eo in ke ej kōm̧m̧ani bwilōn̄ kein am̧?

17 Ij ba n̄an eok, ta men in, bwe bwilōn̄ kein am̧ ren kanooj ļap? Lo, n̄aij juon armej, im ij am̧ rijerbal; kōn menin, jabdewōt men eo kwo kōņaan im ejim̧we, men eo inaaj kōm̧m̧an.

18 Kiiō ke kiin̄ eo eaar ron̄ naan kein, eaar bar ļo̧kjānan, bwe eaar lo bwe Ammōn eaar jeļā ļōmņak ko an; a mekarta men in, kiin̄ Lamonai eaar kōpeļļo̧k lo̧n̄iin, im ba n̄an e: Wōn kwe? Kwōj ke Jetōb Eļap eo, eo ejeļā aolep men otemjej?

19 Ammōn eaar uwaak im ba n̄an e: n̄aij jab.

20 Im kiin̄ eo eba: Ekōjkan kwo jeļā ļōmņak ko an buruō? Kwo maron̄ kōnono jab idadiki, im ba n̄an eō kōn men kein, im barāinwōt ba n̄an eō jān kajoor ta kwaar m̧an im m̧wijitļo̧k pā ko pein ro jeiū im jatū raar kajjeplōklōk bwijin in kidu ko aō—

21 Im kiiō, eļan̄n̄e kwōnaaj ba n̄an eō kōn men kein, jabdewōt kwōj kōņaan inaaj lewōj n̄an eok; im eļan̄n̄e emennin aikuj, inaaj baare eok kōn jarin tariņae ko aō; a i jeļā bwe kwe kwōj kajoorļo̧k jān aolep er; mekarta, jabdewōt kwōj kōņaan jān eō inaaj lewōj n̄an eok.

22 Kiiō Ammōn kōnke eaar mālōtlōt, ijoke jab kaammijak, eaar ba n̄an Lamonai: Kwōn eo̧ron̄ ke naan ko aō, eļan̄n̄e ij ba n̄an eok jān kajoor ta ij kōm̧m̧ani men kein? Im en̄in men eo ikōņaan jān eok.

23 Im kiin̄ eo eaar uwaake e, im ba: Aaet, inaaj tōmak aolep naan ko am̧. Im āindein eaar po kōn mālōtlōt.

24 Im Ammōn eaar jino in kōnono n̄an e kōn ejjeļo̧k idadik, im ba n̄an e: Kwōj tōmake ke bwe ewōr juon Anij?

25 Im eaar uwaak, im ba n̄an e: Ij jab jeļā ta meļeļein men in.

26 Innām Ammōn eba: Kwōj tōmak ke bwe ewōr juon Jetōb Eļap?

27 Im eba, Aaet.

28 Im Ammōn eba: En̄in ej Anij. Im Ammōn eaar bar ba n̄an e: Kwōj tōmak ke bwe Jetōb Eļap in, eo ej Anij, eaar kōm̧anm̧an aolep men otemjej ko rej ilo lan̄ im ilo laļ?

29 Im eba: Aaet, ij tōmak bwe Eaar kōm̧anm̧an aolep men otemjej ko rej ilo laļ; ak ij jab jeļā lan̄ ko.

30 Im Ammōn eba n̄an e: Lan̄ ej jikin eo ijo Anij ej jokwe im aolep enjeļ ko An rekwōjarjar.

31 Im kiin̄ Lamonai eba: Ej pād ilōn̄in laļ?

32 Im Ammōn eba: Aaet, im E ej reilaļtak ioon aolep ro nejin armej; im E jeļā aolep ļōmņak ko im kōttōpar ko an bōro; bwe jān Pein raar aolep ejaak jān jinoin.

33 Im kiin̄ Lamonai eba: Ij tōmak aolep men kein kwaar kōnono. Kwe kar jilkintok eok jān Anij ke?

34 Ammōn eba n̄an e: n̄aij juon armej; im armej ilo jinoin kar ejaake ilo nemāmeen Anij, im kar kūr eō jān Jetōb Kwōjarjar eo An n̄an katakin kōn men kein n̄an armej rein, bwe ren maron̄ itok n̄an juon jeļā kōn men eo ejim̧we im m̧ool;

35 Im m̧ōttan eo in Jetōb in ej jokwe ilo n̄a, eo ej letok n̄an eō jeļā, im barāinwōt kajoor ekkar n̄an aō tōmak im ikdeelel ko aō ilo Anij.

36 Kiiō ke Ammōn em̧ōj an ba naan kein, eaar jino jān ejaak eo an laļ, im barāinwōt ejaak eo an Adam, im kar jiron̄ e aolep men ko kōn wōtlo̧k eo an armej, im tipdiki im erļo̧ke im̧aan ļo̧o̧k ko im jeje ko rekwōjarjar an armej ro, ko kar kōnono kaki jān rikanaan ro, em̧ool laļļo̧k n̄an iien eo jemāer, Liai, eaar likūt Jerusalem.

37 Im eaar barāinwōt tipdiki n̄an er (bwe eaar n̄an kiin̄ eo im rijerbal ro an) aolep ito-itak ko an ro jemāer ilo āne jem̧aden, im aolep en̄taan ko aer kōn kwōle im maro, im aer mejaļjaļļo̧k, im men ko āierļo̧k wōt.

38 Im eaar barāinwōt tipdiki n̄an er kōn jum̧ae ko an Leman im Lemuel, im ļōm̧aro nejin Ishmael, aaet, aolep jum̧ae ko aer eaar ba n̄an er; im eaar tipdiki n̄an er aolep ļo̧o̧k ko im jeje ko rekwōjarjar jān iien eo Liai eaar likūt Jerusalem laļļo̧k n̄an iien in.

39 A ejjab aolepān in; bwe eaar tipdiki n̄an er karōk in lo̧mo̧o̧r, eo kar kōpooje jān iien pedped ko an laļ; im eaar barāinwōt kōjjeļāik er kōn itok eo an Kraist, im aolep jerbal ko an Irooj eaar kōm̧m̧an kwaļo̧k n̄an er.

40 Im ālikin men kein ke em̧ōj an kar ba aolep men kein, im kar tipdiki n̄an kiin̄ eo, bwe kiin̄ eo eaar tōmak aolep naan ko an.

41 Im eaar jino kūr n̄an Irooj, im ba: O Irooj, kwōn tūriam̧o; ekkar n̄an bun̄-pāļo̧k in tūriam̧o ko Am̧ ko kwaar kwaļo̧ki ioon armej in Nipai, en wōr ioō, im armej ro aō.

42 Im kiiō, ke eaar ba men in, eaar wōtlo̧k n̄an laļ, āinwōt n̄e eaar mej.

43 Im ālikin men kein rijerbal ro an raar bōk e im ineekļo̧k e ļo̧k n̄an lio pāleen, im kōbabuik e ioon aowej eo; im eaar babu āinwōt n̄e eaar mej ilo iien eo ruo raan im ruo bon̄ aetokan; im lio pāleen, im ļōm̧aro nejin, im kōrā ro nejin raar liaajlo̧ļ ioon e, ālikin wāween an riLeman ro, tūn̄tūn̄ in liaajlo̧ļ e jako eo an.