Lix Hu laj Alma
ralal laj Alma

1 Anajwan kik’ulman naq sa’ li xb’een chihab’ rawa’b’ejileb’ laj raqol aatin sa’ xb’een lix tenamit laj Nefi, chirix chik li kutan a’in, naq ak xikenaq li rey aj Mosiah sa’ li b’e naxik wi’ chixjunil li ruchich’och’, ut chaab’il li pleet kipleetik wi’, rik’in b’eek chi tiik chiru li Dios, ut maajun kixkanab’ chi awa’b’ejink sa’ xna’aj, a’b’anan kixxaqab’eb’ li chaq’rab’, ut k’ulub’anb’ileb’ xb’aaneb’ li tenamit; jo’kan naq kiteneb’aak sa’ xb’eeneb’ xpaab’ankileb’ li chaq’rab’ li kixk’uub’ chaq.

2 Ut kik’ulman naq sa’ li xb’een chihab’ rawa’b’ejil laj Alma sa’ li raqleb’aal aatin, kik’ame’ jun winq chiru re taaraqe’q aatin chirix, jun winq nim xxaqam, ut na’no ru xb’aan xnimal xmetz’ew.

3 Ut a’an ak xb’eeni chaq rib’ sa’ xyanqeb’ li tenamit, re xjultikankil chiruheb’ li k’a’ru raatin li Dios naq naxye a’an, ut kaw xch’ool chixwech’b’al rix li iglees; kixch’olob’ chiru li tenamit naq li junjunq chi aj tij ut aj tzolonel tento tixsik’ rahe’k xb’aan li tenamit; ut moko tento ta raj naq te’k’anjelaq rik’ineb’ li ruq’, tento raj b’an naq taak’ehe’q li k’a’ru taak’anjelaq reheb’ xb’aan li tenamit.

4 Ut kixch’olob’ ajwi’ chiru li tenamit naq chixjunileb’ li winq te’kole’q sa’ li roso’jik kutan, ut naq moko na’aje’ ta naq te’xuwaq chi moko naq te’siksotq, te’ruuq raj b’an chixtaqsinkil xjolomeb’ ut te’saho’q raj sa’ xch’ool; xb’aan naq li Qaawa’ kixyo’ob’tesi chaq chixjunileb’ li winq, ut jo’kan ajwi’ kixtojeb’ chaq rix chixjunileb’ li winq; ut, sa’ roso’jik, chixjunileb’ li winq te’wanq xyu’am chi junelik.

5 Ut kik’ulman naq k’a’jo’ naq kixk’ut li k’a’aq re ru a’in, jo’kan naq naab’al ke’paab’ank re li raatin, maak’a’jo’ xk’ihaleb’, jo’kan naq ke’ok chixtenq’ankil rik’in li nak’anjelak re, ut chixk’eeb’al tumin re.

6 Ut a’an ki’ok chi taqsiik sa’ xq’etq’etil xch’ool, ut chixk’eeb’al aq’ej chirix li q’axal terto xtz’aq, relik chi yaal, ki’ok ajwi’ chixxaqab’ankil jun li iglees jo’ chanru lix jultikahom.

7 Ut kik’ulman, naq yoo chi xik re jultikank aatin chiruheb’ li neke’paab’ank re li raatin, kixk’ul jun li winq li nawan sa’ lix iglees li Dios; relik chi yaal, jun reheb’ lix tzoloneleb’; ut ki’ok chixwech’b’al chi kaw, re naq taaruuq tixjalb’ehiheb’ li ani wankeb’ sa’ li iglees; a’b’an li winq kixxaqab’ rib’ chiru, ut kixtij rik’in li raatin li Dios.

8 Anajwan laj Gideon xk’ab’a’ li winq; ut a’an li kiwan chaq choq’ k’anjeleb’aal sa’ ruq’ li Dios sa’ xkolb’al lix tenamit laj Limhi chiru li moosil.

9 Anajwan, rik’in naq laj Gideon kixxaqab’ rib’ chiru rik’in li raatin li Dios, kijosq’o’ rik’in laj Gideon, ut kixb’otz’ lix yok’leb’ ch’iich’ ut ki’ok chixsak’b’al. Anajwan laj Gideon ak ch’a’ajkilanb’il xb’aan xk’ihal xchihab’, jo’kan naq ink’a’ kiru chixkuyb’al lix lob’, jo’kan naq kikamsiik rik’in li yok’leb’ ch’iich’.

10 Ut li winq li kikamsink re kichape’ xb’aaneb’ li wankeb’ sa’ li iglees, ut kik’ame’ chiru laj Alma, re taaraqe’q aatin chirix jo’ chanru li maak li kixb’aanu chaq.

11 Ut kik’ulman naq a’an kixaqli chiru laj Alma ut ki’aatinak re xkolb’al rib’ chi k’a’jo’ xkawilal xch’ool.

12 A’b’an laj Alma kixye re: K’e reetal, a’in xb’een wa na’oksiik wi’ li tijok chi tojb’il sa’ xyanq li tenamit a’in. Ut k’e reetal, moko ka’aj ta wi’ wan aamaak rik’in li tijok chi tojb’il, kayal b’an ajwi’ aaq’e chixminb’al rik’in li yok’leb’ ch’iich’; ut wi ta taamine’q li tijok chi tojb’il sa’ xyanq li tenamit a’in, tixk’am raj chaq lix sachlijikeb’ chi junajwa.

13 Ut laa’at kahoy xkik’el jun li winq tiik xch’ool, relik chi yaal, jun li winq li xb’aanunk re naab’al li chaab’ilal sa’ xyanq li tenamit a’in; ut wi ta taqakol aayu’am, taachalq raj xkik’el sa’ qab’een re reeqajunkil.

14 Jo’kan ut, teneb’anb’il li kamk sa’ aab’een, jo’ chanru li chaq’rab’ li k’eeb’il qe xb’aan laj Mosiah, li kiwan chaq choq’ xraqik li qarey, ut k’ulub’anb’il xb’aan li tenamit a’in; jo’kan naq li tenamit a’in tento te’xpaab’ li chaq’rab’.

15 Ut kik’ulman naq ke’xchap; ut aj Nehor xk’ab’a’; ut ke’xk’am sa’ xb’een li tzuul Manti, ut aran kiteneb’aak xyeeb’al, malaj ut kixye xyaalal, chiru li choxa ut li ch’och’, naq li k’a’ru kixk’ut chaq chiru li tenamit moko wan ta sa’ xyaalal rik’in li raatin li Dios; ut aran kixk’ul jun li xutaanal kamk.

16 A’b’anan, a’in moko kixk’e ta xraqik lix jek’inkil li tijok chi tojb’il chiru li ch’och’; xb’aan naq ke’wan naab’al li neke’rahok re li jo’maajo’il k’a’aq re ru re li ruchich’och’, ut eb’ a’an xkoheb’ chixjultikankil li b’alaq’il tzol’leb’; ut a’in ke’xb’aanu re te’bihomo’q ut te’nimaaq ru.

17 A’b’anan moko ke’xkanab’ ta rib’ chi tik’ti’ik, wi ta taanawmanq ru, xb’aan xxuwankil li chaq’rab’; xb’aan naq eb’ laj tik’ti’ neke’xk’ul xtojb’a-maak; jo’kan naq neke’xpak’ jultikank aatin jo’ chanru lix paab’ahomeb’; anajwan ut li chaq’rab’ maajun xwankil naru nawan sa’ xb’een junaq winq chirix lix paab’ahom.

18 Ut moko ke’xkanab’ ta rib’ chi elq’ak, xb’aan xuwankil li chaq’rab’, xb’aan naq nak’ehe’ li tojb’a-maak xb’aan a’an; chi moko ke’xkanab’ rib’ chi maq’ok, chi moko chi kamsink, xb’aan naq li ani nakamsin, a’ li kamk naxk’ul choq’ tojb’a-maak.

19 A’ut kik’ulman naq eb’ li ani ink’a’ neke’wan sa’ lix iglees li Dios ke’ok chixrahob’tesinkileb’ li ani neke’wan sa’ lix iglees li Dios, ut ke’xk’ul chaq lix k’ab’a’ li Kristo sa’ xb’eeneb’.

20 Relik chi yaal, ke’xrahob’tesiheb’, ut ke’xtawasiheb’ rik’in li k’iila paay chi aatin, ut a’in xb’aan xtuulanileb’ xch’ool; xb’aan naq ink’a’ neke’ril rib’ rik’in q’etq’etil, ut xb’aan naq neke’xsihi li raatin li Dios chirib’ileb’ rib’, chi maak’a’ tumin ut chi maak’a’ xtz’aq.

21 Anajwan wan jun li chaq’rab’ q’axal kaw sa’ xyanqeb’ li ani wankeb’ sa’ li iglees, naq maajun winq li wan sa’ iglees, taawakliiq ut tixrahob’tesiheb’ li moko neke’wan ta sa’ li iglees, ut naq maajun rahob’tesink taawanq sa’ xyanqeb’ chirib’ileb’ rib’.

22 A’b’anan, ke’wan naab’al sa’ xyanqeb’ li ke’ok chixq’etq’etinkil rib’, ut chi wech’ok rik’in josq’il rik’ineb’ li xik’ neke’ilok reheb’, toj reetal naq ki’ux li sak’ok-ib’; relik chi yaal, neke’xsak’ rib’ chirib’ileb’ rib’ rik’in xmoch’ol li ruq’eb’.

23 Anajwan kiwan a’in sa’ xkab’ chihab’ rawa’b’ejil laj Alma, ut xb’aan a’an kiwan naab’al li ch’a’ajkilal choq’ re li iglees; relik chi yaal, xb’aan a’an kiwan naab’al li yale’k-ix rik’in li iglees.

24 Xb’aan naq ke’kawu raameb’ naab’al, ut kisachman reetalil lix k’ab’a’eb’, jo’kan naq moko jultikanb’ileb’ ta chik sa’ xyanq lix tenamit li Dios. Ut jo’kan ajwi’ naab’al ke’risi chaq rib’ sa’ xyanqeb’.

25 Anajwan, a’in kiwan choq’ nimla yale’k-ix choq’ reheb’ li xaqxookeb’ chi kaw sa’ li paab’aal; a’b’anan, eb’ a’an ke’wan chi xaqxo junelik ut chi ink’a’ neke’eek’an sa’ xpaab’ankileb’ lix taqlahom li Dios; ut ke’xnumsi rik’in xkuyumeb’ li rahob’tesink li kituub’aman sa’ xb’eeneb’.

26 Ut naq eb’ laj tij ke’xkanab’ xk’anjel re xk’eeb’al li raatin li Dios reheb’ li tenamit, eb’ li tenamit ke’xkanab’ ajwi’ xk’anjeleb’ re rab’inkil li raatin li Dios. Ut chirix naq eb’ laj tij ke’xjek’i li raatin li Dios reheb’, chixjunileb’ ke’sutq’i wi’chik sa’ xk’anjeleb’ chi yalb’ileb’ xq’e; ut laj tij moko naxnima ta rib’ chiruheb’ li neke’ab’in re; xb’aan naq laj jultikanel moko chaab’il ta wi’chik chiru laj ab’inel, chi moko chaab’il wi’chik laj tzolonel chiru li natzolok; ut chi jo’kan juntaq’eeteb’ chixjunil, ut chixjunileb’ ke’k’anjelak, li junjunq chi winq jo’ chanru xkawilal.

27 Ut ke’xk’e xkomon li k’a’ru reheb’, li junjunq chi winq jo’ chanru li wan re, reheb’ li neb’a’, ut li maak’a’ wan re, ut li yaj ut li tawasinb’il; ut ink’a’ neke’xtiqib’ rib’ rik’in aq’ej terto xtz’aq, a’ut aj ajeb’ li ru ut sa rilb’aleb’.

28 Ut chi jo’kan ke’xtuqub’ li na’uxman sa’ li iglees; ut chi jo’kan ke’ok wi’chik chi wank rajlal sa’ tuqtuukilal, maak’a’ naxye anchal li rahob’tesink neke’xk’ul.

29 Ut anajwan, sa’ xk’ab’a’ lix kawilal li iglees, q’axal ke’ok chi b’ihomo’k, ut kiwan xnaab’alil chixjunil li k’a’aq re ru li b’arwan ajb’il ru xb’aaneb’—xnaab’alil lix ketomq ut lix teep chi xul, ut li xul nimob’resinb’il xtib’eleb’ li jar paay wan, ut jo’kan ajwi’ xnaab’alil li iyaj nak’uxman, ut li oor, ut li plaat, ut k’a’aq re ru terto xtz’aq, ut xnaab’alil li lemtz’ t’ikr ut li q’unal t’ikr b’aqb’il chi chaab’il, ut li k’iila paay chi chaab’il t’ikr li moko utz’u’ujinb’il ta.

30 Ut chi jo’kan, sa’ li usaak li wankeb’ wi’, ink’a’ neke’risi li ani t’ust’u, malaj li te’tz’okaaq, malaj li te’chaqiq re, malaj li yajeb’, malaj li moko ch’olaninb’ileb’ ta; ut ink’a’ ke’xk’e xch’ooleb’ chirix li b’ihomal; jo’kan naq aj k’ehoneleb’ re chixjunil, jo’ tiix jo’ saaj, jo’ moos jo’ li ach’ab’anb’il, jo’ winq jo’ ixq, maak’a’ naxye ma maa’aniheb’ sa’ li paab’aal malaj wankeb’ sa’ li paab’aal, moko tiib’il ta ru anihaq chirix li ani neke’ajok tenq’aak.

31 Ut chi jo’kan ke’usa ut q’axal wi’chik ke’b’ihomo’ chiruheb’ li moko wankeb’ ta sa’ lix igleeseb’ a’an.

32 Xb’aan naq eb’ li moko neke’wan ta sa’ lix iglees neke’xk’e xch’ool rik’in li tuulak, ut rik’in loq’onink pak’b’il dios malaj li q’emal, ut rik’in jo’maajo’il aatin, ut rik’in kaqalink ut wech’ij-ib’; tiqtookeb’ rik’in aq’ej terto xtz’aq; taqsinb’ileb’ sa’ xq’etq’etileb’ li ru; rik’in rahob’tesink, tik’ti’ik, elq’ak, maq’ok, xb’aanunkil ko’b’eetak yumb’eetak, ut kamsink, ut li k’iila paay chi maa’usilal; a’b’anan kik’anjelaman li chaq’rab’ sa’ xb’een chixjunileb’ li ke’q’etok re, a’ yaal li kiru xb’aanunkil.

33 Ut kik’ulman naq rik’in xk’anjelankil li chaq’rab’ chi jo’kan sa’ xb’eeneb’, re tixk’ul li junjunq chi winq a’ yaal k’a’ru xb’aanuhom, ke’xch’anab’ b’ayaq rib’, ut moko ke’xkanab’ ta rib’ chixb’aanunkil junaq maa’usilal wi taanawmanq ru; jo’kan naq kiwan naab’al li tuqtuukilal sa’ xyanq lix tenamit laj Nefi toj kixtaw li ro’ chihab’ rawa’b’ejileb’ laj raqol aatin.