1 Im ālikin men kein ke em̧ōj aer kajutak kabun̄ eo ilo āneo, kiin̄ Lamonai eaar kōņaan bwe Ammōn en ilo̧k ippān n̄an āneen Nipai, bwe en maron̄ kwaļo̧k n̄an e jemān.

2 Im ainikien Irooj eaar itok n̄an Ammōn, im ba: Kwōn jab naaj wanlōn̄ļo̧k n̄an āneen Nipai, bwe lo, kiin̄ eo enaaj kappukot mour eo am̧; a kwōnaaj ilo̧k n̄an āneen Middonai; bwe lo, ļeo jatūm̧ Aron, im barāinwōt Mulokai im Amma repād ilo kalbuuj.

3 Kiiō ālikin men kein ke Ammōn eaar ron̄ men in, eaar ba n̄an Lamonai: Lo, ļeo jatū im ļōm̧aro jeiū im jatū repād ilo kalbuuj ilo Middonai, im ij etal bwe in maron̄ kōtļo̧k er.

4 Kiiō Lamonai eaar ba n̄an Ammōn: I jeļā, ilo kajoor an Irooj kwo m̧aron̄ kōm̧m̧an aolep men. A lo, inaaj ilo̧k ippam̧ n̄an āneen Middonai; bwe kiin̄ an āneen Middonai, eo etan ej Antiomno, ej juon jera; kōn menin ij ilo̧k n̄an āneen Middonai, bwe imaron̄ karreel kiin̄ eo an āneo, im enaaj kadiwōjļo̧k ro jeiūm̧ im jatūm̧ jān kalbuuj. Kiiō Lamonai eaar ba n̄an e: Wōn eaar jiron̄ eok bwe ļōm̧aro jeiūm̧ im jatūm̧ repād ilo kalbuuj?

5 Im Ammōn eba n̄an e: Ejjeļo̧k juon eaar jiron̄ eō, ijello̧kun wōt Anij; im Eaar ba n̄an eō—Etal im kōtļo̧k ļōm̧aro jeiūm̧ im jatūm̧, bwe repād ilo kalbuuj ilo āneen Middonai.

6 Kiiō ke Lamonai eaar ron̄ men in eaar kōm̧m̧an bwe rijerbal ro an rej kōpooje o̧o̧j ko an im jariot ko.

7 Im eba n̄an Ammōn: Itok, inaaj ilo̧k ippam̧ laļļo̧k n̄an āneen Middonai, im ijeņ inaaj akweļap ippān kiin̄ eo bwe en kadiwōjļo̧k ļōm̧aro jeiūm̧ im jatūm̧ jān kalbuuj.

8 Im ālikin men kein ke Ammōn im Lamonai raar ito-itak n̄an ijo, raar iioon jemān Lamonai, eo eaar kiin̄ ioon aolepān āneo.

9 Im lo, jemān Lamonai eba n̄an e: Etke kwaar itok jaab n̄an kwōjkwōj eo ilo raan eo eļap ke iaar kōm̧m̧an juon kwōjkwōj n̄an ļōm̧aro nejū, im n̄an armej ro aō?

10 Im e barāinwōt ba: n̄an ia kwōj etal ippān riNipai in, eo ej juon iaan ro nejin ririab eo?

11 Im ālikin men kein Lamonai eaar ba n̄an e n̄an ia ej etal, bwe eaar mijak n̄an kainepataik e.

12 Im eaar barāinwōt tipdiki n̄an e aolep un ko bwe en pād wōt ilo aelōn̄ eo an make, bwe e e eaar jab etal n̄an jemān n̄an kwōjkwōj eo eaar kōpooje.

13 Im ke Lamonai eaar tipdiki n̄an e aolep men kein, lo, n̄an bwilōn̄ eo an, jemān eaar illu ippān, im ba: Lamonai kwōnaaj ilo̧k n̄an kōtļo̧k riNipai rein, ro ren nejin ririab eo. Lo, eaar kowadon̄ e ro jemād; im kiiō rein nejin rej barāinwōt itok ilubwiljid bwe ren maron̄, kōn aer etao im riab ko aer, m̧oņe kōj, bwe ren maron̄ bar kowadon̄e kōj jān men ko m̧weied.

14 Kiiō jemān Lamonai eaar jiron̄ e bwe en jek Ammōn kōn jāje eo. Im eaar barāinwōt jiron̄ e bwe en jab ilo̧k n̄an āneen Middonai, ak bwe en ro̧o̧l ippān n̄an āneen Ishmael.

15 A Lamonai eaar ba n̄an e: I ban m̧an Ammōn, barāinwōt ijjamin naaj ro̧o̧lļo̧k n̄an āneen Ishmael, a ij etal n̄an āneen Middonai bwe in maron̄ kōtļo̧k ļōm̧aro jein im jatin Ammōn, bwe i jeļā bwe ren armej jim̧we im rikanaan ekwōjarjar an Anij eo em̧ool.

16 Kiiō ke jemān eaar ron̄ naan kein, eaar illu ippān, im eaar nōōr jāje eo an bwe en maron̄ jek e n̄an laļ.

17 A Ammōn eaar jutak im ba n̄an e: Lo, kwo jamin naaj jek ļein nejūm̧; mekarta, enaaj kar em̧m̧anļo̧k n̄e en kar wōtlo̧k jān kwe, bwe lo, eaar ukeļo̧k jān jero̧wiwi ko an; ak n̄e kwōj wōtlo̧k ilo iien in, ilo am̧ illu, kwōj jab maron̄ in lo lo̧mo̧o̧r.

18 Im bar juon alen, bwe e aorōk bwe kwōn jab bōrokadu; bwe eļan̄n̄e kwōnaaj jek ļeo nejūm̧, e kōnke ejjeļo̧k ruōn, bōtōktōkin enaaj kūr jān bwidej n̄an Irooj an Anij, n̄an idenoņe bwe en itok ioom̧; im bōlen kwo m̧aron̄ m̧wijkōk jān jetōb eo am̧.

19 Kiiō ke Ammōn eaar ba naan kein n̄an e, eaar uwaak e, im ba: I jeļā bwe n̄e inaaj jek ļein nejū, bwe inaaj kōto̧o̧rļo̧k bōtōktōk ejjeļo̧k ruōn; bwe ej kwe eo eaar kappukot n̄an ko̧kkure e.

20 Im eaar erļo̧keļo̧k pein n̄an jek Ammōn. A Ammōn eaar jutak ņae jekjek ko an, im barāinwōt jek pein bwe en jab maron̄ kōjerbal e.

21 Kiiō ke kiin̄ eo eaar lo bwe Ammōn emaron̄ m̧an e, eaar jino n̄an akweļap ippān Ammōn bwe en dāpij wōt mour eo an.

22 A Ammōn eaar kotak jāje eo an, im ba n̄an e: Lo, inaaj m̧an eok ijello̧kun wōt kōnke kwōnaaj letok n̄an eō bwe ļōm̧aro jeiū im jatū ren diwōjļo̧k jān kalbuuj.

23 Kiiō kiin̄ eo, kōnke eaar mijak n̄e naaj kar bōk mour eo an, eba: Eļan̄n̄e kwōnaaj dāpij mour eo aō inaaj lewōj n̄an eok jabdewōt kwōnaaj kajjitōk, em̧ool n̄an jimattan in aelōn̄ in.

24 Kiiō ke Ammōn eaar lo bwe eaar kōm̧m̧an ioon kiin̄ eo erūtto ekkar n̄an an kōņaan, eaar ba n̄an e: Eļan̄n̄e kwōnaaj leļo̧k n̄an ļōm̧aro jeiū im jatū bwe ren maron̄ diwōjļo̧k jān kalbuuj, im barāinwōt bwe Lamonai en bōk wōt aelōn̄ in kiin̄ eo an, im bwe kwo jamin inepata ippān, ak naaj leļo̧k n̄an e bwe en maron̄ kōm̧m̧an ekkar n̄an kōņaan ko an make ilo jabdewōt men ej ļōmņak e, innām inaaj kōtļo̧k eok; n̄e jaab inaaj jek eok ļo̧k n̄an laļ.

25 Kiiō ke Ammōn eaar ba naan kein, kiin̄ eo eaar jino m̧ōņōņō kōnke mour eo an.

26 Im ke eaar lo bwe Ammōn eaar ejjeļo̧k an ikdeelel n̄an ko̧kkure e, im ke eaar barāinwōt lo iakwe eo eļap ilo e n̄an ļeo nejin Lamonai, eaar bwilōn̄ otem bwilōn̄, im ba: Kōnke en̄in aolep men ko kwaar kōņaan, bwe in kōtļo̧k ro jeiūm̧ im jatūm̧, im kōtļo̧k bwe ļein nejū Lamonai en bōk wōt aelōn̄ in kiin̄ eo an, lo, inaaj kōtļo̧k n̄an eok bwe ļein nejū en bōk aelōn̄ in kiin̄ eo an jān iien im indeeo; im inaaj jamin naaj bar irooj ioon—

27 Im inaaj barāinwōt lewōj n̄an eok bwe ļōm̧aro jeiūm̧ im jatūm̧ ren diwōjļo̧k jān kalbuuj, im kwe im ļōm̧aro jeiūm̧ im jatūm̧ maron̄ ilo̧k n̄an ippa, ilo aelōn̄ in kiin̄ eo aō; bwe inaaj kanooj ikdeelel in lo kom̧. Bwe kiin̄ eo eaar kanooj bwilōn̄ kōn naan ko eaar kōnono, im barāinwōt kōn naan ko kar kōnono jān ļeo nejin Lamonai, kōn menin eaar kōņaan jeļā kaki.

28 Im ālikin men kein Ammōn im Lamonai raar etal wōt ilo ito-itak eo aer ļo̧k n̄an āneen Middonai. Im Lamonai eaar lo jouj ilo mejān kiin̄ eo an āneo; kōn menin ļōm̧aro jein im jatin Ammōn kar bōktok er jān kalbuuj.

29 Im ke Ammōn eaar iioon er eaar būrom̧ōj otem būrom̧ōj, bwe lo raar keelwaan, im kilier raar jorrāān otem jorrāān kōnke raar lokjak kōn to ko reppen. Im barāinwōt raar en̄taan kōn kwōle, maro, im aolep mennin kaen̄taanan otemjeļo̧k; mekarta raar ineem̧m̧an ilo aolep en̄taan ko aer.

30 Im, āinwōt eaar waļo̧k, eaar aer jem̧ļo̧k n̄an kar wōtlo̧k ilo pein armej eo epen burueer im kijn̄en̄e kōnwaer ļo̧k; kōn menin rej jamin kar eo̧ron̄ naan ko aer, im raar kokakļo̧k er, im kar den̄ļo̧ke er, im kar lukwarkwar er jān em̧ n̄an em̧, im jān jikin n̄an jikin, em̧ool m̧ae iien rej tōkeakļo̧k āneen Middonai; im ijo kar bōk er im joļo̧k er ilo kalbuuj, im rekar lokjak kōn to ko rej pen, im likut ilo kalbuuj ium̧win elōn̄ raan ko, im kar kōtļo̧k er jān Lamonai im Ammōn.