1 Ut kik’ulman naq chirix naq ke’xxaqab’ jun li iglees sa’ li ch’och’ a’an, naq li rey aj Lamoni kiraj naq laj Ammon taaxik chirix sa’ li ch’och’ Nefi, re taaruuq chixk’utb’al chiru lix yuwa’.

2 Ut lix yaab’ xkux li Qaawa’ kichal rik’in laj Ammon, ut kixye: Laa’at moko tattaqe’q ta sa’ li ch’och’ Nefi, xb’aan naq k’e reetal, li rey tixsik’ risinkil aayu’am; a’b’an tatxik sa’ li ch’och’ Middoni, xb’aan naq k’e reetal, laj Aaron laa was, ut jo’kaneb’ ajwi’ laj Muloki ut laj Ammah, wankeb’ sa’ tz’alam.

3 Anajwan kik’ulman naq chirix naq laj Ammon kirab’i a’in, kixye re laj Lamoni: K’e reetal, li was ut eb’ lin komon wankeb’ sa’ tz’alam aran Middoni, ut xik we re taaruuq tinwach’ab’eb’.

4 Anajwan laj Lamoni kixye re laj Ammon: Ninnaw rik’in lix metz’ew li Qaawa’ nakatru chixb’aanunkil chixjunil li k’a’aq re ru. A’ut k’e reetal, laa’in tinxik chawix sa’ li ch’och’ Middoni; xb’aan naq li rey sa’ li ch’och’ Middoni, aj Antiomno xk’ab’a’, wan sa’ chaab’ilal wik’in; jo’kan naq tinxik sa’ li ch’och’ Middoni, re tinsahob’resi xch’ool li rey sa’ li ch’och’ a’an, ut a’an taarisiheb’ chaq sa’ tz’alam laa komon. Anajwan laj Lamoni kixye re: Ani xyehok aawe naq eb’ laa komon wankeb’ sa’ tz’alam?

5 Ut laj Ammon kixye re: Maa’ani xyehok we, ka’ajwi’ li Dios; ut a’an kixye we: Ayu ut ach’ab’eb’ laa komon, xb’aan naq wankeb’ chi preexil sa’ li ch’och’ Middoni.

6 Ut naq laj Lamoni kirab’i a’in kixtaqla naq eb’ lix moos te’xkawresiheb’ lix kawaay ut lix kareet.

7 Ut kixye re laj Ammon: Kim, tinxik chawix taq’a sa’ li ch’och’ Middoni, ut aran tintz’aamanq chiru li rey re taarisiheb’ chaq laa komon sa’ tz’alam.

8 Ut naq yookeb’ laj Ammon ut laj Lamoni chi b’eek aran, kik’ulman naq ke’xk’ul lix yuwa’ laj Lamoni, li wan choq’ rey sa’ xb’een chixjunil li ch’och’.

9 Ut k’ehomaq reetal, lix yuwa’ laj Lamoni kixye re: K’a’ut naq ink’a’ katchal sa’ li ninq’e sa’ li nimla kutan a’an naq kinb’aanu jun li ninq’e choq’ reheb’ li walal, ut choq’ reheb’ lin tenamit?

10 Ut kixye ajwi’: B’ar xik aawe rik’in laj Nefita a’in, a’an xkomoneb’ ralal xk’ajol jun aj tik’ti’?

11 Ut kik’ulman naq laj Lamoni kixnumsi resil re b’ar taaxik, xb’aan naq kixxuwa xk’eeb’al xjosq’il.

12 Ut kixye ajwi’ re k’a’ut naq kikana chaq sa’ li rawa’b’ejihom a’an, ut moko xko’o ta rik’in lix yuwa’ sa’ li ninq’e li kixkawresi chaq.

13 Ut anajwan chirix naq laj Lamoni kixnumsi re resil chixjunil li k’a’aq re ru a’in, k’ehomaq reetal, sachso xch’ool kikana chirilb’al naq lix yuwa’ kijosq’o’ rik’in, ut kixye: At Lamoni, xik aawe chirach’ab’ankileb’ laj Nefita a’in, a’aneb’ ralal xk’ajol jun aj tik’ti’. K’e reetal, a’an ki’elq’ak chiruheb’ li qayuwa’; ut anajwan eb’ li ralal xk’ajol chalenaqeb’ ajwi’ sa’ qayanq re naq te’ruuq, rik’in xseeb’aleb’ ut xtik’ti’eb’, chiqab’alaq’inkil, re naq te’ruuq wi’chik chirelq’ankil chiqu li k’a’ru qe.

14 Anajwan lix yuwa’ laj Lamoni kixtaqla a’an naq tixkamsi laj Ammon rik’in li yok’leb’ ch’iich’. Ut kixtaqla ajwi’ naq ink’a’ taaxik sa’ li ch’och’ Middoni, naq taasutq’iiq b’an chirix a’an sa’ li ch’och’ Ismael.

15 A’b’an laj Lamoni kixye re: Ink’a’ tinkamsi laj Ammon, chi moko tinsutq’iiq sa’ li ch’och’ Ismael, xik b’an we sa’ li ch’och’ Middoni re tinruuq chirach’ab’ankileb’ lix komon laj Ammon, xb’aan naq ninnaw naq a’aneb’ tiikil winqeb’ ut santil profeet chiru li tz’aqal Dios.

16 Anajwan naq kirab’i lix yuwa’ li aatin a’in, kijosq’o’ rik’in, ut kixb’otz’ lix yok’leb’ ch’iich’ re taaruuq chixt’anb’al chi ch’och’.

17 A’b’an laj Ammon kixxaqab’ rib’ chi uub’ej ut kixye re: K’e reetal, moko taakamsi ta laa walal; a’b’anan us raj wi’chik naq taat’ane’q a’an chawu laa’at, xb’aan naq k’e reetal, a’an xjal xk’a’uxl chirix lix maak; a’ut wi ta laa’at tatt’ane’q sa’ li hoonal a’in, sa’ laa josq’il, moko taaruuq ta laa waam chi kole’k.

18 Ut jo’kan wi’chik, aajel ru naq moko taab’aanu ta; xb’aan naq wi taakamsi laa walal, rik’in naq a’an jun winq maak’a’ xmaak, taa’elajinq raj chaq chi ch’och’ lix kik’el chiru li Qaawa’ lix Dios, re taa’eeqajumanq sa’ aab’een; ut maare taasachq raj aawaam chawu.

19 Anajwan chirix naq laj Ammon kixye li aatin a’in re, a’an kichaq’ok chiru, ut kixye: Ninnaw naq wi ta tinkamsi li walal, tinhoy raj li kik’ maak’a’ xmaak; xb’aan naq laa’at li katsik’ok re xsachb’al.

20 Ut a’an kixye’ li ruq’ re xkamsinkil laj Ammon. A’b’an laj Ammon kixxaqab’ rib’ chiru lix lob’, ut jo’kan ajwi’ kixsak’ lix tel jo’kan naq ink’a’ kiru chiroksinkil.

21 Anajwan naq kiril li rey naq laj Ammon taaruuq chixkamsinkil, ki’ok chixtz’aamankil chiru laj Ammon naq tixkol lix yu’am.

22 A’b’an laj Ammon kixtaqsi lix yok’leb’ ch’iich’, ut kixye re: K’e reetal, tatinsak’ wi ink’a’ nakak’e we naq te’isiiq chaq lin komon sa’ tz’alam.

23 Anajwan li rey, xb’aan xxuwankil naq taasachq lix yu’am, kixye: Wi taakol inyu’am laa’in tink’e aawe yalaq k’a’ru taapatz’, toj xyijach lin awa’b’ejihom.

24 Anajwan naq kiril laj Ammon naq kixb’aanu chaq re li tiixil rey jo’ chanru kiraj, kixye re: Wi taak’e naq te’isiiq chaq inkomon sa’ tz’alam, ut jo’kan ajwi’ naq laj Lamoni taakanaaq rik’in li rawa’b’ejihom, ut naq moko ra ta taawil a’an, naq taakanab’ b’an re tixb’aanu jo’ chanru li naraj sa’ yalaq k’a’ru naxk’oxla, rik’in a’an tinkol aayu’am; wi b’an ink’a’, tatint’an chi ch’och’.

25 Anajwan chirix naq laj Ammon kixye li aatin a’in, li rey ki’ok chi saho’k sa’ xch’ool xb’aan xyu’am.

26 Ut naq kiril naq laj Ammon maajun li rajom re xsachb’al, ut naq kiril ajwi’ li nimla rahok naxra wi’ laj Lamoni li ralal, kisach xch’ool chi numtajenaq, ut kixye: Sa’ xk’ab’a’ naq ka’ajwi’ a’in li kawaj, naq tinwach’ab’eb’ laa komon, ut tinkanab’ naq li walal aj Lamoni taakanaaq li rawa’b’ejihom rik’in, k’e reetal, tink’e aawe naq li walal taakanaaq li rawa’b’ejihom rik’in, chirix anajwan ut chi junelik, ut ink’a’ chik tinwanq chixjolominkil—

27 Ut tink’e ajwi’ aawe naq eb’ laa komon te’isiiq chaq sa’ tz’alam, ut laa’at ut eb’ laa komon texruuq chi chalk wik’in, sa’ lin awa’b’ejihom; xb’aan naq q’axal nawaj aawilb’al. Xb’aan naq li rey k’a’jo’ naq kisach xch’ool rik’in li aatin li kixye chaq, ut rik’in ajwi’ li aatin li yeeb’il xb’aan laj Lamoni li ralal, jo’kan naq kiraj xtzolb’al.

28 Ut kik’ulman naq laj Ammon ut laj Lamoni ke’ok wi’chik chi b’eek sa’ xjayal li ch’och’ Middoni. Ut laj Lamoni kixtaw usilal sa’ rilob’aal li rey sa’ xb’een li ch’och’; jo’kan naq eb’ lix komon laj Ammon ke’isiik chaq sa’ tz’alam.

29 Ut naq laj Ammon kixk’uleb’ kiraho’ xch’ool chi numtajenaq, xb’aan naq k’ehomaq reetal naq t’ust’uukeb’, ut lix tib’eleb’ q’axal tawasinb’il xb’aan b’ak’e’k rik’in kawil k’aam. Ut ke’xnumsi chaq ajwi’ li tz’okaak, li chaqi-eel, ut chixjunil paay chi ch’a’ajkilal; a’b’anan ke’wan xkuyum sa’ chixjunil li rahilal ke’xk’ul.

30 Ut jo’ ki’uxman, eb’ a’an ke’tz’aq kanaak sa’ ruq’ jun li tenamit li q’axal wi’chik kawujenaqeb’, ut jipeb’ wi’chik xk’a’uxleb’; jo’kan naq ink’a’ ke’raj ab’ink chiru li raatineb’, ut ke’risiheb’ chaq, ut ke’xsak’eb’ chaq, ut ke’ralinasiheb’ sa’ li junjunq chi ochoch, ut sa’ li junjunq chi na’ajej, toj reetal naq ke’wulak sa’ li ch’och’ Middoni, ut aran ke’chape’ ut ke’tz’ape’ sa’ tz’alam, ut ke’b’ak’e’ rik’in kawil k’aam, ut ke’tz’ape’ sa’ tz’alam chiru k’iila kutan, ut ke’ach’ab’aak xb’aan laj Lamoni ut laj Ammon.