1 Iei, nupwen Ammon a soposopono ne aiti ekkewe aramasen Leimonai, sipwene niwin ngeni ewe uruon Aaron me pwin kewe; pun mwirin an we a no seni ewe fonuen Mitonai a emmwen me ren ewe Ngun ngeni ewe fonuen Nifai, pwan mwo tori imwen ewe king ewe a nemenem won unusen ewe fonu tiwenon chok ewe fonuen Ishmael; iwe i ewe semen Leimonai.

2 Iwe non ewe fansoun pwe a feinong ngeni i non imwen ewe king we mi watte, fiti pwin kewe, iwe a pwisin chappetiw me mwen ewe king, me apasa ngeni i: Nengeni, O king, am ekkewe pwin Ammon, ekkewe ka fen angaser seni kanapus.

3 Iwe iei, O king, ika kopwe mut ngenikem manauem, am aupwe noum chon angang. Iwe ewe king a apasa ngeni ir: Uta, pun upwe mut ngenikemi manauemi, iwe usap mutata pwe oupwe nei chon angang; nge upwe tingor non pochokun pwe oupwe angang ngeniei; pun a fen ekis osukosuk non ai ekiek pokiten ewe fangochun me ewe auchean ekkewe kapas an pwium we Ammon; iwe ua mochen pwe upwe sinei ewe popun pwata ese fituk ne feita seni Mitonai.

4 Iwe Aaron a apasa ngeni ewe king: Nengeni, ewe Ngunun ewe Samon a fen kokkori i ngeni pwan ew neni; i a fen feino ngeni ewe fonuen Ishmael, pwe epwe aiti ekkewe aramasen Leimonai.

5 Iei ewe king a apasa ngeni ir: Met ei ka fen apasa usun ewe Ngunun ewe Samon? Nengeni, iei ewe mettoch minne a fen aosukosukaei.

6 Iwe pwan, met ei ewe Ammon a apasa—Ika kopwe aier kopwe manau, iwe ika kosap aier, kopwe katuruno atun ewe ranin soponon?

7 Iwe Aaron a ponueni i me apasa ngeni i: Ka nuku pwe mi wor emon Kot? Iwe ewe king a apasa: Ngang mi sinei pwe ekkewe chon Amalekai ra apasa pwe mi wor emon Kot, iwe ua fen fang ngeni ir pwe repwe kauuta imwenipin, pwe repwe tongeni achufengeni inisir pwe repwe fen ngeni i. Iwe ika iei ka apasa pwe mi wor emon Kot, nengeni upwe nuku.

8 Iwe iei nupwen Aaron a rongorong ei, netipan a poputa ne pwapwa, iwe a apasa: Nengeni, ennetin usun ka manau, O king, mi wor emon Kot.

9 Iwe ewe king a apasa: Met Kot i ewe Ngun mi Nap ewe a uwau semach kewe seni ewe fonuen Jerusalem?

10 Iwe Aaron a apasa ngeni i: Ewer, i ewe Ngun mi Nap, me i a forata mettoch meinisin non nang me non fonufan. Ka nuku ei?

11 Iwe a apasa: Ewer, ua nuku pwe ewe Ngun mi Nap a forata mettoch meinisin, iwe ua mochen pwe kopwe ureniei usun ekkei mettoch meinisin, iwe upwe nuku om kewe kapas.

12 Iwe non ewe fansoun pwe nupwen Aaron a kuna pwe ewe king epwe nuku an kewe kapas, a poputa seni ewe forutan Adam, a anneani ekkewe pukefel ngeni ewe king—usun an Kot forata aramas seni pwisin napanapan, me pwan Kot a ngeni i annuk, me pokiten atai annuk, aramas ra turutiw.

13 Iwe Aaron a awewe ngeni i ekkewe pukefel seni ewe forutan Adam, a awewei ewe turutiwen aramas me mwen i, me ar nikinikin pekin mochenin fonufan me pwan ewe kokkotun ngaseno, minne a monneta seni nongonongen ewe fonufan, me non Kraist, fan iten ion meinisin epwe nuku non itan we.

14 Iwe pokiten aramas ra fen turutiw ese tongeni pwisin fich ngeni i och mettoch; nge ekkewe riaffou me manon Kraist a achasefani ar kewe tipis, me non nuku me aier, me soposopono; me pwe i a muti ekkewe senin mano, pwe ewe peias esap wor an win, me ewe emmetekin mano epwe kuf me non ekkewe apinukunukun ning; iwe Aaron a awewei ekkei mettoch meinisin ngeni ewe king.

15 Iwe non ewe fansoun pwe mwirin an Aaron a awewei ekkei mettoch ngeni i, ewe king a apasa: Met upwe fori pwe epwe tongeni wor ai manau esemuch usun minne ka fen apasa? Ewer, met upwe fori pwe upwe tongeni uputiw me ren Kot, me ei ngun mi ngaw epwe uttutuu seni fan mwari, me angei noun we Ngun, pwe upwe tongeni ureno ren pwapwa, pwe usap tongeni katuruno atun ewe ranin soponon? Nengeni, anon i, upwe fangeta mettoch meinisin ua pisekini, ewer, upwe nikitano ai we muu, pwe upwe tongeni angei ei ennetin pwapwa.

16 Nge Aaron a apasa ngeni i: Ika ka mochen ei mettoch, ika kopwe chappetiw me mwen Kot, ewer, ika kopwe aier seni om kewe tipis meinisin, me chappetiw me mwen Kot, me kokkori itan we non nuku, me nuku pwe kopwe angei, ika kopwe iei iwe kopwe angei ewe apinukunuk minne ka mochen.

17 Iwe non ewe fansoun pwe nupwen Aaron a apasa ekkei kapas, ewe king a chappetiw me mwen ewe Samon, won pukuwan; ewer, a pwan mwo akonano inisin won ewe puun, me puchor pochokun, a apasa:

18 O Kot, Aaron a ureniei pwe mi wor emon Kot; iwe ika mi wor emon Kot, me ika en emon Kot, kose mochen pwarano inisum ngeniei, iwe upwe aturano ai kewe tipis meinisin pwe upwe sineok, me pwe upwe tongeni manau seni mano, me manau atun ewe ranin soponon. Iwe iei nupwen ewe king a apasa ekkei kapas, a chung usun ita a mano.

19 Iwe non ewe fansoun pwe noun kewe chon angang ra sa me ureni ewe kiwin mettoch meinisin a fen fis ngeni ewe king. Iwe a feito ngeni ewe king; iwe nupwen a kuna i an koneno usun ita a mano, me pwan Aaron me pwin kewe ra uta usun ita ir ewe popun an we turuno, a song rer, me annuku pwe noun kewe chon angang, are ekkewe chon angang noun ewe king, repwe angei ir me nireno.

20 Iei ekkewe chon angang ra fen kuna ewe popun an we king we turuno, iei minne rese pwaracho ne wata pour won Aaron me pwin kewe; iwe ra sio ngeni ewe kiwin ra apasa: Pwata ka annuku pwe am aupwe nieno ekkei mwan, nupwen emon me neir a pochokun nap senikem meinisin? Iei minne am aupwe turuno me mwer.

21 Iei nupwen ewe kiwin a kuna nuokusun ekkewe chon angang a pwan poputa ne fokkun nuokus, ren nuokusun ika epwe wor ekkoch mettoch mi ngaw epwe tota won. Iwe a annuku noun kewe chon angang pwe repwe feino me kori ekkewe aramas, pwe repwe tongeni nieno Aaron me pwin kewe.

22 Iei nupwen Aaron a kuna tinikenin ewe kiwin, i, pokiten a pwan sinei pochokunen netipen ekkewe aramas, a nuokus ika pwe ew mwicheich epwe achufengeni inisir, iwe epwe wor ew ennetin anini fengen me ew osukosuk me neir; iei minne a wata poun me aueta ewe king seni ewe puun, me apasa ngeni i: Uta. Iwe a uta won pechen, a angei an pochokun.

23 Iei ei a fis me ne mesen ewe kiwin me chommong me nein ekkewe chon angang. Iwe nupwen ra kuna ra fokkun ingeno, me poputa ne nuokus. Iwe ewe king a uta, me poputa ne aiti ir. Iwe a aiti ir, iei minne unusen chon non imwan we ra siwin ngeni ewe Samon.

24 Iei mi wor ew mwicheich a ioifengen pokiten ewe annuk an ewe kiwin, iwe a poputa ne wor ennetin ngunungun me neir pokiten Aaron me pwin kewe.

25 Nge ewe king a uta me neir me angang ngeni ir. Iwe ra kinamweno ngeni Aaron me ekkewe ir mi nom ren.

26 Iwe non ewe fansoun pwe nupwen ewe king a kuna pwe ekkewe aramas ra kinamweno, a annuku pwe Aaron me pwin kewe repwe uta nukanapen ewe mwicheich, me pwe repwe afanafana ewe kapas ngeni ir.

27 Iwe non ewe fansoun pwe ewe king a tinano ew porous non unusen ewe fonu, me nein noun kewe aramas meinisin ekkewe ir mi nom non unusen ewe fonu, ekkewe ir mi nom non ekkewe kinikinin neni meinisin unukun, minne a pwan mwo kia ngeni ewe sat, non otiw me non notou, me minne a keimu seni ewe fonuen Saraemla me ren ew aukukkun kinikinin fonu pon, minne a soposop seni ewe sat otiw ngeni ewe sat notou, me unukun ekkewe kianin orossetin ewe fonu, me kianin ewe fonu pon minne a nom ennefen unukun ewe fonuen Saraemla, me non ekkewe kianin Mantai, unukun nepopun ewe chonupupu Sidon, a soposop seni otiw ngeni notou—iwe iei ekkewe chon Leiman me ekkewe chon Nifai ra keimufesen.

28 Iei, ewe kinikinin ekkewe chon Leiman mi kon chipwang a nom non ewe fonu pon, me ra nom non imw mangaku; iwe ra toropas fetan non unusen ewe fonu pon non notou, non ewe fonuen Nifai; ewer, me pwan non notoun ewe fonuen Saraemla, non ekkewe kia unukun orossetin ewe fonu, me non notoun ewe fonuen Nifai, non nenien an semer kewe aewin neuo, iwe iei a weneno unukun orossetin ewe fonu.

29 Iwe mi pwan chommong ekkewe chon Leiman non otiwen unukun orossetin ewe fonu, ikewe ekkewe chon Nifai ra asureno ie. Iwe iei ekkewe chon Nifai ra akkarap rokopwanino me ren ekkewe chon Leiman; nge inamo ekkewe chon Nifai ra fen fonuenano unusen ekkewe kinikinin ennefen non ewe fonu ewe a kia ngeni ewe fonu pon, me ren nepopun ewe chonupupu Sidon, seni otiw ngeni notou, unukun won nepekin ewe fonu pon; non ennefen, pwan mwo tori ar ra feito ngeni ewe fonu minne ra eita ngeni Fonuen ras.

30 Iwe a kia ngeni won ewe fonu minne ra eita ngeni Tatakis, pokiten a kon towaw ngeni pekin ennefen pwe a feito ngeni ewe fonu minne a fen aramaseno me a fen tano, usun chun ekkewe am aua fen kapas usun, minne ra pwá me ren ekkewe aramasen Saraemla, pokiten ina ewe nenien ar we aewin inenong.

31 Iwe ra feito seni ikewe feita ngeni eorun ewe fonu pon. Iei ewe fonu won ewe pekin ennefen a iteni Tatakis, me ewe fonu won pekin eor a iteni Fonuen ras, iwe a ew fonu pon minne mi ureno ren sokopaten meinisin man mwacho seni sokkun nikinik, ew kinikin minne a feito seni ewe fonu ennefen pokiten mwongo.

32 Iwe iei, a chok ukukun towawan ew me esop ran sai me ren emon chon Nifai, non ewe kinikin Fonuen ras me ewe kinikin Tatakis, seni otiw ngeni ewe sat notou; iwe iei ewe fonuen Nifai me ewe fonuen Saraemla ra akkarap repwene rokopwanino ren konik, iwe a wor ew kukkunun aukukkunun fonu nefinen ewe fonu ennefen me ewe fonu eor.

33 Iwe non ewe fansoun pwe ekkewe chon Nifai ra nonnom non ewe fonu Fonuen ras, pwan mwo seni otiw ngeni ewe sat notou, iwe iei ekkewe chon Nifai non ar mirit, fiti nour kewe chon mas me nour kewe sounfiu, ra amochanong ekkewe chon Leiman non eor, pwe ren ewe popun esap wor ar nemenem won ennefen, pwe resap tongeni masoweni ewe fonu ennefen.

34 Iei minne ekkewe chon Leiman rese tongeni chok nemenem non ewe fonuen Nifai, me ewe fonu pon unukun. Iei a ew mirit non ekkewe chon Nifai—pokiten ekkewe chon Leiman ir chon koum ngeni ir, resap mutata ar eriaffou me ren meinisin pau, me pwan epwe tongeni ew fonuer ikewe repwe tongeni suno ie, anongonong won ar mochen.

35 Iwe iei ngang, mwirin ai apasa ei, ua niwin sefan ngeni ewe uruon Ammon me Aaron, Omner me Imnai, me pwir kewe.