1 I teienei, ’a ha’api’i noa ai Amona i te mau ta’ata o Lamoni ma te fa’aea ’ore, e ho’i ïa tātou i ni’a i te ’ā’amu o Aarona e tōna ra mau taea’e ; ’oia ho’i i muri iho i tōna fa’aru’era’a mai i te fenua ra nō Midoni, ’ua arata’ihia atu ra ’oia e te Vārua i te fenua ra nō Nephi, e tae atu ra i te fare o te ari’i ’o tē fa’atere ra i te fenua tā’āto’a, ’eiaha rā i te fenua nō Isema’ela ; ’e ’o ’oia ho’i te metua tāne o Lamoni.

2 ’E i muri a’era, ’ua haere ti’a atu ra ’oia ’e tōna ra mau taea’e iāna ra i te aora’i o te ari’i, ’e ’ua pi’o ihora ’oia iho i mua i te aro o te ari’i, ’e ’ua parau atu ra iāna : Inaha, e te ari’i ē, e mau taea’e mātou nō Amona, ’o tā ’oe i fa’aora i rāpae i te fare tāpe’ara’a.

3 ’E i teienei, e te ari’i ē, mai te mea e fa’aora noa ’oe ia mātou, e tāvini ïa mātou ia ’oe. ’E ’ua parau mai ra te ari’i ia rātou : ’A ti’a mai i ni’a, ’e e vaiiho noa vau ia ’outou ’ia ora noa, ’e e ’ore roa ho’i au e fa’ati’a ’ia riro ’outou ’ei mau tāvini nō’u ; e ani rā vau ia ’outou ’ia tauturu mai iā’u nei ; ’ua ahoaho ri’i ho’i tō’u nei mana’o nō te here ’e te faufa’a rahi o te mau parau a tō ’oe taea’e ra ’o Amona ; ’e ’ua hina’aro vau ’ia ’ite i te tumu nō te aha ’aita ’oia i haere mai i rāpae i te fenua nō Midoni nā muri ia ’oe.

4 ’E ’ua parau atu ra Aarona i te ari’i : Inaha, ’ua pi’i te Vārua o te Fatu iāna ’ia haere atu i te hō’ē vāhi ’ē ; ’ua reva atu ’oia i te fenua ra nō Isema’ela, nō te ha’api’i atu i te mau ta’ata o Lamoni.

5 I teienei, ’ua parau mai ra te ari’i ia rātou : E aha teie tā ’outou i parau iho nei nō ni’a i te Vārua o te Fatu ? Inaha, ’o teie te mea i fa’aahoaho iā’u nei.

6 ’E ’oia ato’a, e aha ho’i teie tā Amona i parau a’enei ē—Mai te mea e tātarahapa ’outou, e fa’aorahia ïa ’outou, ’e mai te mea ’aita ’outou e tātarahapa, e ti’avaruhia ïa ’outou ’ia tae i te mahana hope’a ra ?

7 ’E ’ua pāhono atu ra Aarona iāna, ’e nā ’ō atu ra : Tē ti’aturi ra ānei ’oe ē, tē vai ra te hō’ē Atua ? ’E ’ua parau mai ra te ari’i : ’Ua ’ite au ē, tē parau ra te mau ’āti Amaleka ē, tē vai ra te Atua, ’e ’ua fa’ati’a vau ia rātou ’ia patu i te mau fare mo’a, ’ia ti’a ia rātou ’ia ha’aputuputu ia rātou iho nō te ha’amori iāna. ’E i teienei, mai te mea tē parau nei ’oe ē, tē vai ra te hō’ē Atua, inaha, e ti’aturi ïa vau.

8 ’E i teienei, ’ia fa’aro’o a’era Aarona i te reira, ’ua ’oa’oa ihora tōna ’ā’au, ’e ’ua parau atu ra ’oia : Inaha, ’oia mau, mai ia ’oe e te ari’i e ora nei, tē vai mau ra te Atua.

9 ’E ’ua parau mai ra te ari’i : ’O te Atua ānei taua Vārua Rahi ra, ’o tei arata’i mai i tō tātou mau metua mai te fenua mai ra mai Ierusalema ?

10 ’E ’ua parau atu ra Aarona iāna : ’Ē, ’o ’oia ïa taua Vārua Rahi ra, ’e nāna ho’i i hāmani i te mau mea ato’a tō ni’a i te ra’i ’e tō roto i te fenua. Tē ti’aturi ra ānei ’oe i te reira ?

11 ’E ’ua parau mai ra ’oia : ’Ē, tē ti’aturi nei au ē, nā taua Vārua Rahi ra i hāmani i te mau mea ato’a, ’e tē hina’aro nei au ’ia fa’a’ite mai ’oe i taua mau mea ra, ’e e ti’aturi atu ïa vau i tā ’oe ra mau parau.

12 ’E i muri a’era, ’ia ’ite a’era Aarona ē, e ti’aturi te ari’i i tāna mau parau, ’ua ha’amata atu ra ’oia i te tai’o atu i te mau pāpa’ira’a mo’a i te ari’i nō ni’a i te hāmanira’a o Adamu—e mea nāhea tō te Atua hāmanira’a i te ta’ata ’ia au i tōna iho hōho’a, ’e tō te Atua hōro’ara’a i te mau fa’auera’a iāna, ’e nā roto i te ’ōfatira’a i te ture, ’ua hi’a te ta’ata.

13 ’E ’ua ha’amāramarama atu ra Aarona i te mau pāpa’ira’a mo’a iāna, mai te hāmanira’ahia o Adamu, te ha’amāhorahorara’a atu i mua iāna i tō te ta’ata hi’ara’a, ’e tō rātou hina’aro i tō te tino nei ’e ’oia ato’a te ’ōpuara’a nō te fa’aorara’a, ’o tei fa’aineinehia mai te ha’amatara’a mai ā o te ao nei, nā roto i te Mesia, nō te mau ta’ata ato’a e ti’aturi i tōna ra i’oa.

14 ’E mai te taime i hi’a ai te ta’ata nei ’aita roa e ti’a iāna ’ia fāri’i i te faufa’a nōna iho ; ’āre’a rā nā te mau mamae ’e te pohera’a o te Mesia i ha’amatara i tā rātou mau hara, nā roto i te fa’aro’o ’e te tātarahapa, ’e tē vai atu ra ; ’e nāna ho’i i hahae i te mau tā’amu nō te pohe, ’ia ’ore tō te mēnema e rē, ’e ’ia horomi’ihia te tara o te pohe i roto i te ti’aturira’a nō te hanahana ; ’e ’ua ha’amāramarama atu Aarona i teie mau mea ato’a i te ari’i.

15 ’E i muri a’era, ’ia oti a’era tā Aarona ha’amāramaramara’a atu i teie mau mea iāna, ’ua nā ’ō mai ra te ari’i : E aha tā’u e rave ’ia ti’a iā’u ’ia fāri’i i teie ora mure ’ore ’o tā ’oe e parau nei ? ’Oia ïa, e aha tā’u e rave ’ia ti’a iā’u ’ia fānauhia i te Atua ra, ’e ’ia ’īriti-’ē-hia atu teie nei vārua parauti’a ’ore i rāpae i tō’u nei ’ōuma ’e ’ia fāri’i i tōna ra Vārua, ’ia ti’a iā’u ’ia fa’a’īhia i te ’oa’oa, ’e ’ia ’ore au e ti’avaruhia i te mahana hope’a ra ? Inaha, ’ua parau ato’a mai ra ’oia, e fa’aru’e au i tā’u mau faufa’a ato’a, ’oia ïa, e fa’aru’e au i tō’u nei bāsileia, ’ia roa’a iā’u nei teie ’oa’oa rahi.

16 ’Āre’a rā ’ua parau atu ra Aarona iāna : Mai te mea e hina’aro ’oe i teie nei mea, mai te mea e pi’o ’oe i raro i mua i te Atua, ’oia ïa, mai te mea e tātarahapa ’oe i tā ’oe mau hara ato’a, ’e ’ia pi’o i raro i mua i te Atua, ’e ’ia pi’i atu i tōna ra i’oa ma te fa’aro’o, ma te ti’aturi ē e fāri’i ’oe, ’ei reira ïa ’oe e fāri’i ai i te ti’aturira’a tā ’oe i hina’aro.

17 ’E i muri a’era, ’ia oti a’era tā Aarona paraura’a i teie mau parau, ’ua tu’u ihora te ari’i i tōna turi i raro i mua i te Fatu, ’oia ïa, ’ua tārava ihora ’oia i raro i te repo, ’e ’ua ti’aoro māite atura, i te nā-’ō-ra’a ē :

18 E te Atua, ’ua fa’a’ite mai Aarona iā’u nei ē, tē vai ra te Atua ; ’e mai te mea ē tē vai ra te Atua, ’e ’o ’oe taua Atua ra, ’a fa’a’ite mai na ’oe ia ’oe iho iā’u nei, ’e e ha’apae atu vau i tā’u ato’a ra mau hara ’ia ’ite au ia ’oe na, ’e ’ia fa’ati’ahia vau mai te pohe mai, ’e ’ia fa’aorahia i te mahana hope’a ra. ’E i teienei, ’ia fa’aoti a’era te ari’i i teie mau parau, ’ua tā’irihia ihora ’oia, e riro ihora ’oia mai te mea ra ’ua pohe roa.

19 ’E i muri a’era, ’ua horo ti’a atu ra tōna ra mau tāvini e fa’a’ite atu ra i te ari’i vahine i te mau mea i tupu i ni’a i te ari’i. ’E ’ua haere ti’a mai ra ’oia i roto i pīha’i iho i te ari’i ; ’e ’ia ’ite ihora ’oia iāna i te tāravara’a mai te mea ra ē, ’ua pohe roa ’oia, ’e ’ia Aarona ’e tōna ra mau taea’e ho’i i te ti’a-noa-ra’a mai te mea ra ē, ’o rātou te tumu nō tōna topara’a i raro, ’ua riri a’era ’oia ia rātou, ’e ’ua fa’aue atu ra i tōna mau tāvini, ’oia ho’i te mau tāvini o te ari’i, ’ia rave ia rātou ’e ’ia taparahi ia rātou.

20 I teienei, ’ua ’ite te mau tāvini i te tumu i topa’i te ari’i i raro, nō reira ’ua mata’u rātou ’ia fa’atae atu i tō rātou rima i ni’a ia Aarona e tōna ra mau taea’e ; ’e ’ua ui atu ra rātou i te ari’i vahine, i te nā-’ō-ra’a atu ē : E aha ho’i ’oe i fa’aue mai ai ’ia taparahi mātou i teie mau ta’ata, ’E inaha, ’ua hau te pūai o te hō’ē ’o rātou i tō mātou ato’a ra ? Nō reira e pau roa ïa mātou i te pohe i mua ia rātou.

21 I teienei, ’ia ’ite a’era te ari’i vahine i te mata’u o te mau tāvini, ’ua mata’u rahi ato’a ihora ’oia, ’o te ma’iri mai te tahi ’ino i ni’a iho iāna. ’E ’ua fa’aue atu ra ’oia i tōna mau tāvini ’ia haere atu rātou e ti’i i te mau ta’ata, ’ia ti’a ia rātou ’ia taparahi ia Aarona ’e tōna ato’a ra mau taea’e.

22 I teienei, ’ia ’ite a’era Aarona i te ’ōpuara’a a te ari’i vahine, ’e ’ua ’ite ato’a ho’i ’oia i te ’eta’eta o te ’ā’au o te mau ta’ata, ’ua mata’u ihora ’oia ’o te ha’aputuputu mai te mau ta’ata e rave rahi, ’e ’o te tupu te mārōra’a rahi ’e te fifi rahi i rotopū ia rātou ; nō reira ’ua fa’atoro atu ra ’oia i tōna rima, ’e ’ua fa’ati’a a’era i te ari’i mai te repo mai ra, ’e ’ua parau atu ra iāna : ’A ti’a na. ’E ’ua ti’a a’era ’oia i ni’a i tōna nā ’āvae, ’e ’ua fāri’i ihora i tōna pūai.

23 I teienei, ’ua ravehia teie i mua i te aro o te ari’i vahine ’e te mau tāvini e rave rahi. ’E ’ia ’ite a’era rātou i te reira, ’ua māere roa ihora rātou, ’e ’ua mata’u ihora. ’E ’ua ti’a mai ra te ari’i i ni’a, ’e ’ua ha’amata ihora i te ha’api’i atu ia rātou. ’E ’ua ha’api’i atu ’oia ia rātou, ’e nō reira ’ua fa’afāriuhia mai tōna ’utuāfare pā’āto’a i te Fatu.

24 I teienei, e rave rahi ta’ata tei ha’aputuputu ’āmui mai nā roto i te fa’auera’a a te ari’i vahine, ’e ’ua tupu ihora te amuamura’a rahi i rotopū ia rātou nō Aarona ’e tōna ra mau taea’e.

25 ’Āre’a rā, ’ua ti’a mai ra te ari’i i rotopū ia rātou, ’e ’ua a’o mai ra ia rātou. ’E ’ua hau roa ihora rātou ia Aarona ’e te feiā ato’a i pe’e iāna.

26 ’E i muri a’era, ’ia ’ite a’era te ari’i ē, ’ua hau te mau ta’ata, ’ua fa’aue atu ra ’oia ia Aarona ’e tōna ra mau taea’e ’ia ti’a mai rātou i rōpū i te mau ta’ata, ’e ’ia a’o atu i te parau ia rātou.

27 ’E i muri a’era, ’ua fa’atae atu ra te ari’i i te hō’ē fa’auera’a ē ’ati noa a’e te fenua ato’a, i rotopū i tōna mau ta’ata pā’āto’a tē pārahi ra i ni’a i tōna mau fenua ato’a, ’e tei pārahi i roto i te mau retioni pā’āto’a ē ’ati noa a’e, i te pae fenua i te hiti o te miti, i te hiti’a o te rā ’e i te tō’o’a o te rā, ’e tei tā’ōti’ahia i te fenua ra nō Zarahemela e te hō’ē mēdēbara oaoa, tei haere roa atu mai te miti i te hiti’a o te rā ē tae roa atu i te miti i te tō’o’a o te rā ra, ’e nā tahatai noa ē ’ati noa a’e, ’e nā pīha’i iho i te hiti o te mēdēbara i te pae apato’erau ra, i te fenua ra nō Zarahemela, nā roto i te mau hiti i Maniti ra, nā te vāhi tumu o te ’ānāvai Sidona ra, mai te hiti’a o te rā ē tae noa atu i te tō’o’a o te rā—e mea nā-reira-hia ho’i te mau ’āti Lamana ’e te mau ’āti Nephi i te fa’ata’a-’ē-ra’a-hia.

28 I teienei, ’ua pārahi te pae rahi o te mau ta’ata fa’atau o te mau ’āti Lamana i roto i te mēdēbara, ’e ’ua ora noa rātou i roto i te mau ti’ahapa ; ’e ’ua ha’apurara-roa-hia rātou i roto i te mēdēbara i te tō’o’a o te rā, i te fenua nō Nephi ra ; ’oia ïa, ’e i te pae ato’a i te tō’o’a o te rā i te fenua ra nō Zarahemela, i te mau ’ōti’a nō te pae miti, ’e i te tō’o’a o te rā i roto i te fenua ra nō Nephi, i te vāhi nō te fenua ’āi’a mātāmua o tō rātou mau metua, ’e ’ua nā reira noa te ’ōti’a i te haere nā te pae miti.

29 ’E e rave rahi ato’a ho’i mau ’āti Lamana tei te pae i te hiti’a o te rā i tahatai, i te vāhi i tīahihia ai rātou e te mau ’āti Nephi ra. ’E nō reira ’ua fātata roa te mau ’āti Nephi i te ha’a’atihia e te mau ’āti Lamana ; ’āre’a rā ’ua riro i te mau ’āti Nephi te fenua pā’āto’a i te pae apato’erau ra, i te hiti o te mēdēbara i te vāhi tumu o te ’ānāvai ra Sidona, mai te hiti’a o te rā ē tae roa atu i te tō’o’a o te rā, i te pae mēdēbara ra, ’e i te pae apato’erau e tae roa atu i te fenua ra i parauhia ’o ’Auhune.

30 ’E ’ua tāpiri te reira i te fenua ra i parauhia ’o Ano, tei te pae apato’erau ’e ’ua tae roa atu ïa i te fenua i ta’atahia na ’e i ha’amouhia na ho’i ; ’o tō rātou te mau ivi i parauhia na e mātou, ’e tei ’itehia ho’i ’e te mau ta’ata o Zarahemela ra, ’o te vāhi ho’i ïa nō tō rātou tāpaera’a mātāmua.

31 ’E ’ua haere mai rātou mai reira mai i ni’a i te mēdēbara i te pae apato’a. ’E ’ua parauhia te fenua i te pae apato’erau ra ’o Ano, ’e te fenua i te pae apato’a ’ua parauhia ïa o ’Auhune, ’o te mēdēbara ïa i ī i te mau huru ’ānimara taehae ato’a ra ; ’e ’ua haere mai te tahi pae o te reira i reira nō ’ō mai i te fenua i te pae apato’erau nō te ’imi haere i te mā’a.

32 ’E i teienei, mai te miti i te hiti’a o te rā ē tae roa atu i te miti i te tō’o’a o te rā, ’o te vāhi ïa e haerehia e te mau ’āti Nephi nō te hō’ē mahana ’e te ’āfa, mai te mea e nā te ’ōti’a o ’Auhune ra ’e te fenua nō Ano i te haere’a mai te miti i te hiti’a o te rā ē tae roa atu i te miti i te tō’o’a o te rā ; ’e te fenua nō Nephi ra e te fenua ra nō Zarahemela, ’ua ha’a’atihia ïa i te miti, maori rā ’o te hō’ē vāhi iti toe ; tē vai ra te hō’ē ma’a fenua iti oaoa i rōpū i te fenua i te pae apato’erau ’e te fenua i te pae apato’a.

33 ’E i muri a’era, ’ua pārahihia te fenua ra nō ’Auhune e te mau ’āti Nephi, mai te miti i te hiti’a o te rā ē tae roa atu i te miti i te tō’o’a o te rā ; ’e nā roto i te pa’ari o te mau ’āti Nephi, ’ua ha’a’ati tō rātou mau tīa’i ’e tō rātou mau nu’u fa’ehau i te mau ’āti Lamana i te pae apato’a, ’ia ’ore rātou e fāri’i fa’ahou i te fenua i te pae apato’erau, ’ia ’ore ho’i rātou ’ia purara atu i ni’a i te fenua i te pae apato’erau.

34 Nō reira ’aita roa e roa’a fa’ahou te tahi atu ā mau fenua i te mau ’āti Lamana, maori rā ’o te fenua nō Nephi ra, ’e te mēdēbara ē ’ati noa a’e i reira. I teienei, e ’ohipa ’aravihi teie i ravehia e te mau ’āti Nephi—’e nō te mea e ’enemi te mau ’āti Lamana nō rātou, ’aita rātou i fa’ati’a i tō rātou mau ’ati ’ia tae i terā vāhi ’e i terā vāhi, ’e ’aore rā ’ia roa’a ia rātou te hō’ē fenua, e ti’a ai ia rātou ’ia horo atu i reira, mai te au i tō rātou mau hina’aro.

35 ’E i teienei, ’ia oti a’era teie nei parau iā’u, e ho’i fa’ahou vau i ni’a i te parau tuatāpapa a Amona ’e Aarona, Omonera ’e Himeni, ’e tō rātou ra mau taea’e.