1 Nim no, thaum uas Amoos tseem tab tom qhia Lamaunais cov neeg tsis tu ncua li no, peb yuav tig rov qab mus rau Aloos thiab nws cov kwv tij zaj; vim tom qab uas nws tau ncaim ntawm thaj av Midaunais nws tau raug tus Ntsuj Plig coj mus rau thaj av Nifais, twb mus rau vaj ntxwv tus uas kav tag nrho tej thaj av lub tsev tsuas tshuav thaj av Ixama-ees xwb; thiab nws tau yog Lamaunais txiv.

2 Thiab tau muaj tias Aloos tau mus rau nws rau hauv vaj ntxwv lub tsev, nrog nws cov kwv tij, thiab tau khoov ntawm vaj ntxwv xub ntiag, thiab tau hais rau nws tias: Saib seb, Au vaj ntxwv, peb yog Amoos cov kwv tij, cov uas koj tau tso tawm hauv qhov taub los.

3 Thiab nim no, Au vaj ntxwv, yog koj yuav tseg peb txoj sia, peb yuav ua koj tej tub qhe. Thiab vaj ntxwv tau hais rau lawv tias: Cia li sawv, vim kuv yuav pub nej txoj sia rau nej, thiab kuv yuav tsis cia nej ua kuv tej tub qhe; tiam sis kuv yuav kom nej qhia kuv; vim kuv tau muaj tej yam teeb meem nyob hauv siab vim yog txoj kev siab dawb thiab tej lus tseem ceeb heev ntawm nej tus tij laugAmoos; thiab kuv xav paub qhov uas yog vim li cas nws tsis tau tawm ntawm Midaunais nrog nej tuaj.

4 Thiab Aloos tau hais rau vaj ntxwv tias: Saib seb, tus Tswv tus Ntsuj Plig tau hu nws mus lwm txoj kev lawm; nws tau mus rau tom thaj av Ixama-ees, mus qhia Lamaunais cov neeg lawm.

5 Nim no vaj ntxwv tau hais rau lawv tias: Qhov no uas nej tau hais txog tus Tswv tus Ntsuj Plig yog dab tsi? Saib seb, qhov no yog yam uas ua rau kuv nyuaj siab.

6 Thiab ntxiv, qhov no uas Amoos tau hais tias—Yog koj yuav hloov siab lees txim koj yuav dim, thiab yog koj yuav tsis hloov siab lees txim, koj yuav raug ntiab tawm nyob rau hauv hnub kawg no yog dab tsi?

7 Thiab Aloos tau teb nws thiab tau hais rau nws tias: Koj puas ntseeg tias muaj ib tug Vajtswv? Thiab vaj ntxwv tau hais tias: Kuv paub tias cov neeg Amalej hais tias muaj ib tug Vajtswv, thiab kuv tau pub rau lawv kom lawv ua tej chaw dawb huv, xwv kom lawv yuav sau lawv tus kheej tuaj ua ke teev tiam nws. Thiab yog nim no koj hais tias muaj ib tug Vajtswv, saib seb kuv yeej yuav ntseeg.

8 Thiab nim no thaum Aloos tau hnov li no, nws lub siab tau pib zoo siab, thiab nws tau hais tias: Saib seb, tseeb npaum li koj muaj sia nyob, Au vaj ntxwv es, yeej muaj ib tug Vajtswv.

9 Thiab vaj ntxwv tau hais tias: Vajtswv puas yog tus Ntsuj Plig uas Muaj Hwj Chim uas tau coj peb tej yawg koob tawm ntawm thaj av Yeluxalees?

10 Thiab Aloos tau hais rau nws tias: Yog, nws yog tus Ntsuj Plig uas Muaj Hwj Chim ntawd, thiab nws tau tsim tag nrho txhua yam nyob saum ntuj ceeb tsheej thiab hauv ntiaj teb no. Koj puas ntseeg qhov no?

11 Thiab nws tau hais tias: Muaj tseeb tiag, kuv ntseeg tias tus Ntsuj Plig uas Muaj Hwj Chim tau tsim tag nrho ib puas yam tsav, thiab kuv xav kom nej qhia kuv txog tag nrho ib puas yam tsav no, thiab kuv yuav ntseeg nej tej lus.

12 Thiab tau muaj tias thaum Aloos tau pom tias vaj ntxwv yuav ntseeg nws tej lus, nws tau pib txij li thaum kev tsim Adas los, nyeem tej vajlugkub rau vaj ntxwv—saib Vajtswv tau tsim neeg raws li nws tus yam ntxwv li cas, thiab tias Vajtswv tau muab tej lus txib rau nws, thiab tias vim yog txoj kev txhaum, neeg thiaj li tau poob.

13 Thiab Aloos tau piav meej tej vajlugkub rau nws txij li thaum txoj kev tsim Adas los, qhia txoj kev uas neeg poob rau ntawm nws xub ntiag, thiab lawv tej kev ntiaj teb thiab txoj kev txhiv dim, uas tau npaj txij li thaum txoj kev tsim lub ntiaj teb, dhau los ntawm Khetos, rau txhua tus uas yuav ntseeg hauv nws lub npe.

14 Thiab vim neeg tau poob nws thiaj tsis tsim nyog tau ib yam dab tsi nws tus kheej; tiam sis Khetos txoj kev tuag thiab tej kev txom nyem theej rau lawv tej kev txhaum, dhau los ntawm txoj kev ntseeg thiab txoj kev hloov siab lees txim, thiab lwm yam; thiab tias nws tu txoj kev tuag tej hlua, xwv kom lub qhov ntxa yuav tsis muaj yeej, thiab kom tej toj taug ntawm txoj kev tuag yuav raug nqos nyob hauv tej kev cia siab ntawm lub yeeb koob; thiab Aloos tau piav meej tag nrho tej yam no rau vaj ntxwv.

15 Thiab tau muaj tias tom qab uas Aloos tau piav meej tej yam no rau nws tas lawm, vaj ntxwv tau hais tias: Kuv yuav ua dab tsi es kuv thiaj yuav muaj txoj sia nyob mus ib txhis uas koj tau hais no? Muaj tseeb tiag, kuv yuav ua dab tsi es kuv thiaj li yuav raug yug los ntawm Vajtswv, muab tus ntsuj plig phem no rho tawm ntawm kuv lub cev mus, thiab txais yuav nws tus Ntsuj Plig, xwv kom kuv yuav muaj kev xyiv fab puv npo, xwv kom kuv yuav tsis raug ntiab tawm nyob rau hauv hnub kawg? Nws tau hais tias, saib seb, kuv yuav muab ib puas yam tsav uas kuv muaj tso pov tseg, muaj tseeb tiag, kuv yuav tso kuv txoj kev kav teb chaws, xwv kom kuv yuav tau txais txoj kev xyiv fab heev no.

16 Tiam sis Aloos tau hais rau nws tias: Yog koj xav tau yam no, yog koj yuav pe Vajtswv, muaj tseeb tiag, yog koj yuav hloov siab lees txim tag nrho koj tej kev txhaum, thiab yuav pe Vajtswv, thiab hu nws lub npe nyob ntawm txoj kev ntseeg, ntseeg tias koj yuav tau txais, ces koj yeej yuav tau txais txoj kev cia siab uas koj xav tau.

17 Thiab tau muaj tias thaum Aloos tau hais tej lus no tas lawm, vaj ntxwv tau txhos caug ntua pe tus Tswv; muaj tseeb tiag, nws twb tau pw pua lua rau hauv av, thiab thov heev kawg nkaus, hais tias:

18 Au Vajtswv es, Aloos tau qhia rau kuv tias muaj ib tug Vajtswv; thiab yog muaj ib tug Vajtswv, thiab yog koj yog Vajtswv, thov koj ua koj tus kheej rau kuv paub, thiab kuv yuav tso tag nrho kuv tej kev txhaum tseg kom paub koj, thiab xwv kom kuv yuav raug tsa sawv hauv qhov tuag rov los, thiab raug dim nyob rau hauv hnub kawg. Thiab nim no thaum vaj ntxwv tau hais tej lus no tas lawm, nws tau vau hlo zoo li nws tuag lawm.

19 Thiab tau muaj tias nws tej tub qhe tau khiav mus thiab tau qhia niam vaj ntxwv tag nrho ib puas yam tsav uas tau tshwm sim rau vaj ntxwv. Thiab nws tau tuaj rau ntawm vaj ntxwv; thiab thaum nws tau pom nws pw zoo li uas nws twb tuag lawm, thiab kuj tau pom Aloos thiab nws cov kwv tij sawv ntsug zoo li lawv tau ua rau nws vau, nws tau npau taws rau lawv, thiab tau txib kom nws tej tub qhe, los sis vaj ntxwv cov tub qhe, yuav tsum txhom lawv thiab muab lawv tua.

20 Nim no tej tub qhe tau pom qhov uas ua rau vaj ntxwv vau, yog li ntawd lawv tsis kam tso lawv tej tes rau saum Aloos thiab nws cov kwv tij; thiab lawv tau thov niam vaj ntxwv hais tias: Vim li cas koj ho txib kom peb tua cov neeg no, thaum pom tias lawv ib tug yeej muaj zog dua li peb sawv daws? Yog li ntawd peb yeej yuav vau rau lawv xwb.

21 Nim no thaum niam vaj ntxwv tau pom cov tub qhe txoj kev ntshai nws kuj tau pib ntshai heev kawg nkaus li, ntshai tias tsam muaj xyw phem los rau nws. Thiab nws tau txib nws cov tub qhe tias kom lawv mus thiab hu cov neeg, xwv kom lawv yuav tua Aloos thiab nws cov kwv tij.

22 Nim no thaum Aloos tau pom niam vaj ntxwv txoj kev txiav txim siab, nws, kuj paub txog txoj kev tawv ntawm cov neeg tej siab, ntshai tias tsam ib co neeg coob coob yuav sib sau lawv tus kheej tuaj ua ke, thiab yuav muaj ib qho kev sib cav sib ceg loj thiab ib qho kev sib thab nyob hauv lawv; yog li ntawd nws tau cev nws txhais tes mus thiab tau tsa vaj ntxwv sawv hauv av los, thiab tau hais rau nws tias: Sawv ntsug. Thiab nws tau sawv ntseg ntsees, tau txais nws lub zog.

23 Nim no qhov no tau ua nyob ntawm niam vaj ntxwv xub ntiag thiab ntau tus tub qhe. Thiab thaum lawv tau pom qhov no lawv tau xav tsis thoob li, thiab tau pib ntshai. Thiab vaj ntxwv tau sawv txav zog los, thiab tau pib qhuab qhia rau lawv. Thiab nws tau qhuab qhia rau lawv, kawg tias nws tsev neeg tau raug hloov siab tshiab los rau tus Tswv.

24 Nim no tau muaj ib pab neeg coob coob tau sib sau tuaj ua ke vim yog txoj kev txib ntawm niam vaj ntxwv, thiab tau pib muaj tej kev yws yws hnyav heev nyob hauv lawv vim yog Aloos thiab nws cov kwv tij.

25 Tiam sis vaj ntxwv tau sawv txav zog los rau hauv lawv thiab tau qhuab qhia rau lawv. Thiab lawv tau raug daws kev npau taws rau Aloos thiab cov uas nrog nws.

26 Thiab tau muaj tias thaum vaj ntxwv tau pom tias cov neeg tau daws kev npau taws, nws tau kom Aloos thiab nws cov kwv tij yuav tsum los sawv hauv nruab nrab ntawm cov neeg coob coob, thiab xwv kom lawv yuav qhuab qhia txoj lus rau lawv.

27 Thiab tau muaj tias vaj ntxwv tau xa ib tsab xov thoob plaws rau tag nrho thaj av, nyob tag nrho hauv nws cov neeg uas nyob tag nrho hauv nws thaj av, tag nrho cov uas nyob tej thaj tsam ib ncig, uas tau nyob tom ciam dej hiav txwv, nyob sab hnub tuaj tsam ib ncig, uas tau nyob tom ciam dej hiav txwv, nyob sab hnub tuaj thiab nyob sab hnub poob, thiab tej uas tau raug faib tawm ntawm thaj av Xalahelas los ntawm ib thaj hav zoov nqaim, uas txij li dej hiav txwv sab hnub tuaj mus rau dej hiav txwv sab hnub poob, thiab ib puag ncig nyob rau tej ciam teb ntawm ntug dej hiav txwv, thiab tej ciam teb ntawm tej hav zoov uas nyob sab pem toj los ntawm thaj av Xalahelas, dhau los ntawm tej ciam teb ntawm Meethais, los ntawm hauv dej Xidoos, uas ntws pem sab hnub tuaj mus rau sab hnub poob—thiab li no tau yog qhov uas cov Neeg Lamas thiab cov Neeg Nifais tau sib faib.

28 Nim no, cov Neeg Lamas uas tub nkeeg tshaj tau nyob rau hauv hav zoov, thiab tau nyob hauv tej tsev pheeb suab ntaub; thiab lawv tau faib nyob thoob plaws hauv tej hav zoov rau sab hnub poob, nyob hauv thaj av Nifais; muaj tseeb tiag, thiab kuj nyob rau sab hnub poob ntawm thaj av Xalahelas, nyob hauv tej ciam teb ntawm ntug dej hiav txwv, thiab rau sab hnub poob hauv thaj av Nifais, hauv qhov chaw ntawm lawv tej yawg koob thawj cov qub txeeg qub teg, thiab li no ua ciam teb raws ntawm ntug dej hiav txwv.

29 Thiab kuj tau muaj ntau tus Neeg Lamas nyob rau sab hnub tuaj npuab ntug dej hiav txwv, qhov uas cov Neeg Nifais tau caum lawv. Thiab li no cov Neeg Nifais yuav luag raug cov Neeg Lamas vij; txawm li ntawd los cov Neeg Nifais tau nyob tag nrho sab pem toj ntawm thaj av uas ua ciam teb rau tej hav zoov, nyob pem hauv dej Xidoos, txij li sab hnub tuaj mus rau sab hnub poob, ib ncig ntawm tej ntug hav zoov sab hnub poob, ib ncig ntawm tej ntug hav zoov; nyob rau sab pem toj, mus txog thaum lawv tau los txog thaj av uas lawv tau hu ua Huaj Vam.

30 Thiab nws tau ua ciam teb rau saum thaj av uas lawv tau hu ua Quav Poj, nws tau nyob deb heev rau sab pem toj uas tau los mus rau hauv thaj av uas tau muaj neeg thiab tau raug puas tsuaj lawm, ntawm cov uas tej pob txha peb tau hais lawm, uas tau raug nrhiav tau los ntawm cov neeg Xalahelas, nws tau yog qhov chaw uas lawv xub tuaj txog.

31 Thiab lawv tau tuaj ped mus rau hauv tej hav zoov phab nram hav. Yog li ntawd thaj av uas nyob sab pem toj tau hu ua Quav Poj, thiab thaj av uas nyob phab nram hav tau hu ua Huaj Vam, nws tau yog tej hav zoov uas muaj tag nrho txhua yam tsiaj qus huv si, ib feem ntawm qhov uas tau los ntawm thaj av sab pem toj rau zaub noj.

32 Thiab nim no, nws tsuas deb li ib hnub xwb thiab ib nrab kev rau ib tug Neeg Nifais, nyob ntawm ciam teb Huaj Vam thiab thaj av Quav Poj, txij sab hnub tuaj mus rau hiav txwv sab hnub poob; thiab li no thaj av Nifais thiab thaj av Xalahelas tau yuav luag raug dej vij, tau muaj ib nyuag ceg kaum av nyob nruab nrab thaj av sab pem toj thiab thaj av sab nram hav.

33 Thiab tau muaj tias cov Neeg Nifais tau nyob thaj av Huaj Vam, twb txij li sab hnub tuaj mus rau hiav txwv sab hnub poob, thiab li no cov Neeg Nifais nyob hauv lawv txoj kev txawj ntse, nrog lawv tej neeg zov nyas thiab lawv tej tub rog, tau thaiv cov Neeg Lamas rau sab nram hav, xwv kom los ntawm qhov ntawd lawv cov no yuav muaj tsis tau dab tsi ntxiv nyob rau sab pem toj, xwv kom lawv yuav tsis tau tuaj nyob thaj av sab pem toj.

34 Yog li ntawd cov Neeg Lamas tsis muaj peev xwm muaj dab tsi ntxiv tsuas yog nyob hauv thaj av Nifais xwb, thiab tej hav zoov ib ncig xwb. Nim no qhov no tau yog txoj kev txawj ntse hauv cov Neeg Nifais—vim tias cov Neeg Lamas tau yog ib co yeeb ncuab rau lawv, lawv yuav tsis cia lawv tej kev txom nyem rau txhua sab, thiab kuj tias kom lawv yuav muaj ib lub teb chaws uas lawv khiav mus rau qhov twg los tau, raws li lawv siab xav.

35 Thiab nim no kuv, tom qab uas tau hais qhov no tas, rov qab dua mus rau zaj ntawm Amoos thiab Aloos, Oonaws thiab Hinais, thiab lawv cov kwv tij.