1 Iwe nengeni, non ewe fansoun ekkena chon Leiman ra kon song pokiten ra fen nieno pwir kewe; iei minne ra akkapon pwe repwe fori niwiningaw won ekkewe chon Nifai; iwe rese chiwen sossot ne nieno ekkewe aramasen Antai-Nifai-Liai non na fansoun.

2 Nge ra angei nour kewe sounfiu me feino ngeni ekkewe kianin ewe fonuen Saraemla, me turuta won ekkewe aramas minne ra nom non ewe fonuen Ammonaia me nireno.

3 Iwe mwirin ena, a chommong ar maun ngeni ekkewe chon Nifai, non minne ra sufetan me ninnino.

4 Iwe me nein ekkewe chon Leiman ra ninnino ra napengeni ekkewe mwirimwirin Amulon meinisin me pwin kewe, ir ekkewe pris noun Noah, iwe ra ninnino me ren poun ekkewe chon Nifai;

5 Iwe ekkewe nussun, mwirin ar ra suno ngeni ewe fonu pon otiw, me mwirin ar angei ewe pochokun me pungun nemenem won ekkewe chon Leiman, ra annuku pwe chommong me nein ekkewe chon Leiman repwe mano ren ekkei pokiten ar nuku—

6 Pokiten chommong me neir, mwirin ar ra fen engino ngeni ar kewe chommong mi mano me fokkun chommong riaffou, ra poputa ne mwasangasangeta non achechemenien ekkewe kapas minne Aaron me pwin kewe ra fen afanafana ngeni ir me non fonuer we; iei minne ra poputa ar rese chiwen nuku eerenien semer kewe, me poputa ne nuku non ewe Samon, me pwe i a awora manaman mi napanap ngeni ekkewe chon Nifai; iwe iei a chommong me neir ra siwin me non ewe fonu pon.

7 Iwe non ewe fansoun pwe ekkewe chon nemenem minne ir nussun me nein ekkewe noun Amulon ra annuk pwe repwe ninnino, ewer, ir meinisin ekkewe ra nuku non ekkei mettoch.

8 Iei ei ninnino a esenipato pwe chommong me nein pwir kewe repwe mwasangasangeta ar repwe song; iwe a poputa ne wor anini fengen non ewe fonu pon; iwe ekkewe chon Leiman ra poputa ne kutta mwirimwirin Amulon me pwin kewe me poputa ne nireno; iwe ra suno ngeni ewe fonu pon otiw.

9 Iwe nengeni ekkewe chon Leiman ra kutter non ei ran. Iei ekkewe kapas an Apinatai ra fisino, minne a apasa usun mwirimwirin ekkewe pris ekkewe ra annuku pwe epwe riaffouni mano ren ekkei.

10 Pun a apasa ngeni ir: Met oupwe fori ngeniei epwe ew napanapen ekkewe mettoch repwe feito.

11 Iwe iei Apinatai i ewe aewin a riaffouni mano ren ekkei pokiten an nuku non Kot: iei met a ekieki, pwe chommong repwe riaffouni mano ren ekkei, usun chok i a riaffouni.

12 Iwe a apasa ngeni ekkewe pris noun Noah pwe mwirimwirir repwe fori chommong pwe repwe ninnino, non ewe chok nikinikin napanap usun i, me pwe repwe toropas fetan me ninnino, pwan mwo usun emon siip ese wor noun chon masen siip a sufetan me ninnino me ren man mwacho; iwe iei nengeni, ekkei kapas ra kapunguno, pun ra sufetan me ren ekkewe chon Leiman, me ra kutter, iwe ra wichiwich.

13 Iwe non ewe fansoun pwe nupwen ekkewe chon Leiman ra kuna pwe rese tongeni akkufu ekkewe chon Nifai ra niwin sefan ngeni pwisin fonuer we; iwe chommong me neir ra feito repwe nonnom non ewe fonuen Ishmael me ewe fonuen Nifai, me ra achufengeni inisir ngeni ekkewe aramasen Kot, ir ekkewe aramasen Antai-Nifai-Liai.

14 Iwe ra pwan peiasenano nour kewe pisekin maun, usun chok pwir kewe ra fen fori, iwe ra poputa ne winiti aramas mi tupwon; iwe ra fetan non ekkewe aanen ewe Samon, me ra achocho ne aneasochisi an kewe annuk me an kewe annuk kisikis.

15 Ewer, iwe ra aneasochisi ewe annukun Moses; pun mi auchea pwe repwe aneasochisi ewe annukun Moses non ewe fansoun, pun esemo pwonueta. Nge inamo ewe annukun Moses, ra esuku wareton Kraist, ra ekieki pwe ewe annukun Moses a ew esisinen an wareto, me ra nuku pwe repwe aneasochisi ekkewe mwokutukutun nukun tori ewe fansoun i epwe pwano ngeni ir.

16 Iei rese ekieki pwe amanau a feito seni ewe annukun Moses; nge ewe annukun Moses a anisi ne apochokunano ar nuku non Kraist; iwe iei ra angei ew apinukunuk me non nuku, ngeni amanau esemuch, ra apinukunuk won ewe ngunun osini, minne a kapas usun ekkewe mettoch repwe feito.

17 Iwe iei nengeni, Ammon, me Aaron, me Omner, me Himnai, me pwir kewe ra fokkun pwapwa, ren ewe fetanoch minne a wor rer me nein ekkewe chon Leiman, nupwen ra kuna pwe ewe Samon a fang ngeni ir anongonong won ar kewe iotek, me pwe a pwan apungano an kapas ngeni ir non ew me ew mettoch.