1 O bwe in kar juon enjeļ, im kar tōpar aolep kōņaan ko an buruō, bwe in maron̄ ilo̧k im kōnono kōn jilel an Anij, kōn ainikien eo enaaj kōm̧akūtkūt laļ, im kūr ukeļo̧k n̄an armej otemjeļo̧k!

2 Aaet, in kar kabun̄bun̄ļo̧k n̄an armej otemjeļo̧k, āinwōt kōn ainikien jourur, ukeļo̧k im karōk in lo̧mo̧o̧r, bwe rej aikuj ukeļo̧k im itok n̄an ad Anij, bwe en jab bar wōr eļapļo̧k būrom̧ōj ioon aolepān mejān laļ.

3 Ak lo, n̄a juon armej, im ij jero̧wiwi ilo aō kōņaan; bwe ij aikuj in kar po buruō kōn men ko Irooj eaar jitōn̄ tok n̄an eō.

4 Ijjab aikuj kar dāpij ilo kōņaan ko aō naan in jiron̄ ko reppen an juon Anij ejim̧we, bwe ijeļā bwe Eaar letok n̄an armej ekkar n̄an aer kōņaan, men̄e ej n̄an mej ak n̄an mour; aaet, ijeļā bwe Eaar letok n̄an armej, aaet, jiron̄ n̄an er naan in jiron̄ ko rej jamin ukoktak, ekkar n̄an ankilaer, men̄e rej n̄an lo̧mo̧o̧r ak n̄an ko̧kkure.

5 Aaet, im ijeļā bwe em̧m̧an im nana raar itok im̧aan aolep armej; e eo ejjab jeļā em̧m̧an jān nana ej ejjeļo̧k ruōn; a e eo ejeļā em̧m̧an im nana, n̄an e ej leļo̧k ekkar n̄an kōņaan ko an; men̄e ej kōņaan em̧m̧an ak nana, mour ak mej, m̧ōņōņō ak ukeļo̧k in bōklōkōt.

6 Kiiō, kōnke ijeļā men kein, etke in aikuj kōņaan eļapļo̧k jān n̄an kōm̧m̧ane jerbal eo kar kūr eō n̄an e?

7 Etke in aikuj kōņaan bwe in kar juon enjeļ, bwe in maron̄ kōnono n̄an aolep jem̧ļo̧k ko in laļ?

8 Bwe lo, Irooj ej letok n̄an aolep laļ ko, laļ im lo make, n̄an katakin kōn An innaan, aaet, ilo jeļāļo̧kjeņ, aolep men ej lo ekkar bwe ren bōk; kōn menin jej lo bwe Irooj ej kōm̧m̧an pepe ilo jeļāļo̧kjeņ, ekkar n̄an men eo ej jim̧we im m̧ool.

9 Ijeļā bwe Irooj Eaar jiron̄ eō, im ij likōmjāje ilo e. Ijjab likōmjāje ilo n̄a make, a ij likōmjāje ilo men eo Irooj Eaar jiron̄ eō; aaet, im en̄in ej aō wōj, bwe bōlen in maron̄ juon kein jerbal ilo pein Anij n̄an bōktok jān armej n̄an ukeļo̧k; im en̄in ej aō lan̄lōn̄.

10 Im lo, n̄e ij lo elōn̄ iaan ro jeiū im jatū rem̧ool ilo ukeļo̧k, im rej itok n̄an Irooj aer Anij, innām aō ej obrak kōn lan̄lōn̄; innām ij keememej ta Irooj Eaar kōm̧m̧an n̄an eō, aaet, em̧ool bwe Eaar ron̄ aō jar; aaet, innām ij keememej An pein tūriam̧o kake eo ej erļo̧ke tok n̄an eō.

11 Aaet, im ij barāinwōt keememej ineen kōm̧akoko an ro jema; bwe ikanooj jeļā bwe Irooj Eaar lo̧mo̧o̧ren er jān kōm̧akoko, im jān in kar kajutak kabun̄ eo An; aaet, Irooj Anij, Anij an Ebream, Anij an Aisak, im Anij an Jekab, Eaar lo̧mo̧o̧ren er jān kōm̧akoko.

12 Aaet, Iaar iien otemjeļo̧k keememej ineen kōm̧akoko an ro jema; im ejja Anij in wōt eo Eaar lo̧mo̧o̧ren er jān pein riIjipt Eaar lo̧mo̧o̧ren er jān kōm̧akoko.

13 Aaet, im ejja Anij in wōt Eaar kajutak kabun̄ eo An ilubwiljier; aaet, im ejja Anij in wōt Eaar kūr eō kōn juon kūr ekwōjarjar, n̄an kwaļo̧k naan eo n̄an armej rein, im Eaar letok n̄an eō eļap tōprak, eo ilo e aō lan̄lōn̄ ej obrak.

14 Ak ij jab lan̄lōn̄ ilo tōprak eo aō make wōt, ak aō lan̄lōn̄ ej obrakļo̧k kōnke tōprak ko an ļōm̧aro jeiū im jatū, ro raar pād ilo āneo ilōn̄ āneen Nipai.

15 Lo, raar kanooj jerbal, im kar bōktok eļap leen, im ewi jon̄an naaj jinōkjej eo aer?

16 Kiiō, n̄e ij ļōmņak kōn tōprak ko an rein jeiū im jatū aō emootļo̧k, em̧ool n̄an jepelļo̧k eo an jān ānbwinnū, āinwōt kar m̧okta, eļap ej aō lan̄lōn̄.

17 Im kiiō Anij en leļo̧k n̄an rein, jeiū im jatū, bwe ren maron̄ jijet ilo aelōn̄ an Anij; aaet, im barāinwōt aolep ro rej leen jerbal ko aer bwe ren maron̄ jamin bar diwōjļo̧k; ak bwe ren maron̄ nebar E indeeo. Im Anij en leļo̧k bwe e en maron̄ kōm̧m̧an ekkar n̄an naan ko aō, em̧ool āinwōt iaar kōnono. Amen.