1 Aay, laa’inaq raj taxaq anjel, ut chiwanq raj taxaq rajom inch’ool, re raj tinxik ut toxin’aatinaq raj rik’in xtrompeet li Dios, rik’in jun xyaab’ kuxej li taachiq’oq raj re li ruchich’och’, ut tinyaab’asi raj li jalb’a-k’a’uxlej re li junjunq chi tenamit!

2 Relik chi yaal, tinch’olob’ raj chiru li junjunq chi aamej, chanchan rik’in xyaab’ li kaaq, li jalb’a-k’a’uxlej ut li k’uub’anb’il na’leb’ re li tojb’al-ix, naq tento te’xjal xk’a’uxl ut te’chalq rik’in li qaDios, re naq maak’a’aq chik rahil ch’oolejil chiru chixjunil lix b’een li ch’och’.

3 A’ut k’ehomaq reetal, winqin, ut ninmaakob’ rik’in li wajom; xb’aan naq tento raj taatz’aqloq we li k’a’aq re ru xjek’i chaq li Qaawa’ choq’ we.

4 Tento raj naq sa’ li wajom ink’a’ tinsach li kawil aatin taqlanb’il xb’aan jun li Dios tiik xna’leb’, xb’aan naq ninnaw naq a’an nak’ehok reheb’ li winq jo’ chanru li rajomeb’, ma choq’ re li kamk malaj choq’ re li yu’amej; relik chi yaal, ninnaw naq a’an najek’in reheb’ li winq, relik chi yaal, naxtaqla choq’ reheb’ li taqlanb’il aatin li ink’a’ naru xjalb’al, jo’ chanru li rajomeb’ xch’ool, a’ yaal choq’ re li kolb’a-ib’ malaj choq’ re li sache’k.

5 Relik chi yaal, ninnaw naq li us ut li ink’a’ us chalenaqeb’ chiru chixjunileb’ li winq; ani li moko naxnaw ta b’ar wan li us ut li ink’a’ us maak’a’ xjitb’al; a’b’anan ani nanawok re b’ar wan li us ut li ink’a’ us, re a’an k’eeb’il jo’ chanru li rajom, a’ yaal ma naraj li us malaj li ink’a’ us, li yu’am malaj li kamk, li sahil ch’oolejil malaj li yot’e’k sa’ reek’ob’aal xch’ool.

6 Anajwan, rik’in ut naq ninnaw li k’a’aq re ru a’in, k’a’ut naq ink’a’ raj tz’aqal chiwu xb’aanunkil li k’anjel li b’oqb’ilin wi’?

7 K’a’ut naq tinwaj wank choq’ anjel, re taaruuq tin’aatinaq toj sa’ chixjunil lix maril li ruchich’och’?

8 Xb’aan naq k’ehomaq reetal, li Qaawa’ naxk’e re chixjunileb’ li tenamit, xkomon xtenamit ut raatinob’aal, re xk’utb’al li raatin, relik chi yaal, rik’in xchaab’ilal li na’leb’, chixjunil li naxk’oxla naq us naq te’xk’ul; jo’kan ut, naqil naq li Qaawa’ nak’ehok na’leb’ rik’in chaab’ilal, jo’ chanru li k’a’ru tiik ut yaal.

9 Ninnaw li k’a’ru kinixtaqla wi’ li Qaawa’, ut ninnima inloq’al rik’in. Moko ninnima ta inloq’al injunes, ninnima b’an inloq’al rik’in li kinixtaqla wi’ li Qaawa’; relik chi yaal, a’in ut inloq’al, naq maare tinwanq choq’ k’anjeleb’aal sa’ ruq’ li Dios re xk’amb’al junaq aamej sa’ li jalb’a-k’a’uxlej; a’in ut xsahil inch’ool.

10 Ut k’ehomaq reetal, naq nawil naab’al reheb’ li was wiitz’in li yot’b’il chi yaal xch’ooleb’, ut li yookeb’ chi chalk rik’in li Qaawa’ lix Dios, rik’in a’an nanujak li waam rik’in sahilal; rik’in a’an najultiko’ we k’a’ru xb’aanu li Qaawa’ choq’ we, relik chi yaal, a’an naq xrab’i intij; relik chi yaal, toja’ ut naq najultiko’ we li ruq’ aj uxtaan li ye’b’il we.

11 Relik chi yaal, ut najultiko’ ajwi’ we lix preexileb’ inyuwa’; xb’aan naq ninnaw chi yaal naq li Qaawa’ kixkoleb’ chiru moosil, ut rik’in a’in kixxaqab’ lix iglees; relik chi yaal, li Qaawa’ Dios, lix Dios laj Abraham, lix Dios laj Isaak, ut lix Dios laj Jakob, kixkoleb’ chiru li moosil.

12 Relik chi yaal, junelik wanjenaq chi jultik we lix preexileb’ lin yuwa’; ut li Dios ajwi’ a’an li kikolok chaq reheb’ sa’ ruq’eb’ laj Egipcio, kixkoleb’ chiru moosil.

13 Relik chi yaal, ut li Dios ajwi’ a’an kixxaqab’ lix iglees sa’ xyanqeb’; relik chi yaal, ut li Dios ajwi’ a’an kinixb’oq rik’in jun li santil b’oqok, re xjultikankil li aatin chiru li tenamit a’in, ut kinixk’e chi usaak chi naab’al, sa’ li nanumta wi’ xsahil inch’ool.

14 A’b’anan moko ka’aj ta wi’ rik’in li usaak xink’ul injunes nasaho’ inch’ool, q’axal wi’chik b’an nanumta xsahil inch’ool xb’aan li usaak ke’xk’ul li was wiitz’in, li xikenaqeb’ taqe’q sa’ li ch’och’ Nefi.

15 K’ehomaq reetal, eb’ a’an ke’k’anjelak chi numtajenaq, ut naab’al li ke’uuchin wi’; ut k’a’jo’ xnimal lix q’ajkaamunkileb’ taawanq!

16 Anajwan, naq nink’oxla li usaak ke’xk’ul li was wiitz’in a’in nak’ame’ li waam, jo’ raj jachjo ru rik’in li tib’elej naq wan, xb’aan naq q’axal nim xsahil inch’ool.

17 Anajwan ut li Dios chixk’ehaq reheb’ li was wiitz’in a’in naq te’chunlaaq sa’ li rawa’b’ejihom li Dios; relik chi yaal, ut jo’kaneb’ ajwi’ chixjunileb’ li wankeb’ choq’ ruuchinihom lix k’anjeleb’, re naq ink’a’ chik te’elq chaq, re b’an te’ruuq chixnimankil ru a’an chi junelik. Ut li Dios chixk’ehaq taxaq chi uxmank jo’ chanru li waatin, jo’ chanru ajwi’ kinye. Amen.