1 Iwe non ewe fansoun non nepoputan ewe animuwen ierin muur we a poputa ne wor ew anini fengen nein ekkewe aramas; pun emon mwan, ewe a iteni Amlisai, i emon mwan mi fokkun nikatuputup, ewer, emon mwan mi mirit usun miritin ewe fonufan, i a anongonong won mwokutukutun ewe mwan a nieno Gideon me ren ewe ketinas, ewe a ninnino anongonong won ewe annuk—

2 Iei ei Amlisai, ren an nikatuputup, a emmwenano chommong aramas mwirin i; pwan mwo chommong pwe ra poputa ne fokkun pochokununo; iwe ra poputa ne achocho ar repwe fori Amlisai an epwe emon king won ekkewe aramas.

3 Iei ei a anoninen ngeni ekkewe aramasen ewe mwichefen, me pwan ngeni meinisin ekkewe resemo emmwenino me ren pesepesen Amlisai; pun ir mi sinei pwe anongonong won ar annuk ekkena sokkun mettoch epwe fokkun foruta me ren mongungun ekkewe aramas.

4 Iei minne, ika pwe epwe fich an Amlisai epwe feioch me ren mongungun ekkewe aramas, i, emon mwan mi ngaw, epwe angei seni ir ar kewe pung me tufich me ren ewe mwichefen; pun ina an mochen an epwe atano ewe mwichefenin Kot.

5 Iwe non ewe fansoun pwe ekkewe aramas ra achufengeni pwisin inisir me non unusen ewe fonu, emon me emon aramas anongonong won an ekiek, ika pwe epwe efich ngeni ika ungeni Amlisai, non keimunon mwicheich, a kon watte ar anini me amwararen anini fengen emon ngeni pwan emon.

6 Iwe iei ra achufengeni pwisin inisir pwe repwe finata ren mongungur usun ewe mettoch a fis; iwe ra watiw me mwen ekkewe sou apung.

7 Iwe non ewe fansoun pwe mongungun ekkewe aramas a feito ungeni Amlisai, iwe i ese kefinita an epwe emon king won ekkewe aramas.

8 Iei ei a fori watten pwapwa non netipen ekkewe ra ungeni i; nge Amlisai a amwasangata ekkewe ir mi efich i ar repwe song ngeni ekkewe rese efich i.

9 Iwe non ewe fansoun pwe ra ioifengeni pwisin inisir, me ra epinano Amlisai pwe epwe nour king.

10 Iei nupwen Amlisai a kefinita an epwe king wor a annuku ngeni ir pwe repwe angei pisekin maun ne ungeni pwir kewe; iwe ei a fori pwe epwe tongeni nemenem wor.

11 Iei ekkewe aramasen Amlisai ra sokkono ren ewe it Amlisai, ra iteni chon Amlisai; iwe ekkewe nussun ra iteni chon Nifai, are ekkewe aramasen Kot.

12 Iei minne ekkewe aramasen Nifai ra sinei usun mochenin ekkewe chon Amlisai, iwe iei minne ra monneta ar repwe churir; ewer, ra episeki inisir ren ketinas, me ren tok, me ren nikappich, me ren foun nikappich, me ren foun fau, me ren aunun, me ren sokopaten sokkun pisekin maun meinisin, seni sokopaten nikinik.

13 Iwe iei ra monneta ar repwe churi ekkewe chon Amlisai atun ar we fansoun wareto. Iwe mi wor kaptin mi kefinita, me kaptin mi sufon, me kaptin mi nap, anongonong won chommongur.

14 Iwe non ewe fansoun pwe Amlisai a episeki noun kewe mwan ren sokopaten pisekin maun meinisin seni sokopaten nikinik; iwe a pwan finata chon nemenem me sou emmwen won noun kewe aramas, ar repwe emmwenir non maun ngeni pwir kewe.

15 Iwe non ewe fansoun pwe ekkewe chon Amlisai ra feito ngeni ewe chukuchukuta Amnaiu, minne a nom otiwen ewe chonupupu Sidon, minne a pupuno unukun ewe fonuen Saraemla, iwe ikewe ra poputa ne maun ngeni ekkewe chon Nifai.

16 Iei Alma, pokiten i ewe sou apung mi nap me ewe kepinan ekkewe aramasen Nifai, iei minne a feita fiti noun kewe aramas, ewer, fiti noun kewe kaptin, me kaptin mi nap, ewer, me mwen noun kewe sounfiu, ar repwe ungeni ekkewe chon Amlisai ne maun.

17 Iwe ra poputa ne nieno ekkewe chon Amlisai won ewe chukuchukuta otiwen Sidon. Iwe ekkewe chon Amlisai ra fiu ngeni ekkewe chon Nifai ren pochokun watte, ina minne chommong me nein ekkewe chon Nifai ra tur me mwen ekkewe chon Amlisai.

18 Nge inamo ewe Samon a apochokunano poun ekkewe chon Nifai, iwe ra nieno ekkewe chon Amlisai ren ew wachemuken ninnino, pwe ra poputa ne su me mwer.

19 Iwe non ewe fansoun pwe ekkewe chon Nifai ra tapwei ekkewe chon Amlisai unusen ewe ran, me nireno ren wachemuken ninnino, ina minne ninninon ekkewe chon Amlisai a ukukun engon me ru ngerou nime puku inik me ruemon aramas; me ninninon ekkewe chon Nifai a ukukun wonu ngerou nime puku wone me ruemon aramas.

20 Iwe non ewe fansoun pwe nupwen Alma ese chiwen tongeni tapwei ekkewe chon Amlisai a fori pwe noun kewe aramas repwe aueta imwer kewe imw mangaku non ewe nemonun chukun Gideon, ewe nemonun chuk a eiteit seni Gideon ewe a ninnino me ren poun Nior ren ewe ketinas; me non ei nemonun chuk ekkewe chon Nifai ra aueta imwer kewe imw mangaku non ewe pwinin.

21 Iwe Alma a tinano noun kewe chon spai ar repwe tapwei ekkewe nussun chon Amlisai, pwe i epwe tongeni sinei usun ar kokkot me ar kokkotun mettoch mi ngaw, ren ewe popun i epwe tongeni pwisin masa inisin seni ir, pwe i epwe tongeni tumunu noun kewe aramas seni ar repwe ninnino.

22 Iei ekkewe i a tinareuu pwe repwe attona ewe nenien asoso an ekkewe chon Amlisai ra iteni Siram, me Amnor, me Mantai, me Limer; ikkei ir ekkewe ra feiniu fiti nour kewe mwan pwe repwe attona ewe nenien asoso an ekkewe chon Amlisai.

23 Iwe non ewe fansoun pwe non ewe soran ra mwitir niwin ngeni ewe nenien asoso an ekkewe chon Nifai, ra ennetin ingeno, me mairu ren watten nuokus, ra apasa:

24 Nengeni, am aua tapwei ewe mwichen ekkewe chon Amlisai, iwe ren am fokkun mairu, non ewe fonuen Mainan, asetan ewe fonuen Saraemla, won ewe aan ngeni ewe fonuen Nifai, am aua kuna chommongun mwicheichen ekkewe chon Leiman; iwe nengeni, ekkewe chon Amlisai ra chonir;

25 Iwe ra feino won pwich kewe non ena fonu; iwe ra su me mwer fiti nour kewe pwin man, me punuwer kewe, me nour kewe, ngeni teninimwach we; iwe tiwenon chok ika sipwe mwitir repwene nenienano teninimwach we, me semach kewe, me punuwach kewe, me nouch kewe repwe ninnino.

26 Iwe non ewe fansoun pwe ekkewe aramasen Nifai ra angei imwer kewe imw mangaku, me tou seni ewe nemonun chukun Gideon ngeni teninimwer we, minne ewe teninimwen Saraemla.

27 Iwe nengeni, nupwen ar feino epekin ewe chonupupu Sidon, ekkewe chon Leiman me ekkewe chon Amlisai, ekkewe ra fokkun chommong, usun ita, usun ekkewe foun pien neset, ra feito wor ar repwe nireno.

28 Nge inamo, ekkewe chon Nifai ra pochokununo me ren poun ewe Samon, iwe ra fen ennetin iotek ngeni i pwe i epwe angasereno seni ne poun ekkewe chon koum ngeni ir, iei minne ewe Samon a rongorong ar sio, me a apochokunereno, iwe ekkewe chon Leiman me ekkewe chon Amlisai ra tur me mwer.

29 Iwe non ewe fansoun pwe Alma a fiu ngeni Amlisai me ren ewe ketinas, ra nenefengen; iwe ra fiu non pochokun, emon ngeni pwan emon.

30 Iwe non ewe fansoun pwe Alma, pokiten i emon mwanin Kot, pokiten a fen aea watten nuku, a sio, a apasa: O Samon, kopwe umoumoch me mut ngeniei manauei, pwe upwe tongeni ew pisekin aninis me non poum ai upwe amanaua me tumunu ekkei aramas.

31 Iei nupwen Alma a wes ne apasa ekkei kapas a fiu ngeni Amlisai; iwe i a pochokun, ina minne i a nieno Amlisai ren ewe ketinas.

32 Iwe a pwan fiu ngeni ewe kingen ekkewe chon Leiman; nge ewe kingen ekkewe chon Leiman a suno sefan seni me mwen Alma me tinano noun kewe chon mas pwe repwe fiu ngeni Alma.

33 Nge Alma, fiti noun kewe chon mas, ra fiu ngeni ekkewe chon masen ewe kingen ekkewe chon Leiman tori an nireno me asusefanireno.

34 Iwe iei a nimeti ewe puun, are fen ewe oroppa, minne a nom won notoun ewe chonupupu Sidon, a aturanong inisin ekkewe chon Leiman ekkewe ra fen ninnino non ekkewe konikin Sidon, pwe ren ewe popun epwe wor nenien noun kewe aramas ar repwe feino me fiu ngeni ekkewe chon Leiman me ekkewe chon Amlisai won notoun ewe chonupupu Sidon.

35 Iwe non ewe fansoun pwe nupwen meinisin ra fen feino epekin ewe chonupupu Sidon ekkewe chon Leiman me ekkewe chon Amlisai ra poputa ne su me mwer, inamo ika ra kon chommong rese tongeni anneanir.

36 Iwe ra suno me mwen ekkewe chon Nifai ngeni ewe fonu pon minne a nom notou me ennefen, a towaweno seni ekkewe kianin ewe fonu; iwe ekkewe chon Nifai ra tapwer ren unusen ar pochokun, me nireno.

37 Ewer, ra fiu epek me epek, me ninnino me su sefan, tori ar ra toropas fetan non notou me non ennefen, tori ar ra tori ewe fonu pon, minne a iteni Ermounts; iwe ina ewe kinikinin ewe fonu pon minne a masow ren man mi mwacho me rochongaw.

38 Iwe non ewe fansoun pwe chommong ra mano me non ewe fonu pon pokiten feiengawer kewe, me ra itino ren ekkewe man mwacho me pwan ekkewe machangen non asepwan mi ochoch futuk; me chur kewe ra pwa, me ra fen chukuchukuta won ewe puun.