1 Nengeni, iei non ewe fansoun pwe mwirin an ekkewe aramasen Ammon ra nonnomono non ewe fonuen Jerson, ewer, me pwan mwirin ekkewe chon Leiman ra su seni ewe fonu, me ar kewe mi mano ra peiaseno me ren ekkewe aramasen ewe fonu—

2 Iei rese anneani ar kewe mi mano pokiten watten chochor kewe; rese pwan anneani manon ekkewe chochon chon Nifai—nge non ewe fansoun mwirin ar peiasenano ar kewe mi mano, me pwan mwirin ekkewe ranin echikipin, me netipeta, me iotek, (iwe a non ewe engon me wonuen ierin muun ekkewe sou apung won ekkewe aramasen Nifai) a poputa ne wor soposoponon kinamwe non unusen ewe fonu.

3 Ewer, iwe ekkewe aramas ra achocho ne aneasochisi ekkewe annukun ewe Samon; iwe ra tichik ne apwonueta ekkewe angangepin an Kot, anongonong won ewe annukun Moses; pun ra keao ne aneasochisi ewe annukun Moses tori an epwe pwonueta.

4 Iwe iei ekkewe aramas ese chiwen wor ar osukosuk non unusen ewe engon me wonuen ierin muun ekkewe sou apung won ekkewe aramasen Nifai.

5 Iwe non ewe fansoun pwe non nepoputan ewe efisuwen ierin muun ekkewe sou apung, mi wor soposoponon kinamwe.

6 Nge non ewe fansoun non ewe kinikinin soponon ewe efisuwen ier, a feito emon mwan non ewe fonuen Saraemla, iwe i chon Koum ngeni Kraist, pokiten a poputa ne afanafan ngeni ekkewe aramas ne ungeni ekkewe osini minne ekkewe soufos ra fen apasa, usun wareton Kraist.

7 Iei ese wor annuk mi ungeni an emon mwan nuku; pun a ennetin ungeni ekkewe aurour an Kot an epwe wor ew annuk minne epwe fori aramas ar resap nonnofengen.

8 Pun iei anon ewe pukefel: Oupwe finata non ei ran, ion oupwe angang ngeni.

9 Iei ika emon aramas a mochen epwe angang ngeni Kot, ina an tufich; are fen, ika a nuku non Kot ina an tufich ne angang ngeni i; nge ika ese nuku non i ese wor annuk ar repwe ngeni niwinin.

10 Nge ika a nii manau a angei niwinin ngeni mano; me ika a angemwan i a pwan angei niwinin; iwe ika a sona i a pwan angei niwinin; iwe ika a fori nisou i a pwan angei niwinin; ewer, pun ekkei fofforungaw meinisin ra angei niwinir.

11 Pun a fen wor ew annuk pwe aramas repwe kapung anongonong won ar atai annuk. Nge inamo, ese wor annuk mi ungeni an emon aramas nuku; iei minne, emon aramas a angei niwinin chok ren ekkewe atai annuk minne i a fen fori; iei minne aramas meinisin ra nonnofengen.

12 Iwe ei chon Koum ngeni Kraist, ewe itan Korior, (iwe ewe annuk ese wor an nemenem won) a poputa ne afanafan ngeni ekkewe aramas pwe esap wor Kraist. Iwe anongonong won ei napanap i a afanafan, a apasa:

13 O ami ekkewe oua mwochutiw ren ew apinukunuk mi puch me namotmwan, pwata oua achoukemi ren sokkun mettoch mi puch? Pwata oua kutta emon Kraist. Pun ese wor emon aramas a tongeni sinei usun och mettoch minne epwe feito.

14 Nengeni, ekkei mettoch minne oua eita ngeni osini, minne oua apasa pwe ra keititiw me ren soufos mi fel, nengeni, ir eereni mi puch an sememi kewe.

15 Ifa usun oua sinei usun ennetir? Nengeni, ouse tongeni sinei usun mettoch minne ouse kuna; iei minne ouse tongeni sinei pwe epwe wor emon Kraist.

16 Oua esuku me apasa pwe oua kuna ew omusomusen ami kewe tipis. Nge nengeni, ina ewe pungunon ew ekiek mi umwes; iwe ei kokkotongawen ami ekiek a feito pokiten eerenien sememi kewe, minne a emmwenikemino ngeni ew nuku usun mettoch minne rese ennet.

17 Me pwan chommong sokkun mettoch i a apasa ngeni ir, a ureni ir pwe ese tongeni wor achasefan epwe for fan iten tipisin aramas, nge emon me emon aramas epwe sinei öch ika ngaw non ei manau anongonong won ewe mwokutukutun ewe aramas; iei minne emon me emon aramas a feioch anongonong won an sinei, me pwe emon me emon aramas a win anongonong won an pochokun; iwe met chok emon aramas a fori esap ew atai annuk.

18 Iwe iei a afanafan ngeni ir, a emmwenano netipen chommong, a fori ir pwe repwe sachetai mokurer non ar fofforungaw, ewer, a emmwenano chommong fefin, me pwan mwan, ne fori angangen nisou—a ureni ir pwe nupwen emon mwan a mano, a ina nesoponon manauan.

19 Iei ei mwan a pwan feino ngeni ewe fonuen Jerson, pwe epwe afanafana ekkei mettoch me nein ekkewe aramasen Ammon, ekkewe ra akkom aramasen chon Leiman.

20 Nge nengeni ra kon mirit nap seni chommong me nein ekkewe chon Nifai; pun ra angei i, me foti i, me uweiano i me mwen Ammon, ewe a pris mi nap won ekkena aramas.

21 Iwe non ewe fansoun pwe a annuku pwe repwe uweiau i seni ewe fonu. Iwe a feito ngeni ewe fonuen Gideon, me poputa ne pwan afanafan ngeni ir; iwe ikei ese kon wor an fetanoch, pun a ono me fofo me emmwenino me mwen ewe pris mi nap, me pwan ewe sou apung mi nap won ewe fonu.

22 Iwe non ewe fansoun pwe ewe pris mi nap a apasa ngeni i: Pwata ka feinfetan ne angawano ekkewe kokkotun ewe Samon? Pwata ka aiti ekkei aramas pwe esap wor Kraist, an epwe aosukosuka ar apwapwa? Pwata ka kapas ne ungeni ekkewe osini meinisin an ekkewe soufos mi fel?

23 Iei itan ewe pris mi nap Kitona. Iwe Korior a apasa ngeni i: Pokiten use afanafana ekkewe eereni mi puch an sememi kewe, me pokiten use afanafana ekkei aramas ar repwe pwisin amwochuretiw fan ekkewe angang mi puch me mwokutukut minne ra foruta me ren prisen nom, an epwe angemwani pochokun me nemenem wor, an epwe annomur non ew nikinikin tiparoch, pwe resap sachetai mokurer, nge turutiw anongonong won ami kewe kapas.

24 Oua apasa pwe ekkei aramas ir aramas ngaseno. Nengeni, ua apasa pwe ra nom non fotek. Oua apasa pwe ekkewe osinin nom ir mi ennet. Nengeni, ua apasa pwe ouse sinei pwe ir mi ennet.

25 Oua apasa pwe ekkei aramas ir aramas tipis me turutiw, pokiten ewe atai annuk an emon sam ika in. Nengeni, ua apasa pwe emon semirit ese tipis pokiten seman are inan.

26 Iwe oua pwan apasa pwe Kraist epwe wareto. Nge nengeni, ua apasa ouse sinei pwe epwe wor emon Kraist. Iwe oua pwan apasa pwe i epwe ninnino fan iten tipisin ewe fonufan—

27 Iwe iei oua emmwenano ekkei aramas ngeni ekkewe eereni mi puch an sememi kewe, me anongonong won ami pwisin mochen; me oua amwochuretiw, pwan mwo usun ita non fotek, pwe oupwe apisekano inisimi ren angangen pour, pwe resap tongeni neneta ren pwaracho, pwe resap pwaracho ne pwapwaiti ar pung me tufich.

28 Ewer, rese pwaracho ne aea met minne pwisin ar ren ewe nuokus ar repwe asonga nour kewe pris, ekkewe ra achour anongonong won ar mochen, me ra emmweni ir ar repwe nuku, me ren ar kewe eereni me ar anean me ar ekiek mi chok weiweita, me ar osini, me ar kefisitan monomon, pwe repwe, ika rese fori anongonong won ar kewe kapas, asonga emon aramasen nang rese sinei, ewe ra apasa pwe i Kot—emon aramasen nang ese wor emon a fen kukkuna me sinei, ewe ese mwo fen fis me esap tongeni fis.

29 Iei nupwen ewe pris mi nap me ewe sou apung mi nap ra kuna pochokunen netipan, ewer, nupwen ar kuna pwe i epwe kapas mi ngaw ne ungeni Kot, resap awora ponuwen an kewe kapas; nge ra annuku pwe epwe fofo; iwe ra fangeta i me ne poun ekkewe sou angei annuk, me tinano i ngeni ewe fonuen Saraemla, pwe i epwe emmwenino me mwen Alma, iwe ewe sou apung mi nap i ewe kepinan unusen ewe fonu.

30 Iwe non ewe fansoun pwe nupwen a emmwenito me mwen Alma me ewe sou apung mi nap, a pwan soposopono usun chok napanapan an fori me non ewe fonuen Gideon; ewer, a sopweno ne sufonungaw.

31 Iwe a uta ne kapas neuwomongun kapas me mwen Alma, me a kapas mi ngaw ngeni ekkewe pris me sense, a etipisi ir ren ar emmwenano ekkewe aramas ngeni ekkewe eereni mi umwes an semer kewe, fan iten asengesin ar repwe pisekisek ren angangen ekkewe aramas.

32 Iei Alma a apasa ngeni i: Ka sinei pwe am ause apisekano inisim won angangen ekkei aramas; pun nengeni ua fen angang pwan mwo seni nepoputan muun ekkewe sou apung tori iei, ren pwisin pei ren aninisi, me nukun ai kewe chommong sai unukun ewe fonu ne afanafana ewe kapasen Kot ngeni nei kewe aramas.

33 Iwe me nukun ekkewe chommong angang minne ua fen fori non ewe mwichefen, use mwo fen angei mwaren och senine ren niwinin ai angang; esap pwan mwo emon me nein pwi kewe, tiwenon chok non ewe nenien mwottun kapung; iwe mwirin am aua angei chok anongonong won ewe annuk ren niwinin am fansoun.

34 Iwe iei, ika am ause angei och mettoch ren niwinin am kewe angang non ewe mwichefen, met a atufichikem ne angang non ewe mwichefen tiwenon chok ne afanafana ewe ennet, pwe epwe wor am apwapwa non pwapwan pwim kewe?

35 Iwe pwata ka apasa pwe am aua afanafan ngeni ekkei aramas pwe am aupwe angei moni, nupwen en, pwisin won inisum, ka sinei pwe am ause angei och moni? Iwe iei, ka nuku pwe am aua atupano ekkei aramas, minne a forata sokkun pwapwa non netiper?

36 Iwe Korior a ponueni i, Ewer.

37 Iwe mwirin Alma a apasa ngeni i: Ka nuku pwe mi wor emon Kot?

38 Iwe a ponueni, Apw.

39 Iei Alma a apasa ngeni i: Kopwe amam sefan pwe mi wor emon Kot, me pwan amam ewe Kraist? Pun nengeni, ua apasa ngonuk, ngang mi sinei pwe mi wor emon Kot, me pwan Kraist epwe wareto.

40 Iwe iei met om pisekin pwarata pwe ese wor Kot, are pwe Kraist esap wareto? Ua apasa ngonuk pwe ese wor, tiwenon chok om pwisin chok kapas.

41 Nge, nengeni, mi wor rei mettoch meinisin pwe ew pwarata pwe ekkei mettoch ir mi ennet; me mi pwan wor reom mettoch meinisin pwe ew pwarata ngonuk pwe ir mi ennet; iwe kopwe amam ir? Ka nuku pwe ekkei mettoch ir mi ennet?

42 Nengeni, ua sinei pwe ka nuku, nge ka nom fan nemenien emon ngun mi chofona, me ka poutano ewe Ngunun Kot pwe esap wor nenian non en; nge ewe tefin a wor an pochokun wom, iwe a emmweni fetaneok, a anganga ekkewe kokkot pwe epwe tongeni angawano ekkewe noun Kot.

43 Iwe iei Korior a apasa ngeni Alma: Ika kopwe pwari ngeniei ew esisin, pwe upwe tongeni pesepes pwe mi wor emon Kot, ewer, pwari ngeniei pwe mi wor an manaman, iwe mwirin upwe pesepes usun ennetin om kapas.

44 Nge Alma a apasa ngeni i: A fen naf esisin; kopwe sotuni om Kot? Kopwe apasa, Pwari ngeniei ew esisin, nupwen a fen wor reom pwarata usun pwi kei meinisin, me pwan ekkewe soufos mi fel meinisin? Ekkewe pukefel ra kawor me mwom, ewer, me mettoch meinisin ra esisinata pwe mi wor emon Kot; ewer, pwan mwo ewe fonufan, me mettoch meinisin minne ra nom won unungan, ewer, me mwokutukutun, ewer, me pwan ekkewe fonufan meinisin minne ra mwokut non pwisin tettenochur ra pwarata pwe mi wor emon Chon Fori mi Napanap.

45 Iwe iei en mi chok feinfetan, ne emmwenano netipen ekkei aramas, pwarata ngeni ir pwe ese wor Kot? Iwe iei kopwe chok amam seni ekkei chon pwarata meinisin? Iwe a apasa: Ewer, upwe amam, tiwenon chok ika kopwe pwari ngeniei ew esisin.

46 Iwe iei non ewe fansoun pwe Alma a apasa ngeni i: Nengeni, ua netipengaw pokiten pochokunen netipom, ewer, pwe kopwe chok ungeni ewe ngunun ennet, pwe ngunum epwe ngaweno.

47 Nge nengeni, mi tufich pwe ngunum epwe poutmwanino nap seni om kopwe ewe popun uweiatiw chommong ngun ngeni kiteter, ren om chofona me ren om kapas mi eingeing chofona; iei minne ika kopwe pwan amam sefan, nengeni Kot epwe wichiuk, pwe kosap chiwen tongeni kapas, pwe kosap chiwen suki awom sefan, pwe kosap atupano ekkei aramas sefan.

48 Iei Korior a apasa ngeni i: Use amam ewe ennetin emon Kot, nge use nuku pwe mi wor emon Kot; me ua pwan apasa, pwe kose sinei pwe mi wor emon Kot; iwe tiwenon chok ika ka pwari ngeniei ew esisin, usap nuku.

49 Iei Alma a apasa ngeni i: Ei upwe ngonuk pwe epwe ew esisin, pwe kosap chiwen tongeni kapas, anongonong won ai kewe kapas; iwe ua apasa, pwe non iten Kot, kosap chiwen tongeni kapas, pwe esap chiwen wor om kapas.

50 Iei nupwen Alma a apasa ekkei kapas, Korior ese chiwen tongeni kapas, pwe ese chiwen tongeni wor an kapas, anongonong won ekkewe kapas an Alma.

51 Iwe iei nupwen ewe sou apung mi nap a kuna ei, a eitieuu poun me makkei ngeni Korior, a apasa: Ka pesepes usun ewe manamanen Kot? Non i ewe ka mochen pwe Alma epwe pwarano an esisin? Ka mochen i epwe ariaffou ekkoch, pwe epwe pwari ngonuk ew esisin? Nengeni, a fen pwari ngonuk ew esisin; iwe iei kopwe chiwen tipemwaramar?

52 Iwe Korior a eitieuu poun me makkei, a apasa: Ngang mi sinei pwe use chiwen tongeni kapas, pun use tongeni kapas; iwe ngang mi sinei pwe ese wor och mettoch tiwenon chok ika ewe manamanen Kot a tongeni wata ei woi; ewer, me ngang mi sinei fansoun meinisin pwe mi wor emon Kot.

53 Nge nengeni, ewe tefin a otupueino; pun a pwato ngeniei non napanapen emon chon nang, me a apasa ngeniei: Feino me angei sefani ekkei aramas, pun ra fen rikino meinisin mwirin emon Kot rese sinei. Iwe a apasa ngeniei: Ese wor Kot; ewer, me a aitiei met minne upwe apasa. Iwe ua fen afanafana an kewe kapas; me ua afanafaner pokiten ra apwapwa ngeni ekiekin fonufan; iwe ua afanafaner, pwan mwo tori a wor ai watten fetanoch, ina minne ua ennetin nuku pwe ir mi ennet; iwe ren ei popun ua ungeni ewe ennet, pwan mwo tori ua wata woi ei anumamau mi pochokun.

54 Iei nupwen a apasa ei, a tingor pwe Alma epwe iotek ngeni Kot, pwe ewe anumamau epwe tongeni suseni i.

55 Nge Alma a apasa ngeni i: Ika ei anumamau epwe susonuk kopwe pwan emmwenano netipen ekkei aramas sefan; iei minne, epwe fis anongonong wom pwan mwo usun mochenin ewe Samon.

56 Iwe non ewe fansoun pwe ewe anumamau ese suseni Korior; nge a katuruu, me feino fetan seni imw ngeni imw ne tingor fan iten anan mwongo.

57 Iei ewe porous usun met a fen fis ngeni Korior a mwitir fateno non unusen ewe fonu; ewer, ewe porous a titino me ren ewe sou apung mi nap ngeni ekkewe aramas meinisin non ewe fonu, a affata ngeni ekkewe ra fen nuku non ekkewe kapas an Korior pwe mi auchea repwe mwitir aier, ren nuokusun ewe pwan chok kapung epwe feito wor.

58 Iwe non ewe fansoun pwe ra pesepes meinisin usun fofforungawen Korior; iei minne ra siwin sefan meinisin ngeni ewe Samon; iwe ei a fori soponon ewe angangangaw anongonong won napanapen Korior. Iwe Korior a fein fetan seni imw ngeni imw, ne tingor mwongo fan iten aninisin.

59 Iwe non ewe fansoun pwe nupwen a feino nein ekkewe aramas, ewer, nein ew aramas ra fen eimueno inisir seni ekkewe chon Nifai me pwisin eita ngeni ir chon Soram, pokiten ra emmwen me ren emon mwan itan Soram—iwe nupwen a feino neir, nengeni, ra purano me a chapapetiw fan pecher, pwan mwo tori an mano.

60 Iwe iei sia kuna nesopun i ewe a angawano ekkewe kokkotun ewe Samon; iwe iei sia kuna pwe ewe tefin esap anisi noun kewe atun ewe ranin soponon, nge epwe mwitir etekiniretiw ngeni hell.