1 ’E i muri a’era, ’ua haere atu ra rātou, ’e ’ua ha’amata ihora i te poro haere i te parau a te Atua i te mau ta’ata, ma te tomo atu i roto i tō rātou mau sunago, ’e i roto i tō rātou mau fare, ’oia ïa, ’e ’ua poro ato’a atu ra rātou i te parau i roto i tō rātou mau aroā.

2 ’E i muri a’era, i muri iho i tā rātou mau ’ohipa rahi i rotopū ia rātou, ’ua ha’amata ihora rātou i te manuia i rotopū i te pupu feiā veve ; inaha ho’i, ’ua hurihia rātou i rāpae i te mau sunago nō te nehenehe ’ore o tō rātou mau ’ahu.

3 Nō reira, ’aita rātou i fa’ati’ahia ’ia tomo atu i roto i tō rātou mau sunago nō te ha’amori i te Atua, nō te mea ’ua fa’arirohia rātou ’ei mea vi’ivi’i ; nō reira e feiā veve ho’i rātou ; ’oia ïa, ’ua fa’arirohia rātou e tō rātou mau taea’e ’ei mea faufa’a ’ore ; nō reira e mea veve rātou i te mau mea o teie nei ao ; ’e ’oia ato’a e mea ha’eha’a rātou i te ’ā’au.

4 I teienei, ’a ha’api’i atu ai ’e ’a a’o atu ai Alama i te mau ta’ata i ni’a i te ’āivi ra o Onida, ’ua haere mai ra te hō’ē pupu ta’ata rahi iāna ra, ’e ’o rātou ho’i teie i parauhia iho nei, ’oia ho’i, tei ha’eha’a te ’ā’au nō tō rātou veve i te mau mea o teie nei ao.

5 ’E ’ua haere mai ra rātou ia Alama ra ; ’e ’ua nā ’ō mai ra te ta’ata rahi mātāmua i rotopū ia rātou iāna : Inaha, e aha tā tō’u nei mau taea’e e rave, ’ua ’ino’inohia ho’i rātou e te mau ta’ata ato’a nō tō rātou ra veve ; ’oia ïa, e tō mātou iho ho’i mau tahu’a ; ’e ’ua huri ho’i rātou ia mātou i rāpae i tō mātou ra mau sunago ’o tā mātou i hāmani i tō mātou iho rima nā roto i te ’ohipa rahi roa ; ’e ’ua huri rātou ia mātou i rāpae nō tō mātou veve rahi ; ’e ’aita tō mātou e vāhi nō te ha’amori i tō mātou Atua ; ’e inaha, nahea ïa mātou nei ?

6 ’E i teienei, ’ia fa’aro’o a’era Alama i te reira, ’ua fāriu ti’a atu ra tōna mata iāna, ’e ’ua hi’o atu ra ’oia ma te ’oa’oa rahi ; ’e ’ua ’ite ihora ’oia ē, nō tō rātou mau ’ati i ha’eha’a ai rātou, ’e tē fa’aineinehia ra rātou nō te fa’aro’o i te parau.

7 Nō reira ’aita ’oia i parau fa’ahou atu i te tahi atu pupu ta’ata ; ’āre’a rā ’ua fa’atoro atu ra ’oia i tōna rima, ’e ’ua parau atu ra ’oia i te mau ta’ata tāna e ’ite ra, ’o tei tātarahapa mau, ’e ’ua nā ’ō atu ra ia rātou :

8 Tē ’ite nei au ē, ’ua ha’eha’a roa tō ’outou ’ā’au ; ’e mai te mea e parau mau te reira, e ao ïa tō ’outou.

9 Inaha, ’ua parau a’enei ho’i tō ’outou taea’e ē, Nāhea ïa mātou nei ?—’ua hurihia ho’i mātou i rāpae i tō mātou mau sunago, ’e ’aita e ti’a ia mātou ’ia ha’amori i tō tātou Atua.

10 Inaha, tē parau atu nei au ia ’outou na, tē mana’o ra ānei ’outou ē, ’aita e ti’a ia ’outou ’ia ha’amori i te Atua, maori rā i roto i tō ’outou mau sunago ana’e ra ?

11 ’E ’oia fa’ahou, e ui atu vau, tē mana’o ra ānei ’outou ē, hō’ē noa iho tō ’outou ha’amorira’a i te Atua i te hepetoma hō’ē e ti’a ai ?

12 Tē parau atu nei au ia ’outou na, e mea maita’i tō ’outou hurira’ahia i rāpae i tō ’outou mau sunago, ’ia ha’eha’a ’outou, ’e ’ia ha’api’i ho’i ’outou i te pa’ari ; e mea ti’a ho’i ’ia ha’api’i ’outou i te pa’ari ; nō te mea ’ua hurihia ’outou i rāpae ra, i ’ino’inohia ai ’outou e tō ’outou mau taea’e, e nō tō ’outou veve rahi roa i fa’aha’eha’ahia ai tō ’outou ’ā’au ; e mea ti’a ho’i ia fa’aha’eha’ahia ’outou.

13 ’E i teienei, nō te mea ’ua fa’aha’eha’ahia ’outou, e ao tō ’outou ; ia fa’aha’eha’ahia ho’i te ta’ata, e riro paha ’oia i te tātarahapa ; ’oia mau, ’o tē tātarahapa, e arohahia mai ïa ’oia ; ’e ’o tē roa’a te aroha ’e tē tāmau māite ē tae noa atu i te hope’a ra, e ora ïa tōna.

14 ’E i teienei, mai tā’u i parau atu ia ’outou na ē, nō te mea ’ua fa’aha’eha’ahia ’outou, e ao tō ’outou, ’aita ānei ’outou e mana’o nei ē, e ao rahi a’e tō rātou ’o tē fa’aha’eha’a mai ia rātou iho nō te parau ?

15 ’Oia ïa, ’o tē fa’aha’eha’a mau iāna ihora ma te tātarahapa i tāna mau hara, ’e te tāmau māite ē tae noa atu i te hope’a ra, e ao ïa tōna—’oia ïa, e ao rahi a’e tōna i tō te ta’ata i fa’aha’eha’ahia nō tō rātou veve rahi ra.

16 Nō reira, e ao ho’i tō rātou ’o tei fa’aha’eha’a noa ia rātou iho ma te tūra’i-’ore-hia ’ia fa’aha’eha’a ; ’oia ïa, e ao tōna ’o tē ti’aturi i te parau a te Atua, ’e ’o tē bāpetizohia ma te ’ā’au ’eta’eta ’ore ; ’oia ïa, ma te arata’i-’ore-hia ’ia ’ite i te parau, ’e ’aore rā ma te tūra’i-’ore-hia ’ia ’ite, hou rātou e ti’aturi ai i te reira.

17 ’Oia ïa, e rave rahi tē parau mai ē : Mai te mea e fa’a’ite mai ’oe ia mātou i te hō’ē tāpa’o nō te ra’i mai, ’ei reira mātou e ’ite pāpū ai ; ’e ’ei reira mātou e ti’aturi ai.

18 I teienei, tē ani nei au, e fa’aro’o ānei te reira ? Inaha, tē parau atu nei au ia ’outou na ē, e ’ere roa ïa ; nō te mea ’ia ’ite te ta’ata i te hō’ē mea, ’aita ïa e tumu nō te ti’aturi, nō te mea ’ua ’ite ’oia.

19 ’E i teienei, e aha atu ā ïa te rahira’a o te ’anatemara’a o te ta’ata i ’ite i te hina’aro o te Atua ’e ’aita i ha’apa’o i te reira, i tō te ta’ata i ti’aturi noa ma te ’ite ’ore, ’e ’ua ’ōfati i te ture ?

20 I teienei, ’ia ha’avā ’outou i te reira e ti’a ai. Inaha, tē parau atu nei au ia ’outou na, e mea ta’a ’ē maita’i tō te hō’ē ta’ata huru i tō te tahi ; ’e e fāri’i te ta’ata tāta’itahi i tei au i tāna ra ’ohipa.

21 ’E i teienei, mai tā’u i parau a’enei nō ni’a i te fa’aro’o—E ’ere te fa’aro’o i te ’ite pāpū mau i te mau mea e vai nei ; nō reira mai te mea e fa’aro’o tō ’oe, tē ti’aturi ra ïa ’oe i te mau mea ’aore i ’ite-mata-hia, ’o tei riro rā ’ei parau mau.

22 ’E i teienei, inaha, tē parau atu nei au ia ’outou na, ’e ’ua hina’aro vau ’ia ha’amana’o ’outou ē, e aroha tō te Atua i te mau ta’ata ato’a ’o tē ti’aturi i tōna ra i’oa ; nō reira tē hina’aro nei ’oia, i te mātāmua roa, ’ia ti’aturi ’outou, ’oia ïa, i tāna ra parau.

23 ’E i teienei, tē fa’a’ite mai ra ’oia i tāna parau nā roto i te mau melahi i te ta’ata nei ; ’oia ïa, e ’ere i te tāne ana’e, i te vahine ato’a rā. I teienei, e ’ere ïa ’o rātou ana’e ra ; ’ua hōro’ahia mai ho’i te mau parau i te mau tamari’i ri’i e rave rahi taime, ’e ’ua fa’aha’amā atu te reira i te feiā ’aravihi ’e te feiā ’ite.

24 ’E i teienei, e tō’u mau taea’e here, ’ua ani mai ’outou iā’u nei ē, nāhea ’outou nō te mea ’ua ’atihia ’outou ’e ’ua hurihia ho’i i rāpae—i teienei, ’aita vau i hina’aro ’ia mana’o ’outou ē, e ha’avā atu vau ia ’outou mai te au ana’e i te parau mau ra—

25 ’E ’aita ho’i au i mana’o ē, ’ua tūra’ihia ’outou pā’āto’a ’ia fa’aha’eha’a ia ’outou iho ; ’āre’a rā tē ti’aturi nei au ē, tē vai ra te tahi pae i rotopū ia ’outou ’o tei fa’aha’eha’a ia rātou iho, noa atu ā ho’i tō rātou huru.

26 I teienei, mai tā’u i parau nō ni’a i te fa’aro’o—e ’ere ïa i te ’ite pāpū mau—’oia ato’a tā’u nei mau parau. ’Aita e ti’a ia ’outou ’ia ’ite pāpū roa i te ha’amatara’a, ’oia ato’a te fa’aro’o, e ’ere ato’a ïa i te ’ite pāpū roa.

27 Inaha rā, mai te mea e ara ’outou ’e e fa’aaraara ho’i i tō ’outou mau mana’o, i te tāmata i tā’u nei mau parau, ’e i te fa’a’ohipa ho’i i te hō’ē vāhi iti ha’iha’i noa nō te fa’aro’o ; ’oia ïa, noa atu ’aita i ti’a ia ’outou, maori rā ’o te hina’aro noa ’ia ti’aturi ; ’a vaiiho i taua hina’aro ra ’ia tupu i roto ia ’outou ē tae noa atu ’ua ti’aturi ’outou ’e ’ua ti’a ia ’outou ’ia fāri’i i te tahi tufa’a nō tā’u nei mau parau.

28 I teienei, e fa’aau tātou i te parau i te hō’ē huero. I teienei, mai te mea e fa’ati’a ’outou ’ia tanuhia te hō’ē huero i roto i tō ’outou ’ā’au, inaha, mai te mea e huero mau ’e ’aore rā e huero maita’i, ’e mai te mea ’aita ’outou e huri atu i te reira i rāpae nā roto i tō ’outou ti’aturi ’ore, ’e nā roto i te reira e pāto’i ai ’outou i te Vārua o te Fatu ra, inaha, e ha’amata ïa te reira i te tupu rahi i roto i tō ’outou ’ā’au ; ’e ’ia ’ite ’outou i te tupura’a rahi o te reira, e ha’amata ’outou i te parau i roto ia ’outou iho ē—e huero maita’i mau ïa teie, ’e ’aore rā e parau maita’i teie, nō te mea ’ua ha’amata te reira i te fa’arahi i tō’u vārua ; ’oia ïa, ’ua ha’amata te reira i te ha’amāramarama i tō’u ’ite, ’oia ïa, ’e ’ua ha’amata te reira i te riro ’ei mea ’oa’oa roa i roto iā’u nei.

29 I teienei, inaha, ’aita ānei te reira e fa’arahi i tō ’outou fa’aro’o ? Tē parau atu nei au ia ’outou na, ’Oia roa ïa ; ’aita rā te reira i riro ’ei ’ite pāpū roa.

30 Inaha rā, ’ia oru te huero, ’e ’ia ’ōteo, ’e ’ia ha’amata ho’i i te tupu, ’ei reira ’outou e parau ai ē, e huero maita’i ïa ; inaha ho’i, tē ’oru nei, ’e tē ’ōteo nei, ’e tē tupu nei ho’i. ’E i teienei, inaha, ’aita ānei te reira e ha’apūai i tō ’outou fa’aro’o ? ’Oia ïa, e ha’apūai te reira i tō ’outou fa’aro’o : ’e e parau ho’i ’outou ē, ’ua ’ite au e huero maita’i te reira ; inaha ho’i, ’ua ’ōteo mai ’e ’ua ha’amata i te tupu.

31 ’E i teienei, inaha, ’ua ’ite pāpū ānei ’outou ē, e huero maita’i te reira ? Tē parau atu nei au ia ’outou na, ’Oia roa ïa ; e fa’ahotu mai ho’i te mau huero tāta’itahi ato’a i tōna ihora huru mau.

32 Nō reira, ’ia tupu te huero, e mea maita’i ïa, ’āre’a rā ’ia ’ore e tupu, inaha e ’ere ïa i te mea maita’i, nō reira e fa’aru’ehia ïa.

33 ’E i teienei, inaha, nō te mea ’ua tāmata ’outou i te reira, ’e ’ua tanu i te huero, ’e ’ua oru ’e ’ua ’ōteo, ’e ’ua tupu ho’i, ’ua ’ite pāpū ïa ’outou ē, e huero maita’i ïa te reira.

34 ’E i teienei, inaha, e mea pāpū maita’i ānei tō ’outou ’ite ? ’Oia ïa, e mea pāpū maita’i tō ’outou ’ite i taua mea ra, ’e ’ua ’ore tō ’outou fa’aro’o ; nō te mea ’ua riro ïa ’ei ’ite pāpū mau, ’ua ’ite ho’i ’outou ē, ’ua fa’a’oru te parau i tō ’outou vārua, ’e ’ua ’ite ato’a ’outou ē, ’ua ’ōteo i ni’a, ’e te rahi ra tō ’outou māramarama, ’e te tupu rahi ra ho’i tō ’outou mana’o.

35 ’E i teienei, e ’ere ānei te reira i te parau mau ? Tē parau atu nei au ia ’outou na, ’Oia roa ïa, nō te mea ’o te māramarama ïa ; ’e te mea māramarama ato’a ra, e mea maita’i ïa, nō te mea te ’itehia ra, nō reira, e mea ti’a roa ia ’outou ’ia ’ite ē, e mea maita’i ïa ; ’e i teienei, inaha, i muri iho i tō ’outou fāri’ira’a i teie māramarama, ’ua pāpū maita’i roa ānei tō ’outou ’ite i reira ?

36 Inaha, tē parau atu nei au ia ’outou na, ’Aita roa ïa, e ’eiaha ho’i ’outou e ha’apae i tō ’outou fa’aro’o i te hiti, ’ua fa’a’ohipa noa ho’i ’outou i tō ’outou fa’aro’o nō te tanu i te huero, ’ia ti’a ia ’outou ’ia ’ite e mea maita’i ānei te huero.

37 ’E inaha, ’a ha’amata ai te tumu rā’au i te tupu, e parau ïa ’outou ē : E ’atu’atu māite tātou i te reira, ’ia a’ahia, ’ia tupu i ni’a, ’e ’ia fa’ahotu mai ho’i i te mā’a nā tātou. ’E i teienei, inaha, mai te mea e ’atu’atu māite ’outou i te reira, e a’ahia ïa, ’e e tupu i ni’a, ’e e fa’ahotu mai ho’i i te mā’a.

38 ’Āre’a rā ’ia ha’apa’o ’ore ’outou i te tumu rā’au, ’e ’ia ’ore ho’i ’ia ’atu’atu maita’i, inaha, ’aita ïa e a’ahia ; ’e ’ia tae mai te ve’ave’a o te mahana ra ’e ’ia ha’apa’apa’a i te reira, ’e nō te mea ho’i ’aita i a’ahia e ’ōriorio ïa, ’e e ’ōhiti ho’i ’outou i te reira ’e ’a huri atu ai i rāpae.

39 I teienei, e ’ere nō te mea ’aita te huero i te mea maita’i, e ’ere ato’a nō te mea ’aita tōna mā’a i te mea hina’arohia ; nō te mea rā e fenua pāpāmarō tō ’outou, ’e ’aita ’outou e ’atu’atu i te tumu rā’au, nō reira ’aita ’outou e fāri’i i te hotu nō te reira.

40 ’E nō reira, mai te mea ’aita ’outou e ’atu’atu i te parau, ma te hi’o atu i mua ma te ’ā’au fa’aro’o i te hotu nō te reira, e ’ore ïa ’outou e pōfa’i mai i te hotu nō ni’a mai i te tumu rā’au nō te ora.

41 ’Āre’a rā mai te mea e ’atu’atu ’outou i te parau, ’oia ïa, ’ia ’atu’atu i te tumu rā’au ’a ’ōteo mai ai te reira, nā roto i tō ’outou fa’aro’o ’e ma te itoito rahi, ’e te fa’a’oroma’i ho’i, ma te hi’o atu i mua i te hotu nō te reira, e a’ahia ïa te reira ; ’e inaha, e riro te reira ’ei tumu rā’au ’o tē tupu noa i ni’a ē tae atu ai i te ora mure ’ore.

42 ’E nō tō ’outou itoito, ’e tō ’outou fa’aro’o, ’e tō ’outou fa’a’oroma’i i te parau nō te ’atu’atura’a, ’ia a’ahia i roto ia ’outou na, inaha, ’aita e maoro e pōfa’i mai ’outou i te hotu nō te reira, ’o tei riro ’ei mea faufa’a rahi, ’e ’o tei hau tōna monamona i tō te mau mea monamona ato’a ra, ’e ’o tei riro ’ei mea teatea atu i te mau mea teatea ato’a ra ; ’oia ïa, ’e ’ua hau atu tōna māra’a i tō te mau mea mā ato’a ra ; ’e e rave ’outou i te fa’a’amu’a i tō reira hotu ē tae noa atu ’ua pa’ia maita’i ’outou, ’e ’aita ’outou e po’ia fa’ahou, ’e ’aita ho’i e po’ihā fa’ahou.

43 I reira, e tō’u mau taea’e, e ’ō’oti ’outou i te mau utu’a maita’i nō tō ’outou fa’aro’o, ’e tō ’outou itoito, ’e te fa’a’oroma’i, ’e te marū ma te tīa’i i te tumu rā’au ’ia fa’ahotu mai i te mā’a nā ’outou.