1 Áádóó dah diikai, dóó Diyin God bizaad diné yee ndeidíníitą́ą́ʼ, bisodizin bá dahooghangóó, dóó dabighan góneʼ yił yah dahakáahgo; aooʼ, dóó kintah daʼnítiingóó ndi Diyin God bizaad yee ndaʼneeztą́ą́ʼ.

2 Áádóó yéigo yił ndaashnishgo, diné baa dahojoobáʼí baa áłah ńdaadleeh silį́į́ʼ; jó áko, bisodizin bá hooghan yiiʼ áłah ńdaadleeh dóó chʼíbidiʼneelkaad háálá beʼééʼ danichxǫ́ǫ́ʼígo biniinaa—

3 Éí bąą yiiʼ áłah ńdaadleehígíí biyiʼdóó Diyin God bichʼįʼ sohodizinígíí bichʼįʼ baa hóchįʼ, tʼóó badaaʼih dabiʼdiʼnínígíí biniinaa; éí bąą baa dahojoobáʼí; aooʼ, bikʼisóó tʼáadoo biniiyéhé da dabiʼdiʼníí ńtʼę́ę́ʼ; éí bąą nahasdzáán bikáaʼgi naalyéhé éí bee ádaadin; dóó ajéí biyiʼ ałdóʼ baa hojoobáʼí ntsídaakees.

4 Kʼad, Alma Onidah dayiskʼidígíí naʼnitin ńtʼę́ę́ʼ, tʼóó ahayóí diné baa áłah silį́į́ʼ, éí éí baa yátiʼę́ę ádáátʼį́, éí éí ajéí biyiʼ hajoobáʼí ntsídaakeesę́ę, háálá nahasdzáán bikáaʼgi naalyéhé bee ádaadingo baa dahojoobáʼígíí biniinaa.

5 Dóó Alma yeíkai; dóó bá yáłtiʼii kóbiłní: Jó, díí shikʼisóó shąʼ haadadoonííł, háálá baa dahojoobáʼígíí biniinaa diné tʼáá ałtso dabijoołá, aooʼ, nihipriest danilínígíí tʼáá íiyisíí dabijoołá; háálá sodizin yę́ę alą́ąjįʼ naazínígíí sodizin bá hooghandóó chʼídanihineeskaad éí tʼáá íiyisíí nihílaʼ bee bindashiilnishgo ádeiilyaa; dóó tʼáá íiyisíí nihaa dahojoobáʼígíí biniinaa tʼáadoo áajįʼ ndaahkaií danihidííniid; dóó Diyin God biyiʼdóó bichʼįʼ sodadiilzin dooleełígíí éí ádin; jó áádóó, haash dadiiʼnííł?

6 Dóó kʼad Alma díí yidiiztsʼą́ąʼgo, názyizgo, biniiʼ kǫ́ǫ́dígo áyiilaa; dóó tʼáá íiyisíí bił hóózhǫǫdgo yiyiiłtsą́; háálá tiʼdahoozniiʼígíí binahjįʼ tʼáá íiyisíí hojoobaʼ ádaalyaago yiyiiłtsą́, dóó Diyin God binaʼnitin deididootsʼį́łígíí yichʼįʼ hashtʼeʼádaʼdiilyaa lá.

7 Éí bąą nááná łaʼ dinéhę́ę tʼáadoo yichʼįʼ hanáádzíiʼ da; ákondi bigaan ąąh áyiilaa, dóó ayóó íitsʼaʼgo diné baa haskai yę́ę yichʼįʼ haadzííʼ, éí tʼáá íiyisíí niheʼiinaʼ łahgo ádadiilnííł danízin, dóó kwíídííniid:

8 Tʼáá íiyisíí ajéí biyiʼ hojoobaʼ ádeinohsin nisin; dóó díí tʼáá aaníigo ákónóhtʼéego, nihikʼihojídlí.

9 Jó nikʼis haadzíʼę́ę ádííniid, haash dadiiʼnííł?—háálá nihisodizin bá hooghan biyiʼdę́ę́ʼ chʼínihidiʼneelkaad, áko nihiDiyin God doo bichʼįʼ sodadiilzin da.

10 Jó ánihidishní, daʼ Diyin God bisodizin bá hooghan biyiʼísh tʼéiyá sodahodizin danohsin?

11 Dóó ałdóʼ nááná, nanihídíshkid, tʼáásh łáhádi damóo náʼádleehgo tʼéiyá Diyin God bichʼįʼ sodahodizin danohsin?

12 Ánihidishní, yáʼátʼééh nihisodizin bá hooghan biyiʼdę́ę́ʼ chʼínihidiʼneelkaadígíí, áko éí hojoobaʼ ádanihiilaa, dóó bee hódzáanii ńdadidoohłééł; háálá díí naʼnitin bee hódzáanii éí tsʼídá ílį́; áko ajéí hojoobaʼ ádeinohsin ádanihiilaa, háálá chʼínihidiʼneelkaadígíí biniinaa, dóó tʼáá íiyisíí nihaa dahojoobáʼígíí biniinaa nihikʼis danihijoołá; áko biniiyéii hólǫ́ǫgo hojoobaʼ dasoolį́į́ʼ.

13 Dóó kʼad, hojoobaʼ ánihiʼdiilyaaígíí biniinaa nihikʼihojisdliʼ; háálá łahda diné, hojoobaʼ ábiʼdilʼįįhgo, beʼiinaʼ łahgo ánéídléehgo yaa ńdiidááh; áko kʼad tʼáá aaníí, tʼáá háiida beʼiinaʼ hashtʼenáyiidlaaígíí éí ajoobaʼ yikʼídoogááł; dóó tʼáá háiida ajoobaʼ yikʼígháahgo dóó nááʼdiilyá bijį́įjįʼ yéigo átʼį́įgo yisdádoogááł.

14 Dóó kʼad, ánihidííniidígíí, hojoobaʼ ánihiʼdiilyaaígíí biniinaa nihikʼihojisdliʼ, áko diné Diyin God bizaad deidiiztsʼą́ʼígíí binahjįʼ tʼáá bí tʼáá íiyisíí hojoobaʼ ádaʼdiilyaaígíísh hózhǫ́ bikʼidahojídlíi doo danohsin?

15 Aooʼ, tʼáá háiida tʼáá íiyisíí hojoobaʼ áʼdiilyaago, dóó bibąąhági átʼéii átsʼéideetʼą́, dóó nihoníyáajįʼ bidziilgo, éí bikʼihojídlíi dooleeł—aooʼ, tʼáá íiyisíí naadeełii bee ádaadingo ádabiʼdiilyaaígíí biniinaa hojoobaʼ ádabiʼdiilyaaígíí éí biláahgo bikʼihojídlíi dooleeł.

16 Éí bąą, tʼáá bí hojoobaʼgo ádaʼdiilyaa tʼáadoo bichʼįʼ nahwiiʼnání éí bikʼidahojídlíi dooleeł; éí doodago ákótʼé, ááłdishní, diné Diyin God bizaad yoosdląądígíí, dóó tʼáadoo bijéí biyiʼ bízhą́ daʼílíní tó bee biʼdoolzį́ʼígíí, aooʼ, saad doo yikʼiʼdiitą́ągo, éí doodago tʼáadoo bikʼiʼdiitįįh bidiʼníní, daʼoosdląądígíí éí bikʼihojídlíi dooleeł.

17 Aooʼ, ląʼída ádaaní: Yáʼąąshdę́ę́ʼ bee ééhózinii bee nihił ííshją́ą́ ádaoohłaago, índa tʼáá aaníinii nihił béédahodoozįįł; áko índa daʼiidiidląął.

18 Kʼad nanihídíshkid, daʼ díísh oodląʼ átʼé? Jó, Ndagaʼ, nihidishní; áko diné tʼáadoo leʼé bił bééhózingo éí oodlánę́ę ádin yileeh, háálá tʼáá íídą́ą́ʼ bił bééhózin.

19 Dóó kʼad, tsʼídá haa níłtsogo aláahgo bikʼijįʼ haʼdoodzih dooleeł háiida Diyin God íinízinígíí bił bééhózin ndi doo yeʼełʼį́į́góó, tʼáá diné tʼóó oodlánígíí, éí doodago tʼáá haʼátʼííshį́į́ yinahjįʼ oodlánígíí, dóó éí bąąhági ádzaago?

20 Kʼad díí tʼáá nihí nihił bééhodoozįįł. Jó, ánihidishní, łahjí átʼéhígíí éí łahjigo ałdóʼ tʼáá ákótʼé; dóó diné tʼáá ałtso yinaashnishígíí bikʼehgo ńdaʼdiyóołbįįł.

21 Dóó kʼad oodląʼ baa yááłtiʼ—oodląʼ éí doo tʼáá ałtsoní hoł bééhózin óolyée da; éí bąą oodląʼ nihee hólǫ́ǫgo éí tʼáadoo leʼé doo daatʼíinii bíká sih nohsin, éí éí tʼáá aaníí ádaatʼéii.

22 Jó, dóó kʼad, nihił hashneʼ, dóó béédaohłniih dooleeł nisin, Diyin God tʼáá ałtso bízhiʼ dayoodlánígíí yaa joobaʼ; éí bąą, tsʼídá áłtsé, nihá íinízinígíí, éí daʼiidoohdląął, aooʼ, tsʼídá bizaadígíí deidoohdląął ndi.

23 Dóó kʼad, diyin yá ndaalʼaʼí binahjįʼ bizaad diné yił ííshją́ą́ ííłʼį́, aooʼ, doo diné tʼéiyá da asdzání ałdóʼ. Kʼad doo tʼáá díí tʼéiyá da; áłchíní yázhí ląʼída saad bił ííshją́ą́ ádaalneʼ, éí diné dahóyáanii dóó daʼííłtaʼii yikʼeh dadidlį́.

24 Dóó kʼad, shikʼisóó ayóí ánihííníshʼníinii, atínihiʼdiilyaa dóó yíwohdi nihiʼdooʼniidígíí biniinaa haalá dadiiʼnííł dashíínóhʼní—kʼad nihaa ńjítʼį́ éí tʼáadoo dashíínóhʼníní tʼáá hazhóʼó tʼáá aaníinii binahjįʼ tʼéiyá nihaa ndeeshtʼįįł—

25 Háálá doo tʼáá ánółtso hojoobaʼ ánihiʼdiilyaa dishníi da; háálá nohłąʼí da tʼáá nihí hojoobaʼ deinoozį́į́ʼ nisin, azhą́ nááná łahgo nihił áhootʼée ndi.

26 Kʼad, oodląʼ baa haasdzíʼę́ę—doo éí tʼáá ałtsoní hoł bééhózingo óolyée da—shizaad ałdóʼ tʼáá ákótʼé. Tʼóó áłtségo éí tʼáá aanínígíí doo bééhózin da, tʼáá aaníí átʼéhígi átʼéego, oodląʼgi átʼéego doo tʼáá ałtsoní bééhózingo óolyé.

27 Jó ndi, nihíniʼ chʼéédanoosííd dóó ńdadoohłtʼeʼ, shizaad bínóhtááh, dóó oodląʼ azhą́ tʼįįhdígo ndi choołʼį́į́, aooʼ, azhą́ yideeshdląął daatsʼí nohsin ndi, díí íinohsinígíí bíniʼ nihinaalnish, shizaad nihiyiʼdi bá hoołʼaʼjįʼ.

28 Kʼad, díí saad akʼǫ́ǫ́ʼ nahalingo baa ntsídadiikos. Kʼad, nihiyiʼ dahoołʼaahgo, áko nihijéí biyiʼ akʼǫ́ǫ́ʼ kʼídadoolyáago, jó, akʼǫ́ǫ́ʼ tʼáá aaníí átʼéego, éí doodago akʼǫ́ǫ́ʼ yáʼátʼéehii átʼéego, dóó doo daʼiinohdlánígíí bee yíwohjįʼ kódaahłéehgo, áko Bóhólníihii Biyiʼsizíinii bikʼijįʼ nohłį́į́go, jó, nihiyiʼdi ąą dadínóosééł; dóó díí nihiyiʼdi ąą kwáániiłgo baa ákodanohsingo, tʼáá nihiyiʼdóó kódadohníi doo—Díí akʼǫ́ǫ́ʼ yáʼátʼéehii átʼéé lá, éí doodago saadígíí yáʼátʼééh lá, háálá shiyiʼsizíinii dóó shitsʼíís ntsaago ííʼniilaa; aooʼ, hazhóʼó tʼáadoo leʼé baa ákonisingo áshiʼniilaa, aooʼ, shił łikan silį́į́ʼ.

29 Jó kʼad, díísh niheʼoodląʼ ntsaa íidoolííł? Ánihidishníigo, Aooʼ; ákótʼée ndi tʼah doo ałtso bééhoozinjįʼ jiniséeh da.

30 Jó ndi, akʼǫ́ǫ́ʼ ąą kódzaa, dóó biiʼ haʼníísą́, dóó dah díníisą́, índa ádidoohniił díí akʼǫ́ǫ́ʼ yáʼátʼéhígíí átʼée lá; háálá éí ąą kódzaa, dóó biiʼ haʼníísą́ dóó dah díníisą́. Jó, dóó kʼad, daʼ díísh niheʼoodląʼ bidziilgo ádeidoolííł? Aooʼ, niheʼoodląʼ bidziilgo ádeidoolííł: háálá ádadidoohniił díí akʼǫ́ǫ́ʼ yáʼátʼéehii átʼé; jó háálá biiʼ haʼníísą́ dóó dah díníisą́.

31 Jó, dóó kʼad, daʼ díísh tʼáá aaníí akʼǫ́ǫ́ʼ yáʼátʼéehii átʼé? Ánihidishní, Aooʼ; háálá tʼáá ałtso akʼǫ́ǫ́ʼ bitsʼą́ą́dóó hazlį́ʼígíí tʼáá beełtʼéego hadínóotʼį́į́ł.

32 Éí bąą, akʼǫ́ǫ́ʼ díníséego éí éí yáʼátʼééh, ndi doo díníséego, jó éí éí doo yáʼátʼéeh da, éí bąą tʼóó yóó nináhálghą́ą́h.

33 Jó, dóó kʼad, díí bínoohtą́ąʼgo, dóó akʼǫ́ǫ́ʼ kʼidooláago, dóó ąą kódzaa dóó biiʼ haʼníísą́, dóó dah díníisą́ągo, áko akʼǫ́ǫ́ʼ yáʼátʼéehii átʼéego baa ákodínóohsįįł.

34 Jó, dóó kʼad, daʼ tʼáá ałtsonísh nihił bééhózin? Aooʼ, éidi éí tʼáá ałtsoní nihił bééhózin, dóó niheʼoodląʼ éí doo dilníish da; díí nihił bééhózinígíí biniinaa, háálá saadígíí nihiyiʼsizíinii ntsaago áyiilaa, dóó nihiyiʼdi dah díníisą́ągo nihił bééhózin, dóó tʼáadoo leʼé baa ákonohsin soolį́į́ʼ, dóó baa ákonohsinígíí ąą kódzaa.

35 O índa, daʼ ákoósh díí tʼáá aaníí átʼé? Aooʼ, nihidishní, háálá adinídíín átʼé; áko tʼáadoo leʼé adinídíín átʼéego, éí yáʼátʼéehii átʼé, háálá adinídíín éí bééhózin, éí bąą yáʼátʼéhígíí átʼéego nihił bééhózin; jó dóó kʼad, díí adinídíín dasołnihgo daʼ tʼáá ałtsonísh nihił bééhózin?

36 Jó, Ndagaʼ, nihidishní; dóó ałdóʼ doo éí niheʼoodląʼ nahjįʼ ndoohłeeł da, háálá niheʼoodląʼ éí bee akʼǫ́ǫ́ʼ kʼidadoolá éí díí akʼǫ́ǫ́ʼ daatsʼí yáʼátʼéehii átʼé danoozį́įʼgo biniiyé bídanootą́ą́ʼ.

37 Jó áádóó, tsin dah díníisą́ągo, kódadidoohniił: Hazhóʼó baa ádahwiilyą́ą dooleeł, áko bikétłʼóól hodooleeł, áko dínóosééł, dóó bineestʼąʼ nihichʼįʼ kwíidoolííł. Jó dóó kʼad, tʼáá íiyisíí baa ádahołyą́ągo bikétłʼóól hodooleeł, dóó dínóohsééł, dóó bineestʼąʼ hodooleeł.

38 Ndi tsin doo baa ádahołyą́ągo, dóó baa áháyánígíí doo baa ntsídaahkeesgóó, jó doo bikétłʼóól hodooleeł da; dóó jóhonaaʼéí bitsʼáhonigááh silį́įʼgo yidoołchʼił, bikétłʼóól ádingo biniinaa ałtso dínóołnah, dóó hadoohnish dóó yóó ahidoołhą́ą́ł.

39 Kʼad, díí éí akʼǫ́ǫ́ʼ doo tʼóó baaʼihígíí biniinaa da, dóó ałdóʼ doo éí tsin bineestʼąʼ doo nidzinígíí biniinaa da; ndi éí nihileezh bikááʼ doo naniseʼígíí biniinaa, dóó tsin doo baa áhółyą́ą́góó biniinaa, éí bąą bineestʼąʼ doo nihá hodooleeł da.

40 Dóó ákótʼáo, díí saad doo baa áhółyą́ągo, niheʼoodląʼ bee bineestʼąʼ hásídóoʼį́įʼgo, doo éí tsin bee iináanii bineestʼąʼ łaʼ náhidoohłah da.

41 Ndi díí saad baa áhółyą́ą́góó, aooʼ, tsin dah díníisą́ągo baa áhółyą́ągo, yéigo yinohdlą́ągo, dóó haʼólníinii bee, bineestʼąʼ hásídóoʼį́įʼgo, bikétłʼóól hodooleeł; jó áádóó tsin dínéesą́ągo hoolʼáágóó iiná hodooleeł.

42 Dóó háálá yéigo óohtʼį́įgo, dóó oohdlą́ągo dóó haʼólníinii bee saad baa áhółyą́ągo, nihiyiʼdi bikétłʼóól hodooleeł, jó, baa hoolzhiizhgo bineestʼąʼ ńdidoohʼááł, éí éí tsʼídá aláahdi ílį́, dóó tsʼídá tʼáá ałtsoní biláahdi łikan, dóó tsʼídá tʼáá ałtsoní biláahdi łigai, aooʼ, dóó tsʼídá tʼáá ałtsoní biláahdi chin bąąh ádin; dóó díí neestʼą́ doohsį́į́ł nánoochaadjįʼ, doo dichin náádoohdleeł da, dóó doo dibááʼ náádoohdleeł da.

43 Índa, bił háíjééʼ, tsin bineestʼąʼ hodooleełjįʼ niheʼoodląʼ, doo yéigo ádaaohtʼį́į́góó, dóó haʼólníinii bee, dóó yéigo hadaʼíínółníigo, hádasídóoʼį́ʼę́ę, éí deidoołbįįł.