1 Iwe iei non ewe fansoun pwe mwirin an Alma a apasa ekkei kapas ngeni ir a mwotiw won ewe puun, iwe Amulek a uta me poputa ne aiti ir, a apasa:

2 Ami pwi, ua ekieki pwe ese tufich pwe oupwe wewengaw usun ekkewe mettoch minne ra fen apasa usun wareton Kraist, ewe ra fen aitikich pwe i ewe Noun Kot; ewer, ua sinei pwe ekkei mettoch ra fen keit ngenikemi fan chommong me mwen ami rikino senikem.

3 Iwe usun oua fen mochen seni pwi we achengicheng pwe i epwe pwarano ngenikemi met oupwe fori, pokiten ami kewe riaffou; iwe i a fen ekis kapas ngenikemi pwe oupwe amonnata ami ekiek; ewer, me i a fen pesekemi ngeni nuku me ngeni tipepos—

4 Ewer, pwan mwo ngeni an epwe watte ami nuku ren ami oupwe fotuki ewe kapas non netipemi, pwe oupwe sotuni ewe sossot pun oupwe sinei öchun.

5 Iwe am aua fen kuna pwe ewe kapaseis mi auchea minne a nom non ami ekiek epwe ika ewe kapas a nom non ewe Noun Kot, are ika esap wor Kraist.

6 Iwe oua pwan kuna pwe pwi we a fen pwar ngenikemi, non chommong fansoun, pwe ewe kapas a nom non Kraist ngeni amanau.

7 Pwi we a fen apasa usun ekkewe kapas an Sinos, pwe ngaseno epwe feito seni ewe Noun Kot, me pwan usun ekkewe kapas an Sinok; me i a pwan kapas usun Moses, pwe epwe pwarata pwe ekkei mettoch mi ennet.

8 Iwe iei, nengeni, upwe pwarata ngenikemi ren pwisin inisi pwe ekkei mettoch mi ennet. Nengeni, ua apasa ngenikemi, pwe ngang mi sinei pwe Kraist epwe wareto me nein ekkewe noun aramas, pwe epwe wata won inisin ekkewe atai annuk an noun kewe aramas, me pwe i epwe achasefani tipisin ewe fonufan; pun ewe Samon Kot a fen apasa.

9 Pun mi auchea pwe ew achasefan epwe for; pokiten anongonong won ewe kokkot mi auchea an ewe Kot Esemuch mi auchea pwe epwe wor ew achasefan epwe for, are esap ina aramas meinisin repwe wesewesen fokkun mano non pekin ngun; ewer, meinisin ra pochokununo; ewer, meinisin ra turutiw me ra monucheno, me repwe fokkun mano non pekin ngun tiwenon chok ika epwe seni ewe achasefan minne mi auchea pwe epwe for.

10 Pun mi auchea pwe epwe wor ew napanap me amwochunon asor; ewer, esap ew asoren aramas, esap pwan asoren man mwacho, esap pwan asoren och sokkun mansusu; pun esap ew asoren aramas; nge mi auchea pwe epwe ew asor feinfeino chok me esemuch.

11 Iei ese wor emon aramas a tongeni asora pwisin chan minne epwe achasefani tipisin pwan emon. Iei, ika emon aramas a nii manau, nengeni ach ewe annuk, minne mi pung, epwe angei manauan pwin we? Ua apasa ngenikemi, Apw.

12 Nge ewe annuk epwe angei manauan i ewe a fen nii manau; iei minne ese tongeni wor och mettoch minne mi kisikis seni ew achasefan esemuch minne epwe naf fan iten tipisin ewe fonufan.

13 Iei minne, mi auchea pwe epwe wor ew napanap me amwuchunon asor, iwe mwirin epwe fis, are mi auchea pwe epwe fis, ew kounon assuku cha; iwe mwirin ewe annukun Moses epwe pwonueta; ewer, epwe unusen pwonueta, emas mesen mak me tichikin meinisin, iwe esap wor ew epwe kouno.

14 Iwe nengeni, iei ewe unusen wewen ewe annuk, ew me ew kukkunun kinikinin ra itingeni ena napanap me amwuchunon asor; iwe ena napanap me soponon asor epwe ewe Noun Kot, ewer, feinfeino chok me esemuch.

15 Iwe iei i epwe uweiato amanau ngeni meinisin ekkewe repwe nuku non itan we; iwe iei ewe popun ei soponon asor, pwe epwe uweiato ewe nenuken umoumoch, minne a nemenano pungoch, me a efisi ekkoch popun ngeni aramas pwe epwe tongeni wor ar nuku ngeni aier.

16 Iwe iei umoumoch a tongeni amenemenochu ekkewe mochenin pungoch, me rokopwanireno me ne poun tumun, nupwen i ewe ese aea nuku ngeni aier a pwano ngeni unusen annukun ekkewe mochenin pungoch; iei minne ngeni chok i ewe a wor an nuku ngeni aier a emmwen ngeni ewe kokkotun ngaseno mi auchea me esemuch.

17 Iei minne amo Kot epwe mut ngenikemi, ami pwi, pwe oupwe tongeni poputa ne aea ami nuku ngeni aier, pwe oupwe poputa ne kokkori won itan we mi fel, pwe epwe wor an umoumoch womi;

18 Ewer, sio ngeni i pokiten umoumoch; pun i mi manaman ne amanaua kich.

19 Ewer, etipetekisona inisimi, me soposopono non iotek ngeni i.

20 Sio ngeni i nupwen oua nom non ami kewe atake, ewer, fan asengesin noumi kewe penen man meinisin.

21 Sio ngeni i me non imwemi kewe, ewer, fan asengesin chon non imwemi kewe meinisin, nesosor, neonowas, me nekkunion.

22 Ewer, sio ngeni i epwe ungeni manamanen ekkewe chon koum ngenikemi.

23 Ewer, sio ngeni i epwe ungeni ewe tefin, i ewe chon koum ngeni wenechar meinisin.

24 Sio ngeni i fan asengesin uwan ami kewe atake, pwe oupwe feioch senir.

25 Sio fan asengesin ekkewe penen man non ami kewe atake, pwe repwe tongeni chommongono.

26 Nge esap ikkei chok meinisin; mi auchea oupwe wau unusen ngunumi non ami kewe kapet, me non ami kewe neni mi monomon, me non ami kewe fonu pon.

27 Ewer, iwe nupwen ouse sio ngeni ewe Samon, mut ngeni netipemi repwe ureno, soposopono ne wau netipemi non iotek ngeni i fan iten ami tufich, me pwan fan iten tufichin ekkewe ra nom unukumi.

28 Iwe iei nengeni, ami pwi achengicheng, ua apasa ngenikemi, oua ekieki pwe ikkei chok meinisin; pun mwirin oua fen fori ekkei meinisin, ika oupwe kunseni ekkewe mi osupwang, me ekkewe mi seneno, me ika ousap churi ekkewe mi semwen me riaffou, me fangeno ekkoch pisekimi, ika mi wor remi pisek, ngeni ekkewe ir mi osupwang—Ua apasa ngenikemi, ika ousap fori ew me nein ekkei mettoch, nengeni, ami iotek ra namotongaw, me ese namot ngonuk, iwe en ka usun ekkewe chon nikatuputup ekkewe ra amam ewe nuku.

29 Iei minne, ika ouse chechemeni pwe oupwe uren tong ennet, oua usun mecha mi namotmwan, minne ewe chon nimeti mecha a aturareu, (pokiten ese chiwen wor auchean) me a chapapetiw fan pechen aramas.

30 Iwe iei, ami pwi, ua mochen pwe, mwirin ami oua angei fokkun chommong pisekin pwarata, pokiten ekkewe pukefel mi fel ra pwarata usun ekkei mettoch, oua feito me uwani angang ngeni aier.

31 Ewer, ua mochen pwe oupwe feito me ousap chiwen apochokunano netipemi; pun nengeni, iei ewe fansoun me ewe ranin ami amanau; iwe ina minne, ika oupwe aier me ousap apochokunano netipemi, ewe kokkotun ngaseno mi auchea epwe mwitir kawor ngenikemi.

32 Pun nengeni, ei manau iei ewe fansoun an aramas repwe monneta ne churi Kot; ewer, nengeni ewe ranin ei manau ina ewe ran an aramas repwe fori ar kewe angang.

33 Iwe iei, usun ua apasa ngenikemi akkom, pokiten oua fen angei fokkun chommong pisekin pwarata, iei minne, ua tingor ngenikemi pwe ousap ammangano ewe ranin ami aier tori nesoponon; pun mwirin ei ranin manau, minne a kawor ngenikich pwe sipwe monneta ngeni fansoun esemuch, nengeni, ika sise aochueno ach fansoun nupwen non ei manau, iwe epwe feito ewe pwinin rochopwak non minne esap chiwen tongeni wor angang epwe for.

34 Ouse tongeni apasa, nupwen oua feito ngeni ewe fansoun anoninenin osukosuk, pwe upwe aier, pwe upwe niwin ngeni Kot. Apw, ouse tongeni apasa ei; pun ena chok pwan ngun minne a nemenano inisimi atun ewe fansoun oua tou seni ei manau, ena pwan chok ngun epwe wor an manaman ne nemenano inisimi non ena fonufan esemuch.

35 Pun nengeni, ika oua fen ammangano ewe ranin ami aier pwan mwo tori mano, nengeni, oua fen nom fan nemenemen ngunun ewe tefin, iwe i a rikemino pwe noun; iei minne, ewe Ngunun ewe Samon a fen mwokut senikemi, me ese chiwen wor nenian non ami, iwe ewe tefin a wor an unusen manaman womi; iwe iei ewe soponon nikinikin ekkewe aramas mi ngaw.

36 Iwe ei ngang mi sinei, pokiten ewe Samon a fen apasa pwe ese nonnom non tempel ese pin, nge non netipen ekkewe mi tupwon i a nonnom non; ewer, iwe i a pwan apasa pwe ekkewe mi tupwon repwe mwotiw non muun we, pwe resap chiwen tou sefan; nge ufer kewe repwe pwechepwecheno me non chan ewe Nam.

37 Iwe iei, ami pwi achengicheng, ua mochen pwe oupwe chechemeni ekkei mettoch, me pwe oupwe anganga manauemi ren nuokus me mwen Kot, me pwe ousap chiwen amam ewe wareton Kraist;

38 Pwe ousap chiwen ungeni ewe Ngun mi Fel, nge pwe oupwe angei, me wata womi ewe iten Kraist; pwe oupwe etipetekisona inisimi pwan mwo ngeni ewe puun, me fen ngeni Kot, non met chok neni oupwe nom non, non ngun me non ennet; me pwe oupwe nonnom non kinisou iteiten ran, usun ekkewe chommong umoumoch me feioch minne i a watiw womi.

39 Ewer, iwe ua pesekemi, ami pwi, pwe oupwe soposopono mwitir ne iotek, pwe ousap emmwenino me ren sossotun ewe tefin, pwe i esap nemenem womi, pwe ousap nom fan nemenian non ewe ranin soponon; pun nengeni, esap aniwini nengenikemi mettoch mi öch.

40 Iwe iei ami pwi achengicheng, upwe pesekemi pwe epwe wor ami tipepos, me pwe oupwe engino ngeni sokopaten meinisin riaffou; pwe ousap kapas mi ngaw ngeni ekkewe ir ra aturakemiu pokiten ami fokkun woungaw, ren nuokusun ika oupwe winiti chon tipis usun ir;

41 Nge epwe wor ami tipepos, me engino ngeni ekkena riaffou, ren ew pochokunen apinukunuk pwe non ew ran oupwe asoso seni ami kewe riaffou meinisin.