1 Iei non ewe fansoun pwe mwirin an Amulek a awesano ekkei kapas, ra amwokutu inisir seni ewe mwicheich me feito non ewe fonuen Jerson.

2 Ewer, iwe unusen meinisin pwin kewe, mwirin ar ra afanafana ewe kapas ngeni ekkewe chon Soram, ra pwan feito non ewe fonuen Jerson.

3 Iwe non ewe fansoun pwe mwirin ewe kinikinin ekkewe chon Soram mi kon itefouno a apungupung fengen usun ekkewe kapas minne ra fen afanafana ngeni ir, ra song pokiten ewe kapas, pun a fen atano ar mwokutukut; iei minne rese aneasochis ngeni ekkewe kapas.

4 Iwe ra tinano porous me ioifengeni ekkewe aramas meinisin non unusen ewe fonu, me apungupung ngeni ir usun ekkewe kapas minne ra fen apasa.

5 Iei nour kewe chon nemenem me nour kewe pris me nour kewe sense rese mut ngeni ekkewe aramas repwe sinei usun ar mochen; iei minne ra kuna non monomon ekiekin ekkewe aramas meinisin.

6 Iwe non ewe fansoun pwe mwirin ar sinei usun ekiekin ekkewe aramas meinisin, ekkewe ra fen nom non aninisin ekkewe kapas minne Alma a fen apasa me pwin kewe ra katuruu seni ewe fonu; iwe ir mi chommong; iwe ra pwan feito ngeni ewe fonuen Jerson.

7 Iwe non ewe fansoun pwe Alma me pwin kewe ra afanafan ngeni ir.

8 Iei ekkewe aramasen ekkewe chon Soram ra song ren ekkewe aramasen Ammon ekkewe ir mi nom non Jerson, iwe ewe chon nemenemen ekkewe chon Soram mi nap, pokiten i emon mwan mi fokkun ngaw, a titito ren ekkewe aramasen Ammon an mochen pwe repwe aturareu seni fonuer we ekkewe ra feito seni ir non ewe fonu.

9 Iwe a ngasepwichinau chommong kapasen efeiengaw ngeni ir. Iwe iei ekkewe aramasen Ammon rese nuokusiti ar kewe kapas; iei minne rese aturareu, nge ra etiwa ekkewe mi osupwang meinisin seni ekkewe chon Soram ekkewe ra feito ngeni ir; iwe ra tumunur, me aufoufer, me ra ngeni ir fonu pwe fonuer; me ra angang ngeni ir anongonong won ar kewe mochen.

10 Iei ei a amwasangata ekkewe chon Soram ar repwe song ngeni ekkewe aramasen Ammon, iwe ra poputa ne nofit ngeni ekkewe chon Leiman me amwasangereta ar repwe pwan song ngeni ir.

11 Iwe iei ekkewe chon Soram me ekkewe chon Leiman ra poputa ne for amonnetan maun ngeni ekkewe aramasen Ammon, me pwan ngeni ekkewe chon Nifai.

12 Iwe iei a muchuno ewe efisuwen ierin muun ekkewe sou apung won ekkewe aramasen Nifai.

13 Iwe ekkewe aramasen Ammon ra tou seni ewe fonuen Jerson, me feito ngeni non ewe fonuen Milek, me awora neni me non ewe fonuen Jerson fan iten ekkewe sounfiun chon Nifai, pwe repwe tongeni fiu ngeni ekkewe sounfiun ekkewe chon Leiman me ekkewe sounfiun ekkewe chon Soram; iwe iei a poputani ew maun nefinen ekkewe chon Leiman me ekkewe chon Nifai, non ewe awanuwan ierin muun ekkewe sou apung; iwe ew uruo epwe kawor usun ar kewe maun mwirin.

14 Iwe Alma, me Ammon, me pwir kewe, me pwan ekkewe ruomon anuon noun Alma ra niwin ngeni ewe fonuen Saraemla, mwirin ar ra fen pin pisekin aninis me ne poun Kot ne uwei chommong me nein ekkewe chon Soram ngeni aier; iwe meinisin ekkewe ra emmweni ngeni aier ra katou seni fonuer we; nge a wor fonuer ar repwe fonueni me non ewe fonuen Jerson, me ra angei pisekin maun pwe repwe eppeti inisir, me punuwer kewe, me nour kewe, me fonuer kewe.

15 Iei Alma, pokiten a netipengaw ren angangangawen noun kewe aramas, ewer ren ekkewe maun, me ekkewe assuku cha, me ekkewe anini fengen minne a fis nefiner; iwe pokiten a fen affata ewe kapas, are a fen titino pwe epwe affata ewe kapas, me nein ekkewe aramas meinisin non meinisin teninimw; iwe pokiten a kuna pwe netipen ekkewe aramas ra poputa ne pochokununo, me ra poputa ne enetipengaw pokiten tichikin ewe kapas, netipan a fokkun uren netipechou.

16 Iei minne, a annuku pwe noun kewe anuon repwe ioifengen, pwe i epwe tongeni ngeni ir emon me emon an we ew aurour, akkanamon, usun ekkewe mettochun wenechar. Iwe mi wor rem uruon an kewe annuk, minne a ngeni ir anongonong won an pwisin uruo.