1 Kiiō ālikin men kein ke Amulek eaar kōm̧m̧ane jem̧ļo̧k in naan kein an, raar kōjenolo̧k er jān jarlepju eo im itok n̄an āneen Jersōn.

2 Aaet, im aolepān m̧aan ro jein im jatin, ālikin raar kwaļo̧k naan eo n̄an riZoram ro, raar barāinwōt itok ilo āneen Jersōn.

3 Im ālikin men kein ke eaar ejem̧ļo̧k an ro rebun̄bun̄ļo̧k in riZoram ro kar kōnono ippān doon kōn naan eo kar kwaļo̧k naan n̄an er kaki, raar illu kōnke naan eo, bwe eaar ko̧kkure jerbal in m̧oņ eo aer, kōnke raar jamin kar eo̧ron̄ naan ko.

4 Im raar ijjilōkļo̧k im kuktok ippān doon ilo aolepān āneo aolep armej ro, im kōnono ippāer kōn naan ko kar kōnono.

5 Kiiō irooj ro aer im pris ro aer im rikaki ro aer raar jab kōtļo̧k armej to n̄an jeļā kōn kōņaan ko aer; kōn menin raar pukot ilo ittino ļōmņak ko an aolep armej ro.

6 Im ālikin men kein ke em̧ōj aer kar lo ļōmņak ko an aolep armej ro, ro raar errā ilo naan ko kar kōnono jān Alma im ļōm̧aro jein im jatin kar kadiwōjļo̧k er jān āneo; im raar kanooj lōn̄, im raar itok barāinwōt n̄an āneen Jersōn.

7 Im ālikin men kein Alma im ļōm̧aro jein im jatin raar jipan̄ er.

8 Kiiō armej in riZoram ro raar illu ippān armej in Ammōn ro raar pād ilo Jersōn, im irooj eo eutiejtata an riZoram ro, kōnke eaar juon armej ekanooj nana, eaar ijjilōkļo̧k n̄an armej in Ammōn im kar kōņaan bwe ren kadiwōjļo̧k jān āneo aer aolep ro raar itok jān er n̄an āneo āneer.

9 Im eaar kōnono elōn̄ kōlōļn̄o̧n̄ ko ņae er. Im kiiō armej in Ammōn raar jab mijak naan ko aer; kōn menin raar jab kadiwōjļo̧k er, a raar bōk aolep rijeram̧ōl ro an riZoram ro im raar itok n̄an ippāer; im raar naajdik er, im raar ņa ballier, im kar leļo̧k n̄an er bwidej ko aer n̄an aer ļām̧oran; im raar jipan̄ er ekkar n̄an kōņaan ko aer.

10 Kiiō men in eaar kapoktak riZoram ro n̄an illu ņae armej in Ammōn, im raar jino n̄an iiaio ippān riLeman ro n̄an pukwōj er barāinwōt n̄an illu ņae er.

11 Im āindein riZoram ro im riLeman ro raar jino kōm̧m̧an m̧aanjāppopo ko n̄an tariņae ņae armej in Ammōn, im barāinwōt ņae riNipai ro.

12 Im āindein eaar jem̧ļo̧k iiō eo kein kajon̄ouljiljilimjuon in iien tōl an riekajet ro ioon armej in Nipai.

13 Im armej in Ammōn raar ilo̧k jān āneen Jersōn, im ilo̧k ilo āneen Melek, im leļo̧k jikin iāneen Jersōn n̄an jarin tariņae ko an riNipai ro, bwe ren maron̄ pata ippān jarin tariņae ko an riLeman ro im jarin tariņae ko an riZoram ro; im āindein eaar ijjino juon tariņae ikōtaan riLeman ro im riNipai ro, ilo iiō eo kein kajon̄oulruwalitōk in iien tōl an riekajet ro; im juon bwebwenato naaj letok kōn tariņae ko aer tokālik.

14 Im Alma, im Ammōn, im ļōm̧aro jeir im jatier, im barāinwōt ļōm̧aro ruo nejin Alma raar ro̧o̧l n̄an āneen Zaraemla, ālikin aer kar jet kein jerbal ko ilo pein Anij ilo bōktok elōn̄ iaan riZoram ro n̄an ukeļo̧k; im jon̄an wōt eo kar bōktok n̄an ukeļo̧k kar lukwarkwar er jān āneer; a eaar wōr aer bwidej n̄an aer ļām̧oran iāneen Jersōn, im raar kotak kein tariņae ko n̄an jojomar n̄an er make, im kōrā ro pāleer, im ro nejier, im bwidej ko jikier.

15 Kiiō Alma kōnke eaar būrom̧ōj kōn nana eo an armej ro an, aaet kōn tariņae ko, im kōto̧o̧rļo̧k bōtōktōk ko, im akwāālel ko kar ilubwiljier; im kōnke eaar kwaļo̧k naan eo, ak kar jilkinļo̧k n̄an kajeeded naan eo, ilubwiljin aolep armej ilo jikin kwelo̧k otemjeļo̧k; im kōnke eaar lo bwe būruōn armej ro eaar jino kanooj pen, im bwe raar jino n̄an inepata kōnke jejjet eo an naan eo, būruōn eaar būrom̧ōj otem būrom̧ōj.

16 Kōn menin, eaar kōm̧m̧an bwe ļōm̧aro nejin ren kuktok ippān doon, bwe en maron̄ leļo̧k n̄an er aolep kajjojo an naan in rōjan̄, makeļo̧k iaan, kōn men ko rej an weeppān. Im ewōr ad bwebwenato in naan in jiron̄ ko an, ko eaar liļo̧k n̄an er ekkar n̄an ļo̧o̧k ko an make.