1 At walal, k’e aaxik chirab’inkil li waatin, xb’aan naq ninxaqab’ aatin chawu, naq a’ yaal jo’ nakapaab’ lix taqlahom li Dios tat-usaaq sa’ li ch’och’.

2 Nawaj raj naq taab’aanu jo’ xinb’aanu laa’in, ut taajultiko’q aawe xpreexileb’ li qayuwa’; xb’aan naq eb’ a’an ke’wan chi moosil, ut maajun kiru chi kolok reheb’, ka’ajwi’ lix Dios laj Abraham, ut lix Dios laj Isaak, ut lix Dios laj Jakob, ut a’an kixkoleb’ chi yaal sa’ xch’a’ajkilaleb’.

3 Ut anajwan, at walal Helaman, k’e reetal, wankat sa’ aasaajil, jo’kan ut naq nintz’aama chawu naq chawab’i li waatin ut chattzoloq wik’in; xb’aan naq ninnaw naq eb’ li ani neke’xkanab’ rib’ chiru li Dios te’kawresiiq sa’ li yale’k rixeb’, ut li rahilal neke’xnumsi, ut lix ch’a’ajkilaleb’, ut te’waklesiiq sa’ roso’jik li kutan.

4 Ut moko nawaj ta naq taak’oxla naq ninnaw injunes wib’—moko rik’in ta li k’a’ru re li yu’am a’in, rik’in b’an li k’a’ru re li musiq’ej, moko rik’in ta xk’a’uxl li tz’ejwalej, rik’in b’an li Dios.

5 Anajwan, k’e reetal, ninye aawe, wi ta ink’a’ kinyo’la rik’in li Dios ink’a’ raj kinnaw li k’a’aq re ru a’in; a’b’an li Dios, rik’in xtz’uumal re lix santil anjel, xk’e chinnaw li k’a’aq re ru a’in, moko rik’in ta junaq ink’ulub’ejil injunes wib’;

6 Xb’aan naq laa’in xinb’eenink wochb’eeneb’ li ralal laj Mosiah, re xsik’b’al xsachb’al lix iglees li Dios; a’b’anan k’e reetal, li Dios kixtaqla lix santil anjel re qaramb’al chire li b’e.

7 Ut k’e reetal, a’an kooraatina, chanchan xyaab’ li kaaq, ut chixjunil li ch’och’ nachiq’chot rub’el li qoq, ut chiqajunil koot’ane’ chi ch’och’, xb’aan naq kichal sa’ qab’een qaxiw chiru li Qaawa’.

8 A’ut k’e reetal, lix yaab’ kuxej kixye we: Waklin. Ut kinwakli, ut kinxaqli, ut kiwil li anjel.

9 Ut a’an kixye we: Wi laa’at aajunes taawaj sache’k, maasik’ chik xsachb’al lix iglees li Dios.

10 Ut kik’ulman naq kint’ane’ chi ch’och’; ut kiwan chiru xnumik oxib’ kutan ut oxib’ q’ojyin naq ink’a’ kinru chixteeb’al li we, chi moko kinru chiroksinkil woq wuq’.

11 Ut wan chik li k’a’aq re ru kixye li anjel we, li ab’inb’il xb’aaneb’ lin komon, a’b’an laa’in ink’a’ kiwab’i; xb’aan naq chirix naq kiwab’i li aatin—Wi laa’at taawaj sache’k aajunes, maasik’ chik xsachb’al lix iglees li Dios—k’a’jo’ naq kintoch’e’ xb’aan xnimal inxiw ut xsachik inch’ool, maare anchal tinsache’q, jo’kan naq kint’ane’ chi ch’och’ ut maak’a’ chik kiwab’i.

12 A’ut kinyot’e’ rik’in li rahilal re junelik, xb’aan naq li waam kitawasiik chi q’axal numtajenaq, ut kiyot’e’ rik’in chixjunil inmaak.

13 Relik chi yaal, kijultiko’ we chixjunil inmaak ut inmaa’usilal, xb’aan wi’ kinrahob’tesiik rik’in xrahil xb’alb’a; relik chi yaal, kiwil naq kinpo’resi chaq inch’ool chiru lin Dios, ut naq moko kinpaab’ ta lix santil taqlahom.

14 Relik chi yaal, ut keb’inkamsi naab’al li ralal xk’ajol, malaj ut kink’ameb’ xb’e sa’ li sache’k; relik chi yaal ut, q’axal nim chaq inmaa’usilal, jo’kan naq yal xk’oxlankil naq tin’ok chiru lin Dios kixyot’ li waam rik’in nimla xiw li ink’a’ naru xch’olob’ankil.

15 Aay, kink’oxla, chin’isiiq taxaq ut chinmaak’a’o’q taxaq, li waam jo’ ajwi’ lin tib’el, re naq ink’a’ tink’ame’q chi xaqliik chiru lin Dios, re taaraqmanq aatin chiwix xb’aan inb’aanuhom.

16 Anajwan ut, chiru oxib’ kutan ut oxib’ q’ojyin kinyot’e’, rik’in ajwi’ xrahil jun li aamej li k’eeb’il sa’ tojb’a-maak.

17 Ut naq yot’b’ilin chi jo’kan xb’aan rahilal, naq tawasinb’ilin xb’aan xjultikankil xk’ihal inmaak, k’e reetal, kik’ulman naq kijultiko’ ajwi’ we rab’inkil chaq inyuwa’ chi aatinak jo’ profeet chiruheb’ li tenamit chirix xk’ulunik jun li Jesukristo, jun Ralal li Dios, re xtojb’al rix lix maak li ruchich’och’.

18 Anajwan, naq kixchap ink’a’uxl li na’leb’ a’in, kinjap we sa’ inch’ool: At Jesus, Ralal li Dios, chawuxtaana wu, li wankin sa’ xk’ahil li yot’e’k, ut sutsuukin xb’aan lix b’ak’leb’ ch’iich’ li kamk li junelik taawanq.

19 Ut anajwan, k’e reetal, naq kink’oxla a’in, ink’a’ chik kijultiko’ we inrahil; relik chi yaal, moko tawasinb’ilin ta chik xb’aan xjultikankil inmaak.

20 Ut aay, q’axal nim li sahil ch’oolejil, ut q’axal sachol ch’oolej li saqen kiwil; relik chi yaal, kinujak li waam rik’in sahilal li numtajenaq jo’ chanru chaq inrahilal!

21 Relik chi yaal, ninye aawe, at walal, ink’a’ naru nawan k’a’ruhaq q’axal nim ut q’axal k’a jo’ ta inrahilal. Relik chi yaal, ut ninye wi’chik aawe, at walal, naq chi junpak’al chik, moko naru ta nawan k’a’ruhaq q’axal nim ut q’axal ki’ jo’ ta xsahil inch’ool.

22 Relik chi yaal, anchal naq kiwil, jo’ kiril qayuwa’ aj Lehi, li Dios k’ojk’o sa’ xb’een xk’ojarib’aal, sutsu xb’aan k’iila ch’uuteb’ li anjel maak’a’ rajlankileb’, wankeb’ chi b’ichank ut chixnimankil ru lix Dios, relik chi yaal, ut li waam kirataw wank aran.

23 A’b’an k’e reetal, kichal wi’chik xmetz’ew li woq wuq’, ut kinxaqli chi woq, ut kink’utb’esi chiruheb’ li tenamit naq yo’lajenaqin chaq rik’in li Dios.

24 Relik chi yaal, ut chirix li hoonal a’an chalen toj anajwan ink’a’ kinkanab’ k’anjelak, re naq maare tinruuq chixk’amb’aleb’ li aamej sa’ li jalb’a-k’a’uxlej; re naq taaruuq teb’ink’am chixyalb’al xnumtajenaqil li sahil ch’oolejil li xinyal laa’in; re naq yo’lajenaqaqeb’ ajwi’ rik’in li Dios, ut te’nujaq rik’in li Santil Musiq’ej.

25 Relik chi yaal, k’e ut reetal, at walal, li Qaawa’ naxk’e chi numtajenaq xsahil inch’ool rik’in li ruuchinihom ink’anjel;

26 Xb’aan naq sa’ xk’ab’a’ li aatin li kixq’axtesi we, k’e reetal, naab’al li ke’yo’la rik’in li Dios, ut ke’xyal xsahil li kinyal laa’in, ut ke’ril rik’in ruheb’ jo’ kiwil laa’in; jo’kan naq neke’xnaw chirix li k’a’aq re ru kin’aatinak wi’, jo’ ninnaw laa’in; ut li nawb’il inb’aan, k’eeb’il xb’aan li Dios.

27 Ut laa’in kinkawresiik sa’ li jar paay chi yalok-ix ut chi rahilal xinnumsi, relik chi yaal, ut sa’ li k’iila paay chi ch’a’ajkilal; relik chi yaal, li Dios kinixkol chaq chiru tz’alam, ut chiru li b’ak’leb’, ut chiru li kamk; relik chi yaal, ut laa’in ninkanab’ wib’ chiru, ut a’an toj tinixkol chaq.

28 Ut ninnaw naq a’an tinixwaklesi sa’ roso’jik li kutan, re tinwanq rik’in a’an sa’ loq’alil; relik chi yaal, ut laa’in tinnima ru chi junelik q’e kutan, xb’aan naq a’an kirisiheb’ chaq li qayuwa’ aran Egipto, ut kixsub’eb’ laj Egipcio sa’ li Kaqi Palaw; ut kixb’eresiheb’ rik’in xwankilal toj sa’ li yeechi’inb’il ch’och’; relik chi yaal, ut kixkoleb’ chaq chiru moosil ut preexil chi yalaq jo’q’e.

29 Relik chi yaal, ut jo’kan ajwi’ kirisiheb’ chaq li qayuwa’ sa’ li ch’och’ Jerusalen; ut jo’kan ajwi’ rik’in lix wankilal li junelik nakana kixkoleb’ chaq chiru moosil ut preexil chi yalaq jo’q’e toj chalen sa’ li kutan a’in; ut junelik xink’e chi jultik we lix preexileb’; relik chi yaal, ut laa’at ajwi’ tento raj taak’e chi jultik aawe, jo’ xinb’aanu laa’in, lix preexileb’.

30 A’ut k’e reetal, at walal, moko chixjunil ta a’in; xb’aan naq tento taanaw jo’ ninnaw laa’in, naq a’ yaal jo’ nakapaab’ lix taqlahom li Dios tat-usaaq sa’ li ch’och’; ut tento ajwi’ taanaw, naq a’ yaal jo’ ink’a’ nakapaab’ lix taqlahom li Dios, tat-isiiq chaq chiru a’an. A’in ut jo’ chanru li raatin.