1 Iwe iei, nei anuon Ilaman, ua annuku ngonuk pwe kopwe angei ekkewe uruo minne ra fen ewiis ngeniei;

2 Iwe ua pwan annuku ngonuk pwe kopwe makkei ew uruon ekkei aramas, anongonong won usun ua fen fori, won ekkewe seleichen Nifai, me tumunu ekkei mettoch meinisin non monomon minne ua fen tumunu, pwan mwo usun ua fen tumunur; pokiten ren ew popun mi mirit minne ra tumun.

3 Iwe ekkei seleichen brass, minne ra masoweni ekkei makk, minne a masoweni uruon ekkewe pukefel wor, minne a masoweni uruon ach kewe neuo, pwan mwo seni nepoputan—

4 Nengeni, semach kewe ra fen osini, pwe repwe isois me keititiw seni ew tappin aramas ngeni pwan ew, me repwe isois me tumun me ren poun ewe Samon tori ar repwe no ngeni muu meinisin, einang, sokopaten kapas, me aramas, pwe repwe sinei usun ekkewe monomon ra masoweni.

5 Iwe iei nengeni, ika ra isois mi auchea repwe tumunu saramer; ewer, iwe repwe chechemeni saramer; ewer, iwe pwan ekkewe seleich meinisin minne ra masoweni ewe mak minne mi fel.

6 Iei ina kopwe ekieki pwe ei mi puch rei; nge nengeni ua apasa ngonuk, pwe ren mettoch mi kukkun me mecheres watte mettoch ra fis; me kukkun foffor non chommong napanap ra aosukosuka ekkewe mi mirit.

7 Iwe ewe Samon Kot a angang ren ekkoch napanap ne awesi an kewe popun mi auchea me esemuch; iwe ren fokkun kukkun napanap ewe Samon a etipitipingawa ekkewe mi mirit me amanauen chommong ngun.

8 Iwe iei, iwe a fen ew mirit non Kot tori ei fansoun pwe ekkei mettoch repwe tumun; pun nengeni, ra fen awatteno an ekkei aramas chechemeni, ewer, me pesei chommong usun mwanin eerenier kewe, me uwei ir ngeni ewe mirit usun ar Kot ngeni amanauen ngunur.

9 Ewer, ua apasa ngonuk, ika esap ren ekkei mettoch minne ekkei uruo ra masoweni, minne ra nom won ekkei seleich, Ammon me pwin kewe rese tongeni pesei fokkun chommong ngorowun ekkewe chon Leiman usun mwanin eerenien semer kewe; ewer, ekkei uruo me ar kewe kapas ra uwei ir ngeni aier; iwe ei, ra uwei ir ngeni ewe mirit usun ewe Samon ar Kot, me ngeni pwapwa non Jises Kraist ar Chon Angasano.

10 Iwe ion epwe sinei nge tiwenon chok pwe ir repwe ekkewe popun ne uwei chommong ngorow me neir, ewer, me pwan chommong ngorowun pwich kewe mi nukumach, ekkewe chon Nifai, ekkewe ra apochokunano netiper iei non tipis me angangangaw, ngeni ewe mirit usun ar Chon Angasano?

11 Iei ekkei monomon rese mwo unusen pwano ngeniei; iei minne upwe kouno.

12 Iwe epwe naf ika upwe apasa chok pwe ra tumun ren ew popun mi mirit, minne popun mi fat ngeni Kot; pun a aurour non mirit won an kewe angang meinisin, iwe aanan kewe mi wenechar, me an aan a ew foffor mi fis fansoun meinisin esemuch.

13 O chechemeni, chechemeni, nei anuon Ilaman, ifa usun tichikin ekkewe annukun Kot. Iwe i a apasa: Ika kopwe aneasochisi ai kewe annuk kopwe feiochuno me non ewe fonu—nge ika kosap aneasochisi an kewe annuk kopwe pokupokuno seni me mwen mesan.

14 Iwe iei chechemeni, nei anuon, pwe Kot a fen ewiis ngonuk ekkei mettoch, minne ir mi monomon, minne a fen isonir pwe repwe monomon, me pwan minne i epwe isonir me tumunur ren ew popun mi mirit non i, pwe i epwe tongeni pwarano an manaman ngeni tappin aramas repwe feito.

15 Iwe iei nengeni, ua urenuk me ren ewe ngunun osini, pwe ika kopwe atai ekkewe annukun Kot, nengeni, ekkei mettoch minne ir mi monomon repwe no sonuk me ren ewe manamanen Kot, iwe kopwe keitino ngeni Setan, pwe epwe mworeok usun unuchen foun ira me mwen ewe asepwan.

16 Nge ika kopwe aneasochisi ekkewe annukun Kot, me fori ngeni ekkei mettoch minne ir mi monomon anongonong won met minne ewe Samon a annuku ngonuk, (pun mi auchea kopwe tingor ngeni ewe Samon fan iten mettoch meinisin met chok kopwe fori ngeni ir) nengeni, ese wor pochokunen fonufan are hell a tongeni angeir sonuk, pun Kot mi unusen manaman ngeni apwonuetan an kewe kapas meinisin.

17 Pun i epwe apwonueta an kewe pwon meinisin minne i epwe fori ngonuk, pun a fen apwonueta an kewe pwon minne i a fen fori ngeni semach kewe.

18 Pun a pwon ngeni ir pwe i epwe tumunu ekkei mettoch ren ew popun mi mirit non i, pwe i epwe tongeni pwarano an manaman ngeni tappin aramas repwe feito.

19 Iwe iei nengeni, ew popun a fen pwonueta, pwan mwo ngeni niwin sefaniton chommong ngorowun ekkewe chon Leiman ngeni ewe mirit usun ewe ennet; me i a fen pwarano an manaman non ir, me i epwe chok pwan pwarano an manaman non ir ngeni tappin aramas repwe feito; iei minne repwe tumun.

20 Iei minne ua annuku ngonuk, nei anuon Ilaman, pwe kopwe achocho ne apwonueta ai kewe kapas meinisin, iwe pwe kopwe achocho ne aneasochisi ekkewe annukun Kot usun ra fen makketiw.

21 Iwe iei, upwe kapas ngonuk usun ekkewe rue me ruanu seleich, ekkewe ka isoni ir, pwe ekkewe monomon me angangen rochopwak, me ar kewe angang mi monomon, are ekkewe angang mi monomon an ekkewe aramas ir ra fen ninnino, repwe pwano ngeni ekkei aramas; ewer, ar kewe nii manau meinisin, me sona, me angemwan, me ar kewe fofforungaw me angang mi anieput meinisin, repwe pwano ngeni ekkei aramas; ewer, iwe kopwe tumunu ekkei pisekin awewe kapas.

22 Pun nengeni, ewe Samon a kuna pwe ekkei aramas ra poputa ne angang non rochopwak, ewer, ra anganga nii manau mi monomon me angang mi anieput; iei minne ewe Samon a apasa, ika rese aier repwe ninnino seni unungen ewe fonufan.

23 Iwe ewe Samon a apasa: Upwe amonna ngeni nei chon angang Kaseilim, efou fau, minne epwe sarameno non rochopwak ngeni saram, pwe upwe tongeni pwarano ngeni nei aramas ekkewe ra angang ngeniei, pwe upwe tongeni pwarano ngeni ir ekkewe angangen pwir kewe, ewer, ar kewe angang mi monomon, ar kewe angangen rochopwak, me ar fofforungaw me angang mi anieput.

24 Iwe iei, nei anuon, ekkei pisekin awewe kapas ra monneta pwe ewe kapasen Kot epwe tongeni pwonueta, minne i a kapas, a apasa:

25 Upwe uweiau seni rochopwak ngeni saram ar kewe angang mi monomon meinisin me ar kewe angang mi anieput; iwe tiwenon chok ika repwe aier upwe nireno seni unungen ewe fonufan; iwe upwe uwei ngeni saram ar kewe monomon meinisin me angang mi anieput, ngeni muu meinisin ekkewe repwe fonueni ewe fonu.

26 Iwe iei, nei anuon, sia kuna pwe rese aier; iei minne ra fen ninnino, iwe ngeni ei fansoun ewe kapasen Kot a fen pwonueta; ewer, ar kewe angangen anieput mi monomon ra fen katou seni rochopwak me pwano ngenikich.

27 Iwe iei, nei anuon, ua annuku ngonuk pwe kopwe chechemeni ar kewe pwon ra fen akkaponu, me ar kewe pwon, me ar kewe apungupung me non ar kewe angangen anieput mi monomon; ewer, me ar kewe esisin meinisin me ar kewe amwarar kopwe isoni seni ekkei aramas, pwe resap sinei usur, ren nuokusun ika repwe turunong pwan non rochopwak me ninnino.

28 Pun nengeni, mi wor ew anumamau won unusen ei fonu, pwe kiteter epwe feito won ekkewe ir ra angangen rochopwak meinisin, anongonong won ewe manamanen Kot, nupwen ra mwukono; iei minne ua mochen pwe ekkei aramas resap tongeni ninnino.

29 Iei minne kopwe isoni ekkei kokkot mi monomon usun ar pwon ra fen akkaponu me ar pwon seni ekkei aramas, iwe ar kewe chok fofforungaw me ar nii manau me ar kewe angang mi anieput kopwe pwarano ngeni ir; iwe kopwe aiti ir pwe repwe oput sokkun fofforungaw me angang mi anieput me nii manau; iwe kopwe pwan aiti ir pwe ekkei aramas ra ninnino pokiten ar fofforungaw me angang mi anieput me ar nii manau.

30 Pun nengeni, ra nii manauen ekkewe soufosun ewe Samon meinisin ekkewe ra feito neir pwe repwe affata ngeni ir usun ar kewe angangangaw; iwe chan ekkewe ir ra nii manauer ra sio ngeni ewe Samon ar Kot fan iten niwinin tipis won ir ekkewe chon nii manauer; iwe iei ekkewe kapungun Kot ra feito won ekkei chon angangen rochopwak me mwicheich mi monomon.

31 Ewer, iwe epwe anumamau ewe fonu feinfeino chok me fansoun meinisin ngeni ekkewe chon angangen rochopwak me mwicheich mi monomon, pwan mwo ngeni kiteter, tiwenon chok ika repwe aier me mwen repwe unusen mwukono.

32 Iwe iei, nei anuon, chechemeni ekkewe kapas minne ua fen apasa ngonuk; kosap apinukunuku ekkewe kokkot mi monomon ngeni ekkei aramas, nge aiti ir ew koput esemuch ngeni tipis me angangangaw.

33 Afanafana ngeni ir aier, me nuku non ewe Samon Jises Kraist; aiti ir pwe repwe atipetekisona inisir me repwe mosonoson me tipetekison non netip; aiti ir repwe ungeni sossotun ewe tefin meinisin, ren ar nuku non ewe Samon Jises Kraist.

34 Aiti ir pwe resap tongeni pekus ren angang mi öch, nge oupwe mosonoson me tipetekison non netip; pun ekkena sokkun repwe kuna asoso non ngunur.

35 O, chechemeni, nei anuon, me kaeo mirit non om ka serafo; ewer, kaeo non om ka serafo ne aneasochisi ekkewe annukun Kot.

36 Ewer, me sio ngeni Kot fan iten aninisum meinisin; ewer, mut ngeni om foffor meinisin epwe ngeni ewe Samon, iwe ian chok kopwe no ia mut ngeni epwe non ewe Samon; ewer, mut ngeni om ekiek meinisin epwe wenengeni ewe Samon; ewer, mut ngeni memefin netipom epwe nom won ewe Samon feinfeino chok.

37 Aurour ngeni ewe Samon non om foffor meinisin, iwe i epwe emmwenuk non öch; ewer, nupwen ka konetiw fansoun nepwin konetiw ngeni ewe Samon, pwe i epwe tongeni tumunuk non om mour; iwe nupwen ka pwata non ewe soran mut ngeni netipom epwe uren kinisou ngeni Kot; iwe ika kopwe fori ekkei mettoch, kopwe seikita atun ewe ranin soponon.

38 Iwe iei, nei anuon, a wor ekis mettoch upwe apasa usun ewe mettoch minne semach kewe ra eita ngeni efou por, are pisekin emmwen—are semach kewe ra eita ngeni Liaona, minne, a awewe ngeni, ew kampas; iwe ewe Samon a amonnata.

39 Iwe nengeni, ese tongeni wor emon aramas epwe angang anongonong won ewe napanap mi fokkun murino fofforun. Iwe nengeni, a monneta pwe epwe pwar ngeni semach kewe ewe aan minne repwe sai non me non ewe fonu pon.

40 Iwe mi angang ngeni ir anongonong won ar nuku non Kot; iei minne, ika mi wor ar nuku ne nuku pwe Kot mi tongeni fori pwe autun mechan kewe repwe itingeni ewe aan repwe feino ie, nengeni, mi fis; iei minne mi wor rer ei manaman, me pwan chommong ekkoch manaman a fis me ren manamanen Kot, ran me ran.

41 Nge inamo, pokiten ekkena manaman ra mwokut me ren kukkun napanap a pwar ngeni ir angang mi amwarar. Ir mi chipwang, me ra monnuki ne aea ar nuku me achocho iwe mwirin ekkena angang mi amwarar ra kouno, rese fetanoch non ar sai;

42 Iei minne, ra nomwetiw non ewe fonu pon, are rese sai non ew aan mi wenoch, me ra riaffou me echik me kaka, pokiten ar kewe atai annuk.

43 Iwe iei, nei anuon, ua mochen pwe kopwe chechemeni pwe ekkei mettoch resap mettoch me nukun ununur; pun nupwen semach kewe ir mi chipwang ne aneasochis ngeni ei kampas (iei ekkei mettoch ir mettochun fonufan) rese feioch; pwan mwo ina usun ren mettoch minne pekin ngun.

44 Pun nengeni, a ina usun mecheresin ne aneasochis ngeni ewe kapasen Kraist, minne epwe itingonuk ew aan mi wenechar ngeni pwapwa esemuch, usun chok semach kewe ar aneasochis ngeni ei kampas, minne a itingeni ir ew aan mi wenechar ngeni ewe fonuen pwon.

45 Iwe iei ua apasa, met ese wor ew esisin non ei mettoch? Pun usun chok ennetin ei pisekin emmwen a uwei semach kewe, ren ar tapweno mwirin emmwenin, ngeni ewe fonuen pwon, pwan ekkewe kapasen Kraist, ika sipwe tapweno mwirin emmwenir, repwe uweikich nap seni ei nemonun chukun netipechou ngeni ew towawen fonuen pwon mi murino.

46 O nei anuon, kosap mut ngenikich sipwe chipwang pokiten mecheresin ewe aan; pun a ina usun ren semach kewe; pun a fen monneta ngeni ir, pwe ika repwe nengeni repwe tongeni manau; pwan mwo ina usun rech. Ewe aan a monneta, iwe ika sipwe nengeni sipwe tongeni manau feinfeino chok.

47 Iwe iei, nei anuon, tumunu pwe kopwe tumunuochu ekkei mettoch mi monomon, ewer, tumunu pwe kopwe nengeni Kot me manau. Feino ngeni ekkei aramas me affata ewe kapas, me kopwe ennet. Nei anuon, kone nom.