1 At walal, k’e aaxik chirab’inkil li waatin, xb’aan naq ninye aawe, jo’ ajwi’ kinye re laj Helaman, naq a’ yaal jo’ chanru nekepaab’ lix taqlahom li Dios tex’usaaq sa’ li ch’och’; ut a’ yaal jo’ chanru ink’a’ nekepaab’ lix taqlahom li Dios, tex’isiiq chaq chiru.

2 Ut anajwan, at walal, nawoyb’eni naq taawanq xnimal xsahil inch’ool chawix, sa’ xk’ab’a’ naq ink’a’ nakat-eek’an ut tiikat chixpaab’ankil li Dios; xb’aan naq jo’ chanru naq sa’ laa saajil katikib’ ilok wan wi’ li Qaawa’ laa Dios, chi jo’kan ninyo’oni naq toj tatkanaaq sa’ xpaab’ankil lix taqlahom; xb’aan naq osob’tesinb’il li ani nakuyuk toj sa’ roso’jik.

3 Ninye aawe, at walal, naq maak’a’jo’ xsahil inch’ool ak xweek’a chawix, xb’aan laa tiikilal chi paab’ank ut lix yalb’al aaq’e, ut laa kuyum ut xnajtil aawoyb’enihom sa’ xyanqeb’ lix tenamiteb’ laj Tzoramita.

4 Xb’aan naq ninnaw naq katwan chi b’akb’o; relik chi yaal, ut ninnaw naq laa’at katkutiik chi pek sa’ xk’ab’a’ li aatin; ut kanumsi chixjunil li k’a’aq re ru a’in rik’in kuyuk xb’aan naq li Qaawa’ kiwan aawik’in; ut anajwan laa’at nakanaw naq li Qaawa’ katxkol chaq.

5 Ut anajwan at walal Xiblon, nawaj raj naq taajultiko’q aawe, naq a’ yaal jo’ chanru nakakanab’ aawib’ chiru li Dios, chi jo’kan laa’at tatkole’q ajwi’ chiru lix yalb’al aawix, ut li rahilal nakanumsi, ut laa ch’a’ajkilal, ut tatwaklesiiq sa’ roso’jik li kutan.

6 Anajwan, at walal, moko nawaj ta naq taak’oxla naq ninnaw injunes wib’ li k’a’aq re ru a’in; a’an b’an lix Musiq’ li Dios li wan wik’in li nak’ehok chinnaw li k’a’aq re ru a’in; xb’aan naq wi ta ink’a’ kinyo’la rik’in li Dios ink’a’ raj kinnaw li k’a’aq re ru a’in.

7 A’ut k’e reetal, li Qaawa’ rik’in xnimal li ruxtaan kixtaqla lix anjel re xch’olob’ankil chiwu naq tento tinkanab’ li k’anjel re sachok sa’ xyanq lix tenamit; relik chi yaal, ut wilom jun li anjel chi k’utk’u chiru wilob’aal, ut a’an ki’aatinak wik’in, ut lix yaab’ xkux chanchan li kaaq, ut kixchiq’ chixjunil li ch’och’.

8 Ut kik’ulman naq oxib’ kutan ut oxib’ q’ojyin kinwan sa’ xrahil ut xyot’b’al li waam li q’axal k’a; ut maajo’q’e, toj b’an chirix naq kin’elajin chiru li Qaawa’ Jesukristo re taaruxtaana wu, naq kink’ul risinkil inmaak. A’ut k’e reetal, kinjap we chiru ut kintaw tuqtuukilal choq’ re li waam.

9 Ut anajwan, at walal, xinye a’in aawe re taaruuq taatzol chaab’il na’leb’, re naq taatzol wik’in naq maak’a’ chik junaq b’e chi moko chan chik ru naru nakole’ wi’ li winq, ka’ajwi’ rik’in ut sa’ xk’ab’a’ li Kristo. K’e reetal, a’an lix yu’am ut lix saqen li ruchich’och’. K’e reetal, a’an li aatin re yaal ut tiikilal.

10 Ut anajwan, jo’ chanru naq xat-ok chixk’utb’al li aatin, jo’kan ajwi’ nawaj raj naq maakanab’ k’utuk; ut nawaj raj naq yalb’ilaq aaq’e ut aakuyumaq aawib’ chiru chixjunil li k’a’aq re ru.

11 Chawil aawib’ re naq moko taqsinb’ilaqat ta chi q’etq’etil; relik chi yaal, chawil aawib’ re ink’a’ taanima aawib’ xb’aan xchaab’ilal aana’leb’ laa’at, chi moko chirix xnimal aametz’ew.

12 Kawaq aach’ool, a’b’an minumta xkawil; ut chawil ajwi’ aawib’ naq ramb’ilaq aab’aan chixjunil aawatawom, re naq tatwanq chi nujenaq rik’in rahok; chawil aawib’ re ink’a’ tat-ok sa’ li q’emal.

13 Mattijok jo’ neke’xb’aanu laj Tzoramita, xb’aan naq xawil naq neke’tijok re te’ab’iiq xb’aaneb’ li winq, ut re te’nimaaq ru xb’aan xchaab’ilaleb’ xna’leb’.

14 Maaye: At Dios, ninb’antioxi aawe naq chaab’ilo wi’chik chiruheb’ li qas qiitz’in; chaye b’an: At Dios, chakuy xmajelal ink’ulub’ejil, ut che’jultiko’q aawe li was wiitz’in rik’in uxtaanank—relik chi yaal, junelik chach’olob’ xmajelal aak’ulub’ejil chiru li Dios.

15 Ut li Qaawa’ chi’osob’tesinq re laa waam, ut chatxk’ul sa’ roso’jik li kutan sa’ li rawa’b’ejihom, re tatchunlaaq sa’ tuqtuukilal. Anajwan ayu, at walal, ut chak’ut li aatin chiru li tenamit a’in. Tiikaq aak’a’uxl. At walal, inwan.