1 Iwe iei, nei anuon, a ekis chommong met upwe apasa ngonuk nap seni met ua apasa ngeni pwium we; pun nengeni, kose mwo kuna nukucharen pwium we, an nikitu, me an achocho ne aneasochisi ekkewe annukun Kot? Nengeni, esemo pwarano ew nenien appiru ngonuk?

2 Pun kose mwo attonaochu ne aneasochisi ai kewe kapas usun pwium we, me nein ekkewe aramasen ekkewe chon Soram. Iei met use tipeni reom; ka fen soposopono ne sikaseni non om pwisin pochokun me om mirit.

3 Iwe esap ikkei meinisin, nei anuon. Ka fen fori met minne a enetipengaw ngeniei; pun ka nikitano ewe angangen afanafan, me ka feino ngeni non ewe fonuen Siron me nein ekkewe kianin ekkewe chon Leiman, mwirin ewe fin nisou Isapel.

4 Ewer, a fen angeiano netipen chommong; nge esap ew atipengen ngonuk ei, nei anuon. Kopwe fen ita achocho ngeni ewe angangen afanafan ren minne ka fen ewiis ngeni.

5 Kose sinei, nei anuon, pwe ekkei mettoch ra ew angang mi anieput me ne mesen ewe Samon; ewer, wesewesen anieput nap seni tipis meinisin tiwenon chok ika epwe ewe assukun cha mi nimenimoch are amam ewe Ngun mi Fel?

6 Pun nengeni, ika ka amam ewe Ngun mi Fel nupwen a fen nom non en, me ka sinei pwe ka amam, nengeni, iei ei tipis minne ese tongeni mus; ewer, iwe ion chok a nii manau ne ungeni ewe saram me mirit usun Kot, ese mecheres ren an epwe angei omusomus; ewer, ua apasa ngonuk, nei anuon, pwe ese mecheres ren i an epwe angei ew omusomus.

7 Iwe iei, nei anuon, ua anean ngeni Kot pwe ita kose fen tipis ren ew atai annuk mi enetipengaw. Use mochen soposopono won om kewe atai annuk, pwe ete eriaffou ngunum, ika esap ren öchum.

8 Nge nengeni, kose tongeni opano om kewe atai annuk seni Kot; iwe tiwenon chok ika kopwe aier repwe uta pwe pisekin pwarata ngonuk non ewe ranin soponon.

9 Iwe nei anuon, ua mochen pwe kopwe aier me nikitano om kewe tipis, me kosap chiwen feino mwirin mochenian mesom, nge amam inisum non ekkei mettoch meinisin; pun tiwenon chok ika kopwe fori ei kose tongeni muuni ewe muun Kot. Oh, chechemeni, me wata wom, me amam inisum non ekkei mettoch.

10 Iwe ua annuku ngonuk pwe kopwe wata wom om kopwe aurour ngeni pwium kewe watte non om kewe angang; pun nengeni, en ka serafo, me ka uta non auchean om kopwe tumun me ren pwium kewe. Me aneasochis ngeni ar aurour.

11 Kosap mut ngeni inisum epwe emmwenino me ren och namotongaw are mettoch mi puch; kosap mut ngeni ewe tefin epwe emmwenano netipom sefan mwirin ekkewe fin nisou mi ngaw. Nengeni, O nei anuon, ifan ennetin angangangaw ka wata won ekkewe chon Soram; pun nupwen ra kuna om mwokutukut rese mochen nuku non ai kewe kapas.

12 Iwe iei ewe Ngunun ewe Samon a apasa ngeniei: Annuku noum kewe pwe repwe fori mi öch, ren nuokusun ika repwe emmwenano netipen chommong aramas ngeni kiteter; iei minne ua annuku ngonuk, nei anuon, non nuokusun Kot, pwe kopwe kouno seni om angangangaw;

13 Pwe kopwe kun ngeni ewe Samon ren unusen om ekiek, napanap, me pochokun; pwe kosap chiwen emmwenano netip ne fori fofforungaw; nge fen niwin ngeni ir, me fangeta om kewe tipis me muan minne ka fen fori.

14 Kosap kutta mwirin pisekisek are ekkewe namotmwanin mettochun ei fonufan; pun nengeni, kose tongeni uwei ir ngonuk.

15 Iwe iei, nei anuon, upwe ekis apasa ngonuk usun ewe wareton Kraist. Nengeni, ua apasa ngonuk, pwe i ewe epwe ennetin wareto pwe epwe angeiano tipisin ewe fonufan; ewer, epwe wareto pwe epwe afanafana porousen pwapwan amanau ngeni noun kewe aramas.

16 Iwe iei, nei anuon, iei ewe angangen afanafan minne ka fen kokko ngeni, pwe kopwe afanafana ekkei porousen pwapwa ngeni ekkei aramas, pwe kopwe amonnata ar ekiek; are fen pwe amanau epwe tongeni feito ngeni ir, pwe repwe tongeni amonnata ekiekin nour kewe semirit pwe repwe rongorong ewe kapas atun ewe fansoun an wareto.

17 Iwe iei upwe amecheresi om ekiek won ekis ei porous. Nengeni, ka ingeno ika pwata ekkei mettoch repwe fateno me nom me mwen ar repwe fis. Nengeni, ua apasa ngonuk, esap emon ngun atun ei fansoun a chok auchea ngeni Kot usun chok emon ngun epwe fis atun ewe fansoun an wareto?

18 Ese auchea pwe ewe kokkotun ngaseno epwe fateno ngeni ekkei aramas usun chok pwan ngeni nour kewe semirit?

19 Ese mecheres atun ei fansoun an ewe Samon epwe tinato noun chon nang pwe epwe afanafana ekkei porousen pwapwa ngenikich usun chok pwan ngeni nouch kewe semirit, are ngeni mwirin ewe fansoun an we wareto?