1 Iei nei anuon, iei ekis met upwe apasa ngonuk; pun ua weweiti pwe om ekiek a aurek usun ewe manausefanitan ekkewe mi mano.

2 Nengeni, ua apasa ngonuk, pwe ese wor manausefan—are, upwe fen apasa, non ekkoch kapas, pwe ei inis mi tongeni mano esap pwinitanong ewe inis ese tongeni mano, ei kiteter esap pwinitanong esap kiteter—tori mwirin wareton Kraist.

3 Nengeni, a efisi ewe manausefanin ekkewe mi mano. Nge nengeni, nei anuon, ewe manausefan ese mwo fis. Iei, ua pwarano ngonuk ew monomon; nge inamo, mi chommong monomon minne ir mi isois, pwe esap wor emon epwe sinei usur tiwenon chok Kot pwisin. Nge ua pwar ngonuk ew mettoch minne ua fen achocho ne eis me ren Kot pwe upwe tongeni sinei—minne usun ewe manausefan.

4 Nengeni, mi wor ew fansoun a kefinita pwe aramas meinisin repwe feito seni ewe mano. Iei nupwen ei fansoun epwe feito ese wor emon a sinei usun; nge Kot mi sinei ewe fansoun minne a fen kefinita.

5 Iei, ika pwe epwe ew fansoun, are ew aruwen fansoun, are ewe aunungatin fansoun, pwe aramas repwe feito seni mano, ese auchea; pun Kot mi sinei mettoch meinisin; iwe a naf ngeniei ai sinei pwe iei met epwe fis—pwe mi wor ew fansoun a kefinita pwe aramas meinisin repwe manausefan seni ewe mano.

6 Iei mi auchea pwe epwe wor ew ukukun fansoun nefinen ewe fansoun mano me ewe fansoun ewe manausefan.

7 Iwe iei upwe eis met a fis ngeni ekkewe ngunun aramas seni ei fansoun mano ngeni ewe fansoun mi kefinita fan iten ewe manausefan?

8 Iei ika pwe mi wor nap seni ew fansoun a kefinita ren an aramas repwe manausefan ese auchea; pun aramas meinisin rese mano fan ew chok, iwe ei ese auchea; meinisin epwe usun ew chok ran me ren Kot, iwe fansoun chok a keuk ngeni aramas.

9 Iei minne, mi wor ew fansoun a kefinita ngeni aramas pwe repwe manausefan seni ewe mano; me mi wor ew ukukun fansoun nefinen ewe fansoun mano me ewe manausefan. Iwe iei, usun ei ukukun fansoun, met a fis ngeni ngunun aramas ina ewe mettoch minne ua fen achocho ne eis me ren ewe Samon pwe upwe sinei; iwe iei ewe mettoch minne ua sinei.

10 Iwe nupwen ewe fansoun a feito nupwen aramas meinisin repwe manausefan, mwirin repwe sinei pwe Kot mi sinei fansoun meinisin usun minne ra kefinita ngeni aramas.

11 Iei, usun nonnomun ewe ngun nefinen mano me ewe manausefan—Nengeni, a fen pwano ngeniei me ren emon chon nang, pwe ngunun aramas meinisin, mwitir chok ar su seni ei inis mi tongeni mano, ewer, ngunun aramas meinisin, ika pwe repwe öch are ngaw, repwe no ngeni nenier ngeni ena Kot a ngeni ir manau.

12 Iwe mwirin ewe fansoun epwe feito, pwe ngunun ekkewe ir mi tupwon ra ketiwenong non ew nonnomun pwapwa, minne a iteni paratais, ew nonnomun asoso, ew nonnomun kinamwe, ikewe repwe asoso seni ar kewe osukosuk meinisin me seni aurek, me netipechou.

13 Iwe mwirin ewe fansoun epwe feito, pwe ngunun ekkewe aramas mi ngaw, ewer, ekkewe ir mi ngaw—pun nengeni, ese wor rer kinikinin ewe Ngunun ewe Samon; pun nengeni, ra finata angang mi ngaw nap seni öch; iei minne ewe ngunun ewe tefin a tonong non ir, me nemenano imwer kewe—iwe ekkei repwe katuruu non ewe rochopwak nukun; epwe wor kechiw, me puchor, me akkarungi, iwe ei pokiten ar pwisin angangangaw, ra emmwen fetan non fotek me ren mochenin ewe tefin.

14 Iei ei nonnomun ngunun ekkewe aramas mi ngaw, ewer, non rochopwak, me ew nonnomun anoninen, uren nuokus ren ar witiwiti ewe ngetengetin pungochun ningeringerin Kot wor; iei ra nonnom non ei nikinik, usun chok pwan ekkewe mi tupwon non paratais, tori ewe fansoun ar manausefan.

15 Iei, mi wor ekkoch ekkewe ra weweiti pwe ei nikinikin pwapwa me ei nikinikin riaffoun ewe ngun, me mwen ewe manausefan, a wor ew aewin manausefan. Ewer, ua fangeta pwe eni epwe iteni ewe manausefan, ewe manausefanitan ewe ngun me ar ewiis ngeni pwapwa are riaffou, anongonong won ekkewe kapas minne ra fen affateno.

16 Iwe nengeni, a fen affateno sefan, pwe mi wor ew aewin manausefan, ew manausefanin ekkewe ir mi manau akkom, me manau iei, me ekkewe repwe manau, feitiw ngeni ewe manausefanin Kraist seni ewe mano.

17 Iei, sise ekieki pwe ei aewin manausefan, minne a fen affateno usun me non ei napanap, pwe epwe ewe manausefanin ekkewe ngun me ar ewiis ngeni pwapwa are riaffou. Kosap tongeni ekieki pwe epwe iei met wewen.

18 Nengeni, ua apasa ngonuk, Apw; nge a wewen ewe niwinsefanin ewe ngun ngeni ewe inis, ekkewe ir seni ekkewe ranin Adam feitiw ngeni manausefanin Kraist.

19 Iei, ika ngunun me inisin ekkewe ir ra fen affateno repwe niwinsefan non chok ew fansoun, ekkewe aramas mi ngaw usun pwan ekkewe mi tupwon, usap apasa; epwe naf, pwe upwe apasa pwe meinisin repwe feito; are non ekkoch kapas, ar manausefan epwe fis me mwen ewe manausefan an ekkewe ra mano mwirin ewe manausefan an Kraist.

20 Iei, nei anuon, use apasa pwe ar manausefan a fis atun ewe manausefan an Kraist; nge nengeni, ua apasa ren chok ai ekiek, pwe ekkewe ngun me ekkewe inis ra niwinsefan, ngunun me inisin ekkewe mi tupwon, atun ewe manausefan an Kraist, me an we feita ngeni nang.

21 Nge ika epwe atun an we manausefan are mwirin, usap apasa; nge ei ukukun upwe apasa, pwe mi wor ew ukukun neni nefinen mano me ewe manausefanin ewe inis, me ew nikinikin ewe ngun non pwapwa are non riaffou tori ewe fansoun minne a kefinita me ren Kot pwe ekkewe mi mano repwe feito, me repwe niwinsefan, ewe ngun me pwan ewe inis, me emmwenino ne uta me mwen Kot, me repwe kapung anongonong won ar kewe angang.

22 Ewer, ei a efisi ewe niwinsefanin ekkewe mettoch usun minne a fen affateno me ren awen ekkewe soufos.

23 Ewe ngun epwe niwin ngeni ewe inis, me ewe inis ngeni ewe ngun; ewer, iwe poun me pechen meinisin me nekafon chuu repwe niwin ngeni inisir we; ewer, pwan mwo emet metan ewe mokur esap turuno; nge mettoch meinisin repwe niwin ngeni wesewesen me unusochun napanaper.

24 Iwe iei, nei anuon, iei ewe niwinsefan usun minne a fen affateno me ren awen ekkewe soufos—

25 Iwe mwirin ekkewe mi tupwon repwe sarameno me non ewe muun Kot.

26 Nge nengeni, ew anoninenin mano a fis won ekkewe aramas mi ngaw; pun ra mano ren pekin mettoch mi wenechar; pun ra nimengaw, iwe ese wor mettoch mi nimengaw a tongeni muuni ewe muun Kot; nge ra katuruu, me ra ewiis ar repwe angei uwan ar angang are ar foffor, minne ir mi ngaw; me ra unumi ekkewe moromoren apin ew kap mi kipwin.