1 Ut kik’ulman naq ke’xkanab’, ut ke’risi rib’ jun yokb’ rik’ineb’. Ut laj Moroni kixye re laj Tzerahemnah: K’e reetal, at Tzerahemna, naq ink’a’ naqaj wank choq’ winq aj hoyol kik’. Nekenaw naq wankex sa’ quq’, a’b’anan ink’a’ naqaj eekamsinkil.

2 K’e reetal, ink’a’ xoochal chepleetinkil re taaruuq taqahoy eekik’el re xk’ulb’al wankilal; chi moko naqaj xk’amb’al ani junaq sa’ li iiqleb’ re moosil. A’b’anan a’an ajwi’ li na’leb’ xexchal wi’ chiqapleetinkil, relik chi yaal, ut yoo eejosq’il qik’in xb’aan li qapaab’aal.

3 A’b’an anajwan, nekek’e reetal naq li Qaawa’ wan qik’in; ut nekek’e reetal naq a’an xexxq’axtesi sa’ quq’. Anajwan ut tinwaj raj naq teetaw xyaalal naq xb’aanuman a’in qe xb’aan li qapaab’aal, ut xb’aan naq naqapaab’ li Kristo. Ut anajwan nekeril naq ink’a’ naru nekesach li qapaab’aal a’in.

4 Anajwan nekek’e reetal naq a’in lix tz’aqal paab’aal li Dios; relik chi yaal, nekek’e reetal naq li Dios tooxtenq’a, ut tooxk’uula, ut tixkol qix, chiru jo’ najtil tiiko chixpaab’ankil a’an, ut li k’a’ru paab’anb’il qab’aan, ut li paab’aal wanko wi’, ut maajun wa tixkanab’ li Qaawa’ naq toosache’q, ka’ajwi’ wi toot’ane’q sa’ li q’etok aatin ut taqatz’eqtaana li qapaab’aal.

5 Ut anajwan, at Tzerahemnah, nekexintaqla, rik’in lix k’ab’a’ li Dios a’an li numtajenaq xwankil, li xk’e xmetz’ew li quq’ re kiqataw qawankil sa’ eeb’een, sa’ xk’ab’a’ li k’a’ru paab’anb’il qab’aan, sa’ xk’ab’a’ li paab’aal wanko wi’, sa’ xk’ab’a’ li k’anjel nokoloq’onink wi’, ut sa’ xk’ab’a’ li qa-iglees, ut sa’ xk’ab’a’ li santil tenq’ank li teneb’anb’il sa’ qab’een choq’ reheb’ li qixaqil ut li qalal qak’ajol, sa’ xk’ab’a’ li ach’ab’aak li b’ak’b’ilo wi’ rik’in li qach’och’ ut li qatenamit, relik chi yaal, sa’ xk’ab’a’ ajwi’ xxaqab’ankil xwankil lix santil aatin li Dios, li nachal wi’ chixjunil lix sahil li qach’ool; ut sa’ xk’ab’a’ chixjunil li q’axal raaro qab’aan—

6 Relik chi yaal, ut moko chixjunil ta a’in, nekexintaqla sa’ xk’ab’a’ chixjunil lee rajom naq texkanaaq chi yo’yo, naq teeq’axtesi lee k’anjeleb’aal re pleet qe, ut laa’o ink’a’ taqasik’ lee kik’el, taqakol b’an lee yu’am, wi teek’am lee b’e ut ink’a’ chik texchalq chiqapleetinkil.

7 Ut anajwan, wi ink’a’ nekeb’aanu a’in, k’e reetal, wankex sa’ quq’, ut tintaqlaheb’ lin winq naq te’t’ane’q sa’ eeb’een, ut te’xsak’ eetib’el rik’in xtoch’olal li kamk, re naq oso’jenaq texkanaaq; toja’ ut naq taqil ani taawanq xwankil sa’ xb’een li tenamit a’in; relik chi yaal, taqil ani taak’ame’q chi moosil.

8 Ut anajwan kik’ulman naq chirix naq laj Tzerahemna kirab’i li aatin a’in kichal ut kixq’axtesi lix yok’leb’ ch’iich’ ut lix k’onk’ookil ch’iich’, ut roq xtzimaj sa’ ruq’ laj Moroni, ut kixye re: K’e reetal, wahi’ li qak’anjeleb’aal re pleet; taqaq’axtesi eere, a’b’an ink’a’ taqakanab’ qib’ chi ok sa’ jun xaqab’anb’il aatin eerik’in, li naqanaw naq taqaq’et, ut jo’kaneb’ ajwi’ li qalal qak’ajol; a’b’an k’ulumaq li qak’anjeleb’aal re pleet, ut kanab’omaq naq taaruuq too’elq chiru yamyookil ch’och’; wi ut ink’a’, taakanaaq li qayok’leb’ ch’iich’ qik’in, ut too’oso’q malaj ut toonumtaaq.

9 K’ehomaq reetal, laa’o moko reho ta lee paab’aal; ink’a’ naqapaab’ naq a’an li Dios li xkolok chaq eere sa’ quq’; naqapaab’ b’an naq a’an xseeb’al eek’a’uxl li xkolok eere chiru li qayok’leb’ ch’iich’. K’e reetal, a’an lee ramok ch’oolej ut lee ramleb’ li xkolok eere.

10 Ut anajwan chirix naq laj Tzerahemnah kixk’e xraqik xyeeb’al li aatin a’in, laj Moroni kixq’ajsi li yok’leb’ ch’iich’ ut eb’ li k’anjeleb’aal re pleet li kixk’ul chaq, re laj Tzerahemnah, ut kixye: K’e reetal, taqachoy li pleetik.

11 Anajwan ink’a’ naru nawisi li aatin li kinye; jo’kan ut, jo’ naq yo’yo li Qaawa’, moko texxik ta, ka’ajwi’ wi nekex’elk rik’in jun xaqab’anb’il aatin naq ink’a’ texsutq’iiq wi’chik chiqapleetinkil. Anajwan, jo’ wankex sa’ quq’, taqahoy lee kik’el chi ch’och’, malaj ut teek’ulub’a li na’leb’ li kinyeechi’i.

12 Ut anajwan chirix naq kixye laj Moroni li aatin a’in, laj Tzerahemnah kixk’ul lix yok’leb’ ch’iich’, ut kijosq’o’ rik’in laj Moroni, ut kichal sa’ aanil re tixkamsi laj Moroni; a’b’an naq kixtaqsi lix yok’leb’ ch’iich’, k’ehomaq reetal, jun reheb’ laj pleet re laj Moroni kixsak’ li ch’iich’ chi ch’och’, ut kitoqe’ chixk’atq xchapleb’; ut kixsak’ ajwi’ laj Tzerahemnah jo’kan naq kixch’ot xtz’uumal xjolom, li kit’ane’ chi ch’och’. Ut laj Tzerahemnah kirisi rib’ chiruheb’ toj sa’ xyiheb’ laj pleet.

13 Ut kik’ulman naq laj pleet li xaqxo chi nach’, li kich’otok chaq xtz’uumal xjolom laj Tzerahemnah, kixwaklesi chaq chi ch’och’ lix tz’uumal jolomej chirismal, ut kixk’ojob’ sa’ ru’uj lix yok’leb’ ch’iich’, ut kixye’ chiruheb’, ut kixye reheb’ chi kaw xyaab’ xkux:

14 Jo’ chanru ajwi’ naq lix tz’uumal jolomej a’in xt’ane’ chi ch’och’, a’an xtz’uumal xjolom laj taqlahom eere, jo’kan ajwi’ text’ane’q chi ch’och’ laa’ex wi ink’a’ nekeq’axtesi lee k’anjeleb’aal re pleet ut nekexxik rik’in jun sumwank re tuqtuukilal.

15 Anajwan ke’wan naab’al, naq ke’rab’i li aatin a’in ut ke’ril lix tz’uumal jolomej li wan sa’ li yok’leb’ ch’iich’, li ke’chape’ xb’aan xxiw, ut ke’chal naab’al ut ke’xkut lix k’anjeleb’aal re pleet chiroq laj Moroni, ut ke’ok sa’ jun sumwank re tuqtuukilal. Ut jo’ k’ihaleb’ li ke’ok sa’ jun sumwank ke’xkanab’ chi elk chiru li yamyookil ch’och’.

16 Anajwan kik’ulman naq laj Tzerahemnah kichal xjosq’il chi numtajenaq, ut kireek’asiheb’ li jun siir chik reheb’ laj pleet chi josq’o’k, re naq q’axal kaw wi’chik te’xyal ru rik’ineb’ laj Nefita.

17 Ut anajwan laj Moroni kijosq’o’, xb’aan xjipileb’ xch’ool laj Lamanita; jo’kan naq kixtaqla lix tenamit naq te’t’ane’q sa’ xb’eeneb’ ut te’xkamsiheb’. Ut kik’ulman naq ke’ok chixkamsinkileb’; relik chi yaal, ut eb’ laj Lamanita ke’xyal ru rik’ineb’ lix yok’leb’ ch’iich’ ut xnimaleb’ xmetz’ew.

18 A’b’an k’ehomaq reetal, k’utk’u lix t’usulal xtz’uumaleb’ ut xtehelal ru lix jolomeb’, chiru xq’esnaleb’ lix yok’leb’ ch’iich’ laj Nefita; relik chi yaal, k’ehomaq reetal, ke’k’ob’e’ ut ke’sak’e’, relik chi yaal, ut q’axal sa’ junpaat ke’t’ane’ chiruheb’ lix yok’leb’ ch’iich’ laj Nefita; ut ke’ok chi mesuuk chaq, jo’ chanru ajwi’ li profeetil aatin kixye chaq laj pleet re laj Moroni.

19 Anajwan laj Tzerahemnah, naq kiril naq okeb’ re chi sache’k chixjunileb’, kixjap re chi kaw re laj Moroni, ut kixye naq taa’ok sa’ sumwank rik’ineb’ rochb’een ajwi’ lix tenamit, wi te’xkol xyu’ameb’ li jun ch’ol chik, naq maajun wa chik te’chalq chi pleetik rik’ineb’.

20 Ut kik’ulman naq laj Moroni kixtaqla naq taaraqe’q wi’chik li k’anjel re kamsink sa’ xyanqeb’ li tenamit. Ut kixchapeb’ li k’anjeleb’aal re pleet reheb’ laj Lamanita; ut chirix naq ke’ok sa’ jun sumwank re tuqtuukilal rik’in, ke’kanab’aak chi elk chiru li yamyookil ch’och’.

21 Anajwan moko ke’k’ehe’ ta sa’ ajl rajlankileb’ lix kamenaqeb’, xmaak xnimal li rajlankileb’; relik chi yaal, q’axal nim rajlankileb’ lix kamenaqeb’, reheb’ laj Nefita jo’ ajwi’ reheb’ laj Lamanita.

22 Ut kik’ulman naq ke’xkut lix kamenaqeb’ sa’ xha’il Sidon, ut k’amb’ileb’ ut muqb’ileb’ sa’ xchamal li palaw.

23 Ut eb’ li teep aj pleet reheb’ laj Nefita, malaj re laj Moroni, ke’sutq’i ut ke’chal sa’ rochocheb’ ut xch’och’eb’.

24 Ut chi jo’kan kiraqe’ lix waqxaqlaju chihab’ rawa’b’ejileb’ laj raqol aatin sa’ xb’een lix tenamit laj Nefi. Ut chi jo’kan kiraqe’ lix tz’iib’anb’il esil laj Alma, li kitz’iib’aman chiruheb’ lix perel ch’iich’ laj Nefi.