1 Thiab tau muaj tias lawv tau tsum thiab thim ntawm lawv mus ib nyuag ntu. Thiab Maulaunais tau hais rau Xelaheenas tias: Saib seb, Xelaheenas, peb tsis xav ua neeg nyiam tua neeg. Koj paub tias nej nyob hauv peb tes lawm, tiam sis peb tsis xav tua nej.

2 Saib seb, peb tsis tau tuaj ua rog tawm tsam nej xwv kom peb yuav txo nej ntshav nrog kom muaj hwj chim; thiab peb kuj tsis xav coj ib tug twg mus rau kev quab ntawm kev ua qhev. Tiam sis qhov no twb yog qhov uas nej tau tuaj tawm tsam peb ntag; muaj tseeb tiag, thiab nej npau taws rau peb vim yog peb txoj kev teev ntuj.

3 Tiam sis nim no, nej pom tias tus Tswv twb nrog peb; thiab nej pom tias nws twb tau coj nej los rau hauv peb tes lawm. Thiab nim no kuv xav kom nej to taub tias tau muaj li no rau peb los vim yog peb txoj kev teev ntuj thiab peb txoj kev ntseeg ntawm Khetos. Thiab nim no nej pom tias nej tsis muaj peev xwm ua kom peb txoj kev ntseeg no puas tsuaj.

4 Nim no nej pom tias qhov no yog txoj kev ntseeg tseeb ntawm Vajtswv; muaj tseeb tiag, nej pom tias Vajtswv yuav pab cuam, thiab ceev, thiab tswj hwm peb, ntev ib yam li peb yuav ntseeg rau nws, thiab rau peb txoj kev ntseeg, thiab peb txoj kev teev ntuj; thiab tus Tswv yeej yuav tsis cia kom peb raug puas tsuaj li tsuas yog ntshai peb yuav poob mus rau hauv txoj kev txhaum thiab tsis kam lees peb txoj kev ntseeg xwb.

5 Thiab nim no, Xelaheenas, kuv txib koj, los ntawm tus Vajtswv ntawd tus uas muaj hwj chim tag nrho lub npe, tus uas tau txhawb peb lub zog kom peb tau muaj zog dua nej, vim peb txoj kev ntseeg, vim peb txoj kev teev ntuj, thiab vim peb tej kab ke teev tiam, thiab vim peb lub koom txoos, thiab vim txoj hauj lwm dawb huv uas peb tshuav nqi rau peb tej poj niam thiab peb tej me nyuam, vim txoj kev ywj siab ntawd uas khi peb rau peb tej av thiab peb lub teb chaws; muaj tseeb tiag, thiab kuj vim txoj ua raws li Vajtswv txoj lus dawb ceev, uas peb tshuav nqi rau tag nrho peb tej kev zoo siab; thiab vim tag nrho txhua yam uas hlub tshua tshaj plaws rau peb—

6 Muaj tseeb tiag, thiab tsis tas li no xwb; kuv txib koj los ntawm tag nrho tej kev xav tau uas koj muaj rau hauv txoj sia, kom nej cia li muab nej tej cuab yeej ua rog rau peb, thiab peb yuav tsis nrhiav nej tej ntshav, tiam sis peb yuav tseg nej txoj sia, yog tias nej rov mus nej qub lw thiab txhob rov qab tuaj ua rog tawm tsam peb ntxiv lawm.

7 Thiab nim no, yog nej tsis ua li no, saib seb, nej nyob hauv peb tes lawm, thiab kuv yuav txib kuv cov neeg kom lawv tawm tsam nej, thiab ua kom muaj tej qhov txhab tuag nyob hauv nej tej cev, kom nej yuav rais los mus tu noob; thiab thaum ntawd peb yuav ntsia seb leej twg yuav muaj hwj chim kav cov neeg no; muaj tseeb tiag, peb yuav ntsia seb leej twg yuav raug coj mus rau hauv txoj kev ua qhev.

8 Thiab nim no tau muaj tias thaum Xelaheenas tau hnov tej lus hais no nws tau tawm los thiab tau muab nws rab ntaj thiab nws rab liag, thiab nws rab hneev rau hauv Maulaunais tes, thiab tau hais rau nws tias: Saib seb, nov yog peb cov cuab yeej ua rog; peb yuav muab lawv rau nej, tiam sis peb yuav tsis kam cia peb tus kheej lav lus rau nej, qhov uas peb paub tias peb yuav coj tsis tau, thiab peb tej me nyuam los tib yam; tiam sis muab peb tej cuab yeej ua rog mus, thiab cia peb ncaim mus rau hauv hav zoov; tsis li ntawd ces peb yuav ceev peb tej ntaj, thiab peb yuav piam sij los sis yeej xwb.

9 Saib seb, peb tsis yog nyob ntawm nej txoj kev ntseeg; peb tsis ntseeg tias yog Vajtswv tus uas tau coj peb los rau hauv nej tes; tiam sis peb ntseeg tias yog nej txoj kev txawj ntxias uas tau tshwj nej tawm ntawm peb tej ntaj. Saib seb, twb yog nej tej phiaj thaiv hauv siab thiab nej tej phiaj hlau uas tau tshwj nej tseg.

10 Thiab nim no thaum Xelaheenas tau hais cov lus no tas lawm, Maulaunais tau muab rab ntaj thiab tej cuab yeej ua rog, uas nws tau txais, rov rau Xelaheenas, tau hais tias: Saib seb, peb yuav xaus qhov kev ua rog no.

11 Nim no kuv tsis muaj peev xwm sau tej lus uas kuv tau hais lawm rov, yog li ntawd ib yam li tus Tswv muaj sia nyob, nej yuav ncaim mus tsis tau tsuas yog nej yuav ncaim mus nrog ib lo lus lav tseg tias nej yuav tsis rov qab tuaj tawm tsam ua rog rau peb ntxiv lawm. Nim no nej tseem nyob hauv peb tes peb yuav ua kom nej ntshav tshau lug rau hauv av, los sis nej yuav kam ua li tej uas kuv tau hais lawm.

12 Thiab nim no thaum Maulaunais tau hais tej lus no tas, Xelaheenas tau muab nws rab ntaj rov qab, thiab nws tau npau taws rau Maulaunais, thiab nws tau txav zog los xwv kom nws yuav tau muab Maulaunais tua; tiam sis thaum nws tsa hlo nws rab ntaj, saib seb, Maulaunais ib tug tub rog tau ntaus nws poob rau hauv av, thiab rab ntaj tau lov tus ko lawm; thiab nws kuj tau txiav Xelaheenas es nws txiav tau Xelaheenas daim tawv taub hau thiab nws tau poob rau hauv av. Thiab Xelaheenas tau thim ntawm lawv mus rau hauv nruab nrab ntawm nws cov tub rog.

13 Thiab tau muaj tias tus tub rog uas tau sawv ze ntawd, tus uas tau hlais Xelaheenas daim tawv taub hau, tau khaws daim tawv taub hau hauv av tuav cov plaub hau los, thiab tau muab nws tso rau saum nws rab ntsis ntaj, thiab tau muab nws tsa rau lawv, hais ib lub suab nrov nrov rau lawv tias:

14 Tib yam li daim tawv taub hau no uas tau poob rau hauv av, uas yog nej tus thawj daim tawv taub hau, ces nej los yeej yuav vau rau hauv av tib yam li ntawd tsuas yog nej yuav muab nej tej cuab yeej ua rog los thiab ncaim mus nrog txoj kev khi lus ntawm kev thaj yeeb.

15 Nim no tau muaj ntau leej, thaum uas lawv tau hnov tej lus no thiab tau pom daim tawv taub hau uas nyob saum rab ntaj, tau raug ntshai; thiab coob leej tau tawm los thiab tau muab lawv tej cuab yeej ua rog pov rau ntawm Maulaunais ko taw, thiab tau nkag rau hauv ib txoj kev khi lus ntawm kev thaj yeeb. Thiab pes tsawg tus uas tau nkag rau hauv txoj kev cog lus lawv tau cia ncaim mus rau hauv hav zoov.

16 Nim no tau muaj tias Xelaheenas tau npau taws heev, thiab nws tau txhib nws cov tub rog uas tshuav kom npau taws, kom tawm tsam cov Neeg Nifais sib zog tshaj ntxiv.

17 Thiab nim no Maulaunais tau npau taws, vim cov Neeg Lamas tej siab tsis thim xav; yog li ntawd nws tau txib kom nws cov neeg tawm tsam lawv thiab tua lawv. Thiab tau muaj tias lawv tau pib tua lawv; muaj tseeb tiag, thiab cov Neeg Lamas tau tawm tsam nrog lawv tej ntaj thiab lawv tej zog.

18 Tiam sis saib seb, lawv tej tawv liab qab thiab lawv tej taub hau do qhib lug rau cov Neeg Nifais tej ntaj ntse; muaj tseeb tiag, saib seb lawv tau raug hno thiab raug tua, muaj tseeb tiag, thiab tau qaug vau sai heev los ntawm cov Neeg Nifais tej ntaj; thiab lawv tau pib qaug ntau zuj zus, zoo ib yam li Maulaunais tus tub rog tau qhia tias yuav muaj lawm.

19 Nim no Xelaheenas, thaum nws pom lawm tias lawv sawv daws twb yuav puas tsuaj tas, tau qw nrov nrov rau Maulaunais, cog lus tias nws thiab nws cov neeg yuav khi lus nrog lawv, yog lawv yuav tseg lawv cov uas seem tshuav txoj sia, tias lawv yuav tsis tuaj ua rog tawm tsam lawv ib zaug ntxiv lawm.

20 Thiab tau muaj tias Maulaunais tau kom txoj hauj lwm ntawm kev tuag tsum nyob hauv cov neeg. Thiab nws tau muab tej cuab yeej ua rog ntawm cov Neeg Lamas; thiab tom qab uas lawv tau nkag rau hauv ib txoj kev khi lus ntawm kev kaj siab lug nrog nws lawm lawv tau raug tso ncaim mus rau hauv hav zoov.

21 Nim no lawv cov neeg tuag tsis tau muab suav vim yog muaj coob leej heev; muaj tseeb tiag, lawv cov neeg tuag tau muaj coob leej heev, ntawm cov Neeg Nifais thiab ntawm cov Neeg Lamas ob tog huv si.

22 Thiab tau muaj tias lawv tau muab lawv cov neeg tuag pov rau hauv cov dej Xidoos, thiab lawv tau tog mus thiab faus rau hauv dej hiav txwv tob.

23 Thiab cov Neeg Nifais cov tub rog, los sis Maulaunais cov, tau rov qab thiab tau los rau lawv tej vaj tse thiab lawv tej av.

24 Thiab li no tau xaus xyoo thib kaum yim ntawm cov neeg txiav txim txoj kev kav cov Neeg Nifais. Thiab li no tau kawg Amas phau ceev xwm txheej, uas tau raug muab sau rau saum Nifais cov phiaj.