1 Ut kik’ulman naq jo’ k’ihaleb’ ink’a’ ke’raj ab’ink chiru li raatin laj Helaman ut eb’ lix komon ke’ch’utla re xpleetinkileb’ li ras riitz’in.

2 Ut anajwan k’ehomaq reetal, numtajenaqeb’ xjosq’il, jo’kan naq k’eek’ookeb’ xch’ool chixkamsinkileb’.

3 Anajwan li najolomin reheb’ li yookeb’ xjosq’il rik’ineb’ li ras riitz’in a’an jun li winq nim ut kaw rib’; ut aj Amalikiah xk’ab’a’.

4 Ut laj Amalikiah kirataw wank choq’ rey, ut eb’ li tenamit a’an li yookeb’ ajwi’ xjosq’il ke’raj naq a’an taawanq choq’ xreyeb’; ut a’aneb’ xk’ihaleb’ a’an laj raqol aatin re li ch’och’ li kub’enaqeb’ xwankil, ut yookeb’ chixsik’b’al wankilal.

5 Ut k’amb’ileb’ xb’aan lix sahil aatin laj Amalikiah, naq wi te’xtenq’a a’an, ut te’xxaqab’ re taawanq choq’ rey, a’an tixk’eheb’ choq’ aj taqlanel sa’ xb’een li tenamit.

6 Chi jo’kan ke’jalb’ehiik xb’aan laj Amalikiah re xjachb’al rib’eb’, us ta ke’jultikan chaq aatin laj Helaman ut eb’ lix komon, relik chi yaal, us ta q’axal k’eeb’ileb’ xch’ool chixk’aak’alenkil li iglees, xb’aan naq wankeb’ choq’ taqenaqil aj tij sa’ xb’een li iglees.

7 Ut wankeb’ naab’al sa’ li iglees li ke’paab’ank re lix sahil aatin laj Amalikiah, jo’kan naq ke’risi rib’ rik’in ajwi’ li iglees; ut chi jo’kan q’axal ch’a’aj ut xiwxiw li yoo chaq chi uxmank sa’ lix tenamit laj Nefi, us ta q’axal nim li numtaak ke’xq’axeb’ wi’ ru laj Lamanita, ut li nimla saho’k kiwan chaq sa’ xch’ooleb’ xb’aan naq ke’kole’ chaq xb’aan ruq’ li Qaawa’.

8 Chi jo’kan naqil chan ru xseeb’al naq eb’ li ralal xk’ajol li winq neke’sach sa’ xch’ool li Qaawa’ lix Dios, relik chi yaal, chan ru naq seeb’eb’ chixb’aanunkil li maa’usilal, ut chi jalb’ehiik xb’aan li maa’us.

9 Relik chi yaal, ut naqil ajwi’ li nimla maa’usilal jun li winq q’axal aj maak naru naxk’e chi uxmank sa’ xyanqeb’ li ralal xk’ajoleb’ li winq.

10 Relik chi yaal, naqil naq laj Amalikiah, rik’in naq a’an jun winq seeb’ xk’oxlahom ut jun winq re k’iila sahil aatin, naq kixjalb’ehiheb’ xch’ool naab’al li tenamit re xb’aanunkil li maa’usilal; relik chi yaal, ut re xsik’b’al xsachb’al lix iglees li Dios, ut xsachb’al xk’ojob’ankil li ach’ab’aak li kixk’e chaq li Dios reheb’; malaj ut a’an li osob’tesink kixtaqla chaq li Dios chiru lix b’een li ch’och’, choq’ reheb’ li tiikeb’ xch’ool.

11 Ut anajwan kik’ulman naq chirix naq laj Moroni, li kiwan choq’ xb’eenil aj taqlanel reheb’ li teep aj pleet reheb’ laj Nefita, kirab’i resil li jachok-ib’ a’in, kijosq’o’ rik’in laj Amalikiah.

12 Ut kik’ulman naq kixpej lix b’aatal; ut kixchap jun pejel, ut kixtz’iib’a chiru—Re xjultikankil qe li qaDios, li qapaab’aal, ut li ach’ab’aak wanko wi’, ut li qatuqtuukilal, li qixaqil, ut li qakok’al—ut kixb’ak’ sa’ ru’uj jun li b’arb’ookil che’.

13 Ut kixb’ak’ lix ramb’al xjolom chirix, ut lix ramb’al ru xch’ool, ut eb’ lix ramleb’, ut kixb’at lix kolb’a-ib’ aq’ chirix xyiitoq; ut kixchap li b’arb’ookil che’, wan wi’ chi ru’uj lix pejb’il b’aatal, (ut a’an li eetalil re ach’ab’aak kixye re) ut kixkub’si rib’ chi ch’och’, ut kitijok chi anchal xmetz’ew chiru li Dios re taakanaaq rosob’tesihom li ach’ab’aak sa’ xb’eeneb’ li ras riitz’in, chiru jo’ najtil taakanaaq jun ch’uutaqeb’ li Kristiano chireechaninkil li ch’och’—

14 Xb’aan naq jo’ka’in naq chixjunileb’ li tz’aqal neke’paab’ank re li Kristo, li neke’wan sa’ lix iglees li Dios, neke’yehe’ re xb’aaneb’ li moko wankeb’ ta sa’ li iglees.

15 Ut eb’ li neke’wan sa’ li iglees tiikeb’ chi paab’ank; relik chi yaal, chixjunileb’ li tz’aqal neke’paab’ank re li Kristo ke’xk’ul sa’ xb’eeneb’, chi saheb’ sa’ xch’ool, lix k’ab’a’ li Kristo, malaj ut aj Kristiano jo’ yeeb’ileb’ re, sa’ xk’ab’a’ naq neke’xpaab’ li Kristo li taak’ulunq.

16 Ut chi jo’kan, sa’ li kutan a’in, laj Moroni kixtz’aama rik’in tijok naq lix na’leb’eb’ laj Kristiano, ut li ach’ab’aak wan wi’ li ch’och’, taa’usilaaq.

17 Ut kik’ulman naq chirix naq kixhoy li raam chiru li Dios, kixk’ab’a’i chixjunil li ch’och’ li wan chirix li ch’och’ Sachenaqil sa’ xtz’e li saq’e, relik chi yaal, malaj ut chixjunil li ch’och’, sa’ xnim li saq’e jo’ ajwi’ sa’ xtz’e—Jun sik’b’il ru ch’och’, ut li ch’och’ re ach’ab’aak.

18 Ut kixye: Relik chi yaal naq li Dios ink’a’ tixkanab’ naq laa’o, li xik’ ilb’ilo xb’aan naq xqak’ul sa’ qab’een lix k’ab’a’ li Kristo, tooyeq’iiq ut toosache’q, toj reetal naq taqak’am chaq sa’ qab’een rik’in li q’etok aatin naqab’aanu.

19 Ut chirix naq laj Moroni kixye li aatin a’in, xko’o sa’ xyanqeb’ li tenamit, yoo chireek’asinkil sa’ iq’ li jun pejel re li raq’, re naq chixjunil te’ril li tz’iib’anb’il aatin li kixtz’iib’a chaq chiru lix pejelil, ut yoo chixjapb’al re chi kaw xyaab’ xkux, chixyeeb’al:

20 K’ehomaq reetal, ani te’xaqab’anq re li eetalil a’in sa’ xb’een li ch’och’, che’chalq rik’in lix metz’ew li Qaawa’, ut che’ok sa’ jun sumwank naq te’xxaqab’ xwankil li k’a’ru xk’ulub’eb’, ut li paab’aal wankeb’ wi’, re naq li Qaawa’ Dios taarosob’tesiheb’.

21 Ut kik’ulman naq chirix naq laj Moroni kixch’olob’ li aatin a’in, k’ehomaq reetal, eb’ li tenamit ke’ch’utla sa’ aanil, chi b’atb’o lix kolb’a-ib’ aq’ chirix xyiitoqeb’, ut ke’xpej li raq’eb’ choq’ reetalil, malaj choq’ sumwank, naq ink’a’ te’xtz’eqtaana li Qaawa’ lix Dios; malaj ut, sa’ jalan chik aatin, wi te’xq’et lix taqlahom li Dios, malaj te’t’ane’q sa’ li q’etok aatin, ut te’xutaanaq xk’ulb’al sa’ xb’eeneb’ lix k’ab’a’ li Kristo, li Qaawa’ tixpejeb’ jo’ chanru ajwi’ ke’xpej chaq li raq’eb’.

22 Anajwan a’in li sumwank li ke’xk’uub’, ut ke’xkut li raq’ chiroq laj Moroni, ut ke’xye: Noko’ok sa’ sumwank rik’in li qaDios, naq toosache’q, jo’ chanruheb’ li qas qiitz’in sa’ li ch’och’ sa’ xjayal lix nim li saq’e, wi toot’ane’q sa’ li q’etok aatin; relik chi yaal, a’an naru tooxkut chiroqeb’ li xik’ neke’ilok qe, jo’ chanru ajwi’ naq xqakut li qaq’ chawoq re te’yeq’iiq rub’el oqej, wi toot’ane’q sa’ li q’etok aatin.

23 Laj Moroni kixye reheb’: K’ehomaq reetal, laa’o jun rela’ li riyajil laj Jakob; relik chi yaal, laa’o jun rela’ li riyajil laj Jose, li kipejiik xb’aatal xb’aaneb’ li ras sa’ k’iila jachal; relik chi yaal, ut anajwan k’ehomaq reetal, chijultiko’q qe naq taqapaab’ lix taqlahom li Dios, malaj ut taapejiiq li qaq’ xb’aaneb’ li qas qiitz’in, ut tootz’ape’q sa’ tz’alam, malaj ut took’ayiiq, malaj ut tookamsiiq.

24 Relik chi yaal, chiqakol rix li ach’ab’aak wanko wi’ jo’ rela’ laj Jose; relik chi yaal, chijultiko’q qe li raatin laj Jakob, rub’elaj chaq xkamik, xb’aan naq k’ehomaq reetal, a’an kiril naq jun raqal li rela’ lix b’aatal laj Jose kikole’ rix ut ink’a’ kiq’a. Ut kixye—Jo’ chanru naq li jun raqal a’in re li raq’ li walal kikole’ rix, jo’kan ajwi’ jun rela’ li riyajil li walal taakole’q rix xb’aan ruq’ li Dios, ut taak’ame’q rik’in a’an, a’ut li jun ch’ol chik li riyajil laj Jose taa’oso’q, jo’ chanru li rela’ li raq’.

25 Anajwan k’ehomaq reetal, naraho’ li waam xb’aan a’in; a’b’anan li waam nasaho’ rik’in li walal, xb’aan li jun raqal re li riyajil li taak’ame’q rik’in li Dios.

26 Anajwan k’ehomaq reetal, a’in raatin chaq laj Jakob.

27 Anajwan ut, ani nanawok re ma maawa’ li rela’ li riyajil laj Jose, li taa’oso’q jo’ li raq’, eb’ li ani ke’risi rib’ qik’in? Relik chi yaal, ut laa’aqo ajwi’ laa’o wi moko xaqxooko ta chi kaw sa’ xpaab’ankil li Kristo.

28 Ut anajwan kik’ulman naq chirix naq laj Moroni kixye li aatin a’in xko’o, ut kixtaqla ajwi’ xyeeb’al sa’ chixjunil li jar raqal re li ch’och’ ke’wan wi’ li jachok-ib’, ut kixch’utub’eb’ chixjunil li tenamit li ke’ajok re xk’uulankil li ach’ab’aak wankeb’ wi’, re te’xxaqab’ rib’ chiru laj Amalikiah ut eb’ li ke’risi chaq rib’, a’aneb’ aj Amalikiahita nayeeman reheb’.

29 Ut kik’ulman, naq kiril laj Amalikiah naq eb’ lix tenamit laj Moroni k’iheb’ wi’chik chiruheb’ laj Amalikiahita—ut kiril ajwi’ naq eb’ lix tenamit wiib’eb’ xch’ool chirix lix tiikal ru li na’leb’ ke’ok wi’ chaq—jo’kan ut, rik’in naq naxxuwa naq ink’a’ taaq’axoq-u sa’ li na’leb’ a’an, kixk’am chirix li ani re lix tenamit ke’ajok re xik, ut xko’o sa’ li ch’och’ Nefi.

30 Anajwan laj Moroni kixk’oxla naq moko na’ajman ta naq eb’ laj Lamanita te’xk’ul chik xmetz’eweb’; jo’kan naq kixk’oxla xramb’al ru lix tenamit laj Amalikiah, malaj xk’amb’aleb’ chaq wi’chik, ut xk’eeb’al chi kamk laj Amalikiah; relik chi yaal, xb’aan naq kixnaw naq a’an taareek’asiheb’ laj Lamanita chi josq’o’k rik’ineb’, ut tixk’eheb’ chi chalk re xpleetinkileb’; ut a’in kixnaw naq tixb’aanu laj Amalikiah re taaruuq tixtaw li k’a’ru naraj.

31 Jo’kan naq laj Moroni kixk’oxla naq aajel ru naq tixk’ameb’ lix teep aj pleet, li ke’xch’utub’ chaq rib’, ut ke’xchap xk’anjeleb’aal re pleet, ut ke’ok sa’ jun sumwank re xk’uulankil li tuqtuukilal—ut kik’ulman naq kixk’am lix teep aj pleet chirix, ut koxb’eeq rik’ineb’ lix muheb’aal t’ikr chiru li yamyookil ch’och’, re xramb’al xb’e laj Amalikiah sa’ li yamyookil ch’och’.

32 Ut kik’ulman naq kixb’aanu jo’ chanru li kiraj, ut koxb’eeq chiru li yamyookil ch’och’, ut kixrameb’ li teep aj pleet re laj Amalikiah.

33 Ut kik’ulman naq laj Amalikiah ki’eelelik rochb’een junjunq reheb’ lix winq, ut li jun ch’ol chik ke’q’axtesiik sa’ ruq’ laj Moroni ut ke’k’ame’ wi’chik sa’ li ch’och’ Tzarahemla.

34 Anajwan, laj Moroni, rik’in naq a’an jun winq xaqab’anb’il xb’aaneb’ li xb’eenil aj raqol aatin ut lix yaab’ xkux li tenamit, jo’kan naq kiwan xwankil jo’ chanru naraj rik’in li teep aj pleet reheb’ laj Nefita, re tixxaqab’eb’ xwankil ut tixk’anjela li wankilal sa’ xb’eeneb’.

35 Ut kik’ulman naq yalaq ani reheb’ laj Amalikiahita li ink’a’ kiraj ok sa’ jun sumwank naq tixxaqab’ li na’leb’ chirix li ach’ab’aak, re te’xxaqab’ jun xjolomil tenamit li ach’ab’anb’il, kixk’eheb’ chi kamsiik, ut moko k’iheb’ ta li ke’tz’eqtaanank re li sumwank re ach’ab’aak.

36 Ut kik’ulman ajwi’, naq kixtaqla xtaqsinkil li eetalil re ach’ab’aak sa’ xb’een li junjunq chi najt xteramil kab’l li wan sa’ chixjunil li ch’och’, li eechaninb’il xb’aaneb’ laj Nefita; ut chi jo’kan laj Moroni kixxaqab’ li xaqxookil eetalil re ach’ab’aak sa’ xyanqeb’ laj Nefita.

37 Ut ke’ok chi wank wi’chik sa’ tuqtuukilal sa’ li ch’och’; ut chi jo’kan ke’xk’uula li tuqtuukilal sa’ li ch’och’ toj ka’ch’in chik ma naraqe’ li xb’elelaju chihab’ rawa’b’ejileb’ laj raqol aatin.

38 Ut laj Helaman ut eb’ li taqenaqil aj tij ke’xk’uula ajwi’ xtusam li iglees; relik chi yaal, chiru ajwi’ xnumik kaahib’ chihab’ naab’al li tuqtuukilal ut saho’k ch’oolej ke’wan wi’ sa’ li iglees.

39 Ut kik’ulman naq ke’wan naab’al li ke’kam, chi kaweb’ xch’ool chixpaab’ankil naq tojb’il rix li raameb’ xb’aan li Qaawa’ Jesukristo; chi jo’kan ke’el chaq sa’ li ruchich’och’ rik’in saho’k sa’ xch’ooleb’.

40 Ut ke’wan naab’al li ke’kam rik’in li tiq, li nawan chi kok’ aj xsa’ sa’ li ch’och’ chiru jarub’aq kutan chiru li chihab’—a’b’anan ink’a’ chi naab’al rik’in li tiq, xb’aan xchaab’ilal xwankileb’ li k’iila q’een ut xe’ kixkawresi li Dios re risinkil li neke’chal wi’ li yajel, li neke’chal sa’ xb’eeneb’ li winq xb’aan li nak’ulman rik’in xjalanik li kutan—

41 A’b’an ke’wan naab’al li ke’kam xb’aan tiixilal; ut eb’ li ke’kam sa’ xpaab’ankil li Kristo saheb’ sa’ xch’ool rik’in a’an, jo’ tento taqak’oxla.