1 Im kiiō, ālikin men kein ilo wōt iien eo Amalikaia eaar bōk aelōn̄ in kiin̄ eo eaar jino kōketak būruōn riLeman ro ņae armej in Nipai; aaet, eaar jitōn̄ em̧m̧aan ro n̄an kōnono n̄an riLeman ro jān im̧ōn bar ko aer, ņae riNipai ro.

2 Im āindein eaar kōketak burueer ņae riNipai ro, jon̄an ilo jem̧ļo̧kinļo̧k iiō eo kein kajon̄oulruwatimjuon in iien tōl an riekajet ro, e kōnke eaar tōpar kōttōbalbal ko an n̄an iien eo, aaet, kōnke eaar kiin̄ ioon riLeman ro, eaar kappukot barāinwōt n̄an irooj ioon aolepān āneo, aaet, im aolep armej ro raar pād ilo āneo, riNipai im barāinwōt riLeman.

3 Kōn menin eaar tōpar kōttōbalbal ko an, bwe eaar kapenļo̧k būruōn riLeman ro im kapilōk koļmānļo̧kijeņ ko aer, im kalim̧otak er n̄an illu, jon̄an eaar kobaikļo̧k ippān doon juon jarin pata n̄an ilo̧k n̄an kōpata ņae riNipai ro.

4 Bwe eaar pen būruōn, kōnke an kanooj ļap oran armej ro an, n̄an anjo̧ ioon riNipai ro im bōkļo̧k er n̄an ineen kōm̧akoko.

5 Im āindein eaar jitōn̄ kapen utiej ro jān riZoram ro, kōnke raar ļaptata aer meļeļe kōn kajoor eo an riNipai ro, im jikin ko aer reppen, im m̧ōttan ko rem̧ōjņo̧tata ilo jikin kwelo̧k ko aer; kōn menin eaar jitōn̄ er n̄an kapen utiej ro ioon jarin tariņae ko an.

6 Im ālikin men kein raar bōk kāām eo aer, im em̧m̧akūt m̧aanļo̧k n̄an āneen Zaraemla ilo āne jem̧aden eo.

7 Kiiō ālikin men kein ilo iien eo ke Amalikaia eaar āindein bōk kajoor jān m̧oņ im riab, Moronai, ilo wāween eo juon, eaar kōpooj koļmānļo̧kijeņ ko an armej ro n̄an m̧ool n̄an Irooj aer Anij.

8 Aaet, eaar kōkajoorļo̧k jarin tariņae ko an riNipai ro, im kajutak me ko reddik, ak jikin likōpejn̄ak ko; jolōn̄ļo̧k kappe in bwidej ko ipeļaakin ijo n̄an jepooļe jarin tariņae ko an, im barāinwōt kalōki wōrwōr ko in dekā n̄an kapooļe peļaakier, ipeļaakin jikin kwelo̧k ko aer, im tōrerein ko an āneo āneer; aaet, jepooļe aolep peļaakin āneo.

9 Im ilo me in tariņae ko rem̧ōjņo̧tata aer eaar likūt elōn̄ļo̧k oran em̧m̧aan; im āindein eaar kapene im kōkajoorļo̧k āneo riNipai ro raar bōke.

10 Im āindein eaar kōppojak n̄an rejetake anemkwōj eo aer, bwidej ko aer, kōrā ro pāleer, im ro nejier, im aer aenōm̧m̧an, im bwe ren maron̄ mour n̄an irooj aer Anij, im bwe ren maron̄ dāpij ta eo kar ņa etan jān rikōjdat ro aer em̧m̧akūt an riKristian.

11 Im Moronai eaar juon em̧m̧aan ekajoor im pen; eaar juon armej in meļeļe eweeppān; aaet, juon em̧m̧aan eo eaar jab itok-limo ilo kōto̧o̧rļo̧k bōtōktōk; juon armej eo jetōb eo an eaar m̧ōņōņō ilo anemkwōj im kōtļo̧k in laļ eo an, im ro jein im jatin jān lokjak im kōm̧akoko.

12 Aaet, juon em̧m̧aan eo būruōn eaar jiōbļo̧k kōn kam̧m̧oolol n̄an an Anij, kōn elōn̄ jim̧we ko im jeraam̧m̧an ko Eaar likūt ioon armej ro An; juon em̧m̧aan eo eaar jerbal otem jerbal n̄an em̧m̧anļo̧k im jokane an armej ro an.

13 Aaet, im eaar juon em̧m̧aan eo eaar pen ilo tōmak ilo Kraist, im eaar kallim̧ur kōn juon kanejnej n̄an jojomar kōn armej ro an, jim̧we ko an, im laļ eo an, im tōmak eo an, em̧ool n̄an jako in bōtōktōkin.

14 Kiiō riNipai ro kar katakin er n̄an jojomar kōn er make ņae rikōjdat ro aer, em̧ool n̄an kōto̧o̧rļo̧k in bōtōktōk eļan̄n̄e eaar mennin aikuj; aaet, im kar barāinwōt katakin er n̄an jamin kar leļo̧k juon ļōkatip, aaet, ren jamin kotak jāje eo ijello̧kun wōt n̄e ej ņae juon rikōjdat, ijello̧kun wōt n̄e eaar n̄an oņaake mour ko aer.

15 Im en̄in eaar aer tōmak, bwe jen kōm̧m̧an āinwōt Anij Enaaj kōjeraam̧m̧an er ilo āneo, ak ilo bar jet naan, eļan̄n̄e renaaj kar tiljek ilo kōjparok kien ko an Anij bwe Enaaj kar kōjeraam̧m̧an er ilo āneo; aaet, kakkōl er n̄an ko, ak n̄an pojak n̄an tariņae, ekkar n̄an kauwōtata eo aer.

16 Im barāinwōt, bwe Anij en kar kwaļo̧kļo̧k n̄an er ia rej aikuj ilo̧k ie n̄an jojomar kōn er make ņae rikōjdat ro aer, im jen kōm̧m̧an āinwōt, Irooj Enaaj lo̧mo̧o̧ren er; im en̄in eaar tōmak eo an Moronai, im būruōn eaar m̧ōņōņō ilo e; jaab ilo kōto̧o̧rļo̧k bōtōktōk ak ilo kōm̧m̧an em̧m̧an, ilo oņaake armej ro an, aaet, ilo kōjparok kien ko an Anij, aaet, im jum̧ae nana.

17 Aaet, em̧ool, em̧ool ij ba n̄an kom̧, eļan̄n̄e aolep armej rekar, im raar, im renaaj kar, āinwōt Moronai, lo, lukkuun kajoor ko an hell renaaj kar idikdik indeeo; aaet, devil enaaj kar ejjeļo̧k an kajoor ioon būruōn ro nejin armej.

18 Lo, eaar juon em̧m̧aan āinwōt Ammōn, ļeo nejin Mosaia, aaet, im em̧ool ļōm̧aro jet nejin Mosaia, aaet, im barāinwōt Alma im ļōm̧aro nejin, bwe rekar aolep armej in Anij.

19 Kiiō lo, Hilamōn im ļōm̧aro jein im jatin rekar jab dikļo̧k ijo kuņaer n̄an armej ro jān Moronai; bwe rekar kwaļo̧k naan eo an Anij, im rekar peptaij n̄an ukeļo̧k aolep armej ro rekar eo̧ron̄ naan ko aer.

20 Im āindein raar wōnm̧aanļo̧k, im armej ro raar kōttāik er kōnke naan ko aer, jon̄an raar kanooj lo jouj an Irooj, im āindein raar rōļo̧k jān tariņae ko im aitwerōk ko ilubwiljier, aaet, em̧ool ium̧win tōrean eo emān iiō aetokan.

21 A, āinwōt iaar ba, ilo jem̧ļo̧kinļo̧k iiō eo kein kajon̄oulruwatimjuon, aaet, mekarta aenōm̧m̧an eo aer ilubwiljier make, raar m̧akoko in kar kipel er n̄an jum̧ae ro jeir im jatier, riLeman ro.

22 Aaet, im ilo tukaduin, tariņae ko aer rekar jab jem̧ļo̧k ium̧win elōn̄ iiō ko ippān riLeman ro, mekarta jon̄an m̧akoko eo aer eļap.

23 Kiiō, raar būrom̧ōj n̄an kotak kein tariņae ņae riLeman ro, kōnke raar jab m̧ōņōņō ilo kōto̧o̧rļo̧k bōtōktōk; aaet, im ejjab aolepān in—raar būrom̧ōj bwe ren wāween eo n̄an jilkinļo̧k elōn̄ ro jeir im jatier jān laļ in n̄an laļ eo ejjeļo̧k jem̧ļo̧kin, jab pojak n̄an iioon aer Anij.

24 Mekarta, rej jamin kar kōtļo̧k n̄an likūt mour ko aer, bwe kōrā ro pāleer im ro nejier ren kar to̧o̧re er jān lāj eawiia an ro rekar juon iien jeir im jatier, aaet, im kar jepelļo̧k jān kabun̄ eo aer, im kar likūt er im kar ilo̧k n̄an ko̧kkure er jān kobaļo̧k ippān riLeman ro.

25 Aaet, raar jab maron̄ ineek bwe ro jeir im jatier ren m̧ōņōņō ioon bōtōktōkin riNipai ro, toun wōt an wōr jet ro rej aikuj kōjparok kien ko an Anij, bwe kallim̧ur eo an Irooj eaar, eļan̄n̄e renaaj kōjparok kien ko renaaj jeraam̧m̧an ilo āneo.