1 Thiab nim no tau muaj tias, sai sai txij kiag thaum uas Amalikhaiyas tau los ua vaj ntxwv kav lawm nws tau pib tshoov cov Neeg Lamas tej siab tawm tsam Nifais cov neeg; muaj tseeb tiag, nws tau tsa neeg mus nyob saum lawv tej pej thuam hais lus nkaug cov Neeg Nifais rau cov Neeg Lamas.

2 Thiab li no nws tau tshum lawv tej siab nkaug cov Neeg Nifais, kawg tias thaum yuav kawg ntawm xyoo thib kaum cuaj ntawm cov neeg txiav txim txoj kev kav, nws tau ua tau li nws siab xav los txog li no, muaj tseeb tiag, tau raug muab ua vaj ntxwv kav cov Neeg Lamas, nws kuj tau nrhiav kav tag nrho tej thaj av, muaj tseeb tiag, thiab kav tag nrho cov neeg sawv daws uas nyob hauv thaj av, cov Neeg Nifais thiab cov Neeg Lamas.

3 Yog li ntawd nws tau ua tau li nws siab xav, vim nws tau ua kom cov Neeg Lamas siab tawv thiab ua kom lawv tej siab dig, thiab tau txhib lawv kom npau taws, kawg tias thaum kawg nws tau sau tau neeg coob heev mus ua rog tawm tsam cov Neeg Nifais.

4 Vim nws tau xav, kov kom yeej cov Neeg Nifais thiab coj lawv los mus ua qhev, vim nws muaj neeg coob heev kawg nkaus li.

5 Thiab li no nws tau tsa cov Neeg Xaulas ua thawj nom peb, vim lawv yog cov uas paub txog cov Neeg Nifais lub zog zoo, thiab lawv tej chaw muab siav thiab tej chaw uas tsis muaj zog tshaj ntawm lawv tej nroog; yog li ntawd nws tau tsa lawv los ua tej thawj nom peb kav nws cov tub rog.

6 Thiab tau muaj tias lawv tau coj lawv tej khoom siv, thiab tau txav tawm mus rau tom thaj av Xalahelas nyob hauv hav zoov.

7 Nim no tau muaj tias lub sij hawm uas Amalikhaiyas tau tab tom ua kom tau hwj chim li no los ntawm txoj kev dag thiab ntxias, Maulaunais, ho tab tom npaj cov neeg tej siab kom ntseeg tus Tswv lawv tus Vajtswv.

8 Muaj tseeb tiag, nws tau tab tom txhawb cov Neeg Nifais cov tub rog kom muaj zog, thiab tab tom tsa ua tej me nyuam yeej, los sis tej qhov chaw muab siav; khawb kwj av ncig thaiv nws cov tub rog, thiab kuj tau puab phab ntsa pob zeb vij lawv, ua voj voog ncig lawv tej nroog thiab ncig lawv tej ciam av; muaj tseeb tiag, ncig tag nrho thaj av.

9 Thiab nws tau tso neeg coob dua rau hauv lawv tej chaw tiv thaiv uas tsis muaj zog tshaj; thiab li no nws tau ua kom thaj av uas cov Neeg Nifais nyob muaj dag thiab muaj zog tuaj.

10 Thiab li no nws tau npaj tiv thaiv lawv txoj kev ywj siab, lawv tej av, lawv tej poj niam, thiab lawv tej me nyuam, thiab lawv txoj kev nyab xeeb, thiab xwv kom lawv yuav tau ua neej pub rau tus Tswv lawv tus Vajtswv, thiab kom lawv yuav tswj tuav tau tej uas raug hu los ntawm lawv tej yeeb ncuab hais tias yog txoj kev ntseeg ntawm cov neeg Khetos.

11 Thiab Maulaunais yog ib tug neeg muaj zog thiaj muaj hwj chim; nws yog ib tug neeg uas muaj kev to taub zoo kawg nkaus li; muaj tseeb tiag, ib tug neeg uas tsis nyiam nqaij ntuag ntshav nrog; ib tug neeg uas xyiv fab rau kev ywj siab thiab kev ywj pheej ntawm nws lub teb chaws, thiab nws cov kwv tij dim ntawm txoj kev raug txim thiab ua qhev;

12 Muaj tseeb tiag, ib tug neeg uas muaj lub siab puv npo ua nws tus Vajtswv tsaug, rau ntau yam kev ua tau thiab tej koob hmoov uas nws tau muab rau nws cov neeg; ib tug neeg uas ua hauj lwm hnyav heev rau nws cov neeg txoj kev noj qab haus huv thiab txoj kev tsis muaj teeb meem dab tsi.

13 Muaj tseeb tiag, thiab nws yog ib tug neeg uas nyob ruaj nrees hauv txoj kev ntseeg Khetos, thiab nws tau khi ib lo lus los tiv thaiv nws cov neeg, nws tej kev muaj cai, thiab nws lub teb chaws, thiab nws txoj kev teev ntuj, mus txog thaum xiam nws tej ntshav.

14 Nim no cov Neeg Nifais tau raug qhia kom tiv thaiv lawv tus kheej ntawm lawv tej yeeb ncuab, txawm tias nqaij yuav ntuag ntshav yuav nrog yog nws xav tau lawm; muaj tseeb tiag, thiab lawv kuj tau raug qhia kom tsis txhob ua siab lwm tus, muaj tseeb tiag, thiab tsis txhob tsa rab ntaj tsuas yog tsa tawm tsam yeeb ncuab xwb, tsuas yog cia tshwj lawv txoj sia xwb.

15 Thiab qhov no yog lawv txoj kev ntseeg, tias los ntawm txoj kev ua li no Vajtswv yuav ua kom lawv vam meej nyob rau hauv thaj av, los sis ua lwm yam lus hais, yog lawv muaj kev ntseeg coj ntsoov Vajtswv tej lus txib ces nws yuav ua kom lawv vam meej nyob hauv thaj av; muaj tseeb tiag, ceeb toom kom lawv khiav, los sis kom npaj ua rog, raws li lawv tej kev muaj xwm;

16 Thiab uas, Vajtswv kuj yuav ua rau lawv paub qhov uas tsim nyog lawv yuav mus tiv thaiv tawm tsam lawv tej yeeb ncuab, thiab los ntawm txoj kev ua li no, tus Tswv yuav coj lawv; thiab qhov no yog Maulaunais txoj kev ntseeg, thiab nws lub siab tau zoo siab heev rau qhov ntawd; tsis yog nyob hauv txoj kev nqaij ntuag ntshav nrog tiam sis nyob hauv txoj kev ua zoo, nyob hauv txoj kev tshwj nws cov neeg, muaj tseeb tiag, nyob hauv txoj kev coj ntsoov Vajtswv tej lus txib, muaj tseeb tiag, thiab tiv thaiv txoj kev tsis ncaj.

17 Muaj tseeb tiag, tseeb tiag, kuv hais tseeb rau nej tias, yog tag nrho tej neeg ua nyob tas los lawm, thiab tab tom nyob no, thiab tseem yuav nyob lawm yav tom ntej, yuav zoo li Maulaunais, saib seb, txhua lub hwj chim hauv ntuj txiag teb tsaus yuav raug tshee hnyo mus ib txhis; muaj tseeb tiag, tus dab yuav tsis muaj hwj chim kav noob neej tej siab ib zaug li.

18 Saib seb, nws yog ib tug neeg zoo li Amoos, Mauxiyas tus tub, muaj tseeb tiag, thiab twb zoo li Mauxiyas lwm cov tub, muaj tseeb tiag, thiab kuj zoo li Amas thiab nws cov tub, vim lawv sawv daws puav leej yog neeg ntawm Vajtswv.

19 Nim no saib seb, Hilamas thiab nws cov kwv tij yeej ua hauj lwm pab rau cov neeg tsis tsawg dua li Maulaunais; vim lawv tau qhuab qhia Vajtswv txoj lus, thiab lawv tau ua kev cai raus dej rau txoj kev hloov siab lees txim rau txhua tus neeg uas mloog lawv tej lus.

20 Thiab li no lawv tau tawm mus, thiab cov neeg tau txo lawv tej hwj chim vim yog lawv tej lus, kawg tias thaum kawg lawv tau koob hmoov ntau los ntawm tus Tswv, thiab li no lawv tau dim ntawm tej kev tsov rog thiab tej kev sib cav sib ceg nyob hauv lawv, muaj tseeb tiag, twb tau ncua li plaub xyoos.

21 Tiam sis, ib yam li kuv twb hais lawm, nyob rau thaum kawg xyoo thib kaum cuaj, muaj tseeb tiag, txawm tias lawv muaj kev thaj yeeb nyob hauv lawv los, lawv tseem tau raug yuam kom ua rog nrog lawv cov kwv tij, cov Neeg Lamas.

22 Muaj tseeb tiag, thiab thaum kawg, lawv tej rog tsis tsum li tau ntau xyoo nrog cov Neeg Lamas, txawm tias lawv tsis xav ua rog.

23 Nim no, lawv tau tu siab uas yuav nqa cuab yeej ua rog tawm tsam cov Neeg Lamas, vim lawv tsis nyiam ua kom muaj nqaij ntuag ntshav nrog; muaj tseeb tiag, thiab tsis tas li no xwb—lawv tau tu siab uas tau ua qhov uas xa lawv cov kwv tij coob leej tawm ntawm lub ntiaj teb no mus rau hauv lub ntiaj teb uas nyob mus ib txhis, uas tsis tau npaj mus ntsib lawv tus Vajtswv li.

24 Txawm li ntawd los, lawv ua tsis tau uas cia li tso lawv txoj sia tseg, kom lawv tej poj niam thiab tej me nyuam yuav raug tua lwj tua liam los ntawm cov neeg phem qus uas twb tau yog lawv cov kwv tij ib zaug, muaj tseeb tiag, thiab tau ntxeev siab tawm ntawm lawv lub koom txoos, thiab tau ncaim lawv mus thiab tau mus ua kom lawv puas tsuaj los ntawm qhov uas koom cov Neeg Lamas.

25 Muaj tseeb tiag, lawv tiv tsis taus tias lawv cov kwv tij yuav zoo siab rau cov Neeg Nifais tej ntshav, ntev npaum li yuav muaj ib tug twg yuav coj Vajtswv tej lus txib, vim los lus cog tseg ntawm tus Tswv yog li no, yog tias lawv yuav coj nws tej lus txib lawv yuav huaj vam nyob hauv thaj av.