1 Iwe iei non ewe fansoun non ewe engon me ewin maram non ewe engon me tiuwen ier, won ewe aengonun ranin ewe maram, ekkewe sounfiun ekkewe chon Leiman ra pwá ar feito ngeni ewe fonuen Ammonaia.

2 Iwe nengeni, ewe teninimw a fen kauusefanita, iwe Moronai a annomu ew mwichen sounfiu me ren kianin ewe teninimw, me ra achukuchukata puun a rokopwanino pwe epwe eppeti ir seni ekkewe foun nikappich me ekkewe foun fau noun ekkewe chon Leiman; pun nengeni, ra fiu ren foun fau me ren foun nikappich.

3 Nengeni, ua apasa pwe ewe teninimwen Ammonaia a fen kausefanita. Ua apasa ngenikemi, ewer, pwe a kausefanita non kinikin; iwe pokiten ekkewe chon Leiman ra fen atano akkom pokiten angangangawen ekkewe aramas, ra ekieki pwe epwe pwan ew niap mi mecheres ngeni ir.

4 Nge nengeni, ifa ennetin ar tipengaw; pun nengeni, ekkewe chon Nifai ra tueta ew tit mi for seni puun a rokopwanireno, minne mi fokkun tekia ekkewe chon Leiman rese tongeni monei nour kewe foun fau me nour kewe foun nikappich ngeni ir pwe repwe tongeni kur, rese pwan tongeni feito wor tiwenon chok ika epwe me ren ar kewe nenien tonong.

5 Iei atun ei fansoun ekkewe kaptin mi nap noun ekkewe chon Leiman ra fokkun ingeno, pokiten ewe mirit an ekkewe chon Nifai ne amonnata ar kewe nenien tumun.

6 Iei ekkewe sou emmwenin ekkewe chon Leiman ra ekiek, pokiten watten chochor, ewer, ra ekieki pwe repwe tufich ne feito wor usun ra fen akkom fori; ewer, me ra pwan amonnata inisir ren pwonupwon, me ren chechen neup; me ra pwan amonnata inisir ren ufen unuchen man, ewer, uf mi fokkun manun pwe repwe pwonueno senenor kewe.

7 Iwe pokiten ar monneta ra ekieki pwe epwe mecheres ar repwe akkufu me nemenano pwir kewe ngeni ewe achoun fotek, are nireno me ningawereno anongonong won met epwe fich ngeni netiper.

8 Nge nengeni, ren ar fokkun mairu, ra monneta ngeni ir, non ew napanap minne esemo fis akkom me nein ekkewe noun Liai. Iei ra monneta ngeni ekkewe chon Leiman, ne maun anongonong won ewe napanapen aurouren Moronai.

9 Iwe non ewe fansoun pwe ekkewe chon Leiman, are ekkewe chon Amalekaia, ra fokkun ingeno ren ar we napanapen monneta ngeni maun.

10 Iei, ika king Amalekaia a fen feitiw seni ewe fonuen Nifai, me mwen noun kewe sounfiu, eni epwe fen fori ekkewe chon Leiman pwe repwe maun ngeni ekkewe chon Nifai me ren ewe teninimwen Ammonaia; pun nengeni, ese aureki chan noun kewe aramas.

11 Nge nengeni, Amalekaia ese pwisin feitiw won inisin pwe epwe maun. Iwe nengeni, noun kewe kaptin mi nap rese pwaracho ar repwe maun ngeni ekkewe chon Nifai me ren ewe teninimwen Ammonaia, pun Moronai a fen siwini ewe kokkotun mwokutukut me nein ekkewe chon Nifai, ina minne ekkewe chon Leiman ra tipengaw pokiten ar kewe nenien tumun me rese tongeni feito wor.

12 Iei minne ra mwokut sefan ngeni non ewe fonu pon, me angei ar we mwicheichen sounfiu me fetan ngeni ewe fonuen Noah, ra ekieki pwe ina ewe aruwen neni mi öch ngeni ir ar repwe feito ungeni ekkewe chon Nifai.

13 Pun rese sinei pwe Moronai a fen apochokunano, are kauuta imwen tumun mi tittino, fan iten teninimw meinisin non unusen ewe fonu mi rokopwanireno; iei minne, ra fetan ngeni ewe fonuen Noah fiti ew pochokunen tiniken; ewer, nour kewe kaptin mi nap ra feito me akkaponu ew pwon pwe repwe nieno ekkewe aramasen ena teninimw.

14 Nge nengeni, ren ar mairu, ewe teninimwen Noah, minne mi fen akkom ew neni mi apwangapwang, iei, me ren Moronai, a pochokununo, ewer, pwan mwo nap pochokunan seni ewe teninimwen Ammonaia.

15 Iwe iei, nengeni, ei ew mirit non Moronai; pun a ekieki pwe repwe nuokus me ren ewe teninmwen Ammonaia; iwe pokiten ewe teninimwen Noah a fen akkom ina ewe kinikinin ewe fonu mi apwangapwang, iei minne repwe karisino ikewe pwe repwe maun; iwe ei a anongonong won an mochen.

16 Iwe nengeni, Moronai a fen finata Liai pwe epwe kaptin mi nap won ekkewe mwanin ewe teninimw; iwe i ewe pwan chok Liai ewe a fiu ngeni ekkewe chon Leiman non ewe nemonun chuk won otiwen ewe chonupupu Sidon.

17 Iwe iei nengeni non ewe fansoun, pwe nupwen ekkewe chon Leiman ra kuna pwe Liai a nemeni ewe teninimw ra pwan tipengaw sefan, pun ra fokkun nuokusiti Liai; nge inamo nour kewe kaptin mi nap ra fen akkapon ren ew pwon pwe repwe maun ngeni ewe teninimw; iei minne, ra emmwenata nour kewe sounfiu.

18 Iei nengeni, ekkewe chon Leiman rese tongeni tonong non ar kewe imwen tumun mi tittino me ren pwan och aan tiwenon chok me ren ewe nenien tonong, pokiten tekian ewe oroppa minne ra fen achukuchukata, me anonnonun ewe warawar minne ra fen tueta mi rokopwanino, tiwenon chok ika epwe me ren ewe nenien tonong.

19 Iwe iei ekkewe chon Nifai ra monneta ar repwe nieno ekkewe meinisin repwe sossot ne tota pwe repwe tonong non ekkewe imwen eppet mi tittino ren ekkoch aan, ar repwe moneinong foun fau me foun nikappich ngeni ir.

20 Iei ra monneta, ewer, ew mwichen nour kewe mwan mi wesen pochokun, fiti nour kewe ketinas me nour kewe aunun, pwe repwe wichietiw ekkewe meinisin repwe sossot ne feita ngeni ar we nenien tumun me ren ewe nenien tonong; iwe iei ra monneta pwe repwe eppeti inisir seni ekkewe chon Leiman.

21 Iwe non ewe fansoun pwe ekkewe kaptinen ekkewe chon Leiman ra emmwenata nour kewe sounfiu me mwen ewe nenien tonong, me poputa ne fiu ngeni ekkewe chon Nifai, pwe repwe tonong non ar we nenien tumun; nge nengeni, ekkewe chon Nifai ra asusefani ir seni fansoun ngeni fansoun, ina minne ra ninnino ren ew wachemuken ninnino.

22 Iei nupwen ra kuna pwe rese tongeni angei nemenem won ekkewe chon Nifai me ren ewe aanen tonong, ra poputa ne tuetiw fan ar kewe oroppan puun pwe repwe tongeni angei ew aanen nour kewe sounfiu, pwe epwe tongeni wor ar tufichin nonnofengen ne fiu; nge nengeni, non ekkei sossot ne fori ekkei mettoch ra ninnino me ren ekkewe foun fau me foun nikappich minne ra kur; iwe me nukun ar aurano ar kewe warawar ren ar osonatiw ewe oroppan puun, ra ureno ren ukukun chochon ar kewe mi mano me inis mi feiengaw.

23 Iei ekkewe chon Nifai a wor rer unusen nemenem won ekkewe chon koum ngeni ir; iwe iei ekkewe chon Leiman ra sossot ne nieno ekkewe chon Nifai tori nour kewe kaptin mi nap meinisin ra ninnino; ewer, iwe a nap seni ew ngorow me nein ekkewe chon Leiman ra ninnino; nupwen, won ewe efoch pau, ese wor emon aramas me nein ekkewe chon Nifai minne a ninnino.

24 Mi wor ukukun nime ekkewe ra feiengaw, ekkewe ra pwano ngeni ekkewe foun nikappich noun ekkewe chon Leiman me non ewe aanen tonong, nge ir mi pwonupwon me ren ar kewe pwonupwon, me ar kewe chechen neup, me ar kewe pwonupwonun mokur, ina minne kinaser kewe a nom won pecher, chommong me neir mi fokkun watte feiengawer.

25 Iwe non ewe fansoun, pwe nupwen ekkewe chon Leiman ra kuna pwe nour kewe kaptin meinisin ra ninnino ra suno ngeni ewe fonu pon. Iwe non ewe fansoun pwe ra niwin ngeni ewe fonuen Nifai, pwe repwe ureni nour ewe king, Amalekaia, i emon chon Nifai seni an uputiw, usun ar kewe chommong mi mano.

26 Iwe non ewe fansoun pwe a fokkun song ren noun kewe aramas, pokiten ese angei an mochen won ekkewe chon Nifai; i ese nemenareno ngeni ewe achoun fotek.

27 Ewer, i a fokkun song, iwe a kapas mi ngawei Kot, me pwan Moronai, a akkapon ren ew pwon pwe i epwe pwisin unumi chan; iwe ei pokiten Moronai a aneasochisi ekkewe annukun Kot ne amonneta fan iten tumunun noun kewe aramas.

28 Iwe non ewe fansoun, pwe won ewe efoch pau, ekkewe aramasen Nifai ra kinisou ngeni ewe Samon ar Kot, pokiten an we manaman mi napanap ne angasereno seni ne poun ekkewe chon koum ngeni ir.

29 Iwe iei a muchuno ewe engon me tiuwen ierin muun ekkewe sou apung won ekkewe aramasen Nifai.

30 Ewer, mi wor soposoponon kinamwe me neir, me fokkun watten feioch me non ewe mwichefen pokiten ar aneasochis me achocho minne ra ngeni ewe kapasen Kot, minne a affateno ngeni ir me ren Ilaman, me Siplon, Corianton, me Ammon me pwin kewe, ewer, me ren ekkewe meinisin ra fen seikita me ren ewe tetten mi fel an Kot, ra papatais ngeni aier, me titino pwe repwe afanafan me nein ekkewe aramas.