1 Ut anajwan kik’ulman naq sa’ xjunlaju po lix b’elelaju chihab’, sa’ lajeeb’ xb’e li po, eb’ li teep aj pleet reheb’ laj Lamanita ke’ile’ chi nach’ok rik’in li ch’och’ Ammonihah.

2 Ut k’ehomaq reetal, ak yiib’anb’il chi ak’il li tenamit, ut laj Moroni kixk’ojob’ jun teep aj pleet chire xnub’aal li tenamit, ut eb’ a’an ke’xtuub’ chaq li ch’och’ chi sutsu chirix re xramb’al chiruheb’ lix tzimajeb’ ut lix pekeb’ laj Lamanita; xb’aan naq k’ehomaq reetal, eb’ a’an neke’pleetik rik’in pek ut rik’in tzimaj.

3 K’ehomaq reetal, xinye naq kiyiib’aman chaq chi ak’il li tenamit Ammonihah. Ninye eere, relik chi yaal, naq jun raqal kiyiib’aman chaq chi ak’il; ut rik’in naq eb’ laj Lamanita ak jun sut ke’xsach, xmaak xmaa’usilaleb’ li tenamit, ke’xk’oxla naq moko taach’a’ajko’q ta chiruheb’ xchapb’al wi’chik.

4 A’b’an k’ehomaq reetal, k’a’jo’ naq kisach rajomeb’; xb’aan naq k’ehomaq reetal, eb’ laj Nefita ke’xtuub’ chaq jun uul li ch’och’ chi sutsu chirixeb’, li q’axal najt xteram jo’kan naq eb’ laj Lamanita ink’a’ neke’ru chixkutb’aleb’ rik’in xpekeb’ ut xtzimajeb’ re te’rahob’tesinq, chi moko ke’ru chi chalk sa’ xb’eeneb’, ka’ajwi’ sa’ xna’aj li rokeb’aaleb’.

5 Anajwan sa’ li hoonal a’an eb’ li xb’eenil aj taqlanel reheb’ laj Lamanita ke’sach xch’ool chi numtajenaq, xb’aan xchaab’ilal xna’leb’eb’ laj Nefita sa’ xkawresinkil li na’ajej te’xkol wi’ rib’.

6 Anajwan eb’ li neke’jolomink reheb’ laj Lamanita ke’xk’oxla, xb’aan xnimal li rajlankileb’, relik chi yaal, ke’xk’oxla naq k’eeb’ilaq reheb’ chalk sa’ xb’eeneb’ jo’ chanru ke’xb’aanu chaq junxil; relik chi yaal, ut ke’xkawresi ajwi’ chaq rib’ rik’in li ramleb’, ut li xramb’al ru ch’oolej; ut ke’xkawresi ajwi’ rib’ rik’in aq’ej tz’um okenaq, relik chi yaal, li aq’ej q’axal pim re xtz’apb’al ru xt’ust’uukilaleb’.

7 Ut rik’in naq kawresinb’ileb’ chi jo’kan ke’xk’oxla naq moko taach’a’ajko’q ta chiruheb’ numtaak sa’ xb’eeneb’ ut xk’eeb’aleb’ li ras riitz’in rub’el riiqleb’ li moosil, malaj xkamsinkileb’ ut xsachlenkileb’ a’ yaal jo’ neke’raj.

8 A’b’an k’ehomaq reetal, q’axal xsachikeb’ xch’ool, rik’in naq kawresinb’ileb’ chixk’ulb’aleb’, jo’ chanru li maajun wa ilb’il chaq sa’ xyanqeb’ li ralal xk’ajol laj Lehi. Anajwan kawresinb’ileb’ chiruheb’ laj Lamanita, re pleetik jo’ chanru li tzolb’ileb’ wi’ chaq xb’aan laj Moroni.

9 Ut kik’ulman naq eb’ laj Lamanita, malaj ut eb’ laj Amalikiahita, ke’sach xch’ool chi numtajenaq chirix chan ru naq ke’xkawresi rib’ choq’ re li pleet.

10 Anajwan, wi ta kichal chaq li rey aj Amalikiah sa’ li ch’och’ Nefi, sa’ xjolomil lix teep aj pleet, maare raj kixk’eheb’ laj Lamanita chixpleetinkileb’ laj Nefita sa’ li tenamit Ammonihah; xb’aan naq k’ehomaq reetal, a’an maak’a’ naxk’oxla chirix xkik’eleb’ lix tenamit.

11 A’b’an k’ehomaq reetal, laj Amalikiah moko kichal ta rochb’eeneb’ chi pleetik. Ut k’ehomaq reetal, li xb’eenileb’ lix taqlaneleb’ moko ke’chal ta xch’ool chixpleetinkileb’ laj Nefita sa’ li tenamit Ammonihah, xb’aan naq laj Moroni kixjal chaq xtuqub’ankil li k’a’ru na’uxman sa’ xyanqeb’ laj Nefita, jo’kan naq eb’ laj Lamanita ke’sach rajomeb’ rik’in li na’ajej neke’xkol wi’ rib’, ut ink’a’ ke’ru chi chalk sa’ xb’eeneb’.

12 Jo’kan naq ke’xsutq’isi rib’ chiru li yamyookil ch’och’, ut ke’xk’am lix teep chirix ut ke’b’eek sa’ xjayal li ch’och’ Noe, neke’xk’oxla naq a’an xkab’il li na’ajej li chaab’il re te’chalq sa’ xb’eeneb’ laj Nefita.

13 Xb’aan naq moko neke’xnaw ta naq laj Moroni kixk’e chaq xkawilal, malaj kixyiib’ chaq li kawil na’ajej te’xkol wi’ rib’, sa’ li junjunq chi tenamit sa’ chixjunil li ch’och’ sa’ xsutam; jo’kan ut, koxe’b’eeq sa’ xjayal li ch’och’ Noe chi xaqxookeb’ xch’ool; relik chi yaal, li xb’eenileb’ lix taqlaneleb’ ke’chal chi uub’ej ut ke’ok sa’ jun xaqab’anb’il aatin naq te’xsacheb’ li ani wankeb’ sa’ li tenamit a’an.

14 A’b’anan k’ehomaq reetal, sachsookeb’ xch’ool ke’kana, naq li tenamit Noe, li q’unil ru na’ajej chaq junxil, anajwan chik, sa’ xk’ab’a’ laj Moroni, ak kaw chik, relik chi yaal, naxq’ax xkawil li tenamit Ammonihah.

15 Ut anajwan k’ehomaq reetal, a’in xchaab’ilal xna’leb’ laj Moroni; xb’aan naq a’an kixk’oxla naq te’xuwaq sa’ li tenamit Ammonihah; ut jo’ li tenamit Noe a’an chaq li jun raqal q’axal q’un ru re li ch’och’ junxil, chi jo’kan aran toxe’b’eeq re pleetik; ut chi jo’kan kiwan, jo’ chanru kiraj.

16 Ut k’ehomaq reetal, laj Moroni kixxaqab’ chaq laj Lehi re taawanq choq’ xb’eenil aj taqlanel sa’ xb’eeneb’ li winq sa’ li tenamit a’an, ut a’an ajwi’ laj Lehi a’an li kipleetik rik’ineb’ laj Lamanita sa’ li ru taq’a chirix li nima’ Sidon sa’ releb’ saq’e.

17 Ut anajwan k’ehomaq reetal, naq ke’xtaw laj Lamanita naq laj Lehi nataqlan sa’ xb’een li tenamit, kik’ulman naq jun sut chik ke’sach rajom, xb’aan naq neke’xxuwa ru laj Lehi chi numtajenaq, a’b’anan eb’ li xb’eenileb’ lix taqlanel ak ke’xye chaq rik’in xaqab’anb’il aatin naq te’xpleeti li tenamit, jo’kan naq ke’xnumsi chi uub’ej lix teepeb’.

18 Anajwan k’ehomaq reetal, eb’ laj Lamanita maajun chik b’e ke’ru wi’ chi ok sa’eb’ li kawil na’ajej neke’xkol wi’ rib’, ka’ajwi’ chiru li okeb’aal, xb’aan xnimal xteram li tub’tuukil ch’och’ li tuub’anb’il chaq, ut xchamal lix jukulal li ch’och’ li kijukman chaq chirix, ka’ajwi’ sa’ li okeb’aal ink’a’.

19 Ut chi jo’kan kawresinb’ileb’ laj Nefita chixsachb’al chixjunil li ani taayaloq taqsink re te’ok sa’ li kawil na’ajej sa’ jalan chik b’e, rik’in xkutb’al li pek ut li tzimaj sa’ xb’eeneb’.

20 Chi jo’kan kawresinb’ileb’; relik chi yaal, jun ch’oleb’ lix winqeb’ li q’axal kaweb’ rib’, rik’in lix yok’leb’ ch’iich’ ut lix jok’eb’, re xt’anb’al chixjunileb’ li ani te’xyal ok sa’ li na’ajej neke’xkol wi’ rib’, chiru xna’aj li okeb’aal; ut chi jo’kan kawresinb’ileb’ chixkolb’al rib’ chiruheb’ laj Lamanita.

21 Ut kik’ulman naq eb’ laj taqlanel reheb’ laj Lamanita ke’xnumsi chi uub’ej lix teep aj pleet chiru xna’aj li okeb’aal, ut ke’ok chixyalb’al ru rik’ineb’ laj Nefita, re te’ok sa’ li na’ajej neke’xkol wi’ rib’; a’b’an k’ehomaq reetal, ke’sutq’isiik chirix junjunq sut, jo’kan naq ke’kamsiik rik’in jun kamsiik q’axal nim.

22 Anajwan naq ke’xtaw naq ink’a’ ke’ru chixtawb’al xwankil sa’ xb’eeneb’ laj Nefita chiru li okeb’aal, ke’ok chixb’ekb’al chaq lix uul ch’och’ re taaruuq te’xtaw jun okeb’aal choq’ re lix teepaleb’ aj pleet, re naq te’ruuq chi pleetik sa’ juntaq’eetalil; a’b’anan k’ehomaq reetal, sa’ xyalb’al a’in ke’t’anliik xb’aan li pek ut li tzimaj li kikute’ reheb’, ut ruuchil xb’ut’b’al lix jukulal li ch’och’ rik’in xb’ekb’al chaq li uul ch’och’, kib’ut’e’ ka’ch’inaq rik’in lix tib’eleb’ li kamenaq ut li toch’enaqeb’.

23 Chi jo’kan eb’ laj Nefita ke’wan anchal xwankileb’ sa’ xb’eeneb’ li xik’ neke’ilok reheb’; ut chi jo’kan ke’xyal xq’e laj Lamanita chixsachb’aleb’ laj Nefita toj reetal naq kamsinb’il chixjunileb’ li xb’eenil xtaqlaneleb’; relik chi yaal, ut numenaq jun mil reheb’ laj Lamanita ke’kamsiik; naq chi junpak’al chik, maajun aamej kiwan sa’ xyanqeb’ laj Nefita li kikamsiik.

24 Wan na lajeeb’ roxk’aal li ke’toch’e’, li ke’wan chi k’utk’u chiru xtzimajeb’ laj Lamanita chiru li okeb’aal, a’b’an tz’aptz’ookeb’ ru xb’aaneb’ lix ramleb’, ut lix ramb’al ru xch’ooleb’, ut lix ramb’al xjolomeb’, jo’kan naq lix toch’olaleb’ chiru roqeb’ ke’wan, ut naab’al reheb’ q’axal ra.

25 Ut naq ke’ril laj Lamanita naq kamsinb’ileb’ chixjunil li xb’eenil xtaqlaneleb’, kik’ulman naq ke’eelelik chiru li yamyookil ch’och’. Ut kik’ulman naq ke’sutq’i sa’ li ch’och’ Nefi, re xyeeb’al resil re lix reyeb’, aj Amalikiah, a’an aj Nefita naq kiyo’la chaq, chirix li nimla sachk ke’xk’ul.

26 Ut kik’ulman naq a’an kijosq’o’ chi numtajenaq rik’in lix tenamit, xb’aan naq ink’a’ kixtaw chaq li kiraj sa’ xb’eeneb’ laj Nefita; ink’a’ kixk’eheb’ rub’el riiqleb’ li moosil.

27 Relik chi yaal, kichal xjosq’il chi numtajenaq, ut kixmajewa li Dios, ut jo’kan ajwi’ laj Moroni, kixye rik’in xaqab’anb’il aatin naq taaruk’ xkik’el, ut a’in xb’aan naq laj Moroni kixpaab’ lix taqlahom li Dios sa’ xkawresinkil rib’ choq’ re xkolb’al rix lix tenamit.

28 Ut kik’ulman, naq chi junpak’al chik, eb’ lix tenamit laj Nefi ke’b’antioxink chiru li Qaawa’ lix Dios, xb’aan lix wankil maak’a’ xjuntaq’eetankil sa’ xkolb’aleb’ chaq sa’ ruq’eb’ li xik’ neke’ilok reheb’.

29 Ut chi jo’kan kiraqe’ li xb’elelaju chihab’ rawa’b’ejileb’ laj raqol aatin sa’ xb’eeneb’ lix tenamit laj Nefi.

30 Relik chi yaal, ut kiwan rajlal li tuqtuukilal sa’ xyanqeb’, ut li usaak q’axal nim sa’ li iglees xb’aan xk’eeb’aleb’ xxik ut xyalb’aleb’ xq’e chirix li raatin li Dios, li kich’olob’aak chiruheb’ xb’aan laj Helaman, ut laj Xiblon, ut laj Korianton, ut laj Ammon ut eb’ lix komon, relik chi yaal, ut xb’aaneb’ chixjunil li k’ojob’anb’ileb’ rik’in lix santil k’anjelil li Dios, li kub’sinb’ileb’ xha’ choq’ re li jalb’a-k’a’uxlej, ut taqlanb’ileb’ chi jultikank aatin sa’ xyanqeb’ li tenamit.