1 Ut anajwan kik’ulman naq laj Moroni ink’a’ kixkanab’ kawresink choq’ re li pleet, malaj re xkolb’al rix lix tenamit chiruheb’ laj Lamanita; xb’aan naq kixtaqla naq eb’ lix teep aj pleet te’tiklaaq sa’ xtiklajik lix junmay chihab’ rawa’b’ejileb’ laj raqol aatin, naq te’xtikib’ b’ekok re xtuub’ankil li ch’och’ sa’ xsutam chixjunileb’ li tenamit, chiru chixjunil li ch’och’ li eechaninb’il xb’aaneb’ laj Nefita.

2 Ut sa’ xb’eeneb’ li tub’tuukil ch’och’ a’in kixtaqla naq chiwanq li pech’b’il che’, relik chi yaal, xk’anjelankil li pech’b’il che’, k’ab’lanb’il jo’ xxaqam jun winq, sa’ xsutameb’ li tenamit.

3 Ut kixtaqla naq sa’ xb’een lix k’anjelankil li pech’b’il che’ a’in, te’kab’laq chi tustu li jutz’juukil che’ sa’ xb’eeneb’ li pech’b’il che’ sa’ xsutam, ut kaweb’ ut najteb’ xteram.

4 Ut kixtaqla xkab’lankil li najt xteramil kab’l chi taqenaq sa’ xb’eeneb’ li k’anjelanb’il jutz’juukil che’ a’an, ut kixtaqla xyiib’ankil li kolb’a-ib’ na’ajej sa’ xb’eeneb’ li najt xteramil kab’l a’an, re naq lix pekeb’ ut lix tzimajeb’ laj Lamanita ink’a’ te’ruuq chixrahob’tesinkileb’.

5 Ut ke’kawresiik re naq te’ruuq chixkutb’al chaq li pek sa’ xb’een, jo’ chanru rajomeb’ ut xmetz’eweb’, ut te’xkamsi li ani taayaloq nach’ok rik’in lix xaqxookil tz’ak li tenamit.

6 Chi jo’kan laj Moroni kixkawresi li kawil na’ajej royb’eninkil xk’ulunikeb’ li xik’ neke’ilok reheb’, chixsutam li junjunq chi tenamit sa’ chixjunil li ch’och’.

7 Ut kik’ulman naq laj Moroni kixtaqla naq eb’ lix teep aj pleet te’xik sa’ li yamyookil ch’och’ sa’ releb’ saq’e; relik chi yaal, ut xkoheb’ ut ke’ralinasi chaq chixjunileb’ laj Lamanita li wankeb’ sa’ li yamyookil ch’och’ sa’ releb’ saq’e toj sa’ tz’aqal xch’och’eb’, li wan chirix li ch’och’ Tzarahemla sa’ xtz’e li saq’e.

8 Ut li ch’och’ Nefi helho xtiikal chalen li palaw sa’ releb’ saq’e toj sa’ li wan sa’ rokeb’.

9 Ut kik’ulman naq chirix naq laj Moroni kiralinasiheb’ chaq chixjunileb’ laj Lamanita sa’ li yamyookil ch’och’ sa’ releb’ saq’e, li wan chirix li ch’och’ wan wi’ tz’aqal li reechanihomeb’ sa’ xjayal lix nim li saq’e, kixtaqla naq eb’ li ani wankeb’ sa’ li ch’och’ Tzarahemla ut sa’ li ch’och’ sa’ xsutam te’xik sa’ li yamyookil ch’och’ sa’ releb’ saq’e, toj sa’eb’ li nub’aal chire li palaw, ut te’reechani li ch’och’.

10 Ut kixk’ojob’eb’ ajwi’ li teep aj pleet sa’ xtz’e li saq’e, sa’ xnub’aaleb’ li reechanihomeb’, ut kixtaqlaheb’ chixkab’lankil li kawresinb’il na’ajej, re te’xkol rix lix teep aj pleet ut lix tenamit sa’ ruq’eb’ chaq li xik neke’ilok reheb’.

11 Ut chi jo’kan kirisi chaq chixjunil lix kawilaleb’ laj Lamanita sa’ li yamyookil ch’och’ sa’ releb’ saq’e, relik chi yaal, ut jo’kan ajwi’ sa’ rokeb’ saq’e, ut kixk’e xkawilal li nub’aal li naxjacheb’ ru laj Nefita rik’ineb’ laj Lamanita, jachjo wi’ ru li ch’och’ Tzarahemla rik’in li ch’och’ Nefi, li natikla sa’ li palaw sa’ rokeb’ saq’e, ut nanume’ chire xyo’leb’aal li nima’ Sidon—ut eb’ laj Nefita ke’reechani chixjunil li ch’och’ sa’ xjayal lix nim li saq’e, relik chi yaal, chixjunil li ch’och’ li wan chirix li ch’och’ Naab’alil sa’ xjayal lix nim li saq’e, jo’ chanru li neke’saho’ wi’ xch’ool.

12 Chi jo’kan laj Moroni, rik’ineb’ lix teep aj pleet, li ke’tam wulaj wulaj xb’aan xkawileb’ xch’ool naq te’kole’q sa’ xk’ab’a’ lix k’anjel a’an, kixsik’ risinkil chaq xmetz’eweb’ ut xwankileb’ laj Lamanita sa’eb’ li ch’och’ li eechaninb’il xb’aaneb’ a’an, re naq maak’a’aqeb’ xwankil sa’ xb’een li ch’och’ eechaninb’il xb’aaneb’.

13 Ut kik’ulman naq eb’ laj Nefita ke’xtikib’ xk’eeb’al xk’ojob’ankil jun li tenamit, ut Moroni ke’xk’e choq’ xk’ab’a’ li tenamit; ut wan chire li palaw sa’ releb’ saq’e, ut wan sa’ xtz’e li saq’e chixk’atq xnub’aal li reechanihomeb’ laj Lamanita.

14 Ut ke’xtikib’ ajwi’ xk’eeb’al xk’ojb’ankil jun li tenamit sa’ xyi li tenamit Moroni ut li tenamit Aaron, li naxjunaji rib’ rik’in xnub’aaleb’ li ch’och’ Aaron ut Moroni; ut Nefihah ke’xk’e choq’ xk’ab’a’ li tenamit, malaj li ch’och’.

15 Ut ke’xtikib’ sa’ li chihab’ ajwi’ a’an xkab’lankil k’iila tenamit sa’ xnim li saq’e, ut jun jalan ru xyiib’ankil, Lehi ke’xk’ab’a’in, li wan sa’ xnim li saq’e sa’eb’ li nub’aal chire palaw.

16 Ut chi jo’kan kiraqe’ li xjunmay chihab’.

17 Ut sa’ li usaak a’in ke’tawman lix tenamit laj Nefi sa’ xtiklajik li xb’een xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi.

18 Ut ke’usa chi numtajenaq, ut q’axal ke’b’ihomo’; relik chi yaal, ut ke’k’ihan ut ke’kawu xmetz’ew sa’ li ch’och’.

19 Ut chi jo’kan naqil chan ru ruxtaanal ut xtiikal ru chixjunil lix b’aanuhom li Qaawa’, re xtz’aqob’resinkil ru chixjunil li raatin reheb’ li ralal xk’ajoleb’ li winq; relik chi yaal, naru naqak’e reetal naq tz’aqlojenaq xyaalalil chixjunil li raatin, sa’ li kutan ajwi’ a’in, li kixye re laj Lehi, naq kixye:

20 Osob’tesinb’ilat laa’at ut eb’ laa walal aak’ajol; ut eb’ a’an te’osob’tesiiq; a’ yaal jo’ chanru te’xpaab’ lin taqlahom te’usaaq sa’ li ch’och’. A’b’anan chijultiko’q aawe, a’ yaal jo’ chanru ink’a’ neke’xpaab’ lin taqlahom te’isiiq chaq chiru li Qaawa’.

21 Ut naqil naq li yeechi’ihom a’in tz’aqlojenaq xyaalalil chiru lix tenamit laj Nefi; xb’aan naq a’an ajwi’ li ch’ii’lank-ib’ ut li wech’ok-ib’ sa’ xyanqeb’, relik chi yaal, li kamsink, ut li poqlenk, li loq’onink pak’b’il dios, li yumb’eetak ko’b’eetak, ut li tz’eqb’eetalil, li kiwan sa’ xyanqeb’ chirib’ileb’ rib’, li kik’amok chaq sa’ xb’eeneb’ lix pleeteb’ ut lix sachlijikeb’.

22 Ut eb’ li tiikeb’ chixpaab’ankil lix taqlahom li Qaawa’ ke’kole’ sa’ chixjunil hoonal, a’b’an k’iila mil reheb’ li ras riitz’in aj maak ke’k’ehe’ chi moosil, malaj chi oso’k xb’aan yok’leb’ ch’iich’, malaj chi lajk chi maak’a’eb’ xpaab’aal, ut chixjunajinkil rib’ rik’ineb’ laj Lamanita.

23 A’b’an k’ehomaq reetal, maajun chik xq’ehil wanjenaq xnimal li sahil ch’oolejil sa’ xyanqeb’ lix tenamit laj Nefi, chalen chaq xkutankil laj Nefi, jo’ li kiwan sa’ xkutankil laj Moroni, relik chi yaal, sa’ li kutan ajwi’ a’in, sa’ li xb’een xka’k’aal chihab’ rawa’b’ejileb’ laj raqol aatin.

24 Ut kik’ulman naq li xkab’ xka’k’aal chihab’ rawa’b’ejileb’ laj raqol aatin kiraqe’ ajwi’ sa’ tuqtuukilal; relik chi yaal, ut jo’kan ajwi’ li rox xka’k’aal chihab’.

25 Ut kik’ulman naq sa’ xtiklajik li xkaa xka’k’aal chihab’ rawa’b’ejileb’ laj raqol aatin, kiwan raj tuqtuukilal sa’ xyanq lix tenamit laj Nefi wi ta ink’a’ xb’aan jun li wech’ok-ib’ li kik’ulman sa’ xyanqeb’ chirix li ch’och’ Lehi, ut li ch’och’ Morianton, li naxjunaji rib’ rik’in xnub’aal Nefi, ut xkab’ichaleb’ wankeb’ sa’eb’ li nub’aal chire li palaw.

26 Xb’aan naq k’ehomaq reetal, eb’ li tenamit aj eechanihom re li ch’och’ Morianton ke’xye naq reheb’ a’an jun raqal li ch’och’ Lehi; jo’kan naq ki’ok chi wank jun tiqwal wech’ok-ib’ sa’ xyanqeb’, jo’kan naq eb’ li ani wankeb’ Morianton ke’xchap xk’anjeleb’aal re pleet chiruheb’ li ras riitz’in, ut k’eek’ookeb’ xch’ool naq rik’in yok’leb’ ch’iich’ te’xkamsiheb’.

27 A’b’an k’ehomaq reetal, eb’ li tenamit aj eechanihom re li ch’och’ Lehi ke’eelelik sa’ xteep laj Moroni, ut ke’xtz’aama chiru naq tixtenq’aheb’; xb’aan naq k’ehomaq reetal, moko reheb’ ta li maak.

28 Ut naq eb’ li wankeb’ Morianton, li k’amb’ileb’ xb’e xb’aan jun li winq aj Morianton xk’ab’a’, ke’xk’e reetal naq eb’ li wankeb’ Lehi ke’eelelik rik’in xteep laj Moroni, kichal xxiweb’ chi numtajenaq, maare anchal taachalq lix teep aj pleet laj Moroni sa’ xb’eeneb’ ut tixsacheb’.

29 Jo’kan naq laj Morianton kixk’e sa’ xch’ooleb’ naq te’eeleliq sa’ li ch’och’ li wan sa’ xjayal lix nim li saq’e, li nujenaq rik’in ninqi helam chi ha’, ut te’reechani li ch’och’ li wan sa’ xnim li saq’e.

30 Ut k’ehomaq reetal, ke’xk’e raj chi uxmank li k’uub’anb’il na’leb’ a’in (ut rik’in a’an ki’ux raj raho’k ch’oolej) a’ut k’ehomaq reetal, laj Morianton, rik’in naq a’an jun winq numtajenaq xjosq’il, chi jo’kan kijosq’o’ rik’in jun reheb’ lix moos xqa’al, ut kichal sa’ xb’een, ut kixsak’ chi naab’al.

31 Ut kik’ulman naq a’an ki’eelelik, ut kiwulak junpak’al sa’ xteep laj Moroni, ut kixye re laj Moroni chixjunil li k’a’aq re ru chirix li na’leb’ a’an, ut chirix ajwi’ lix k’oxlahomeb’ naq te’eeleliq sa’ li ch’och’ sa’ xjayal lix nim li saq’e.

32 Anajwan k’ehomaq reetal, eb’ li tenamit li wankeb’ sa’ li ch’och’ Naab’alil, malaj ut laj Moroni, kixk’oxla naq eb’ a’an te’ab’inq chiru li raatin laj Morianton ut te’xjunaji rib’ rik’in lix tenamit, ut chi jo’kan a’an taareechaniheb’ li jar raqal chi ch’och’ a’an, li tixk’e raj xk’ojob’ankil li ninqi ch’a’ajkilal sa’ xyanqeb’ lix tenamit laj Nefi, relik chi yaal, ut a’ ch’a’ajkilal a’an taak’amoq raj re xsachik li ach’ab’aak li wankeb’ wi’.

33 Jo’kan naq laj Moroni kixtaqla jun teep aj pleet, rochb’een li nak’anjelak reheb’, re xramb’al lix tenamit laj Morianton, re xramb’al li reelelikeb’ sa’ li ch’och’ sa’ xjayal lix nim li saq’e.

34 Ut kik’ulman naq ink’a’ ke’xrameb’ ru toj reetal naq ke’nach’ok chaq rik’in xmaril li ch’och’ Sachenaqil; ut aran ke’xrameb’ ru, chixk’atq lix ka’ch’inal ru na’ajej li nanume’ chixk’atq li palaw toj sa’ li ch’och’ sa’ xjayal lix nim li saq’e, relik chi yaal, chixk’atq li palaw, sa’ rokeb’aal saq’e ut sa’ releb’aal.

35 Ut kik’ulman naq li teep aj pleet li taqlanb’il chaq xb’aan laj Moroni, li jolominb’il xb’aan jun winq aj Teankum xk’ab’a’, kixk’ul lix tenamit laj Morianton, ut k’a’jo’ xjipileb’ xch’ool lix tenamit laj Morianton (xb’aan naq k’eeb’ileb’ xch’ool xb’aan lix maa’usilal ut lix sahil aatin) jo’kan naq kitikla jun li pleet chirib’ileb’ rib’, b’ar wi’ laj Teankum kixkamsi laj Morianton ut kixq’ax ru lix teep aj pleet, ut kixk’ameb’ choq’ preex, ut kisutq’i sa’ xna’aj lix teep laj Moroni. Ut chi jo’kan kiraqe’ li xkaa xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi.

36 Ut chi jo’kan ke’k’ame’ chaq wi’chik lix tenamit laj Morianton. Ut chirix naq ke’xxaqab’ aatin naq te’xk’uula li tuqtuukilal, ke’k’ojob’aak wi’chik sa’ li ch’och’ Morianton, ut ki’ux xjunajinkileb’ rib’ rik’ineb’ li wankeb’ Lehi; ut eb’ a’an ke’k’ojob’aak ajwi’ wi’chik sa’ xch’och’eb’.

37 Ut kik’ulman naq sa’ li chihab’ ajwi’ a’an naq kik’ojob’aak wi’chik li tuqtuukilal sa’ xb’een xtenamit laj Nefi, naq laj Nefihah, li kiwan jo’ xkab’il li xb’eenil aj raqol aatin, kikam, chirix wank sa’ li raqleb’aal aatin rik’in tz’aqal tiikilal chiru li Dios.

38 A’b’anan a’an ink’a’ kiraj reechaninkil chaq rik’in laj Alma li tz’iib’anb’il esil ut li k’a’aq chik re ru li q’axal k’eeb’ileb’ xloq’al xb’aan laj Alma ut eb’ lix yuwa’; jo’kan naq laj Alma kixq’axtesi re laj Helaman, li ralal.

39 K’ehomaq reetal, kik’ulman naq li ralal laj Nefihah kixaqab’aak re taawanq sa’ li raqleb’aal aatin, sa’ xna’aj lix yuwa’; relik chi yaal, kixaqab’aak jo’ xb’eenil aj raqol aatin ut jo’ aj jolominel sa’ xb’een li tenamit, rik’in jun xaqab’anb’il aatin ut jun loq’laj k’ojob’anb’il k’anjel re taaraqoq aatin chi tiik, ut tixk’uula li tuqtuukilal ut li ach’ab’aak wankeb’ wi’ li tenamit, ut tixk’e reheb’ li k’a’ru loq’ kanab’anb’ileb’ chixb’aanunkil, a’an naq te’xloq’oni li Qaawa’ lix Dios; relik chi yaal, re tixtenq’a ut tixxaqab’ xwankil lix na’leb’ li Dios chiru chixjunil lix kutan, ut re tixk’ameb’ laj maak sa’ li raqb’a-aatin a’ yaal jo’ chanru li maak ke’xb’aanu.

40 Anajwan k’ehomaq reetal, aj Pahoran xk’ab’a’ a’an. Ut laj Pahoran kiwan sa’ xk’ojarib’aal lix yuwa’, ut kixtikib’ rawa’b’ejil sa’ xraqik li xkaa xka’k’aal chihab’, sa’ xb’een lix tenamit laj Nefi.