1 Ut anajwan kik’ulman sa’ xtiklajik li ro’ xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi, chirix naq ke’xxaqab’ xtuqtuukilal li ani wankeb’ Lehi rik’ineb’ li wankeb’ Morianton chirix lix ch’och’eb’, ut chirix naq ke’xtikib’ li ro’ xkak’al chihab’ sa’ tuqtuukilal;

2 A’b’anan moko najt ta naq ke’xk’uula tz’aqal li tuqtuukilal sa’ li ch’och’, xb’aan naq ki’ok chi wank jun wech’ok-ib’ sa’ xyanqeb’ li tenamit chirix laj Pahoran, li xb’eenil aj raqol aatin; xb’aan naq k’ehomaq reetal, wan jun raqal reheb’ li tenamit li ke’ajok re naq taajalmanq junjunq raqal sa’ li chaq’rab’.

3 A’b’an k’ehomaq reetal, laj Pahoran ink’a’ kixjal chi moko kixkanab’ chi jalmank li chaq’rab’; jo’kan naq ink’a’ ki’ab’in chiruheb’ li ke’xtaqla chaq xyaab’eb’ xkux rochb’een lix tz’iib’anb’il tz’aamahomeb’ chirix xjalb’al li chaq’rab’.

4 Jo’kan ut, eb’ li ke’ajok re naq taajalmanq li chaq’rab’ ke’josq’o’ rik’in, ut ke’raj naq moko taawanq ta chik jo’ xb’eenil aj raqol aatin sa’ xb’een li ch’och’; jo’kan naq kiwakli jun tiqwal wech’ok-ib’ chirix li na’leb’ a’an, a’ut moko toj ta reetal li hoyok kik’.

5 Ut kik’ulman naq eb’ li ke’ajok re naq taa’isimanq chaq laj Pahoran sa’ li raqleb’aal aatin, rey aj winq kiyehe’ reheb’, xb’aan naq ke’raj naq taajalmanq li chaq’rab’ choq’ re naq taasache’q lix jolomil tenamit li ach’ab’anb’il, ut taaxaqab’aaq jun rey sa’ xb’een li ch’och’.

6 Ut eb’ li ke’ajok re naq taakanaaq laj Pahoran jo’ xb’eenil aj raqol aatin sa’ xb’een li ch’och’ ke’xk’ul choq’ xk’ab’a’eb’ ach’ab’anb’il winq; ut chi jo’kan jachjookeb’ ru, xb’aan naq eb’ li ach’ab’anb’il winq ke’xxaqab’ chaq aatin, malaj ut ke’ok chaq sa’ sumwank naq te’xk’uula xwankil li k’a’ru xk’ulub’eb’ ut li kanab’anb’ileb’ chixb’aanunkil chirix xpaab’aaleb’, rik’in jun xjolomil tenamit li ach’ab’anb’il.

7 Ut kik’ulman naq li na’leb’ a’in li ke’xwech’ wi’ rib’ kituqub’aak rik’in xyaab’ xkux li tenamit. Ut kik’ulman naq a’eb’ li ach’ab’anb’il winq li ke’k’ulub’aak xb’aan xyaab’ xkux li tenamit, ut laj Pahoran kikana sa’ li raqleb’aal aatin, ut rik’in a’an kiwan nimla saho’k ch’oolej sa’ xyanqeb’ lix komon laj Pahoran ut naab’al ajwi’ reheb’ laj rahol re li ach’ab’aak, li ke’ch’anab’ank ajwi’ reheb’ li rey aj winq, jo’kan naq maak’a’eb’ xch’ool chi wech’ok; kiteneb’aak b’an sa’ xb’eeneb’ xxaqab’ankil li na’leb’ chirix li ach’ab’aak.

8 Anajwan eb’ li ke’ajok re li rey a’aneb’ li taqenaqeb’ xwankil naq ke’yo’la, ut ke’raj wank choq’ rey; ut xaqab’anb’ileb’ xwankil xb’aaneb’ li neke’sik’ok wankilal, ut xk’ulb’al xwankileb’ sa’ xb’een li tenamit.

9 A’b’anan k’ehomaq reetal, ch’a’aj naq sa’ li kutan a’an ke’wan xkomon a’ wech’ok-ib’ a’an sa’ xyanq lix tenamit laj Nefi; xb’aan naq k’ehomaq reetal, laj Amalikiah ak kireek’asi wi’chik xch’ooleb’ lix tenamiteb’ laj Lamanita re xpleetinkil lix tenamiteb’ laj Nefita, ut yoo chaq chixch’utub’ankileb’ laj pleet sa’ jar raqal re lix ch’och’, ut chixk’eeb’al reheb’ li k’anjeleb’aal re pleet, ut chixkawresinkileb’ choq’ re li pleet chi yalb’il anchal xq’e; xb’aan naq a’an kixxaqab’ chaq aatin naq taaruk’ xkik’el laj Moroni.

10 A’b’an k’ehomaq reetal, toj taqil naq maak’a’ rajb’al li k’a’ru kixyeechi’i; a’b’anan kixkawresi rib’ ut eb’ lix teep aj pleet re te’chalq chixpleetinkileb’ laj Nefita.

11 Anajwan moko kiwan ta xnimaleb’ lix teep aj pleet jo’ li ke’wan chaq junxil, xb’aan li k’iila mil li ke’kamsiik chaq xb’aan ruq’eb’ laj Nefita; a’ut us ta k’a’jo’ xnimal xsachikeb’, laj Amalikiah kixch’utub’ jun teep aj pleet sachol ch’oolej xnimal, jo’kan naq moko naxxuwa ta kub’eek sa’ li ch’och’ Tzarahemla.

12 Relik chi yaal, laj Amalikiah ajwi’ kikub’e sa’ xjolomileb’ laj Lamanita. Ut kiwan sa’ ro’ xka’k’aal chihab’ rawa’b’ejileb’ laj raqol aatin; ut kiwan sa’ li kutan ajwi’ a’an naq xe’ok chaq chixtuqub’ankil li na’leb’ chirix li wech’ok-ib’ ke’wan wi’ chirix laj Pahoran, li xb’eenil aj raqol aatin.

13 Ut naq eb’ li winq a’an rey aj winq neke’yehe’ re, ke’rab’i naq chalkeb’ re laj Lamanita chixpleetinkileb’, kik’ulman naq ke’chal xsahileb’ xch’ool; ut ink’a’ ke’raj xchapb’al li k’anjeleb’aal re pleet, xb’aan naq q’axaleb’ xjosq’il rik’in li xb’eenil aj raqol aatin, ut rik’ineb’ ajwi’ laj rahol re li ach’ab’aak, jo’kan naq ink’a’ ke’raj xchapb’al xk’anjeleb’aal re pleet re xkolb’al xtenamiteb’.

14 Ut naq kiril a’in laj Moroni, ut kiril ajwi’ naq chalkeb’ re laj Lamanita sa’ xnub’aal li ch’och’, kik’ulman naq kichal xjosq’il chi numtajenaq xb’aan xjipileb’ xch’ool li tenamit a’an li kik’anjelak chaq chi k’a’jo’ xyalb’al xq’e chixkolb’aleb’ rix; relik chi yaal, kijosq’o’ chi numtajenaq, ut kinujak li raam rik’in josq’il chirixeb’.

15 Ut kik’ulman naq kixtaqla jun tz’iib’anb’il tz’aamahom, rochb’een xyaab’ xkux li tenamit, re laj jolominel re li ch’och’, kixtz’aama naq taaril li tz’iib’anb’il, ut tixk’e xwankil a’an (laj Moroni) re tixmineb’ ru a’an li ke’risi chaq rib’ chixkolb’al rix lix tenamiteb’, malaj tixk’eheb’ chi kamk.

16 Xb’aan naq li kiraj a’an xb’een wa, a’an xk’eeb’al xraqik li wech’ok-ib’ ut jachok-ib’ a’an sa’ xyanq li tenamit; xb’aan naq k’ehomaq reetal, toj aran, a’in li kik’amok chaq re chixjunil lix sachlijikeb’. Ut kik’ulman naq kik’eeman re, jo’ chanru xyaab’ xkux li tenamit.

17 Ut kik’ulman naq laj Moroni kixtaqla naq lix teep aj pleet te’xik chixpleetinkileb’ li rey aj winq a’an, re xt’anb’al lix q’etq’etileb’ ut xtaqenaqil lix wankileb’, ut xkub’sinkileb’ chi ch’och’, malaj ut te’xchap li k’anjeleb’aal re pleet ut te’xxaqab’ li na’leb’ chirix li ach’ab’aak.

18 Ut kik’ulman naq ke’b’eek li teep aj pleet re xpleetinkileb’; ut ke’xt’an chaq lix q’etq’etileb’ ut lix taqenaqil wankileb’, jo’kan naq a’ yaal jo’ ke’xtaqsi xk’anjeleb’aal re pleet, re xpleetinkileb’ lix winq laj Moroni, ke’yok’e’ chaq ut ke’kub’siik chi ch’och’.

19 Ut kik’ulman naq ke’wan kaahib’ mil xkomoneb’ a’an li ke’risi chaq rib’ li ke’t’anje’ chaq rik’in yok’leb’ ch’iich’; ut eb’ laj jolominel reheb’ li ink’a’ ke’kamsiik sa’ pleet ke’chape’ ut ke’tz’ape’ sa’ tz’alam, xb’aan naq moko kitz’aqlok ta hoonal re raqok aatin chirixeb’ sa’ li kutan a’an.

20 Ut li rela’eb’ laj isihom rib’ a’an, re naq ink’a’ te’sak’e’q chi ch’och’ rik’in li yok’leb’ ch’iich’, ke’xq’axtesi rib’ chiru li eetalil re ach’ab’aak, ut kiteneb’aak sa’ xb’eeneb’ xtaqsinkil li eetalil re ach’ab’aak sa’ xb’eeneb’ lix najt xteramil kab’leb’, ut sa’ xtenamiteb’, ut xchapb’al li k’anjeleb’aal re pleet re xkolb’al lix tenamit.

21 Ut chi jo’kan laj Moroni kixk’e xraqikeb’ li rey aj winq a’an, jo’kan naq maajun wan li k’ab’a’inb’il jo’ rey aj winq; ut chi jo’kan kixk’e xraqik lix jipileb’ xch’ool ut xq’etq’etileb’ li ani ke’xye rib’ naq aj taqenaqil kik’eleb’; ke’kub’siik b’an chixtuulanob’resinkil rib’ chanchan lix komoneb’, ut chi pleetik rik’in xkawileb’ xch’ool re te’ach’ab’aaq chiru moosil.

22 K’ehomaq reetal, naq chi jo’kan yoo laj Moroni chixkub’sinkil xwankil li pleet ut li wech’ok-ib’ sa’ xyanq tz’aqal lix tenamit, ut chixk’eeb’aleb’ rub’el xwankil li tuqtuukilal ut li sahil wank, ut chixtusub’ankil li na’leb’ re xkawresinkil li pleetik rik’ineb’ laj Lamanita, k’ehomaq reetal, kik’ulman naq eb’ laj Lamanita ak okenaqeb’ sa’ li ch’och’ Moroni, li wan sa’eb’ li nub’aal chire li palaw.

23 Ut kik’ulman naq eb’ laj Nefita moko tz’aqal ta xkawileb’ xmetz’ew sa’ li tenamit Moroni, jo’kan naq laj Amalikiah kiralinasiheb’ chaq, ut naab’aleb’ kixkamsi. Ut kik’ulman naq laj Amalikiah kireechani li tenamit, relik chi yaal, kireechani chixjunil lix kawresinb’il na’ajeb’.

24 Ut eb’ li ke’eelelik chaq sa’ li tenamit Moroni ke’chal sa’ li tenamit Nefihah, ut jo’kaneb’ ajwi’ li wankeb’ sa’ li tenamit Lehi ke’xch’utub’ rib’, ut ke’xkawresi rib’, ut kawresinb’ileb’ chixk’ulb’aleb’ laj Lamanita sa’ pleet.

25 A’b’anan kik’ulman naq laj Amalikiah ink’a’ kixkanab’eb’ laj Lamanita chi xik chixpleetinkil li tenamit Nefihah; kixk’uulaheb’ b’an taq’a chire li palaw, ut kixkanab’eb’ li winq sa’ li junjunq chi tenamit re xk’uulankil xwankil sa’ xb’een ut re xkolb’aleb’ rix.

26 Ut chi jo’kan kixb’aanu, ut kireechani k’iila tenamit, li tenamit Nefihah, ut li tenamit Lehi, ut li tenamit Morianton, ut li tenamit Omner, ut li tenamit Gid, ut li tenamit Mulek, li wankeb’ chixjunil sa’eb’ li nub’aal sa’ releb’ saq’e chire li palaw.

27 Ut chi jo’kan eb’ laj Lamanita ke’reechani, rik’in xseeb’al xb’alaq’ laj Amalikiah, xk’ihaleb’ li tenamit a’an, rik’in lix teepeb’ li maak’a’ rajlankileb’; ut chixjunileb’ li tenamit a’an k’eeb’ileb’ xkawilal chi chaab’il jo’ chanruheb’ li na’ajej kawresinb’il xb’aan laj Moroni; ut ke’wan chixjunil choq’ kawil na’ajej choq’ reheb’ laj Lamanita.

28 Ut kik’ulman naq ke’b’eek toj sa’ xnub’aal li ch’och’ Naab’alil, ut ke’ralinasiheb’ laj Nefita chiruheb’ ut naab’al ke’xkamsi.

29 A’b’an kik’ulman naq ke’k’ule’ xb’aan laj Teankum, li kikamsink chaq re laj Morianton ut kixram chaq lix tenamit naq ki’eelelik a’an.

30 Ut kik’ulman naq kixram ajwi’ laj Amalikiah, naq yoo chi b’eek rochb’een lix teep aj pleet k’i rajlankileb’, re taareechani li ch’och’ Naab’alil, ut jo’kan ajwi’ li ch’och’ sa’ xjayal lix nim li saq’e.

31 A’b’an k’ehomaq reetal, a’an kixk’ul xsachik li rajom naq kirame’ ru xb’aan laj Teankum ut eb’ lix winq, xb’aan naq a’aneb’ xninqal ru aj pleet, xb’aan naq li junjunq chi winq re laj Teankum naxq’axeb’ ru laj Lamanita sa’ xmetz’eweb’ ut sa’ xseeb’aleb’ chi pleetik, jo’kan naq ke’xtaw xwankil sa’ xb’eeneb’ laj Lamanita.

32 Ut kik’ulman naq ke’xch’i’leheb’, ut chi jo’kan ke’xkamsiheb’ toj reetal naq kiq’ojyino’. Ut kik’ulman naq laj Teankum ut eb’ lix winq ke’xyiib’ lix muheb’aal t’ikr sa’ xnub’aal li ch’och’ Naab’alil; ut laj Amalikiah kixyiib’eb’ lix muheb’aal t’ikr sa’eb’ li nub’aal sa’ samahib’ chire li palaw, ut chi jo’ka’in ke’tiikisiik chaq.

33 Ut kik’ulman naq chirix naq ki’ok q’ojyin, laj Teankum rochb’een lix moos ke’xmuqb’e rib’ ut xkoheb’ chi q’eq, ut ke’ok sa’ xteep laj Amalikiah; ut k’ehomaq reetal, li wara xnumta chaq sa’ xb’eeneb’ sa’ xk’ab’a’ xnimal xtawajikeb’, a’an xb’aan xtawasinkil rib’eb’ ut xb’aan xtiqwal li kutan.

34 Ut kik’ulman naq laj Teankum ki’ok chi muqb’enb’il sa’ xmuheb’aal t’ikr li rey, ut kixk’ob’ sa’ raam rik’in jutz’juukil che’; ut jun kamik naq kixkamsi li rey, jo’kan naq ink’a’ kirajsiheb’ ru lix moos.

35 Ut kisutq’i wi’chik sa’ muqmu rik’in tz’aqal lix teep, ut k’ehomaq reetal, warenaqeb’ lix winq, ut kirajsiheb’ ru ut kixye reheb’ chixjunil li k’a’aq re ru kixb’aanu chaq.

36 Ut kixtaqla naq eb’ lix teep aj pleet yo’on wanqeb’, xb’aan naq maare anchal te’ajq ru laj Lamanita ut te’chalq sa’ xb’eeneb’.

37 Ut chi jo’kan naraqe’ li ro’ xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi; ut chi jo’kan naraqe’ lix kutan laj Amalikiah.