1 Ut anajwan, kik’ulman sa’ li xwaq xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi, k’ehomaq reetal, naq ke’aj ru laj Lamanita sa’ li xb’een eq’la chiru li xb’een po, k’ehomaq reetal, ke’xtaw naq kamenaq laj Amalikiah sa’ xmuheb’aal t’ikr; ut ke’ril ajwi’ naq laj Teankum ak kawresinb’il chixpleetinkileb’ sa’ li kutan a’an.

2 Ut anajwan, naq ke’ril a’in laj Lamanita ke’chal xxiweb’, ut ke’xkanab’ rajomeb’ naq te’b’eeq sa’ li ch’och’ sa’ xjayal lix nim li saq’e, ut ke’xsutq’isi rib’ rochb’een chixjunil lix teepeb’ aj pleet sa’ li tenamit Melek, ut ke’xsik’ xkolb’al rib’eb’ sa’ lix kawresinb’il na’ajeb’.

3 Ut kik’ulman naq li riitz’in laj Amalikiah kixaqab’aak choq’ rey sa’ xb’een li tenamit; ut a’an aj Ammoron xk’ab’a’; chi jo’kan li rey aj Ammoron, riitz’in li rey aj Amalikiah, kixaqab’aak re taa’awa’b’ejinq sa’ xna’aj.

4 Ut kik’ulman naq kixtaqla naq eb’ lix tenamit te’xk’uula xwankileb’ sa’ xb’eeneb’ li tenamit a’an, li ke’reechani chaq rik’in xhoyb’al li kik’; xb’aan naq maajun tenamit ke’reechani chaq chi ink’a’ kisach naab’al xkik’eleb’.

5 Ut anajwan, laj Teankum kiril naq eb’ laj Lamanita k’eek’ookeb’ xch’ool chixk’uulankil xwankil sa’ xb’eeneb’ li tenamit a’an li ke’reechani chaq, ut li jar raqal chi ch’och’ a’an li ke’ru chireechaninkil; ut xb’aan naq kiril ajwi’ naq q’axal k’iheb’ rajlankil, laj Teankum kixk’oxla naq moko aajel ta ru naq tixyal xpleetinkileb’ sa’ lix kawil na’ajeb’.

6 Kixk’uulaheb’ b’an lix winq chixsutam, chanchan naq yoo chixkawresinkil rib’ chi pleetik; relik chi yaal, ut yaal ajwi’ naq yoo chixkawresinkil rib’ re xkolb’al rib’ chiruheb’, rik’in xtuub’ankil li xaqxookil tz’ak chixsutam, ut xkawresinkileb’ li kolb’a-ib’ na’ajej.

7 Ut kik’ulman naq kiwan chi jo’kan chixkawresinkil rib’ choq’ re li pleet toj reetal naq laj Moroni kixtaqla jun nimla ch’uut chi winq re xk’eeb’al xkawilal lix teep aj pleet.

8 Ut laj Moroni kixk’e ajwi’ xtaqlankil naq tixk’uulaheb’ chixjunil li preex li te’t’ane’q sa’ ruq’; xb’aan naq jo’eb’ laj Lamanita ak ke’xchap k’iila preex, naq a’an tixk’uula chixjunileb’ laj preex xkomoneb’ laj Lamanita, choq’ reeqajeb’ li ani ke’xchap chaq laj Lamanita.

9 Ut kixk’e ajwi’ xtaqlankil naq tixk’e xkawilal li ch’och’ Naab’alil, ut tixkol rix lix ka’ch’inal ru na’ajej li naxik sa’ li ch’och’ sa’ xjayal lix nim li saq’e, maare anchal eb’ laj Lamanita te’xtaw li na’ajej a’an ut te’wanq xwankil chixrahob’tesinkileb’ chaq chi ka’pak’al.

10 Ut laj Moroni kixtaqla ajwi’ xtz’aamankil chiru naq xaqxooq xch’ool sa’ xk’uulankil xwankil sa’ xb’een li jun raqal chi ch’och’ a’an, ut naq chi yalaq chan ru tixsik’ chan ru xrahob’tesinkileb’ laj Lamanita sa’ li jun raqal a’an, a’ yaal jo’ chanru taaruuq chiru, re naq maare rik’in k’oxlanb’il pleet malaj jalan chik chan ru naq taareechani wi’chik eb’ li tenamit a’an li ke’maq’e’ chaq sa’ ruq’eb’; ut naq tixk’e xkawilal ut tixnima xmetz’eweb’ li tenamit sa’ xsutam, li ink’a’ ke’t’ane’ chaq sa’ ruq’eb’ laj Lamanita.

11 Ut kixye ajwi’ re: Tink’ulunq raj aawik’in, a’b’anan k’e reetal, chalenaqeb’ laj Lamanita sa’ qab’een sa’eb’ lix nub’aal li ch’och’ chixk’atq li palaw sa’ rokeb’ saq’e, ut k’e reetal, xik we chixpleetinkileb’, jo’kan naq ink’a’ ninru chi k’ulunk aawik’in.

12 Anajwan, li rey (aj Ammoron) ak ki’el chaq sa’ li ch’och’ Tzarahemla, ut ak kixk’e chixnaw li rixaqil li rey chirix xkamik li ras, ut kixch’utub’ chaq jun nimla teep chi winq, ut koxb’eeq chixpleetinkileb’ laj Nefita sa’eb’ li nub’aal chixk’atq li palaw sa’ rokeb’ saq’e.

13 Ut chi jo’kan yoo chixyalb’al xq’e chixrahob’tesinkileb’ laj Nefita, ut chixjalb’ehinkil jun raqal reheb’ lix teep sa’ li jun raqal chi ch’och’ a’an, ut kixtaqlaheb’ ajwi’ li ani kixkanab’ chaq chireechaninkileb’ li tenamit li ak kixchap chaq, naq jo’kan ajwi’ te’xrahob’tesiheb’ laj Nefita sa’eb’ li nub’aal chixk’atq li palaw sa’ releb’ saq’e, ut te’reechani xch’och’eb’ a’ yaal jo’ chanru kiru chiruheb’, jo’ chanru xwankileb’ lix teep aj pleet.

14 Ut chi jo’kan xiwxiw li ke’wan wi’ laj Nefita sa’ xraqik li xwaq xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi.

15 A’b’anan, kik’ulman sa’ xwuq xka’k’aal chihab’ rawa’b’ejileb’ laj raqol aatin, naq laj Teankum, chi taqlanb’il xb’aan laj Moroni—a’an li kixaqab’ank chaq reheb’ li teep aj pleet re xkolb’al rix lix nub’aal li ch’och’ sa’ xtz’e li saq’e ut sa’ rokeb’ saq’e, ut kixtikib’ chaq xb’eenik sa’ xjayal li ch’och’ Naab’alil, re taaruuq tixtenq’a laj Teankum, rik’ineb’ lix winq, sa’ reechaninkil wi’chik li tenamit li ke’sach chaq chiruheb’—

16 Ut kik’ulman naq laj Teankum kixk’ul xtaqlankil naq tixpleeti li tenamit Mulek, ut taareechani wi’chik wi taaruuq.

17 Ut kik’ulman naq laj Teankum kixkawresi rib’ chixpleetinkil li tenamit Mulek, ut koxb’eeq rochb’een lix teep aj pleet re xpleetinkileb’ laj Lamanita; a’b’anan kiril naq moko taaruhanq ta naq taanumtaaq sa’ xb’eeneb’ naq wankeb’ sa’ lix kawresinb’il na’ajeb’; jo’kan naq kixkanab’ li rajom, ut kisutq’i wi’chik sa’ li tenamit Naab’alil re royb’eninkil xchalik laj Moroni, re taaruuq tixk’ul xkomon xmetz’ew lix teep aj pleet.

18 Ut kik’ulman naq laj Moroni kiwulak rochb’een lix teep aj pleet sa’ li ch’och’ Naab’alil, naq yoo chi nach’ok xraqik li xwuq xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi.

19 Ut sa’ xtiklajik li xwaqxaqib’ xka’k’aal chihab’, laj Moroni ut laj Teankum ut naab’al reheb’ li xb’eenil aj taqlanel reheb’ ke’ch’utla re xk’uub’ankil xna’leb’ chirix li pleet—k’a’ru te’xb’aanu re te’elq chaq laj Lamanita chixpleetinkileb’; malaj chan tana’ ru naq te’ruuq chixq’unb’esinkileb’ xch’ool chi elk chaq sa’ xkawil na’ajeb’, re taaruuq te’xtaw xwankil sa’ xb’eeneb’ ut te’xchap wi’chik li tenamit Mulek.

20 Ut kik’ulman naq ke’xtaqlaheb’ aj taql rik’in li teep aj pleet reheb’ laj Lamanita, li yoo chixkolb’al rix li tenamit Mulek, rik’in li najolomin reheb’, a’an laj Jakob xk’ab’a’, ut ke’xtz’aama chiru naq taa’elq rochb’eeneb’ lix teep aj pleet re xkulb’aleb’ sa’ li helhookil ch’och’ sa’ xyiheb’ li wiib’ chi tenamit. A’b’an k’ehomaq reetal, laj Jakob, a’an aj Tzoramita, ut ink’a’ kiraj elk rik’in lix teep aj pleet re xkulb’aleb’ sa’ li helhookil ch’och’.

21 Ut kik’ulman naq laj Moroni, rik’in naq maak’a’ xyo’onihom xk’ulb’aleb’ sa’ juntaq’eetalil, chi jo’kan kixk’e xch’ool chirix jun k’uub’anb’il na’leb’ re taaruuq tixb’alaq’iheb’ laj Lamanita chi elk chaq sa’ lix kawil na’ajeb’.

22 Jo’kan naq kixtaqla naq laj Teankum tixk’am chirix jun ch’ina ch’uut chi winq ut te’b’eeq taq’a chixk’atq xmaril li palaw; ut laj Moroni ut lix teep aj pleet, chi q’eq, ke’b’eek sa’ li yamyookil ch’och’, chirix li tenamit Mulek sa’ rokeb’ saq’e; ut chi jo’kan wulajaq chik, naq eb’ laj k’aak’alenel xkomoneb’ laj Lamanita ke’xk’e reetal laj Teankum, xkoheb’ sa’ aanil ut ke’xye re laj Jakob, li najolomin reheb’.

23 Ut kik’ulman naq koxe’b’eeq li teepeb’ aj pleet reheb’ laj Lamanita re xpleetinkil laj Teankum, ut ke’xk’oxla xb’aan rajlankileb’ numtaak sa’ xb’een laj Teankum, xb’aan naq moko k’i ta rajlankil a’an. Ut naq laj Teankum kirileb’ li teepeb’ aj pleet reheb’ laj Lamanita chi chalk sa’ xb’een, ki’ok chi q’ajk taq’a chire li palaw, sa’ xjayal lix nim li saq’e.

24 Ut naq ke’ril laj Lamanita naq ki’ok chi eelelik, kik’ulman naq ke’chal xkawileb’ xch’ool ut ke’xtaaqe rik’in xmetz’eweb’. Ut naq laj Teankum yoo chi jo’kan chixnajtob’resinkileb’ laj Lamanita, li yookeb’ chixtaaqenkil chi maak’a’ xyaalal, k’ehomaq reetal, laj Moroni kixtaqla naq jun raqal lix teep aj pleet li wan rik’in toxe’b’eeq ut te’ok sa’ li tenamit, ut te’reechani.

25 Ut chi jo’kan ke’xb’aanu, ut ke’xkamsi chixjunileb’ li kanab’anb’ileb’ chixkolb’al rix li tenamit; relik chi yaal, chixjunileb’ li ink’a’ ke’raj xq’axtesinkil xk’anjeleb’aal re pleet.

26 Ut chi jo’kan laj Moroni kireechani li tenamit Mulek rik’in jun raqal lix teep aj pleet, naq yoo chi b’eek rik’in li jun ch’ol chik re xk’ulb’aleb’ laj Lamanita naq te’sutq’iiq chaq sa’ xtaaqenkil laj Teankum.

27 Ut kik’ulman naq eb’ laj Lamanita ke’xtaaqe laj Teankum toj reetal naq ke’nach’ok chaq rik’in li tenamit Naab’alil, toja’ ut naq ke’k’ule’ xb’aan laj Lehi ut jun ch’ina teep aj pleet, li kikanab’aak chaq chixkolb’al rix li tenamit Naab’alil.

28 Anajwan ut k’ehomaq reetal, naq eb’ li xb’eenileb’ aj taqlanel reheb’ laj Lamanita ke’ril laj Lehi rochb’een lix teep aj pleet chi chalk sa’ xb’eeneb’, ke’eelelik chi k’a’jo’ xsachikeb’ xna’leb’, maare anchal ink’a’ te’xtaw li tenamit Mulek chi maji’ neke’tawe’ xb’aan laj Lehi, xb’aan naq tawajenaqeb’ xb’aan xb’eenikeb’, ut hiltesinb’ileb’ lix winq laj Lehi.

29 Anajwan moko neke’xnaw ta laj Lamanita naq laj Moroni wan chirixeb’ rochb’een lix teep aj pleet, ut ka’ajwi’ laj Lehi ut eb’ lix winq neke’xxuwa.

30 Anajwan laj Lehi moko kiraj ta xtawb’aleb’ toj reetal naq te’k’ule’q xb’aan laj Moroni ut lix teep aj pleet.

31 Ut kik’ulman naq moko najt ta ke’xsutq’isi rib’ laj Lamanita naq ke’kana chi sutsuukeb’ rix xb’aaneb’ laj Nefita, xb’aaneb’ lix winq laj Moroni chi junpak’al, ut lix winq laj Lehi chi junpak’al chik, chixjunileb’ hiltesinb’ileb’ ut tz’aqaleb’ xmetz’ew; a’b’an eb’ laj Lamanita tawajenaqeb’ xb’aan xnajtil xb’eenikeb’.

32 Ut laj Moroni kixtaqlaheb’ lix winq naq te’t’ane’q sa’ xb’eeneb’ toj reetal naq te’xq’axtesi xk’anjeleb’aal re pleet.

33 Ut kik’ulman naq laj Jakob, rik’in naq a’an najolomink reheb’, ut a’an ajwi’ aj Tzoramita, ut ink’a’ naru xkub’sinkil xch’ool, kixk’ameb’ xb’e laj Lamanita chi pleetik chi numtajenaqeb’ xjosq’il rik’in laj Moroni.

34 Rik’in naq laj Moroni wan sa’ li b’e te’b’eeq wi’, chi jo’kan laj Jakob k’eek’o xch’ool chixkamsinkileb’ ut chixpaab’al xb’e toj sa’ li tenamit Mulek. A’b’an k’ehomaq reetal, laj Moroni ut eb’ lix winq kaweb’ wi’chik xmetz’ew, jo’kan naq ink’a’ ke’xkanab’ rib’ chi tiikisiik xb’aaneb’ laj Lamanita.

35 Ut kik’ulman naq ke’pleetik chi ka’pak’al chi numtajenaqeb’ xjosq’il, ut ke’kamsiik naab’al chi ka’pak’al; relik chi yaal, ut kitoch’e’ laj Moroni ut kikamsiik laj Jakob.

36 Ut laj Lehi kixtiikisiheb’ chirix chi k’a’jo’ xjosq’il rik’ineb’ lix kawil winq, jo’kan naq eb’ laj Lamanita li wankeb’ chi ixej ke’xq’axtesi xk’anjeleb’aal re pleet, ut li jun ch’ol chik, rik’in naq sachsookeb’ xna’leb’ chi us, ink’a’ neke’xnaw ma te’xik malaj te’sak’oq.

37 Anajwan laj Moroni naq kiril xsachikeb’ xna’leb’, a’an kixye reheb’: Wi teek’am chaq lee k’anjeleb’aal re pleet ut teeq’axtesi, k’ehomaq reetal, taqakanab’ xhoyb’al eekik’el.

38 Ut kik’ulman naq chirix naq ke’rab’i laj Lamanita li aatin a’in, eb’ li xb’eenil aj taqlanel reheb’, chixjunileb’ li ink’a’ ke’kamsiik chaq, ke’chal ut ke’xkut xk’anjeleb’aal re pleet chiroq laj Moroni, ut ke’xtaqlaheb’ ajwi’ lix winq naq te’xb’aanu chi jo’kan.

39 A’b’anan k’ehomaq reetal, ke’wan naab’al li ink’a’ ke’raj, ut eb’ li ink’a’ ke’ajok re xq’axtesinkileb’ lix yok’leb’ ch’iich’ ke’chape’ ut ke’b’ak’e’, ut ke’isiik chaq xk’anjeleb’aal re pleet, ut ke’mine’ ru chi b’eek rochb’eeneb’ li ras riitz’in toj sa’ li ch’och’ Naab’alil.

40 Anajwan ut lix k’ihaleb’ li preex li ke’chape’ kixq’ax xk’ihaleb’ li ke’kamsiik, relik chi yaal, kixq’ax xk’ihaleb’ li ke’kamsiik chi ka’pak’al.