1 Anajwan kik’ulman naq chirix naq laj Moroni kixk’ul li hu a’in q’axal wi’chik kijosq’o’, xb’aan naq kixnaw naq laj Ammoron tz’aqal re ru xnawom chirix xb’alaq’; relik chi yaal, kixnaw naq laj Ammoron naxnaw naq moko tiik ta ru li na’leb’ ki’ok wi’ chaq sa’ pleet rik’in lix tenamit laj Nefi.

2 Ut a’an kixye: K’ehomaq reetal, ink’a’ tinq’ajsi li preex chiqib’il qib’ rik’in laj Ammoron, ka’ajwi’ wi a’an taarisi li rajom, jo’ kinye sa’ inhu; xb’aan naq ink’a’ tinkanab’ re a’an naq tixtaw chik xwankil chiru li ak xk’ul.

3 K’ehomaq reetal, ninnaw li na’ajej b’ar wi’ neke’xk’aak’ale laj Lamanita lin tenamit li ke’xk’am chi preexil; ut jo’ laj Ammoron ink’a’ tixk’e we li xinye sa’ inhu, k’ehomaq reetal, tink’e re a’an jo’ chanru li waatin; relik chi yaal, tinsik’ xkamikeb’ toj reetal naq te’xtz’aama tuqtuukilal.

4 Ut anajwan kik’ulman naq chirix naq kixye laj Moroni li aatin a’in, kixtaqla sik’ok sa’ xyanqeb’ lix winq, re naq maare tixtaw junaq winq ralal xk’ajol laj Laman sa’ xyanqeb’.

5 Ut kik’ulman naq ke’xtaw jun, aj Laman xk’ab’a’; ut a’an jun reheb’ lix moos li rey li kikamsiik chaq xb’aan laj Amalikiah.

6 Anajwan laj Moroni kixtaqla naq laj Laman ut junjunq rajlankileb’ lix winq te’xik rik’ineb’ laj k’aak’alenel li wankeb’ sa’ xb’eeneb’ laj Nefita.

7 Anajwan eb’ laj Nefita k’aak’alenb’ileb’ sa’ li tenamit Gid; jo’kan naq laj Moroni kixsik’ ru laj Laman ut kixtaqla naq te’xik junjunq rajlankileb’ li winq chirix.

8 Ut naq ki’ewu laj Laman xko’o rik’ineb’ laj k’aak’alenel li wankeb’ sa’ xb’eeneb’ laj Nefita; ut k’ehomaq reetal, ke’ril chi chalk ut ke’xb’oq; a’b’an a’an kixye reheb’: Mexxuwak; k’ehomaq reetal, laa’in aj Lamanita. K’ehomaq reetal, laa’o xoo’eelelik chaq rik’ineb’ laj Nefita, ut warenaqeb’; ut k’ehomaq reetal naq xqamaq’ xkomon lix viin ut xqak’am chaq qik’in.

9 Anajwan naq eb’ laj Lamanita ke’rab’i li aatin a’in ke’xk’ul rik’in sahil ch’oolejil, ut ke’xye re: K’e chaq qe xkomon lee viin, re taaruuq too’uk’aq; sa sa’ qach’ool naq xek’am chi jo’kan li viin eerik’in, xb’aan naq lub’luuko.

10 A’b’an laj Laman kixye reheb’: Chiqak’uula xkomon li qaviin toj reetal naq tooxik chixk’ulb’aleb’ laj Nefita sa’ pleet. A’b’an li yehom a’in yal kixnima ratawomeb’ chiruk’b’al xkomon li viin;

11 Xb’aan naq lub’luuko, chankeb’; jo’kan ut chiqak’ul xkomon li viin, ut moqon taqak’ul viin chi jek’inb’il qe, li tixk’e qametz’ew chi xik re xpleetinkileb’ laj Nefita.

12 Ut laj Laman kixye reheb’: Naru nekeb’aanu jo’ chanru nekeraj.

13 Ut kik’ulman naq ke’ruk’ xkomon li viin chi moko ramb’il ta; ut chaab’il xsahil choq’ reheb’, jo’kan naq q’axal wi’chik ke’ruk’; ut kaw, rik’in naq ak k’uub’anb’il xkawil.

14 Ut kik’ulman naq ke’uk’ak ut ke’xsahila xch’ooleb’, ut moqon ak kalajenaqeb’ chixjunileb’.

15 Ut anajwan naq ke’ril laj Laman ut eb’ lix winq naq kalajenaqeb’ chixjunileb’, ut naq cham xwarjikeb’, ke’sutq’i rik’in laj Moroni ut ke’xye re chixjunil li k’a’aq re ru kik’ulman chaq.

16 Anajwan ut kiwan a’in jo’ chanru k’uub’anb’il xb’aan laj Moroni. Ut laj Moroni ak kixkawresiheb’ lix winq rik’in k’anjeleb’aal re pleet; ut xko’o sa’ li tenamit Gid, naq cham xwarjikeb’ laj Lamanita ut kalajenaqeb’, ut kixkuteb’ li k’anjeleb’aal re pleet rik’ineb’ li preex, jo’kan naq chixjunileb’ wankeb’ chik xk’anjeleb’aal re pleet;

17 Relik chi yaal, jo’kaneb’ ajwi’ li rixqilaleb’, ut chixjunil xkomoneb’ lix kok’aleb’, jo’ k’ihal li ke’ru chiroksinkil k’anjeleb’aal re pleet, naq laj Moroni kixchoy xk’eeb’al k’anjeleb’aal re pleet re chixjunileb’ li preex a’an; ut chixjunil li k’a’aq re ru a’an kib’aanuman chi q’axal ch’anch’o.

18 A’b’anan wi ta ke’rajsiheb’ ru laj Lamanita, k’ehomaq reetal naq kalajenaqeb’ ut eb’ laj Nefita ke’ru raj chixkamsinkileb’.

19 A’b’an k’ehomaq reetal, moko a’in ta li kiraj laj Moroni; a’an ink’a’ nasaho’ xch’ool rik’in kamsink chi moko hoyok kik’; kisaho’ b’an xch’ool rik’in xkolb’al lix tenamit chiru li sache’k; ut xb’aan a’in, re naq ink’a’ tixk’ul sa’ xb’een li moko tiik ta, ink’a’ kiraj t’ane’k sa’ xb’eeneb’ laj Lamanita ut xsachb’aleb’ sa’ xkalajikeb’.

20 A’b’an ak kixk’ul chaq li naraj; xb’aan naq kixk’e li k’anjeleb’aal re pleet reheb’ li preex a’an xkomoneb’ laj Nefita li wankeb’ sa’ xyanq xtz’akil li tenamit; ut kixk’eheb’ xwankil chireechaninkil li jar na’ajej a’an li wankeb’ sa’ xyanq li xaqxookil tz’ak.

21 Toja’ ut naq kixtaqlaheb’ li winq li wankeb’ rik’in naq te’najto’q jun yokb’ rik’ineb’, ut te’xsutub’ rix li teep aj pleet reheb’ laj Lamanita.

22 Anajwan k’ehomaq reetal, kib’aanuman a’in chi q’eq, ut chi jo’kan naq ke’aj ru laj Lamanita eq’la ke’xk’e reetal naq sutsuukeb’ xb’aaneb’ laj Nefita chirix, ut naq eb’ lix preex wankeb’ xk’anjeleb’aal re pleet chi sa’.

23 Ut chi jo’kan ke’ril naq eb’ laj Nefita wankeb’ xwankil sa’ xb’eeneb’; ut sa’ li wankeb’ wi’ ke’xtaw naq moko aajel ta ru naq te’xpleetiheb’ laj Nefita; jo’kan naq eb’ li xb’eenil aj taqlanel reheb’ ke’relaji lix k’anjeleb’aaleb’ re pleet, ut ke’xk’am chaq ut ke’xkut chiroqeb’ laj Nefita, ut ke’xtz’aama uxtaan.

24 Anajwan k’ehomaq reetal, a’in li rajom laj Moroni. A’an kixchapeb’ choq’ preex re pleet, ut kireechani li tenamit, ut kixtaqla rach’ab’ankil chixjunileb’ li preex, li ani aj Nefita; ut eb’ a’an ke’xjunaji rib’ rik’in lix teep aj pleet laj Moroni, ut k’a’jo’ naq ke’xk’e xkawilal lix teep aj pleet.

25 Ut kik’ulman naq kixtaqlaheb’ laj Lamanita li kixchap chaq choq’ preex, naq te’xtikib’ jun k’anjel re xk’eeb’al xkawilaleb’ li kawresinb’il na’ajej sa’ xsutam li tenamit Gid.

26 Ut kik’ulman naq chirix naq kixk’e xkawilal li tenamit Gid, jo’ chanru li rajom, kixtaqla naq te’k’ame’q lix preex sa’ li tenamit Naab’alil; ut kixk’aak’ale li tenamit a’an rik’in jun teep q’axal kaw.

27 Ut kik’ulman naq eb’ a’an, us ta k’a’jo’ xk’ihal li b’alaq’ik ke’xyal laj Lamanita, ke’xk’uula ut ke’xkol rix chixjunil li preex li ke’xchap chaq, ut ke’xk’uula ajwi’ chixjunil li ch’och’ ut li wankilal li ke’xchap wi’ chaq chik.

28 Ut kik’ulman naq eb’ laj Nefita ke’ok wi’chik chi q’axok-u, ut chixk’ulb’al wi’chik li k’a’ru xk’ulub’eb’ ut li kanab’anb’ileb’ chixb’aanunkil.

29 K’iila sut ke’xyal laj Lamanita xsutinkileb’ rix chi q’eq, a’b’an sa’ xyalb’al a’in k’iila preex ke’chape’ reheb’.

30 Ut k’iila sut ke’xyal xk’eeb’al lix viin reheb’ laj Nefita, re te’ruuq chixsachb’aleb’ rik’in li b’an re kamsink malaj rik’in li kalaak.

31 A’b’an k’ehomaq reetal, eb’ laj Nefita moko timileb’ ta chixk’oxlankil li Qaawa’ lix Dios sa’ xq’ehil lix ch’a’ajkilaleb’. Moko kiru ta naq ke’chape’ sa’ xra’aleb’; relik chi yaal, ink’a’ ke’xkanab’ rib’ chixyalb’al lix viin, ka’ajwi’ wi xe’xk’e xb’een wa re junjunq reheb’ li preex aj Lamanita.

32 Ut chi jo’kan ke’ril rib’ naq maajun b’an re kamsink taak’eemanq sa’ xyanqeb’; xb’aan naq wi lix viin tixkamsi jun aj Lamanita, tixkamsi ajwi’ jun aj Nefita; ut chi jo’kan ke’xyal rix chixjunil li ruk’a li nakaltesin.

33 Ut anajwan kik’ulman naq ki’aje’ ru naq laj Moroni tixkawresi rib’ re xpleetinkil li tenamit Morianton; xb’aan naq k’ehomaq reetal, eb’ laj Lamanita, rik’in xk’anjeleb’, ke’xk’e xkawilal li tenamit Morianton toj reetal naq q’axal kawil na’ajej a’an.

34 Ut junelik yookeb’ chixk’amb’al chaq li ak’ teep sa’ li tenamit a’an, jo’ ajwi’ chi ak’il li k’a’ru nak’anjelak reheb’.

35 Ut chi jo’kan kiraqe’ li xb’ele xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi.