1 Thiab nim no tau muaj tias nyob rau thaum pib xyoo thib peb caug ntawm cov neeg txiav txim txoj kev kav, nyob rau hnub xiab ob ntawm thawj lub hlis, Maulaunais tau txais Hilamas ib tsab ntawv, qhia txog tej hauj lwm ntawm cov neeg uas nyob rau ces kaum av ntawd.

2 Thiab cov no yog tej lus uas nws tau sau, hais tias: Kuv tus tij laug, Maulaunais uas kuv hlub, nyob hauv tus Tswv thiab hauv peb tej kev txom nyem ntawm peb tej tsov rog; saib seb, kuv tus tij laug uas kuv hlub es, kuv muaj tej yam qhia koj txog peb tej kev ua rog nyob rau feem av ntawm no.

3 Saib seb, ob txhiab tus tub ntawm cov neeg uas Amoos tau coj tawm pem thaj av Nifais los—niam no koj tau paub tias cov no yog Lamas tej xeeb ntxwv, uas yog tus tub hlob ntawm peb yawg koob Lihais.

4 Nim no tsis tas kuv yuav rov qab qhia koj txog lawv tej kev li kev cai los sis lawv tej kev tsis ntseeg, vim koj twb paub txog ib puas yam tsav no lawm—

5 Yog li ntawd nws txaus kom kuv qhia koj tias ob txhiab tus tub hluas no tau nqa lawv tej cuab yeej ua rog, thiab tau xav kom kuv ua lawv tus thawj coj; thiab peb tau tawm tuaj tiv thaiv peb lub teb chaws.

6 Thiab nim no koj kuj tau paub txog txoj kev khi lus uas lawv tej txiv tau khi, tias lawv yuav tsis nqa lawv tej cuab yeej ua rog tawm tsam lawv tej kwv tij kom muaj ntshav nrog.

7 Tiam sis nyob rau hauv xyoo thib nees nkaum thiab rau, thaum lawv tau pom peb tej kev kub ntxhov thiab peb tej kev txom nyem rau lawv, lawv twb tau yuav luag rhuav txoj kev khi lus uas lawv tau khi lawm thiab yuav luag nqa lawv tej cuab yeej ua rog tiv thaiv peb.

8 Tiam sis kuv tsis kam cia lawv kom lawv rhuav qhov kev khi lus no uas lawv tau khi lawm, xav tias Vajtswv yuav txhawb peb lub dag lub zog, kawg tias vim yog txoj kev coj lo lus lees tseg uas lawv tau lees lawm peb thiaj tsis raug sab ntxiv lawm.

9 Tiam sis saib seb, muaj ib yam dab tsi ntawm no uas peb yuav muaj kev xyiv fab heev. Vim saib seb, nyob rau hauv xyoo nees nkaum thiab rau, kuv, Hilamas, tau coj pem hau ntej ob txhiab tus tub hluas mus rau lub nroog Yudais, mus pab Eethipas, tus uas koj tau tsa ua ib tug thawj coj kav cov neeg nyob rau feem av ntawd.

10 Thiab kuv tau koom kuv ob txhiab tus tub, (vim lawv tau tsim nyog hu ua tej tub) rau tej tub rog ntawm Eethipas, ntawm lub zog uas Eethipas tau zoo siab kawg nkaus li rau; vim saib seb, nws tej tub rog tau tsawg tuaj los ntawm cov Neeg Lamas vim lawv tej tub rog tau tua peb tej neeg coob, qhov uas peb yuav tsum txom nyem siab.

11 Txawm li ntawd los, peb kuj muaj kev zoo siab nyob hauv qhov no, tias lawv tau tuag rau txoj kev tiv thaiv lawv lub teb chaws thiab ntawm lawv tus Vajtswv, muaj tseeb tiag, thiab lawv zoo siab.

12 Thiab cov Neeg Lamas kuj tau txhom coob tug ua neeg raug txim, tag nrho cov uas yog thawj nom peb, vim lawv tsis tau tseg lwm cov cia muaj sia nyob li. Thiab peb xav tias nim no nyob lub sij hawm no lawv nyob hauv thaj av Nifais lawm; nws yuav yog li ntawd yog tias lawv tsis tau raug tua.

13 Thiab nim no cov no yog tej nroog uas cov Neeg Lamas txeeb tau los ntawm txoj kev ua kom nqaij ntuag ntshav nrog coob leej ntawm peb tej neeg uas siab muaj zog.

14 Thaj av Meethais, los sis lub nroog Meethais, thiab lub nroog Xi-elas, thiab lub nroog Khumenais, thiab lub nroog Eethiphalas.

15 Thiab cov no yog cov nroog uas lawv txeeb tau thaum kuv tuaj txog rau lub nroog Yudais; thiab kuv nrhiav pom Eethipas thiab nws cov neeg tab tom ua hauj lwm hnyav txhim kho lub nroog.

16 Muaj tseeb tiag, thiab lawv tau txom nyem siab hauv sab nqaij tawv thiab hauv sab ntsuj plig, vim lawv tau tawm tsam yam tsis ntshai li thaum nruab hnub thiab ua hauj lwm thaum tsaus ntuj kom tswj tuav tau lawv tej nroog; thiab li no lawv tau raug tej kev txom nyem loj ntawm txhua yam.

17 Thiab nim no lawv tau txiav txim siab ua kom yeej nyob hauv qhov chaw no los sis tuag xwb; yog li ntawd koj yuav xav tias cov nyuag tub rog yau uas kuv tau coj nrog kuv, muaj tseeb tiag, kuv cov tub ntawd, tau muab tej kev cia siab loj thiab txoj kev xyiv fab heev rau lawv.

18 Thiab nim no tau muaj tias thaum cov Neeg Lamas tau pom tias Eethipas tau txais ib qho zog loj rau nws cov tub rog, lawv tau raug yuam los ntawm Amauloos tej lus txib kom tsis txhob tuaj tawm tsam lub nroog Yudais, los sis tsis ua rog, tawm tsam peb.

19 Thiab li no peb tau koob hmoov los ntawm tus Tswv; vim yog lawv tau tuaj tawm tsam peb thaum lub caij uas peb tsis muaj zog tej zaum lawv yeej yuav tau ua kom peb tej tub rog yau puas tsuaj; tiam sis li no peb thiaj tau raug cawm dim.

20 Lawv tau raug Amauloos txib kom tswj tuav cov nroog uas lawv txeeb tau lawm. Thiab li no tau xaus xyoo thib nees nkaum thiab rau. Thiab nyob rau thaum pib xyoo thib nees nkaum thiab xya peb tau npaj peb tej nroog thiab peb tus kheej rau txoj kev tiv thaiv.

21 Nim no peb xav kom cov Neeg Lamas tuaj rau saum peb; vim peb tsis xav mus tawm tsam rau saum lawv nyob hauv lawv tej chaw tiv thaiv.

22 Thiab tau muaj tias peb tau tso neeg ua tub sab rau ib puag ncig nraud, mus saib tej kev txawv txav ntawm cov Neeg Lamas, kom lawv yuav hla tsis tau peb hmo ntuj los sis nruab hnub tuaj tawm tsam peb lwm cov nroog uas nyob sab pem toj.

23 Vim peb paub tias nyob rau hauv cov nroog ntawd lawv tseem tsis tau muaj zog txaus yuav ntsib tau lawv; yog li ntawd peb tau xav tias kheev lam lawv yuav tuaj hla ntawm peb mus, ces yuav tawm tsam lawv tom lawv qab tuaj, thiab li no yuav tav tau lawv tom qab tuaj tib lub sij hawm ntawd lawv ho raug ntsib tom hauv ntej tuaj thiab. Peb tau xav tias peb yuav kov yeej lawv; tiam sis saib seb, peb tsis tau txais li peb siab xav no.

24 Lawv tsis kam hla peb nrog tag nrho lawv tej tub rog, thiab lawv kuj tsis kam cia ib feem tuaj li, lawv ntshai tsam yuav tsis muaj zog txaus thiab lawv yuav swb.

25 Thiab lawv kuj tsis kam nqis mus lawm nram lub nroog Xalahelas; thiab lawv kuj tsis kam hla tus hau dej Xidoos, mus rau lub nroog Nifaihas.

26 Thiab li no, nrog lawv tej tub rog, lawv tau txiav txim siab tswj tuav cov nroog uas lawv txeeb tau lawm.

27 Thiab nim no tau muaj tias nyob rau hauv lub ob hlis xyoo no, kuv ob txhiab leej tub ntawd tej txiv tau nqa tej khoom noj khoom siv ntau yam tuaj rau peb.

28 Thiab kuj tau xa ob txhiab tus neeg tom thaj av Xalahelas tuaj rau peb thiab. Thiab li no peb tau npaj tau kaum txhiab leej neeg, thiab tej khoom noj khoom siv rau lawv, thiab kuj rau lawv tej poj niam thiab lawv tej me nyuam.

29 Thiab cov Neeg Lamas, tau pom peb tej tub rog tau ntau zuj zus txhua hnub li no, thiab tej khoom noj khoom siv tuaj pab peb, lawv tau pib txhawj ntshai, thiab tau pib maj nrawm nroos, saib puas yuav ua tau kom peb txoj kev txais tej khoom noj khoom siv thiab dag zog tu.

30 Nim no thaum peb tau pom tias cov Neeg Lamas tau pib txhawj txog tej yam no, peb tau xav siv ib qho tswv yim rau lawv; yog li ntawd Eethipas tau txib kom kuv nrog kuv cov tub me me mus rau ib lub nroog nyob ze, kom zoo li peb ris khoom noj khoom siv mus rau lub nroog nyob ze ntawd.

31 Thiab peb yuav tsum mus ze rau ntawm lub nroog Eethiphalas, kom zoo li peb tab tom mus rau lub nroog uas nyob tom ntej, uas nyob ze ntug hiav txwv.

32 Thiab tau muaj tias peb tau tawm mus li ntawd, yam li uas peb ris tej khoom noj khoom siv, mus rau lub nroog ntawd.

33 Thiab tau muaj tias Eethipas tau nrog nws cov tub rog ib feem tawm mus, tseg loo cov uas seem tswj tuav lub nroog. Tiam sis nws tsis tawm mus txog thaum uas kuv twb tau nrog kuv tej tub rog me me mus dhau lawm, thiab tau los ze lub nroog Eethiphalas.

34 Thiab nim no, cov Neeg Lamas tej tub rog uas muaj zog tshaj tau raug tso rau hauv lub nroog Eethiphalas; muaj tseeb tiag, nyob coob tshaj.

35 Thiab tau muaj tias thaum lawv tej neeg soj xyuas tau los qhia rau lawv, lawv tau tawm nrog lawv tej tub rog tuaj tawm tsam peb.

36 Thiab tau muaj tias peb tau khiav ua ntej lawv mus rau sab pem toj. Thiab li no peb tau ntxias coj cov Neeg Lamas tej tub rog uas muaj zog tshaj plaws mus;

37 Muaj tseeb tiag, twb coj mus rau ib qhov ncua deb tsawv, kawg tias thaum lawv pom Eethipas cov tub rog tab tom raws lawv lawm, nrog lawv lub zog, lawv twb tsis tig mus rau sab xis los sis sab laug li, tiam sis lawv tau taug txoj kev ncaj nraim raws peb; thiab, li peb tau xav, twb yog lawv xav tias yuav tua kom tau peb ua ntej Eethipas caum tau lawv, thiab lawv tau ua li no xwv kom peb cov neeg yuav vij tsis tau lawv.

38 Thiab nim no Eethipas, pom hlo peb tej kev yuav muaj teeb meem, tau nrog nws cov tub rog mus ceev heev. Tiam sis saib seb, nws yog thaum tsaus ntuj; yog li ntawd lawv caum tsis tau peb, thiab Eethipas los kuj caum tsis tau lawv; yog li ntawd peb tau rub yeej rau hmo ntawd.

39 Thiab tau muaj tias ua ntej thaum hnub yuav tawm thaum sawv ntxov, saib seb, cov Neeg Lamas tau caum rawv peb. Nim no peb tseem tsis tau muaj zog txaus yuav sawv tiv lawv; muaj tseeb tiag, kuv yuav tsis cia kom kuv cov tub me me yuav poob rau hauv lawv tes; yog li ntawd peb tau mus tas zog ntxiv, thiab peb tau mus rau hauv hav zoov.

40 Nim no lawv tsis kam tig mus rau sab xis los sis rau sab laug ntshai tsam lawv yuav raug vij; thiab kuv los kuj tsis kam tig rau sab xis los sis sab laug ntshai tsam lawv yuav txhom tau kuv, thiab peb yuav sawv tiv tsis tau lawv, tiam sis tsuas yuav raug tua, thiab lawv yuav dim mus; thiab li no peb tau khiav tas hnub mus rau hauv hav zoov, mus txog ntua thaum tsaus ntuj.

41 Thiab tau muaj ntxiv tias, thaum kaj ntug sawv ntxov tuaj peb tau pom cov Neeg Lamas rau saum peb, thiab peb tau khiav ua ntej lawv.

42 Tiam sis tau muaj tias lawv tsis tau raws peb deb ua ntej lawv nres; thiab tau yog thaum sawv ntxov hnub xiab peb ntawm lub xya hli.

43 Thiab nim no, xyov Eethipas raws tau lawv lawm los tsis tau peb tsis paub, tiam sis kuv tau hais rau kuv cov neeg tias: Saib seb, peb tsis paub tiam sis lawv tau nres rau qhov uas kom peb yuav mus tawm tsam lawv lawm, xwv kom lawv yuav txhom tau peb nyob hauv lawv tej ntxiab.

44 Yog li ntawd, kuv cov tub, nej yuav hais li cas, nej puas yuav mus ua rog tawm tsam lawv?

45 Thiab nim no kuv hais rau koj, kuv tus tij laugMaulaunais uas kuv hlub, tias kuv yeej tsis tau pom ib zaug dua li uas muaj siab loj tag npaud, yeej tsis tau pom li, nyob hauv tag nrho cov Neeg Nifais.

46 Vim ib yam li kuv ib txwm sij hu lawv ua kuv cov tub (vim tag nrho lawv puav leej tseem hluas heev) kawg tias lawv tau hais rau kuv tias: Txiv, saib seb peb tus Vajtswv twb nrog peb, thiab nws yuav tsis cia kom peb tuag; ces cia peb cia li mus; peb yuav tsis tua peb cov kwv tij yog lawv yuav tsis thab peb; yog li ntawd cia peb mus, nyob tsam lawv yuav kov yeej Eethipas cov tub rog.

47 Nim no lawv yeej tsis tau sib tua ib zaug li, tiam sis lawv tsis ntshai txoj kev tuag; thiab lawv tau xav txog lawv txiv txoj kev ywj siab heev dua li lawv xav txog lawv txoj sia; muaj tseeb tiag, lawv tau raug qhia los ntawm lawv niam, tias yog lawv tsis txhob ua xyem xyav, Vajtswv yuav cawm lawv dim.

48 Thiab lawv tau rov qab hais lawv niam tej lus rau kuv, tias: Peb yeej tsis ua xyem xyav peb niam yeej paub lawm.

49 Thiab tau muaj tias kuv tau tig rov nrog kuv ob txhiab leej mus tawm tsam cov Neeg Lamas no uas tau raws peb. Thiab nim no saib seb, Eethipas cov tub rog caum tau lawv, thiab ib npluav rog uas tsis zoo saib kiag tau pib.

50 Eethipas cov tub rog tau lim heev, vim lawv txoj kev siv sij hawm luv mus deb heev, twb tau yuav luag poob rau hauv cov Neeg Lamas tes; thiab yog tias kuv tsis tau nrog kuv ob txhiab leej tig rov qab ces lawv yeej yuav ua tau li lawv siab xav lawm.

51 Vim Eethipas tau poob tsam los ntawm ntaj, thiab nws cov thawj coj ntau leej thiab, vim yog lawv txoj kev lim, uas tau yog los ntawm lawv txoj kev mus ceev—yog li ntawd Eethipas cov neeg, tau tsis meej pem vim yog txoj kev tuag ntawm lawv tej thawj coj, tau thim ncaim ntawm cov Neeg Lamas.

52 Thiab tau muaj tias cov Neeg Lamas siab tau loj tuaj, thiab tau pib caum lawv; thiab li no cov Neeg Lamas tau caum lawv tag siab nrho thaum Hilamas tuaj rau tom lawv qab nrog nws ob txhiab leej, thiab tau pib tua lawv heev kawg nkaus li, kawg tias tag nrho cov Neeg Lamas tej tub rog tau nres thiab tau tig los rau Hilamas.

53 Nim no thaum Eethipas cov neeg tau pom cov Neeg Lamas tig rov qab, lawv tau sib sau lawv cov neeg tuaj ua ke thiab tau rov tuaj rau tom cov Neeg Lamas qab dua.

54 Thiab nim no tau muaj tias peb, Nifais cov neeg, Eethipas cov neeg, thiab kuv nrog rau kuv ob txhiab leej, tau vij cov Neeg Lamas, thiab tau tua lawv; muaj tseeb tiag, kawg tias lawv tau raug yuam kom tso lawv tej cuab yeej ua rog thiab lawv tus kheej ua li tej neeg raug txim hauv hav rog.

55 Thiab nim no tau muaj tias thaum lawv tau swb lawv tus kheej rau peb lawm, saib seb, kuv tau suav cov tub hluas uas tau nrog kuv tawm tsam, ntshai nyob tsam lawv muaj ntau leej tau raug tua lawm.

56 Tiam sis saib seb, rau kuv txoj kev xyiv fab heev, lawv tsis tau muaj ib tug kiag uas tau raug tuag li; muaj tseeb tiag, thiab lawv tau tawm tsam ib yam li nrog Vajtswv lub zog; muaj tseeb tiag, yeej tsis tau paub dua tias yuav muaj neeg ua rog nrog lub zog uas muaj tej txuj ci tseem ceeb zoo li ntawd li; thiab lawv tau tawm tsam cov Neeg Lamas nrog lub hwj chim loj npaum li, kawg tias lawv tau ua rau lawv txhawj; thiab vim qhov no cov Neeg Lamas thiaj tau muab lawv tus kheej los ua neeg raug txim hauv hav rog.

57 Thiab ib yam li peb tsis muaj chaw rau peb tej neeg raug txim, kom peb muaj peev xwm saib xyuas tau lawv kom ceev tau lawv tawm ntawm cov Neeg Lamas tej tub rog, yog li ntawd peb tau xa lawv mus rau thaj av Xalahelas, thiab ib feem ntawm Eethipas cov neeg uas tsis tau raug tua, nrog lawv; thiab cov uas seem tshuav kuv tau coj lawm thiab tau muab lawv koom nrog kuv cov tub hluas neeg Amoos, thiab tau rov qab mus rau lub nroog Yudais.