1 K’e ut reetal, anajwan kik’ulman naq li qajom chirix a’in, a’an reechaninkil li tenamit Manti; a’b’an k’e reetal, maak’a’ kiruhan wi’ chiqu xk’amb’aleb’ chi elk sa’ li tenamit rik’ineb’ li qakok’ ch’uut. Xb’aan naq k’e reetal, kijultiko’ reheb’ li k’a’ru ak kiqab’aanu chaq; jo’kan naq ink’a’ kooru chixb’alaq’inkileb’ chi elk chaq sa’eb’ lix kawil na’ajeb’.

2 Ut maak’a’jo’ naq neke’xq’ax rajlankil li qateep aj pleet, jo’kan naq moko kiwan ta qach’ool chi xik ut chixpleetinkileb’ sa’ lix kawil na’ajeb’.

3 Relik chi yaal, kiwan ut chi aajel ru chiqu naq taqoksiheb’ li qawinq sa’ xk’uulankil qawankil sa’ xb’eeneb’ li jar raqal chi ch’och’ kiqachap wi’ chaq chik, wan wi’ qeechanihom; jo’kan naq ki’aje’ ru naq too’oyb’eninq, re taaruuq taqak’ul chaq xkomon chik qakawilal sa’ li ch’och’ Tzarahemla, ut jo’kan ajwi’ chi ak’il li k’a’ru taak’anjelaq qe.

4 Ut kik’ulman naq rik’in a’in kintaqla aj taql rik’in laj jolominel re li qach’och’, re xk’eeb’al chixnaw chirix li yoo chi uxmank rik’in li qatenamit. Ut kik’ulman naq kiqoyb’eni xk’ulb’al chaq li nak’anjelak qe ut xkawilal li qateep sa’ li ch’och’ Tzarahemla.

5 A’b’an k’e reetal, b’ab’ay ajwi’ kiqara wi’ rik’in a’in; xb’aan naq eb’ laj Lamanita yookeb’ ajwi’ chixk’ulb’al nimla kawilal chi wulaj wulaj, ut naab’al ajwi’ li k’a’ru nak’anjelak reheb’; ut jo’ka’in li koowan wi’ sa’ li kutan a’an.

6 Ut eb’ laj Lamanita yookeb’ chaq chi elk re qapleetinkil chi yalaq jo’q’e, ut k’eek’ookeb’ xch’ool rik’in k’oxlanb’il pleet chiqasachb’al; a’b’anan moko kooru ta chi elk re xpleetinkileb’, sa’ xk’ab’a’ li na’ajej neke’xkol wi’ rib’ ut lix kawil na’ajeb’.

7 Ut kik’ulman naq koo’oyb’enin sa’ li ch’a’ajkilal a’in koowan wi’, chiru xnumik k’iila po, toj reetal ajwi’ naq oso’k qe xb’aan xmaak’a’il li tzakemq.

8 A’b’anan kik’ulman naq kiqak’ul li tzakemq, ut k’amb’il qe chi k’aak’alenb’il xb’aan jun teep chi aj pleet wan wi’ wiib’ mil chi winq re qatenq’ankil; ut ka’ajwi’ a’in li qatenq’ankil kiqak’ul, re xkolb’al qib’ ut li qatenamit chiru t’ane’k sa’ ruq’eb’ li xik’ neke’ilok qe, relik chi yaal, re xyalb’al qu rik’ineb’ laj xik’ ilonel li ink’a’ naru rajlankileb’.

9 Ut anajwan lix yaalalil li qach’a’ajkilal a’in, malaj lix yaalalil k’a’ut naq ink’a’ ke’xtaqla chik xkawilal li teep qe, moko nawb’il ta qab’aan; jo’kan naq kiraho’ qach’ool ut koonujak ajwi’ rik’in xiw, maare anchal taachalq lix raqb’a-aatin li Dios sa’ xb’een li qach’och’, toj taanumtaaq sa’ qab’een ut toosache’q chi junajwa.

10 Jo’kan naq kiqahoy li qaam chi tijok chiru li Dios, re naq a’an tixk’e qametz’ew ut tooxkol chaq sa’ ruq’eb’ li xik’ neke’ilok qe, relik chi yaal, ut tixk’e ajwi’ qametz’ew re taqak’uulaheb’ li qatenamit, ut li qach’och’, ut li eechaninb’il qab’aan, re xtenq’ankil li qatenamit.

11 Relik chi yaal, ut kik’ulman naq li Qaawa’ li qaDios koorula’ani rik’in xk’eeb’al chiqanaw naq a’an tooxkol; relik chi yaal, jo’kan naq kixye tuqtuukilal re li qaam, ut kixk’e nimla paab’aal qe, ut kixk’e chiqayo’oni naq sa’ xk’ab’a’ a’an tookole’q.

12 Ut kichal xkawil qach’ool rik’in li ch’ina teep li kitaqlaak chaq qe, ut xaqxo li qana’leb’ naq taqaq’axeb’ ru li xik’ neke’ilok qe, ut taqak’uula qawankil sa’ xb’een li qach’och’, ut li eechaninb’il qab’aan, ut li qixaqil, ut li qakok’al, ut li na’leb’ li ach’ab’anb’ilo wi’.

13 Ut chi jo’kan xookoho rik’in x’anchalil qametz’ew chixpleetinkileb’ laj Lamanita, li wankeb’ sa’ li tenamit Manti; ut kiqayiib’ li qamuheb’aal t’ikr sa’ li junpak’al wan wi’ li yamyookil ch’och’, li nach’ wan rik’in li tenamit.

14 Ut kik’ulman naq wulajaq chik a’an, naq ke’ril laj Lamanita naq wanko sa’eb’ li nub’aal chire li yamyookil ch’och’ li nach’ wan rik’in li tenamit, naq ke’xtaqlaheb’ lix muqmuukil k’ehol eetal chiqasutam, re taaruuq te’xk’e reetal rajlankil ut xkawil xmetz’ew li qateep aj pleet.

15 Kik’ulman ut, naq ke’ril naq moko kaw ta qametz’ew, jo’ chanru li qajlankil, ut rik’in naq neke’xxuwa naq maare taqaram xtenq’ankileb’ wi ink’a’ te’elq chiqapleetinkil ut toohe’xkamsi, ut rik’in ajwi’ naq sa’ xch’ooleb’ a’an moko taach’a’ajko’q ta chiruheb’ qasachb’al rik’in xk’ihal xteepeb’, jo’kan naq ke’ok chixkawresinkil rib’ chi elk re qapleetinkil.

16 Ut naq kiqil naq yookeb’ chixkawresinkil rib’ chi elk sa’ qab’een, k’e reetal, kintaqla naq laj Gid, rochb’een jun ch’ina teep chi winq, tixmuq rib’ sa’ li yamyookil ch’och’, ut jo’kan ajwi’ naq laj Teomner ut jun ch’ina teep chi winq te’xmuq ajwi’ rib’ sa’ li yamyookil ch’och’.

17 Anajwan laj Gid ut eb’ lix winq wankeb’ sa’ li nim ut li jun ch’ol chik sa’ li tz’e; ut naq ak ke’xmuq rib’ chi jo’kan, k’e reetal, laa’in kinkana, wochb’een li jun ch’ol chik re lin teep aj pleet, sa’ li na’ajej ajwi’ a’an b’ar wi’ kiqayiib’ xb’een wa li qamuheb’aal t’ikr royb’eninkil li hoonal naq te’elq chaq laj Lamanita chi pleetik.

18 Ut kik’ulman naq eb’ laj Lamanita ke’chal chaq chiqapleetinkil rik’in lix teepeb’ aj pleet li k’i rajlankil. Ut chirix naq ke’chal ut okeb’ raj re chi t’ane’k sa’ qab’een rik’in yok’leb’ ch’iich’, kintaqla naq eb’ lin winq, li ani wankeb’ wik’in, te’xsutq’isi rib’ chiru li yamyookil ch’och’.

19 Ut kik’ulman naq eb’ laj Lamanita koohe’xtaaqe chi k’a’jo’ xseeb’al xxikikeb’, xb’aan naq numtajenaq rajomeb’ chiqatawb’al re te’ruuq chiqakamsinkil; jo’kan naq koohe’xtaaqe sa’ li yamyookil ch’och’; ut laa’o koonume’ sa’ xyiheb’ laj Gid ut laj Teomner, jo’kan naq eb’ a’an moko ke’tawe’ ta xb’aaneb’ laj Lamanita.

20 Ut kik’ulman naq chirix naq ke’nume’ laj Lamanita, malaj ut chirix naq kinume’ li teep aj pleet, laj Gid ut laj Teomner ke’wakli chaq sa’eb’ li na’ajej muqmuukeb’ wi’, ut ke’xrameb’ laj muqmuukil k’ehol eetal reheb’ laj Lamanita re naq ink’a’ te’sutq’iiq sa’ li tenamit.

21 Ut kik’ulman naq chirix naq ke’xrameb’ chaq, ke’alinak sa’ li tenamit ut ke’t’ane’ sa’ xb’eeneb’ laj k’aak’alenel li ke’kana chaq re xk’aak’alenkil li tenamit, jo’kan naq ke’xsacheb’ ut ke’reechani li tenamit.

22 Anajwan kib’aanuman a’in xb’aan naq eb’ laj Lamanita ke’xkanab’ naq chixjunil lix teep aj pleet te’k’ame’q sa’ li yamyookil ch’och’, ka’ajwi’ junjunq chi aj k’aak’alenel ink’a’.

23 Ut ki’k’ulman naq laj Gid ut laj Teomner chi jo’ka’in ke’reechani lix kawil na’ajeb’. Ut kik’ulman naq kiqachap qab’e, chirix b’eek chi najt sa’ li yamyookil ch’och’, sa’ xjayal li ch’och’ Tzarahemla.

24 Ut naq ke’ril laj Lamanita naq yookeb’ chi b’eek sa’ xjayal li ch’och’ Tzarahemla, ke’chal xxiw chi numtajenaq, maare anchal wan jun li na’leb’ k’uub’anb’il re xk’amb’aleb’ xb’e sa’ li sache’k; jo’kan naq ke’ok wi’chik chixsutq’isinkil rib’ chiru li yamyookil ch’och’, relik chi yaal, chiru ajwi’ li b’e ke’chal wi’ chaq.

25 Ut k’e reetal, ak q’ojyin chik ut ke’xyiib’ xmuheb’aal t’ikr, xb’aan naq eb’ li xb’eenil aj taqlanel reheb’ laj Lamanita ke’xk’oxla naq lub’jenaqeb’ laj Nefita xb’aan xb’eenikeb’; ut rik’in naq neke’xk’oxla naq ke’ralinasi chaq chixjunil lix teep aj pleet, rik’in a’an maak’a’ ke’xk’oxla chirix li tenamit Manti.

26 Anajwan kik’ulman naq chirix naq kiq’ojyino’, kintaqla naq eb’ lin winq moko te’warq ta, naq te’b’eeq b’an chi uub’ej chiru jalan chik b’e sa’ xjayal li ch’och’ Manti.

27 Ut xb’aan li qab’eenik a’in chiru q’ojyin, wulajaq chik ak numenaqo chirixeb’ laj Lamanita, jo’kan naq koowulak xb’een wa chiruheb’ sa’ li tenamit Manti.

28 Ut chi jo’kan kik’ulman, naq rik’in li k’oxlanb’il pleet a’in kiqeechani li tenamit Manti chi maak’a’ li hoyok kik’.

29 Ut naq ke’wulak li teep aj pleet reheb’ laj Lamanita chi nach’ rik’in li tenamit, ut ke’ril naq kawresinb’ilo chixk’ulb’aleb’, kik’ulman naq ke’sach xch’ool chi numtajenaq ut ke’chape’ rik’in nimla xiw, jo’kan naq ke’eelelik chiru yamyookil ch’och’.

30 Relik chi yaal, ut kik’ulman naq eb’ li teep aj pleet reheb’ laj Lamanita ke’eelelik chaq sa’ chixjunil li jun raqal chi ch’och’ a’in. A’b’anan k’e reetal, ke’xk’am rik’ineb’ naab’al li ixq ut li kok’al chirix li ch’och’.

31 Ut chixjunileb’ li tenamit a’an li ke’chape’ chaq xb’aaneb’ laj Lamanita, chixjunileb’ sa’ li kutan a’in eechaninb’ileb’ qab’aan; ut eb’ li qayuwa’ ut li qixqilal ut li qakok’al yookeb’ chi sutq’iik sa’ rochocheb’, ka’ajwi’ li ani ke’chape’ choq’ preex ut ke’k’ame’ xb’aaneb’ laj Lamanita ink’a’.

32 A’ut k’e reetal, ka’ch’in li qateep aj pleet re xk’uulankil qawankil sa’ xb’een xk’ihal li tenamit ut xnimal li qeechanihom a’in.

33 A’b’anan k’e reetal, naqakanab’ qib’ chiru li qaDios li kooxkanab’ chi q’axok-u sa’ xb’eeneb’ li ch’och’ a’an, jo’kan naq ak xqeechaniheb’ li tenamit ut li ch’och’ a’an, li ak qe chaq junxil.

34 Anajwan ink’a’ naqanaw xyaalal k’a’ut naq lix jolomil li tenamit ink’a’ naxtaqla chik xkomon qakawilal, chi moko neke’xnaw li winq a’an li ke’chal qik’in k’a’ut naq moko kiqak’ul ta chik li qakawilal.

35 K’e reetal, ink’a’ naqanaw ma maare ink’a’ chaab’il xex’el laa’ex, ut xepatz’ xkawileb’ li teep sa’ li jun raqal chi ch’och’ a’an; wi ut jo’kan, moko naqaj ta xwech’b’al rix.

36 Wi ut ink’a’ jo’kan, k’e reetal, naqaxuwa naq wan junaq jachok-ib’ sa’ xjolomil li tenamit, xb’aan wi’ ink’a’ neke’xtaqla chik li winq re qatenq’ankil; xb’aan naq naqanaw naq numenaqeb’ wi’chik rajlankileb’ chiru li ani ke’xtaqla chaq.

37 A’b’an k’e reetal, maak’a’ na’ajman wi’ a’in—naqakanab’ qib’ chiru naq li Dios tooxkol, us ta q’uneb’ xmetz’ew li qateep aj pleet; relik chi yaal, ut tooxkol chaq sa’ ruq’eb’ li xik’ neke’ilok qe.

38 K’e reetal, a’in li xb’ele xka’k’aal chihab’, ak yoo chi nach’ok xraqik, ut laa’o ak qeechanihomeb’ li qach’och’, ut eb’ laj Lamanita ke’eelelik sa’ li ch’och’ Nefi.

39 Ut eb’ li alalb’ej a’an re lix tenamit laj Ammon, li kin’aatinak wi’ chi q’axal chaab’il, wankeb’ wik’in sa’ li tenamit Manti; ut li Qaawa’ kixtenq’aheb’, relik chi yaal, ut kixkoleb’ chiru t’ane’k xb’aan li yok’leb’ ch’iich’, jo’kan naq ink’a’ xkamsiman yal ta jun chi aamej.

40 A’b’an k’e reetal, naab’al li toch’olal ke’xk’ul; a’b’anan neke’xxaqab’ rib’ chi kaw sa’ li ach’ab’aak li kirach’ab’eb’ wi’ li Dios; ut tz’aqal k’eek’ookeb’ xch’ool chixk’oxlankil li Qaawa’ lix Dios chi wulaj wulaj; relik chi yaal, tz’aqal k’eek’ookeb’ xch’ool chixpaab’ankil lix k’uub’anb’il aatin, ut lix raqb’a-aatin, ut lix taqlahom chi rajlal; ut kaw xpaab’aaleb’ sa’ li profeetil aatin chirix li k’a’ru toj taachalq.

41 Ut anajwan, at was wiitz’in Moroni raarookat inb’aan, li Qaawa’ qaDios, li kixtoj qix ut kixk’e li qach’ab’ankil, chatxk’uula taxaq junelik chiru; relik chi yaal, ut chi’usilanq taxaq re li tenamit a’in, toj reetal naq laa’at tat-usaaq sa’ reechaninkil chixjunil li ke’xmaq’ chaq chiqu laj Lamanita, li kiwan chaq re qatenq’ankil. Ut anajwan, k’e reetal, ninchoy inhu. Laa’in aj Helaman, ralal laj Alma.