1 Ut kik’ulman naq kitz’iib’ak wi’chik rik’in laj jolominel re li ch’och’, a’an laj Pahoran, ut a’in li aatin kixtz’iib’a, kixye: K’ehomaq reetal, ninb’eresi lin hu re laj Pahoran, sa’ li tenamit Tzarahemla, li wan choq’ xb’eenil aj raqol aatin ut aj jolominel sa’ xb’een li ch’och’, ut reheb’ ajwi’ chixjunil li sik’bileb’ ru xb’aan li tenamit a’in re xjolominkil ut xb’eresinkil li na’uxman sa’ li pleet a’in.

2 Xb’aan naq k’ehomaq reetal, wan k’a’ruhaq li tinye reheb’ re xjitb’aleb’; xb’aan naq k’ehomaq reetal, laa’ex ajwi’ nekenaw naq xaqab’anb’ilex re xch’utub’ankileb’ li winq, ut xkawresinkileb’ rik’in yok’leb’ ch’iich’, ut rik’in k’onk’ookil ch’iich’, ut li k’iila paay chi k’anjeleb’aal re pleet, li jar raqal wan, ut xtaqlankileb’ sa’ xb’eeneb’ laj Lamanita, sa’ b’araq chi na’ajej te’ok wi’ sa’ li qach’och’.

3 Anajwan ut k’ehomaq reetal, ninye eere naq laa’in, ut jo’kan ajwi’ eb’ lin winq, ut jo’kan ajwi’ laj Helaman ut eb’ lix winq, kiqak’ul rahilal chi numtajenaq nim xrahil; relik chi yaal, li tz’okaak, chaqi-eel ut tawaak, ut li k’iila paay chi ch’a’ajkilal, li jar raqal wan.

4 A’b’an k’ehomaq reetal, wi ta ka’ajwi’ a’in li rahilal kiqanumsi ink’a’ raj taqawech’i rix, chi moko raj toowech’oq.

5 A’b’an k’ehomaq reetal, yo’on li kamsiik wanjenaq sa’ xyanq li qatenamit; relik chi yaal, mileb’ li ke’t’ane’ xb’aan li yok’leb’ ch’iich’, ut jalan wi’ raj ke’xk’ul wi ta laa’ex ketaqla reheb’ li qateep aj pleet tz’aqal xmetz’eweb’ ut li k’a’ru kitenq’an raj reheb’. Relik chi yaal, maak’a’jo’ naq kekanab’ qak’oxlankil.

6 Anajwan ut k’ehomaq reetal, taqaj raj xnawb’al xyaalalil li kanab’ank a’in q’axal nim; relik chi yaal, naqaj xnawb’al xyaalalil naq wankex chi maak’a’ nekek’oxla.

7 Ma naru tab’i’ nekek’oxla chunlaak sa’ xb’een lee k’ojarib’aal chi warenaq eek’a’uxl, naq eb’ li xik’ neke’ilok eere yookeb’ chixjek’inkil li k’anjel re kamsink chesutam? Relik chi yaal, naq yookeb’ chixkamsinkil k’iila mil reheb’ lee ras eeriitz’in—

8 Relik chi yaal, eb’ ajwi’ li ke’ilok eere re xkolb’aleb’ rix, relik chi yaal, kexxk’eheb’ b’ar wi’ kexru raj chixk’eeb’al xtenq’ankileb’; relik chi yaal, kexru raj chixtaqlankil li teep aj pleet reheb’, re raj xk’eeb’aleb’ xkawilal, ut xkolb’al raj k’iila mil reheb’ chiru t’ane’k xb’aan li yok’leb’ ch’iich’.

9 A’ut k’ehomaq reetal, moko chixjunil ta a’in—keram chiruheb’ li k’a’ru eere li kik’anjelak raj reheb’, jo’kan naq k’iheb’ li ke’pleetik ut ke’hoye’ xkik’el lix yu’ameb’ xb’aan x’anchalil li rajomeb’ choq’ re lix chaab’ilal li tenamit a’in; relik chi yaal, ut a’in ke’xb’aanu naq oso’keb’ re xb’aan tz’okaak, rik’in naq k’a’jo’ naq kekanab’ xk’oxlankileb’.

10 Ut anajwan, ex was wiitz’in raarookex inb’aan—xb’aan naq raarookex naq tento raj texwanq; relik chi yaal, ut tento raj kereek’asi eerib’ chi yalb’il wi’chik eeq’e choq’ re lix chaab’ilal ut li ach’ab’aak wan wi’ li tenamit a’in; a’b’an k’ehomaq reetal, kekanab’ xk’oxlankileb’, jo’kan naq lix kik’eleb’ k’iila mil te’chalq sa’ xb’een eejolom re taa’eeqajumanq; relik chi yaal, xb’aan naq nawb’il chiru li Dios chixjunil li relajihomeb’, ut li rahilal ke’xk’ul—

11 K’ehomaq reetal, ma naru tab’i’ nekek’oxla naq texruuq chi chunlaak sa’ xb’eeneb’ lee k’ojarib’aal, ut xb’aan xnumtajenaqil xchaab’ilal li Dios maak’a’ teeb’aanu ut texxkol raj? K’ehomaq reetal, wi xek’oxla a’in maak’a’ xyaalal lee k’oxlahom.

12 Ma nekek’oxla tab’i’ naq, rik’in naq k’a’jo’ xk’ihaleb’ lee ras eeriitz’in li xe’kamsiik, a’an xmaak xmaa’usilaleb’? Ninye eere, wi xek’oxla a’in maak’a’ xyaalal lee k’oxlahom; xb’aan naq ninye eere, wankeb’ naab’al li ke’t’ane’ rik’in li yok’leb’ ch’iich’, ut k’ehomaq reetal, a’an wan choq’ eejitb’al;

13 Xb’aan naq li Qaawa’ naxkanab’ chi kamsiik li tiik xch’ool re naq taaruuq chi chalk lix tiik ruhil na’leb’ ut lix raqb’a-aatin sa’ xb’eeneb’ laj maak; jo’kan ut, maak’a’ xyaalal naq teek’oxla naq sachenaqeb’ li tiikeb’ xch’ool rik’in naq kamsinb’ileb’; k’ehomaq b’an reetal, eb’ a’an neke’ok sa’ lix hilob’aal li Qaawa’ lix Dios.

14 Anajwan ut k’ehomaq reetal, ninye eere, ninxuwa chi numtajenaq naq taachalq lix raqb’a-aatin li Dios sa’ xb’een li tenamit a’in, xb’aan xnumtajik lix q’emaleb’, relik chi yaal, lix q’emaleb’ lix jolomil li qatenamit, rik’in naq numtajenaq naq ke’xkanab’ xk’oxlankileb’ li ras riitz’ineb’, relik chi yaal, eb’ ajwi’ li ke’kamsiik.

15 Xb’aan naq wi ta ink’a’ kiwan li maa’usilal li kitikla xb’een wa sa’ qajolomil, kooru raj chixramb’aleb’ li xik’ neke’ilok qe re naq maajun wankilal raj ke’xtaw sa’ qab’een.

16 Relik chi yaal, wi ta ink’a’ kiwan li pleet li kitikla sa’ qayanq laa’o; relik chi yaal, wi ta ink’a’ ke’wan li rey aj winq a’an, li ke’tikib’ank re xnimal li hoyok kik’ sa’ qayanq; relik chi yaal, sa’ li kutan yooko wi’ chi wech’ink chiqib’il qib’, wi ta kiqajunaji b’an li qametz’ew jo’ kiqab’aanu chaq junxil; relik chi yaal, wi ta ink’a’ raj ke’rataw li rey aj winq a’an wankilal ut awa’b’ejil sa’ qab’een; wi ta ke’wan b’an chi xaqxookeb’ xch’ool sa’ li na’leb’ chirix li ach’ab’aak wanko wi’, ut qe’xjunaji raj rib’ qik’in, ut xkoheb’ raj chixpleetinkileb’ li xik’ neke’ilok qe, ut ink’a’ b’an ke’xchap xyok’leb’ ch’iich’ chiqu, li kiwan wi’ xnimal li hoyok kik’ sa’ qayanq laa’o; relik chi yaal, wi ta koowulak chixpleetinkileb’ rik’in xmetz’ew li Qaawa’, kiqajek’iheb’ raj li xik’ neke’ilok qe, xb’aan naq kib’aanuman raj, jo’ chanru xtz’aqlojik ru li raatin a’an.

17 A’b’an k’ehomaq reetal, anajwan yookeb’ laj Lamanita chi chalk sa’ qab’een, chireechaninkileb’ li qach’och’, ut yookeb’ chixkamsinkil li qatenamit rik’in li yok’leb’ ch’iich’, relik chi yaal, li qixqilal ut li qakok’al, ut yookeb’ ajwi’ chixk’amb’aleb’ choq’ preex, ut chixk’eeb’aleb’ chixnumsinkil li k’iila paay chi ch’a’ajkilal, ut a’in xb’aan xnimal lix maa’usilaleb’ li ani yookeb’ chixsik’bal wankilal ut awa’b’ejil, relik chi yaal, a’aneb’ ajwi’ li rey aj winq a’an.

18 A’ut k’a’ut naq naab’al tinye chirix li na’leb’ a’in? Xb’aan naq ink’a’ naqanaw ma ink’a’ yookex ajwi’ laa’ex chixsik’b’al li wankilal. Ink’a’ naqanaw ma maawa’ex laa’ex aj pleetinel re lee tenamit.

19 Malaj ut ma xekanab’ qak’oxlankil xmaak naq wankex sa’ xyi li qatenamit ut sutsuukex xb’aan li wank sa’ xyaalalil, xb’aan wi’ ink’a’ nekekanab’ chi taqlaak li tzakemq qe, ut winq ajwi’ re xk’eeb’al xkawilaleb’ li qateep aj pleet?

20 Ma xsach sa’ eech’ool lix taqlahom li Qaawa’ lee Dios? Relik chi yaal, ma xsach sa’ eech’ool lix preexileb’ li qayuwa’? Ma xsach sa’ eech’ool li k’iila sut kookole’ wi’ chaq sa’ ruq’eb’ li xik’ neke’ilok qe?

21 Malaj ut ma nekek’oxla naq li Dios toj tooxkol, naq chunchuuko sa’ xb’een qak’ojarib’aal ut ink’a’ nokok’anjelak rik’in li k’a’ru xk’e chaq li Qaawa’ choq’ qe?

22 Relik chi yaal, ma texchunlaaq sa’ q’emalil naq sutsuukex xb’aaneb’ li mil, relik chi yaal, ut li lajetq mil li wankeb’ ajwi’ sa’ q’emalil, naq wankeb’ k’iila mil sa’ lee sutam sa’ xnub’aal li ch’och’ li yookeb’ chi t’ane’k xb’aan li yok’leb’ ch’iich’, relik chi yaal, toch’enaqeb’ ut yoo chi elk xkik’eleb’?

23 Ma nekek’oxla tab’i’ naq li Dios texril chi maak’a’ eemaak naq nekexchunla ut nekeril li k’a’aq re ru a’in? K’ehomaq reetal, ninye eere ink’a’. Anajwan nawaj raj naq chijultiko’q eere naq li Dios kixye naq tento xb’een wa taach’ajob’resimanq xsa’ li k’uleb’aal, ut chirix a’an taach’ajob’resiiq ajwi’ rix li k’uleb’aal.

24 Ut anajwan, wi ink’a’ nekejal eek’a’uxl chirix li k’a’ru xeb’aanu, ut ink’a’ nekex’ok chi wakliik ut chixyalb’al eeq’e, ut ink’a’ neketaqla tzakemq ut eb’ li winq qik’in, ut rik’in ajwi’ laj Helaman, re taaruuq chixtenq’ankil li jar raqal re qach’och’ li kixk’ul wi’chik, re ajwi’ taaruuq taqachap wi’chik li rela’ li qeechanihom sa’ li na’ajej a’in, k’ehomaq reetal, taa’ajmanq ru naq ink’a’ chik taqayal qu rik’ineb’ laj Lamanita toj reetal naq xqach’ajob’resi xb’een wa lix sa’ li qak’uleb’aal, relik chi yaal, a’an xjolomil li qatenamit.

25 Ut wi ink’a’ nekek’e li ninye sa’ inhu, ut ink’a’ nekex’el chaq ut nekek’ut chiwu tz’aqal xmusiq’ li ach’ab’aak, ut ink’a’ nekeyal eeq’e chixnimankil xmetz’ew ut xk’eeb’al xkawileb’ li qateep aj pleet, ut chixk’eeb’al reheb’ tzakemq re xtenq’ankileb’, k’ehomaq reetal, tinkanab’ jun raqal reheb’ lin ach’ab’anb’il winq re xk’uulankil qawankil sa’ xb’een li jun raqal a’in re li qach’och’, ut tinkanab’ lix metz’ew ut li rosob’tesihom li Dios sa’ xb’eeneb’, re naq maajun chik chi wankilal taaruuq chi k’anjelak sa’ xb’eeneb’—

26 Ut a’in xb’aan xnumtajenaqil xpaab’aaleb’, ut lix kuyumeb’ sa’ li rahilal neke’xnumsi—

27 Ut tinchalq eerik’in, ut wi wan ani sa’ eeyanq li narahok re li ach’ab’aak, relik chi yaal, wi wan yal ta jun miin raqal li ach’ab’aak li toj nakana, k’ehomaq reetal, tinwaklesi li pleetink-ib’ sa’ eeyanq, toj reetal ajwi’ naq eb’ li te’ajoq re xmaq’b’al li wankilal ut li awa’b’ejil te’kanaaq chi oso’jenaq.

28 Relik chi yaal, k’ehomaq reetal, ink’a’ ninxuwa lee wankilal chi moko lee awa’b’ejil; a’an b’an lin Dios li ninxuwa; ut xb’aan xtaqlahom a’an naq ninchap inyok’leb’ ch’iich’ re xkolb’al rix lix na’leb’ intenamit, ut xb’aan lee maa’usilal laa’ex naq kiqanumsi xnimal li sachk a’in.

29 K’ehomaq reetal, xtaw xq’ehil, relik chi yaal, xnach’ok chaq li hoonal anajwan, naq wi ink’a’ nekewaklesi eerib’ re xkolb’al rix lee tenamit ut lee kok’al, li yok’leb’ ch’iich’ re li raqb’a-aatin wan chi taqsinb’il sa’ eeb’een; relik chi yaal, ut taat’ane’q sa’ eeb’een ut texrula’ani toj reetal naq texsache’q chi junajwa.

30 K’ehomaq reetal, nawoyb’eni intenq’ankil eeb’aan; ut wi ink’a’ nekexk’anjelak re qatenq’ankil, k’ehomaq reetal, chalk we eerik’in, sa’ ajwi’ li ch’och’ Tzarahemla, ut texinsak’ rik’in li yok’leb’ ch’iich’, re naq ink’a’ chik taaruuq taawanq eewankil chixramb’al lix k’iijik li tenamit a’in sa’ li na’leb’ chirix li ach’ab’aak wanko wi’.

31 Xb’aan naq k’ehomaq reetal, li Qaawa’ ink’a’ tixkanab’ naq taawanq eeyu’am ut taanimanq eemetz’ew sa’ lee maa’usilal re xsachb’al lix tenamit tiik xch’ool.

32 K’ehomaq reetal, ma naru tab’i’ nekek’oxla naq li Qaawa’ tixkol eeyu’am laa’ex ut taachalq rik’in raqb’a-aatin sa’ xb’eeneb’ laj Lamanita, naq a’an xna’leb’eb’ lix yuwa’eb’ li xk’ehok re xkaqal lix ch’ooleb’ a’an, relik chi yaal, ut nimanb’il a’an xb’aaneb’ li xe’risi chaq rib’ qik’in, a’b’an lee maa’usilal laa’ex nachal xb’aan naq nekera xk’ulb’al eeloq’alil ut li jo’maajo’il k’a’aq re ru re li ruchich’och’?

33 Nekenaw naq nekeq’et lix taqlahom li Dios, ut nekenaw naq nekeyeq’i rub’el eeroq. K’ehomaq reetal, li Qaawa’ naxye we: Wi eb’ li kexaqab’ choq’ eejolominel ink’a’ neke’xjal xk’a’uxl chirix xmaakeb’ ut xmaa’usilaleb’, texxik chixpleetinkileb’.

34 Ut anajwan k’ehomaq reetal, laa’in, aj Moroni, elajinb’ilin, jo’ chanru li sumwank li kink’uub’ re xpaab’ankil lix taqlahom lin Dios; jo’kan naq nawaj raj naq texwanq chi letzlo rik’in li raatin li Dios, ut teeseeb’a eerib’ chixtaqlankil we xkomon li k’a’ru eere ut lee winq, ut jo’kan ajwi’ re laj Helaman.

35 Ut k’ehomaq reetal, wi ink’a’ nekeb’aanu a’in tinseeb’a wib’ chi chalk eerik’in, xb’aan naq k’ehomaq reetal, li Dios ink’a’ tixkanab’ naq too’oso’q rik’in tz’okaak; jo’kan naq tixk’e qe xkomon lee tzakemq, us ta tento taawanq rik’in li yok’leb’ ch’iich’. Anajwan ilomaq naq teetz’aqob’resi ru li raatin li Dios.

36 K’ehomaq reetal, laa’in aj Moroni, li xb’eenil aj taqlanel eere. Moko ninsik’ ta li wankilal, ninsik’ b’an xt’anb’al. Moko ninsik’ ta nimob’resiik wu xb’aan li ruchich’och’, lix loq’al b’an inDios ninsik’, ut li ach’ab’aak ut li chaab’ilal re lin tenamit. Ut jo’ka’in ninchoy inhu.