1 Nengeni, iei non ewe fansoun pwe mwitir mwirin an Moronai a tinano noun we toropwe ngeni ewe kepina mi nap, a angei echo toropwe seni Paoran, ewe kepina mi nap. Iwe ikkei ekkewe kapas minne i a angei:

2 Ngang, Paoran, ngang ewe kepina mi nap won ei fonu, ua tinano ekkei kapas ngeni Moronai, ewe kaptin mi nap won ekkewe sounfiu. Nengeni, ua apasa ngonuk, Moronai, pwe use pwapwa non ami kewe weiresin riaffou, ewer, a anetipengawa nguni.

3 Nge nengeni, mi wor ekkewe ir ra pwapwa non ami riaffou, ewer, ina popun ra fen poputa non ungeni ngeniei, me pwan ekkewe ir nei aramas ekkewe ir mi ngaseno, ewer, iwe ra fen poputa ne ungenikem ra fokkun chommong.

4 Iwe ina ekkewe ra achocho pwe repwe angeiano ewe nenien mwottun kapung seniei ir ekkewe popun ei ennetin angangangaw; pun ra fen aea chommongun eingeing, me ra fen emmwenano netipen chommong aramas, minne ina ewe popun riaffou mi anetipechou me neich; ra fen amwochu ach kewe pisekin mwongo, me ra fen anuokusu nouch kewe aramas mi ngaseno ina popun rese feino ngonuk.

5 Iwe nengeni, ra fen asueino me mwer, iwe ua fen suno ngeni ewe fonuen Gideon, fiti meinisin mwan mi tufich ai upwe tongeni angei ir.

6 Iwe nengeni, ua fen tinano ew porous non unusen ei kinikinin ewe fonu; iwe nengeni, ra achufengen ngenikem iteiten ran, pwe repwe angei nour pisekin maun, ne eppeti fonuer me ar ngaseno, me pwe repwe angei niwinin ekkewe muan ngenikem.

7 Iwe ra fen feito ngenikem, ina popun pwe ekkewe ra fen poputa ne ungenikem ra wesen pwarano ar we ungeni, ewer, ina popun pwe ra nuokusitikem me rese pwaracho ne tou ungenikem non maun.

8 Ra fen angei nemenem won ewe fonu, are ewe teninimw, teninimwen Saraemla; ra fen finata emon king wor, iwe a fen mak ngeni ewe kingen ekkewe chon Leiman, non minne i a fen choni ewe mwichen muun atipeew ngeni i; non minne mwichen muun atipeew i a fen tipeew pwe epwe amwochu ewe teninimwen Saraemla, minne nemenem i a ekieki pwe epwe atufichi ekkewe chon Leiman ne choroku nussun ewe fonu, iwe i epwe finita an epwe king won ekkei aramas nupwen repwe kuf me ren ekkewe chon Leiman.

9 Iwe iei, non noum we toropwe ka fen esitaei, nge ese auchea; ngang use song, nge ua pwapwa non sufonun netipom. Ngang, Paoran, use achocho ai upwe angei nemenem, tiwenon chok ai upwe amwochu ai we nenien mwottun kapung pwe upwe tongeni tumunu ekkewe pung me ewe ngasenon nei kewe aramas. Nguni mi nukuchar non ena napanapen ngaseno non minne Kot a fen angasakicheno.

10 Iwe iei, nengeni, sipwe ungeni fofforungaw pwan mwo tori assuku cha. Sisap assuku chan ekkewe chon Leiman ika pwe repwe nom non pwisin fonuer.

11 Sisap assuku chan pwich kewe ika resap poputa non ew ungeni me angei ewe ketinas ngenikich.

12 Sipwe pwisin mut ngeni inisich sipwe nom fan nemenien ewe choun fotek ika epwe auchea me ren ewe pungochun Kot, are ika epwe annuku ngenikich pwe sipwe fori.

13 Nge nengeni i ese annuku ngenikich pwe sipwe mut ngeni inisich sipwe nom fan nemenien ekkewe chon koum ngenikich, nge pwe sipwe wanong ach apinukunuk non i, iwe i epwe angasakicheno.

14 Iei minne, pwi achengicheng, Moronai, sipwe ungeni ngaw, me met chok mi ngaw sisap tongeni ungeni ren ach kapas, ewer, awewe usun ren chon ungeni me chon rikino, sipwe ungeni ir ren nouch ketinas, pwe sipwe tongeni annomu ach we ngaseno, pwe sipwe tongeni pwapwa non ewe auchean tufichin ach we mwichefen, me non ewe nongonongen ach we Chon Angasano me ach Kot.

15 Iei minne, mwitir feito rei fiti ekkoch noum kewe mwan, me nikiti ekkewe nussun fan tumunun Liai me Tiankam; ngeni ir nemenem pwe repwe emmweni ewe maun non ena kinikinin ewe fonu, anongonong won ewe Ngunun Kot, minne ina ewe pwan ngunun ngaseno minne mi nom rer.

16 Nengeni ua fen tinano ekkoch pisekin mwongo ngeni ir, pwe resap tongeni mano tori ami oupwe tongeni feito rei.

17 Ionfengeni met chok mwichen sounfiu ka tongeni nupwen ami karisito ikei, iwe sipwe mwitir feino ungeni ekkewe chon rikino, non ewe pochokunen ach Kot anongonong won ewe nuku minne mi nom rech.

18 Iwe sipwe angei nemenem won ewe teninimwen Saraemla, pwe sipwe tongeni angei ekkoch mwongo pwe sipwe tinano ngeni Liai me Tiankam; ewer, sipwe feino ungeni ir non ewe pochokunen ewe Samon, iwe sipwe awesano ei ennetin angangangaw.

19 Iwe iei, Moronai, ua pwapwa ai angei noum toropwe, pun ua ekis aurek usun met sipwe fori, ika pwe epwe pung rech ach sipwe no ungeni pwich kewe.

20 Nge ka fen apasa, tiwenon chok ika repwe aier ewe Samon a fen annuku ngonuk pwe kopwe no ungeni ir.

21 Tumunu pwe kopwe apochokunano Liai me Tiankam non ewe Samon; ureni ir pwe resap nuokus, pun Kot epwe angasereno, ewer, me pwan ir meinisin ekkewe ra nukuchar non ena napanapen ngaseno non minne Kot a fen angasereno. Iwe iei ua esipano nei toropwe ngeni pwi achengicheng, Moronai.