1 Im ālikin men kein ilo jinoin jiln̄uul im jiljino iiō in iien tōl an riekajet ro ioon armej in Nipai, ke Siblon eaar bōk ippān men ko rekwōjarjar ko kar liļo̧k n̄an Hilamōn jān Alma.

2 Im eaar juon armej ejim̧we, im eaar etetal jim̧we im̧aan Anij; im eaar kijejeto n̄an kōm̧m̧an em̧m̧an iien otemjej, n̄an kōjparok kien ko an Irooj an Anij; im kar ļeo jatin barāinwōt.

3 Im ālikin men kein Moronai eaar mej barāinwōt. Im āindein eaar jem̧ļo̧k jiln̄uul im jiljino iiō in tōl an riekajet ro.

4 Im ālikin men kein ilo jiln̄uul im jiljilimjuon iiō in iien tōl an riekajet ro, eaar wōr juon kumi in em̧m̧aan ro, em̧ool n̄an oran eo ļalem to̧ujin im ābukwi emān, ippān kōrā ro pāleer im ro nejier, raar ilo̧k jān āneen Zaraemla n̄an āneo eaar pād ituiōn̄.

5 Im ālikin men kein Hagoth, kōnke eaar juon em̧m̧aan edoebeb otem doebeb, kōn menin eaar ilo̧k im jek n̄an e juon wa eļap otem ļap, ioon tōrerein ko an āneo Bun̄-pāļo̧k, iturin āneo Āneen Mej, im bwillo̧keļo̧k ilo lo̧jet eo irilik, iturin kōnwa aidikdik eo ļo̧k ilo āneo ituiōn̄.

6 Im lo, eaar wōr elōn̄ riNipai ro raar deļo̧n̄eļo̧k ijo im kar jerakļo̧k kōn eļap mennin aikuj ko, im barāinwōt elōn̄ kōrā ro im ajri ro; im raar bōk kooj eo aer n̄an tuiōn̄. Im āindein eaar jem̧ļo̧k jiln̄uul im jiljilimjuon iiō.

7 Im ilo jiln̄uul im ruwalitōk iiō eo, ļein eaar jek wa ko jet. Im wa eo m̧oktata eaar bar ro̧o̧l tok, im elōn̄ļo̧k armej raar deļo̧n̄ļo̧k ie, im raar barāinwōt bōk eļap mennin aikuj ko, im bar jibadekļo̧k āneo ituiōn̄.

8 Im ālikin men kein kar jab bar ron̄ kake er. Im kōmij ļōmņak bwe raar maļon̄ ilo m̧wilaļ ko in lo̧meto. Im ālikin men kein bar juon wa eaar jerakļo̧k; im ia eaar ilo̧k ie kōmij jab jeļā.

9 Im ālikin men kein ilo iiō in eaar wōr elōn̄ armej ro raar ilo̧k ilo āneo ituiōn̄. Im āindein eaar jem̧ļo̧k jiln̄uul im ruwalitōk iiō eo.

10 Im ālikin men kein ilo jiln̄uul im ruwatimjuon iiō in iien tōl an riekajet ro, Siblon eaar mej barāinwōt, im Koriantōn eaar ilo̧k n̄an āneo ituiōn̄ ilo juon wa, n̄an bōkļo̧k mennin aikuj ko n̄an armej ro raar ilo̧k ilo āne jab eo.

11 Kōn menin eaar erom mennin aikuj n̄an Siblon n̄an jakiļo̧k men ko rekwōjarjar, m̧okta jān an mej, ioon ļeo nejin Hilamōn, eo kar kūr e Hilamōn, eo kar etņake etan jemān.

12 Kiiō lo, aolep m̧wijm̧wij kein ko raar pād ilo oņaake an Hilamōn kar jeje im jilkinļo̧k ilubwiljin ro nejin armej ilujeen aolepān āneo, ijello̧kun wōt m̧ōttan ko kar jiron̄ jān Alma ren jab ilo̧k n̄ani.

13 Mekarta, men kein kar kōjparoki ilo kwōjarjar, im lilaļļo̧k jān juon epepen n̄an eo juon, kōn menin, ilo iiō in, kar jakiļo̧k ioon Hilamōn, m̧okta jān mej an Siblon.

14 Im ālikin men kein ilo kar iiō in ewōr jet ribōrojepel ro raar ilo̧k ippān riLeman ro; im rekar bar kalim̧otak er n̄an illu ņae riNipai ro.

15 Im barāinwōt ilo ejja iiō in wōt raar wanlaļļo̧k kōn juon jarin tariņae ebwijlep n̄an tariņae ņae armej in Moronaia, ak ņae jarin tariņae eo an Moronaia, ilo eo kar m̧an er im ubaaklikļo̧k er bar juon alen n̄an āneo ko aer, im raar en̄taan kōn eļap jako.

16 Im āindein eaar jem̧ļo̧k jiln̄uul im ruwatimjuon iiō in iien tōl an riekajet ro ioon armej in Nipai.

17 Im āindein eaar jem̧ļo̧k bwebwenato eo an Alma, im Hilamōn ļeo nejin, im barāinwōt Siblon, eo eaar nejin em̧m̧aan.