1 Inaha, e tō’u mau taea’e here, nō te mea ’ua fa’ati’ahia vau ’ia haere mai ia ’outou nei, nō reira e tāmata vau ’ia parau atu ia ’outou i tō’u iho reo ; ’oia ïa, nā tō’u iho vaha, ’o te mātāmua ho’i teie o tā’u paraura’a atu ia ’outou i te parau a tō’u iho vaha, i tāpe’a-tāmau-hia ho’i au i te pārahira’a ha’avā, nō te rahi o te ’ohipa i ’ore ai i ti’a ai iā’u ’ia haere mai i’ō ’outou nei.

2 ’Aita roa i ti’a iā’u ’ia haere mai i’ō nei i teie taime ’āhiri ’aita te pārahira’a ha’avā i hōro’ahia i te tahi ’ē atu, nō te fa’atere nō te mono iā’u ; ’e nā roto i te aroha rahi o te Fatu ’ua fa’ati’a mai ’oia iā’u ’ia haere mai i’ō ’outou nei.

3 ’E inaha, ’ua haere mai au ma te ti’aturi rahi ’e te hina’aro rahi ho’i ’ia ’ite au ē, ’ua fa’aha’eha’a na ’outou ia ’outou iho i mua i te Atua, ’e ’ua tāmau māite noa ’outou i te ani atu i tōna ra maita’i, ’e ’ia ’ite ho’i au ē, ’ua riro ’outou ’ei feiā hapa ’ore i mua iāna ra ; ’e ’ia ’ite ho’i au ē, ’aita ’outou i vai i roto i te pe’ape’a ri’ari’a mai tō tātou mau taea’e i Zarahemela ra.

4 ’Ia fa’ahanahanahia rā te i’oa o te Atua, ’oia i hōro’a mai iā’u ’ia ’ite, ’oia ïa, ’oia i hōro’a mai iā’u ’ia fāri’i i te ’oa’oa rahi nō te ’itera’a ē ’ua tu’u-fa’ahou-hia rātou i ni’a i te ’ē’a nō tāna ra parauti’a.

5 ’E tē ti’aturi nei au, mai te au i te Vārua o te Atua i roto iā’u nei ē, e fāri’i ato’a vau i te ’oa’oa nō ni’a ia ’outou ; ’aita rā vau i hina’aro ’ia tupu mai tō’u ’oa’oa nō ni’a ia ’outou nā roto i te mau ’ati e rave rahi ’e te ’oto i fāri’ihia e au nō te mau taea’e i Zarahemela, inaha ho’i, ’ua fāri’i au i te ’oa’oa nō rātou i muri a’e i tō’u haerera’a nā roto i te ’ati rahi ’e te ’oto.

6 Inaha rā, tē ti’aturi nei au ē ’aita ’outou i vai na i roto i te ti’aturi ’ore rahi mai tō ’outou ra mau taea’e ; tē ti’aturi nei au ē ’aita ’outou i fa’ateiteihia i roto i te te’ote’o o tō ’outou ’ā’au ; ’oia ïa, tē ti’aturi nei au ē ’aita ’outou i ha’amau i tō ’outou ’ā’au i ni’a i te mau tao’a rahi ’e te mau mea faufa’a ’ore o teie nei ao ; ’oia ïa, tē ti’aturi nei au ē ’aita ’outou i ha’amori i te mau ’īdolo, ’ua ha’amori rā ’outou i te Atua mau, ’e te Atua ora, ’e tē hi’o ra ’outou i mua nō te ha’amatarara’a i tā ’outou ra mau hara, ma te fa’aro’o mure ’ore e tupu a muri atu.

7 Inaha ho’i, tē parau atu nei au ia ’outou na, e rave rahi te mau mea e tupu a muri atu ; ’e inaha, tē vai nei te hō’ē mea i hau roa atu i te faufa’a rahi i te mau mea ato’a—inaha ho’i, tē fātata mai nei te tau e ora ai ’e e tae mai ai te Tāra’ehara i rotopū i tōna mau ta’ata.

8 Inaha, ’aita vau e parau nei ē, e haere mai ’oia i rotopū ia tātou nei, ’a pārahi ai ’oia i roto i tōna tino tāhuti nei ; inaha ho’i, ’aita te Vārua i parau mai iā’u ē, e nā-reira-hia ïa. I teienei, nō ni’a i teie mea, ’aita ïa vau i ’ite ; ’ua ’ite rā vau ē, e mana tō te Fatu te Atua ’ia rave i te mau mea ato’a mai te au i tāna ra parau.

9 Inaha rā, teie tā te Vārua i parau mai iā’u, i te nā-’ō-ra’a mai ē : ’A ti’aoro atu i teie nei mau ta’ata i te nā-’ō-ra’a ē—’A tātarahapa ’outou, ’e ’a fa’aineine i te ’ē’a o te Fatu, ’e ’a haere nā ni’a i tōna mau ’ē’a, e mea tītī’aifaro te reira ; inaha ho’i, tē fātata mai nei te bāsileia o te ao, ’e e haere mai te Tamaiti a te Atua i ni’a i te fenua nei.

10 ’E inaha, e fānauhia mai ’oia e Maria i Ierusalema, i te fenua o tō tātou ra mau hui tupuna ; e pāretenia ’oia, te hō’ē fāri’i maita’i ’e tei mā’itihia ho’i ; ’o tē tāpo’ihia e te ata o te Vārua Maita’i ’e ’o tē tō nā roto i tōna mana, ’e e fānau mai ’oia i te hō’ē tamaiti, ’oia ïa, i te Tamaiti a te Atua.

11 ’E e haere atu ’oia ma te fa’a’oroma’i i te mau māuiui ’e te mau ’ati, ’e te mau huru fa’ahemara’a ato’a ; ’e e nā reira ’oia ’ia tupu te parau ’o tei nā ’ō mai ē, e rave ’oia i ni’a iāna te mau māuiui ’e te mau ma’i o tōna mau ta’ata.

12 ’E e rave ’oia i te pohe i ni’a iāna, ’ia ti’a iāna ’ia tātara i te mau tā’amu nō te pohe i ru’uru’uhia ai tōna ra mau ta’ata ; ’e e rave ’oia i tō rātou mau paruparu i ni’a iho iāna, ’ia fa’a’īhia tōna ra ’ā’au i te aroha, mai te au i te tino, ’e ’ia ’ite ’oia nā roto i te tino i te rāve’a nō te fa’aora i tōna mau ta’ata ’ia au i tō rātou mau paruparu.

13 I teienei, ’ua ite te Vārua i te mau mea ato’a ; ’āre’a rā e fa’a’oroma’i te Tamaiti a te Atua i te mamae tino nei, ’ia ti’a iāna ’ia rave i te mau hara a tōna ra mau ta’ata i ni’a iāna, ’e ’ia ti’a iāna ’ia fa’a’ore i tā rātou mau hapa mai te au i te mana nō tāna fa’aorara’a ; ’e i teienei, inaha, teie te ’itera’a pāpū i roto iā’u nei.

14 I teienei, tē parau atu nei au ia ’outou na, ’ia tātarahapa ’outou ’e ’ia fānau-fa’ahou-hia e ti’a ai ; nō te mea tē parau mai nei ho’i te Vārua ē, ’ia ’ore ’outou ’ia fānau-fa’ahou-hia e ’ore ’outou e fāri’i i te bāsileia o te ao ra ; nō reira, ’a haere mai ’e ’ia bāpetizohia nō te tātarahapara’a, ’ia tāmāhia ’outou i tā ’outou mau hara, ’ia noa’a ia ’outou te fa’aro’o i te ’Ārenio a te Atua, ’o tei hōpoi ’ē atu i te mau hara a tō te ao nei, tei iāna ho’i te pūai ’ia fa’aora ’e ’ia tāmā i te ta’ata i te mau mea parauti’a ’ore ato’a ra.

15 ’Oia ïa, tē parau atu nei au ia ’outou na, ’a haere mai ’e ’eiaha e mata’u, ’e ’a ha’apae i te mau hara ato’a i ro’o-’ōhie-hia ai ’outou ra, ’e i ru’uru’uhia ai ’outou i te pohe ; ’oia ïa, ’a haere mai ’e ’a haere ti’a atu, ’e ’a fa’a’ite atu i tō ’outou Atua ē, ’ua hina’aro ’outou ’ia tātarahapa i tā ’outou mau hara ’e ’ia fafau atu i te hō’ē fafaura’a iāna ’ia ha’apa’o i tāna mau fa’auera’a, ’e ’ia fa’a’ite pāpū atu iāna i teie nei mahana i te reira nā roto i te haerera’a i raro i te mau pape nō te bāpetizora’a.

16 ’E ’o ’oia ’o tē nā reira, ’e ’o tē ha’apa’o i te mau fa’auera’a a te Atua mai te reira atu ā taime, ’o ’oia ïa tei ha’amana’o i tā’u i parau atu iāna, ’oia ïa, e ha’amana’o ’oia ē ’ua parau atu na vau iāna ē, e noa’a te ora mure ’ore iāna, mai te au i te ’itera’a pāpū o te Vārua Mo’a, ’o tei fa’a’ite pāpū mai iā’u nei.

17 ’E i teienei, e tō’u mau taea’e here, ’ua ti’aturi ānei ’outou i teie nei mau mea ? Inaha, tē parau atu nei au ia ’outou na, ’oia ïa, ’ua ’ite ho’i au ē, ’ua ti’aturi ’outou i te reira ; ’e te rāve’a i ’ite ai au i te reira e mea nā roto ïa i te fa’a’itera’a a te Vārua i roto iā’u nei. ’E i teienei nō te mea e mea pūai tō ’outou fa’aro’o i te reira, ’oia ïa, i te mau mea o tā’u i parau atu, ’ua rahi ïa tō’u nei ’oa’oa.

18 ’E mai tā’u ho’i i parau atu ia ’outou na i te mātāmua ra, tē vai nei tō’u hina’aro ’ia ’ore ’outou ’ia vai i roto i te huru pe’ape’a mai tō ’outou ra mau taea’e, ’e i teienei, ’ua ’ite au ē, ’ua fa’ati’ahia tō’u ra hina’aro.

19 ’Ua ’ite ho’i au ē, tei ni’a ’outou i te mau ’ē’a nō te parauti’a ; ’ua ’ite au ē, tei ni’a ’outou i te ’ē’a e tae atu ai i te bāsileia o te Atua ; ’oia ïa, ’ua ’ite au ē, tē fa’atītī’aifaro nei ’outou i tōna mau ’ē’a.

20 ’Ua ’ite au ē, ’ua fa’a’itehia ’outou i te reira nā roto i te ’itera’a pāpū o tāna ra parau, ’e ’aita e ti’a iāna ’ia haere nā te mau ’ē’a pi’o, ’e ’aita ato’a ’oia e fa’ahuru ’ē i tāna i parau ; ’e ’aita ho’i ’oia e fāriu atu i te pae ’atau ’e i te pae ’aui, ’oia ho’i mai te mea ti’a i te mea ti’a ’ore ; nō reira, e mea mure ’ore tōna haere’a.

21 ’E ’aita ’oia e pārahi i roto i te mau hiero vi’ivi’i ; ’e ’aita ho’i te hō’ē mea vi’ivi’i ’e ’aore rā te hō’ē mea repo e ti’a ’ia fāri’ihia i roto i te bāsileia o te Atua ; nō reira tē parau atu nei au ia ’outou ē, e tae mai te tau, ’oia ïa, i taua mahana hope’a ra, ’o ’oia ’o tei vi’ivi’i e vai noa ’oia i roto i tōna huru vi’ivi’i.

22 ’E i teienei, e tō’u mau taea’e here, ’ua parau atu vau i teie mau mea ia ’outou na, ’ia fa’aara vau ia ’outou ’ia ’ite ’outou i tā ’outou ’ohipa i te Atua ra, ’ia ti’a ia ’outou ’ia haere ma te hapa ’ore i mua iāna, ’ia haere ho’i ’outou mai te au i te fa’anahora’a mo’a a te Atua ra i fāri’ihia ai ’outou na.

23 ’E i teienei, ’ua hina’aro vau ’ia riro ’outou ’ei feiā ha’eha’a, ’e te auraro, ’e te marū ; ’e ’ei feiā a’o-’ōhie-hia ; tei ’ī i te fa’a’oroma’i, ’e te hitahita ’ore ; ’e te au maita’i i te mau mea ato’a ; ’e te itoito i te ha’apa’ora’a i te mau fa’auera’a a te Atua i te mau taime ato’a ; i te anira’a i te mau mea ato’a e au ia ’outou na, i tā te vārua ’e tā te tino ato’a ho’i ; ’e i te ha’amaita’ira’a i te Atua nō te mau mea ato’a tā ’outou e fāri’i ma te fa’aea ’ore.

24 ’E ’ia tāpe’a māite ’outou i te fa’aro’o, ’e te ti’aturi, ’e te here, ’e i reira e rahi ai tā ’outou ravera’a i te mau ’ohipa maita’i.

25 ’E ’ia ha’amaita’i mai te Fatu ia ’outou, ’e ’a ha’apa’o māite i tō ’outou iho mau ’ahu ’ia pōra’o ’ore, ’ia ti’a ia ’outou i te pae hope’a ’ia ha’apārahihia i roto i te bāsileia o te ao ra i pīha’i iho ia Aberahama, ia Isaaka, ’e ia Iakoba, ’e i te mau peropheta mo’a mai te mātāmua mai ā o te ao nei, ’e ’ia pōra’o ’ore tō ’outou mau ’ahu mai tō rātou mau ’ahu i pōra’o ’ore, ’e ’ia ’ore ’ia haere i rāpae ē a muri noa atu.

26 ’E i teienei, e tō’u mau taea’e here, ’ua parau atu vau i teie mau parau ia ’outou mai te au i tā te Vārua i fa’a’ite pāpū mai iā’u nei ; ’e ’ua ’oa’oa roa tō’u vārua nō tō ’outou itoito rahi ’e te ha’apa’o maita’i i tā’u nei parau.

27 ’E i teienei, ’ia tae mai te hau o te Atua i ni’a ia ’outou na, ’e i ni’a ho’i i tō ’outou mau ’utuāfare e mau fenua, ’e i ni’a ato’a i tā ’outou mau nana māmoe ’e mau nana pua’atoro, ’e tā ’outou ato’a ra mau tao’a, ’e i ni’a ato’a i tā ’outou mau vahine ’e tā ’outou mau tamari’i, mai te au i tō ’outou fa’aro’o ’e tā ’outou mau ’ohipa maita’i, mai teie tau atu ē a muri noa atu. ’E ’o teie tā’u i parau. ’Āmene.