1 Ut jo’kan wi’chik laa’in, aj Alma, rik’in naq taqlanb’ilin xb’aan li Dios naq tink’am chiwix laj Amulek ut tinxik ut tinjultikanq wi’chik aatin chiru li tenamit a’in, malaj li ani wankeb’ sa’ li tenamit Ammonihah, kik’ulman, naq kin’ok chi jultikank aatin chiruheb’, naq ke’ok chinwech’b’al, ut ke’xye:

2 Anihat laa’at? Ma nakak’oxla tab’i’ naq taqapaab’ li tixch’olob’ jun chi winq, us ta tixjultika chiqu naq taa’oso’q li ruchich’och’?

3 Anajwan eb’ a’an ink’a’ ke’xtaw ru li aatin li ke’xye; xb’aan naq moko ke’xnaw ta naq taa’oso’q ajwi’ li ruchich’och’.

4 Ut ke’xye ajwi’: Ink’a’ taqapaab’ laa waatin wi jo’ profeet taach’olob’ naq li nimla tenamit a’in taasache’q sa’ junaj chi kutan.

5 Anajwan moko neke’xnaw ta naq li Dios naru chixb’aanunkil xkomon li sachb’a-ch’oolejil k’anjel a’in, xb’aan naq a’aneb’ jun tenamit kaweb’ raam ut jipeb’ xk’a’uxl.

6 Ut ke’xye: Ani pe’ li Dios, li maajun chik wankilal naxtaqla sa’ xyanq li tenamit a’in, yal jun ajwi’ chi winq, re xch’olob’ankil xyaalal chiruheb’ xkomon li xninqal ru ut sachb’a-ch’oolejil na’leb’ a’in?

7 Ut ke’xxaqab’ chaq rib’ re xk’eeb’al li ruq’eb’ sa’ inb’een, a’b’an k’ehomaq reetal, moko ke’xb’aanu ta. Ut kinxaqli rik’in xkawil inch’ool re ch’olob’ank chiruheb’; relik chi yaal, kinch’olob’ li yaal chiruheb’ chi kaw inch’ool, ut kinye:

8 K’ehomaq reetal, ex tasal tenamit aj maakex ut po’b’il eech’ool, chan ru naq xsach sa’ eech’ool li na’leb’ kanab’anb’il chaq xb’aaneb’ lee yuwa’; relik chi yaal, k’a’jo’ sa’ junpaat naq xsach sa’ eech’ool lix taqlahom li Dios.

9 Ma ink’a’ jultik eere naq li qayuwa’ aj Lehi ki’isiik chaq Jerusalen xb’aan ruq’ li Dios? Ma ink’a’ jultik eere naq chixjunileb’ ke’b’eresiik xb’aan a’an chiru li yamyookil ch’och’?

10 Ut ma toja’ sa’ junpaat xsach sa’ eech’ool jo’ k’ihal sut kixkoleb’ li qayuwa’ sa’ ruq’eb’ chaq li xik’ neke’ilok reheb’, ut kixkoleb’ rix re naq ink’a’ te’sache’q, xb’aan ruq’eb’ ajwi’ li ras riitz’ineb’?

11 Relik chi yaal, ut wi ta moko xb’aan ta lix wankilal li maak’a’ xjuntaq’eetankil, ut li ruxtaan, ut xnajtil li royb’enihom choq’ qe, ak najter raj chik anajwan naq laa’o koo’isiik raj sa’ xb’een li ruchich’och’ chi maak’a’ xjalb’al, ut maare kook’ehe’ raj sa’ jun wanjik re rahilal ut rahil ch’oolejil li maak’a’ roso’jik.

12 K’ehomaq reetal, anajwan ninye eere naq a’an nekexxtaqla chixjalb’al eek’a’uxl; ut wi ink’a’ nekejal eek’a’uxl, maamin texruuq chireechaninkil li rawa’b’ejihom li Dios. A’ut k’ehomaq reetal, moko chixjunil ta a’in—kexxtaqla chixjalb’al eek’a’uxl, malaj ut a’an texxsach chaq chi junajwa chiru lix b’een li ruchich’och’; relik chi yaal, a’an texrula’ani sa’ xjosq’il, ut sa’ xnimal xjosq’il moko tixsutq’isi ta rib’.

13 K’ehomaq reetal, ma ink’a’ jultik eere li aatin li kixye re laj Lehi, li naxye naq: A’ yaal jo’ chanru nekepaab’ lin taqlahom, tex’usaaq sa’ li ch’och’? Ut jo’kan wi’chik, yeeb’il naq: A’ yaal jo’ chanru ink’a’ nekepaab’ lin taqlahom tex’isiiq chaq chiru li Qaawa’.

14 Anajwan nawaj raj naq chijultiko’q eere, naq a’ yaal jo’ chanru naq eb’ laj Lamanita ink’a’ ke’xpaab’ lix taqlahom li Dios, ke’isiik chaq chiru li Qaawa’. Anajwan naqil naq xk’ute’ xyaalalil li raatin li Dios sa’ li na’leb’ a’in, ut eb’ laj Lamanita ke’isiik chaq chiru, chalen chaq naq kitikla li q’etok aatin xb’aaneb’ sa’ li ch’och’.

15 A’b’anan ninye eere, naq ka’ch’inaq wi’chik xrahileb’ a’an sa’ xkutankil li raqb’a-aatin cheru laa’ex, wi nekexkana sa’ lee maak, relik chi yaal, ut ka’ch’inaq wi’chik xrahileb’ sa’ li yu’am a’in cheru laa’ex, wi ink’a’ nekejal eek’a’uxl.

16 Xb’aan naq wan naab’al li k’a’ru yeechi’inb’il reheb’ laj Lamanita; xb’aan naq a’an xmaak li na’leb’ kanab’anb’il chaq xb’aaneb’ lix yuwa’ li kib’aanunk re naq ke’kana chi maak’a’ xnawomeb’ jo’ li wankeb’ wi’; jo’kan naq li Qaawa’ taaruxtaanaheb’ ru ut tixnajtob’resi ru lix wanjikeb’ sa’ li ch’och’.

17 Ut sa’ junaq q’e kutan te’k’ame’q chixpaab’ankil li raatin, ut chixnawb’al naq moko yaal ta li na’leb’ kanab’anb’il chaq xb’aaneb’ lix yuwa’eb’; ut naab’al reheb’ te’kole’q, xb’aan naq li Qaawa’ taaruxtaana ru chixjunileb’ li te’patz’oq re lix k’ab’a’.

18 A’ut k’ehomaq reetal, ninye eere naq wi nekexkana sa’ lee maa’usilal, naq moko taanajtob’resiiq ta ru lee kutan sa’ li ch’och’, xb’aan naq te’taqlaaq laj Lamanita sa’ eeb’een; ut wi ink’a’ nekejal eek’a’uxl te’chalq sa’ jun hoonal li moko teenaw ta, ut tex’ula’aniiq rik’in li sache’k chi junajwa; ut taawanq jo’ chanru xnimal xjosq’il li Qaawa’.

19 Xb’aan naq a’an ink’a’ texxkanab’ chi wank eeyu’am sa’ lee maa’usilal, re xsachb’al lix tenamit. Ninye eere, Ink’a’; tixkanab’ raj b’an naq eb’ laj Lamanita te’xsach chixjunil lix tenamit, xtenamit laj Nefi yeeb’il reheb’, wi ta taaruuq naq te’t’ane’q sa’ li maak ut li q’etok aatin, chirix naq k’eeb’il xnimal li saqen ut xnimal li na’leb’ reheb’ xb’aan li Qaawa’ lix Dios;

20 Relik chi yaal, chirix naq wanjenaqeb’ choq’ jun tenamit q’axal usilanb’ileb’ xb’aan li Qaawa’; relik chi yaal, chirix naq q’axal usilanb’ileb’ wi’chik sa’ xb’een chixjunil chik li tenamit, li junkab’al, li aatinob’aal, malaj li teepal, chirix naq k’eeb’ileb’ chixnaw chixjunil li k’a’aq re ru, jo’ chanru li rajomeb’, ut lix paab’aaleb’, ut lix tijeb’, chirix li k’a’ru wanjenaq, ut li wan, ut li toj taachalq;

21 Chirix ula’aniik xb’aan lix Musiq’ li Dios; chirix seraq’ik rik’ineb’ li anjel, ut chirix naq aatinanb’ileb’ xb’aan xyaab’ xkux li Qaawa’; ut chirix wank li musiq’ej re profeetil aatin rik’ineb’, ut li musiq’ej re k’utb’esink, ut jo’kan ajwi’ k’iila maatan, li maatan re aatinak rik’in jalanil aatinob’aal, ut li maatan re jultikank aatin, ut li maatan re li Santil Musiq’ej, ut li maatan re jaltesink ru aatin;

22 Relik chi yaal, ut chirix naq isinb’ileb’ chaq xb’aan li Dios sa’ li ch’och’ Jerusalen, xb’aan ruq’ li Qaawa’, chirix kole’k chiru we’ej, ut chiru yajerk, ut chiru li k’iila paay chi yajel, li jar raqal wan, ut chirix naq nimanb’il xkawilaleb’ sa’ pleet, re naq ink’a’ te’sache’q, chirix naq isinb’ileb’ chaq chi moosil li junjunq sut, ut chirix naq k’uulanb’ileb’ ut kolb’ileb’ rix toj anajwan, ut k’eeb’ileb’ chi usaak toj reetal naq b’ihomeb’ sa’ jar paay li k’a’aq re ru—

23 Ut anajwan k’ehomaq reetal ninye eere, naq wi li tenamit a’in, li ke’k’uluk re xk’ihal li osob’tesink a’in sa’ ruq’ li Qaawa’, te’xq’et aatin chiru li saqen ut li nawom li ak xe’xk’ul, ninye eere naq wi jo’kan taa’uxmanq, naq wi te’t’ane’q sa’ li q’etok aatin, k’a’jo’ naq ka’ch’inaq wi’chik xrahileb’ laj Lamanita chiruheb’ a’an.

24 Xb’aan naq k’ehomaq reetal, lix yeechi’ihom li Qaawa’ wan chi ye’b’il reheb’ laj Lamanita, a’b’anan moko eere ta laa’ex wi nekexq’etok aatin; xb’aan naq ma ink’a’ kixyeechi’i li Qaawa’ chi ch’olch’o ut kixtaqla xkawilal li raatin, naq wi teepo’resi eech’ool rik’in a’an, texsache’q chaq chi junajwa chiru lix b’een li ruchich’och’?

25 Anajwan ut xb’aan a’in, re naq ink’a’ texsache’q, li Qaawa’ kixtaqla lix anjel chirula’aninkil naab’al reheb’ lix tenamit, ut kixch’olob’ chiruheb’ naq tento te’xik ut te’xjap re chi anchaleb’ xmetz’ew chiru li tenamit a’in, ut te’xye: Jalomaq eek’a’uxl, xb’aan naq ak taahaye’q chaq li awa’b’ejihom re choxa;

26 Ut moko k’iila kutan ta chik naq li Ralal li Dios taachalq sa’ xloq’al; ut lix loq’al a’anaq xloq’al li Junaj Yo’lajenaq chiru li Yuwa’b’ej, nujenaq chi usilal, juntaq’eetalil, ut yaal, nujenaq chi kuyuk, uxtaan, ut najtil oyb’enink, seeb’ chirab’inkil lix yaab’eb’ lix tenamit ut chixsumenkil ru lix tijeb’.

27 Ut k’ehomaq reetal, a’an nachal chixtojb’aleb’ rix li ani te’kub’eeq xha’ choq’ re li jalb’a-k’a’uxlej, rik’in xpaab’ankil lix k’ab’a’.

28 Jo’kan ut, kawresihomaq lix b’e li Qaawa’, xb’aan naq xnach’ok chaq li kutan naq chixjunileb’ li winq te’xq’ol jun xq’ajkamunkil lix k’anjeleb’, jo’ chanru li wanjenaqeb’ wi’—wi tiikeb’ naq ke’wan, te’xq’ol xkolb’aleb’ li raam, jo’ chanru lix wankil ut lix kolom li Jesukristo; ut wi ink’a’ useb’ xe’wan te’xq’ol li tojb’a-maak choq’ re li raameb’, jo’ chanru lix wankilal ut lix preexil laj tza.

29 Anajwan k’ehomaq reetal, a’an a’in lix yaab’ xkux li anjel, li naxjap re chiru li tenamit.

30 Ut anajwan, ex was wiitz’in raarookex inb’aan, xb’aan naq was wiitz’inex, ut tento raj naq raarooqex, ut tento raj tex’uuchinq rik’in k’anjel li k’ulub’ej choq’ re li jalb’a-k’a’uxlej, rik’in naq q’axal kawob’resinb’il eeraam chirix li raatin li Dios, ut rik’in naq laa’ex jun tenamit sachenaq ut t’anenaq.

31 Anajwan kik’ulman naq chirix naq laa’in, aj Alma, kinye li aatin a’in, k’ehomaq reetal, eb’ li tenamit ke’chal xjosq’il wik’in xb’aan naq kinye reheb’ naq a’aneb’ jun tenamit kaweb’ raam ut jipeb’ xk’a’uxl.

32 Ut jo’kan ajwi’ sa’ xk’ab’a’ naq kinye reheb’ naq a’aneb’ jun tenamit sachenaq ut t’anenaq ke’josq’o’ wik’in, ut ke’xsik’ xk’eeb’al li ruq’ sa’ inb’een, re tine’xtz’ap sa’ tz’alam.

33 A’b’anan kik’ulman naq li Qaawa’ ink’a’ kixkanab’eb’ naq tine’xchap sa’ li hoonal a’an ut tine’xtz’ap sa’ tz’alam.

34 Ut kik’ulman naq laj Amulek xko’o ut kixxaqab’ rib’ chi uub’ej, ut ki’ok ajwi’ chi jultikank aatin chiruheb’. Ut anajwan moko chixjunil ta li raatin laj Amulek tz’iib’anb’il, a’b’anan jun raqal li raatin tz’iib’anb’il sa’ li hu a’in.