Buk blong Inos

1 Luk, i bin hapen se mi, Inos, mi save se papa blong mi i bin wan stret man—from hem i bin tijim mi long lanwis blong hem, mo tu, long ol fasin we Lod i lukaotgud mo i givim advaes long man—mo mi blesem nem blong God blong mi from samting ia—

2 Mo bae mi talem long yufala long saed blong traehad we mi bin gat long fored blong God, bifo mi bin kam klin aot long ol sin blong mi.

3 Luk, mi bin go blong lukaotem ol animol long ol bus; mo ol toktok we mi bin harem plante taem we papa blong mi i talem long saed blong laef we i no save finis, mo glad blong ol sent, i bin go draon dip long hat blong mi.

4 Mo sol blong mi i bin hanggri; mo mi bin nildaon long fored blong Meka blong mi, mo mi bin prea long hem wetem wan strongfala prea mo bin askem hem strong from sol blong miwan; mo long fuldei mi bin prea long hem; yes, mo taem we naet i bin kam mi bin stap blong leftemap voes blong mi laod mekem se i bin kasem ol heven.

5 Mo wan voes i bin kam long mi, i talem se: “Inos, mi mi fogivim ol sin blong yu, mo bae mi blesem yu.”

6 Mo mi, Inos, mi bin save we God i no save giaman; taswe, hem i bin tekemaot ol rong blong mi.

7 Mo mi bin talem se: “Lod, ?yu mekem samting ia olsem wanem?”

8 Mo hem i bin talem long mi se: “From fet blong yu long Kraes, we yu yu neva bin harem o luk hem. Mo plante yia bae i pas i go bifo hem i soemaot hemwan long bodi blong mit mo bun; taswe, yu go stat, fet blong yu i bin mekem yu klin.”

9 Nao, i bin hapen se taem we mi bin harem ol toktok ia, mi bin stat blong gat wan tingting we mi wantem wan gudlaef blong ol brata blong mi, Ol Man blong Nifae; taswe, mi bin kapsaetem ful sol blong mi long God from olgeta.

10 Mo taem we, olsem ia nao, mi bin stap traehad long spirit, luk, voes blong Lod i bin kam long maen blong mi bakegen, i talem se: “Bae mi visitim ol brata blong yu folem strong tingting blong olgeta blong obei ol komanmen blong mi. Mi bin givim long olgeta graon ia, mo hem i wan tabu graon; mo bae mi no sakem wan nogus tok long graon ia, be nomo, sapos i from rabis fasin; taswe, bae mi visitim ol brata blong yu folem wanem mi bin talem; mo ol fasin blong brekem loa, bae mi mekem se i foldaon long hed blong olgeta bakegen wetem fasin blong harem nogud.”

11 Mo afta mi, Inos, mi bin harem ol toktok ia, fet blong mi long Lod i stat blong i nomo seksek; mo mi bin prea long hem wetem plante longfala hadwok from ol brata blong mi, Ol Man blong Leman.

12 Mo i bin hapen se afta we mi bin prea mo bin wok wetem strong tingting, Lod i bin talem long mi: “Bae mi givim long yu olsem we yu yu wantem, from fet blong yu.”

13 Mo nao, luk, hemia i bin samting we mi bin wantem long hem—se sapos i olsem, we ol pipol blong mi, Ol Man blong Nifae, bae oli foldaon long fasin blong brekem loa, mo tru long eni wei, oli ded, mo Ol Man blong Leman bae oli no ded, nao bae Lod God bae i sevem wan histri blong ol pipol blong mi, Ol Man blong Nifae; iven sapos i mas hapen tru long paoa blong tabu han blong hem, blong mekem se i save kamaot long wan dei long fiuja long Ol Man blong Leman, blong, maet, oli save tekem olgeta long fasin blong sevem man—

14 From long taem naoia ol hadwok blong mifala oli blong nating nomo blong karembak olgeta oli kam long tru fet. Mo oli bin mekem wan promes, long kros blong olgeta se, sapos i save hapen, bae oli prapa spolem gud ol histri blong mifala mo mifala, mo tu, evri kastom blong ol papa blong mifala.

15 Taswe, from mi bin save se Lod God i save sevem ol histri blong mifala, mi bin gohed blong prea long hem, from hem i bin talem long mi se: “Eni samting we bae yu askem wetem fet, mo stap biliv se bae yu kasem long nem blong Kraes, bae yu kasem samting ia.”

16 Mo mi bin gat fet, mo mi bin prea long God blong bae hem i sevem ol histri; mo hem i bin mekem wan kavenan wetem mi se bae hem i karem olgeta i kamaot long Ol Man blong Leman long taem we hem i jusum.

17 Mo mi, Inos, mi bin save se bae i hapen folem kavenan we hem i bin mekem; taswe, sol blong mi i bin stop blong wari.

18 Mo Lod i bin talem long mi: “Ol papa blong yu tu oli bin askem long mi samting ia; mo bae mi mekem samting ia long olgeta folem fet blong olgeta; from fet blong olgeta i bin olsem blong yu.”

19 Mo nao i hapen se mi, Inos, mi bin go aot long medel blong ol pipol blong Nifae, mi bin talemaot ol profesi blong ol samting we bae oli kam, mo mi talem testemoni abaot ol samting we mi bin harem mo bin luk.

20 Mo mi testifae se ol pipol blong Nifae oli bin lukaotem blong wok strong wetem strong tingting oltaem blong karembak Ol Man blong Leman oli kam long tru fet long God. Be ol wok blong mifala i blong nating nomo; fasin ia blong olgeta blong no laekem ol man i bin strong, mo ol rabis fasin blong olgeta i bin lidim olgeta, mekem se oli bin kam wael, mo prapa wael, mo oli wan pipol we i laekem blong mekem blad i ron, oli bin fulap wetem fasin blong wosipim ol aedol mo oli bin doti; oli bin kakae ol animol we oli kakae ol narafala animol; oli bin stap insaed long ol tenet, mo oli wokbaot olbaot long waelples, wetem wan sotfala skin blong animol we i raonem wes blong olgeta, mo oli bin katem sevem hea blong hed blong olgeta; mo oli bin gud tumas long bonara, mo long huknaef, mo long akis. Mo plante long olgeta i no bin kakae eni samting, be mit nomo we i no tan; mo oli bin gohed oltaem blong lukaotem mifala blong kilimded mifala.

21 Mo i bin hapen se ol pipol blong Nifae oli bin wok long graon, mo oli resemap evri kaen sid, mo blong ol frut, mo ol grup blong eni kaen animol we oli stap tugeta, mo ol grup blong ol kaen buluk blong evri kaen, mo ol nanigot, mo ol wael nanigot, mo tu, plante hos.

22 Mo i bin gat bigfala namba blong ol profet long medel blong mifala. Mo ol pipol oli bin wan pipol we oli stronghed, mo oli slo blong andastanem samting.

23 Mo i no bin gat eni samting, be ol rabis hadtaem nomo, oli bin prij mo profesae long saed blong ol wo, mo ol rao, mo ol foldaon, mo oli gohed blong mekem se oli tingbaot ded, mo taem blong taem we i no save finis, mo ol jajmen mo paoa blong God, mo evri samting ia—oli gohed blong mekem olgeta oli gat respek long Lod oltaem. Mi talem se i no bin gat eni samting, be ol samting ia nomo, mo toktok we i klia tumas we bae i blokem olgeta blong go daon kwik long ded. Mo long fasin ia nao mi raet long saed blong olgeta.

24 Mo mi bin luk ol faet bitwin Ol Man blong Nifae mo Ol Man blong Leman, long rod blong ol dei blong mi.

25 Mo i bin hapen se mi bin stat blong kam olfala, mo wan handred mo seventi mo naen yia i bin pas long taem we papa blong mifala Lihae i bin aot long Jerusalem.

26 Mo mi bin luk se i no longtaem mi mas go daon long gref blong mi, mo paoa blong God i bin kam long mi mekem se mi mas prij mo talemaot profesi long ol pipol ia, mo talemaot trutok folem trutok we i stap long Kraes. Mo mi bin talemaot hemia long evri dei blong mi, mo mi bin glad long hem mo i bitim evri narafala samting long wol.

27 Mo kolosap mi go long ples blong spel blong mi, we i wetem Ridima blong mi; from mi save se tru long hem bae mi spel. Mo mi glad long dei we bodi blong mit mo bun blong mi bae i kam wan niu bodi we i nomo save ded, mo bae i stanap long fored blong hem; afta bae mi luk fes blong hem wetem glad, mo bae hem i talem long mi: “Kam long mi, yu we mi bin blesem yu, i gat wan ples i rere blong yu long ol kingdom blong Papa blong mi.” Amen.