1 Ut kik’ulman naq laj Xez, a’an ralal xk’ajol laj Het—xb’aan naq laj Het ki’oso’ chaq xb’aan li we’ej, ut chixjunil lix junkab’al, ka’ajwi’ laj Xez ink’a’—jo’kan ut, laj Xez ki’ok wi’chik chixwaklesinkil jun q’etb’il tenamit.

2 Ut kik’ulman naq laj Xez kijultiko’ re lix sachlijikeb’ lix yuwa’, ut kixwaklesi jun awa’b’ejihom tiik; xb’aan naq kijultiko’ re li k’a’ru kixb’aanu chaq li Qaawa’ sa’ xk’amb’al chaq laj Jared ut li ras chiru li chamal ha’; ut kib’eek sa’eb’ lix b’e li Qaawa’; ut ke’yo’la ralal ut xrab’in.

3 Ut li asb’ej reheb’ li ralal, aj Xez xk’ab’a’, kixpo’resi xch’ool chiru; a’b’anan laj Xez kisak’e’ xb’aan ruq’ jun aj elq’, xb’aan xq’axalil lix b’ihomal, ut rik’in a’an kiwan wi’chik sa’ tuqtuukilal lix yuwa’.

4 Ut kik’ulman naq lix yuwa’ kixkab’la naab’al li tenamit chiru lix b’een li ch’och’, ut li tenamit ki’ok wi’chik chixjek’inkil rib’ chiru chixjunil lix b’een li ch’och’. Ut laj Xez kiwan chi yo’yo toj reetal naq numtajenaq xk’ihal lix chihab’; ut kiyo’la laj Riplakix choq’ ralal. Ut kikam, ut laj Riplakix ki’awa’b’ejin sa’ xna’aj.

5 Ut kik’ulman naq laj Riplakix ink’a’ kixb’aanu li k’a’ru tiik sa’ rilob’aal li Qaawa’, xb’aan naq ke’wan naab’al li rixaqil ut xmoosil ixaqil, ut kixk’e sa’ xb’eeneb’ xtel li winq li k’a’ru ra riiqankil; relik chi yaal, kixk’eheb’ chixtoj li rahil tojleb’ chiru li tenamit; ut rik’in li tojleb’ kixyiib’ k’iila kab’l paapookeb’ xsa’.

6 Ut kixkab’la jun k’ojarib’aal choq’ re, numtajenaq xch’ina-usal; ut kixyiib’ k’iila tz’alam, ut ani ink’a’ ki’ajok xk’eeb’al rib’ rub’el li tojleb’, kixtz’ap sa’ tz’alam, ut ani ink’a’ naru chixtojb’al li tojleb’ kixtz’ap sa’ tz’alam; ut kixtaqla naq te’k’anjelaq rajlal re xk’ulb’al li nak’anjelak reheb’; ut ani ink’a’ ki’ajok re k’anjelak kixk’e chi kamsiik.

7 Jo’kan naq kixtaw chixjunil lix chaab’il k’anjel, relik chi yaal, lix chaab’il ch’iich’ oor kixtaqla xsaqob’resinkil ru sa’ tz’alam; ut jar paay li k’a’ru k’anjelanb’il kixtaqla xk’anjelankil sa’ tz’alam. Ut kik’ulman naq kixtawasi li tenamit rik’in li ko’b’eetak kixb’aanu ut lix tz’eqb’eetalil.

8 Ut chirix naq ki’awa’b’ejin chiru xnumik wiib’ roxk’aal chihab’, eb’ li tenamit ke’wakli sa’ po’resink ch’oolej rik’in; ut ki’ok wi’chik chi wank li pleet sa’ li ch’och’, jo’kan naq kikamsiik laj Riplakix, ut eb’ li ralal xk’ajol ke’alinasiik chaq sa’ li ch’och’.

9 Ut kik’ulman naq chirix xnumik k’iila chihab’, laj Morianton (a’an ralal xk’ajol chaq laj Riplakix) kixch’utub’ jun teep aj pleet xkomoneb’ li isinb’ileb’ chaq, ut xko’o ut kixpleeti li tenamit, ut kixtaw xwankil sa’ xb’een k’iila tenamit; ut kiniman xrahil li pleet chi numtajenaq, ut kikana chiru xnumik k’iila chihab’; ut a’an kixtaw xwankil sa’ xb’een chixjunil li ch’och’, ut kixxaqab’ rib’ choq’ rey sa’ xb’een chixjunil li ch’och’.

10 Ut chirix naq kixxaqab’ rib’ choq’ rey, kixkotz li iiq sa’ xb’een li tenamit, ut rik’in a’an kixtaw usilal sa’ rilob’aaleb’ li tenamit, ut eb’ a’an ke’xyul choq’ xreyeb’.

11 Ut kixb’aanu li tiik ruhil na’leb’ choq’ reheb’ li tenamit, a’b’an moko choq’ re ta a’an, xb’aan xk’ihal li ko’b’eetak kixb’aanu; jo’kan naq ki’isiik chaq chiru li Qaawa’.

12 Ut kik’ulman naq laj Morianton kixkab’la k’iila tenamit, ut eb’ li tenamit ke’b’ihomo’ chi numtajenaq rub’el li rawa’b’ejil, rik’in kab’l, ut rik’in oor ut plaat, ut rik’in rawb’al li iyaj nak’uxman, ut rik’in ketomq, ut teep chi xul, ut k’a’aq chik re ru li kik’ojob’aak wi’chik reheb’.

13 Ut laj Morianton kiwan chi yo’yo toj reetal naq numtajenaq xk’ihal lix chihab’, toja’ ut naq kiyo’la laj Kim choq’ ralal; ut laj Kim ki’awa’b’ejin sa’ xna’aj lix yuwa’; ut ki’awa’b’ejin chiru waqxaqib’ chihab’, ut kikam lix yuwa’. Ut kik’ulman naq laj Kim ink’a’ ki’awa’b’ejin sa’ tiikilal, jo’kan naq moko usilanb’il ta xb’aan li Qaawa’.

14 Ut li ras kiwakli sa’ po’resink ch’oolej rik’in, ut rik’in a’an kixk’am chi preexil; ut kikana sa’ preexil chixjunil lix kutan; ut ke’yo’la ralal ut xrab’in sa’ preexil, ut sa’ xtiixilal kiyo’la laj Levi choq’ ralal; ut kikam.

15 Ut kik’ulman naq laj Levi kik’anjelak sa’ preexil chirix xkamik lix yuwa’, chiru xnumik wiib’ roxk’aal chihab’. Ut kixpleeti li rey sa’ xb’een li ch’och’, ut rik’in a’an kixtaw li awa’b’ejihom choq’ re xjunes.

16 Ut chirix naq kixtaw li awa’b’ejihom choq’ re xjunes kixb’aanu li k’a’ru tiik sa’ rilob’aal li Qaawa’; ut eb’ li tenamit ke’usa sa’ li ch’och’; ut kiwan a’an chi yo’yo toj reetal naq tz’aqal naab’al xchihab’, ut ke’yo’la ralal ut xrab’in; ut kiyo’la ajwi’ laj Korom choq’ ralal, ut kixyul a’an choq’ rey sa’ xna’aj.

17 Ut kik’ulman naq laj Korom kixb’aanu li k’a’ru chaab’il sa’ rilob’aal li Qaawa’ chixjunil lix kutan; ut ke’yo’la naab’al li ralal ut xrab’in; ut chirix naq kiril chaq k’iila kutan ki’oso’ xyu’am, jo’ chanru xkomon chik li ruchich’och’; ut laj Kix ki’awa’b’ejin sa’ xna’aj.

18 Ut kik’ulman naq laj Kix ki’oso’ ajwi’ xyu’am, ut laj Lib ki’awa’b’ejin sa’ xna’aj.

19 Ut kik’ulman naq laj Lib kixb’aanu ajwi’ li k’a’ru chaab’il sa’ rilob’aal li Qaawa’. Ut sa’ xkutankil laj Lib ke’sachman li k’anti’ wankeb’ xmay. Jo’kan naq xkoheb’ sa’ li ch’och’ sa’ xjayal lix tz’e li saq’e, re xyoob’al li tzakemq choq’ re li ani wankeb’ sa’ li ch’och’, xb’aan naq li ch’och’ nujenaq rik’in xxulil li k’iche’. Ut laj Lib ajwi’ ki’ok choq’ nimla aj yo.

20 Ut ke’xyiib’ jun nimla tenamit chixk’atq li ka’ch’in ruhil ru’uj chi ch’och’, chixk’atq li na’ajej b’ar wi’ li palaw naxjach ru li ch’och’.

21 Ut ke’xk’uula li ch’och’ sa’ xjayal lix tz’e li saq’e choq’ yamyookil na’ajej, re xtawb’al li xul re xyoob’al. Ut chixjunil lix b’een li ch’och’ sa’ xjayal lix nim li saq’e nujenaq rik’in tenamit.

22 Ut ke’wan xsak’ahileb’ chi numtajenaq, ut ke’loq’ok ut ke’k’ayin ut ke’yakok chirib’ileb’ rib’, re taaruuq te’k’uluq tumin.

23 Ut ke’k’anjelak rik’in li k’iila paay chi pek ch’iich’ xsa’, ut ke’xyiib’ li oor, ut li plaat, ut li saq ch’iich’, ut li ch’iich’ bronce, ut li k’iila paay chi ch’iich’, ut ke’xb’ek chaq chi ch’och’; jo’kan naq ke’xtuub’a li k’iila tuub’ chi ch’och’ re xtawb’al li pek ch’iich’ xsa’, re oor, ut re plaat, ut re saq ch’iich’, ut re kaqi ch’iich’. Ut ke’xk’anjela jar paay li k’a’ru k’anjelanb’il chi chaab’il.

24 Ut ke’wan xlemtz’ t’ikr, ut xq’unal t’ikr b’aqb’il chi chaab’il; ut ke’xk’anjela li k’iila paay chi t’ikr, re taaruuq te’xtiqib’ rib’ chiru xt’ust’uukilaleb’.

25 Ut ke’xyiib’ li k’iila paay chi k’anjeleb’aal re xk’anjelankil li ch’och’, re k’alek jo’ ajwi’ re awk, re q’olok ut re aq’ink, jo’ ajwi’ re xtenb’al li iyaj.

26 Ut ke’xyiib’ li k’iila paay chi k’anjeleb’aal li ke’xk’anjela wi’ lix xuleb’.

27 Ut ke’xyiib’ jar paay li k’anjeleb’aal re pleet. Ut ke’xk’anjela li k’iila paay chi k’anjel li q’axal moko nawb’il ta ru xk’anjelankil.

28 Ut maajun wa taaruuq chi wank junaq tenamit chi osob’tesinb’il wi’chik chiruheb’ a’an, ut chi k’eeb’ileb’ wi’chik chi usaak xb’aan ruq’ li Qaawa’. Ut ke’wan sa’ jun ch’och’ li sik’b’il ru sa’ xb’een chixjunil li ch’och’, xb’aan naq li Qaawa’ kiyehok chaq re.

29 Ut kik’ulman naq laj Lib kiwan xyu’am k’iila chihab’, ut ke’yo’la ralal ut xrab’in; ut kiyo’la ajwi’ laj Heartom choq’ ralal.

30 Ut kik’ulman naq laj Heartom ki’awa’b’ejin sa’ xna’aj lix yuwa’. Ut chirix naq ki’awa’b’ejin laj Heartom chiru kaahib’ xka’k’aal chihab’, k’ehomaq reetal, kimaq’e’ li awa’b’ejihom chiru. Ut a’an kik’anjelak k’iila chihab’ sa’ preexil, relik chi yaal, chixjunil rela’ lix kutan.

31 Ut kiyo’la laj Het choq’ ralal, ut laj Het kiwan chixjunil lix kutan sa’ preexil. Ut laj Het kiyo’la laj Aaron choq’ ralal, ut laj Aaron kiwan chixjunil lix kutan sa’ preexil; ut kiyo’la laj Amnigaddah choq’ ralal, ut laj Amnigaddah kiwan ajwi’ chixjunil lix kutan sa’ preexil; ut kiyo’la laj Koriantum choq’ ralal, ut laj Koriantum kiwan chixjunil lix kutan chi preexil; ut kiyo’la laj Kom choq’ ralal.

32 Ut kik’ulman naq laj Kom kixk’am lix yijach li awa’b’ejihom rik’in. Ut ki’awa’b’ejin sa’ xb’een lix yijach li awa’b’ejihom chiru wiib’ roxk’aal chihab’; ut kixpleeti li rey, aj Amgid, ut ke’pleetik chiru xnumik k’iila chihab’, ut chiruheb’ li chihab’ a’an laj Kom kixtaw xwankil sa’ xb’een laj Amgid, ut kixtaw xwankil sa’ xb’een rela’ li awa’b’ejihom.

33 Ut sa’ xkutankil laj Kom ke’ok chi wank aj elq’ sa’ li ch’och’; ut ke’xk’ulub’a li k’uub’anb’il na’leb’ re najter, ut ke’xk’anjela li xaqab’anb’il aatin jo’ chanruheb’ li najter winq, ut ke’xsik’ wi’chik xsachb’al li awa’b’ejihom.

34 Anajwan laj Kom kixpleetiheb’ chi naab’al; a’b’anan ink’a’ kinumta sa’ xb’eeneb’.